1 Tesalonika 3 - Kálara Zyɛ̌m Edwán é mpʉ̌n

¹ Mpʉ bɨh bé a baaka dihbe edi no e, bɨh bé a ka bee ó, bɨh bé ófuo liʼ wâʼ bɨh ome é nkana Atɛn,

² le elomlo bɨn Timote. Nye ó mɨɔ ga wina ndwe e syɛl mosa mo Zyɛm, mʉr bɨna e nɔɔ ndɨ é l'empomo e syɛɛ egwar lé elɛɛ Mbɨambɨa Lɔɔ mo Krɨst ɨ. Bɨh bé a lomo nye gʉʼ bɨn ye ó, nye lɨlɨ bɨn e buʼo, le esa ó, bɨn toʼ dolo lé ejyɛʼ taa buʼo yin boo Krɨst.

³ Mpʉ bʉr mu lé edwe bɨn mɨtuu e mɨndɛl é bananaʼ ɛ, bɨh bé a lomo nye ó, bɨn beʼ l'adimle buʼo, duho tɨ. Bɨn bʉr o tɨ, bɨn bé egʉa ó, bɨntɨʼa bɨnɨ, byé ó sa Zyɛm a bɛa tiile é leme we ó, nye ókab bɨna ga ɛ.

⁴ É jɔʼ bɨh bé a be paʼra win ɨ, bɨh bé a be ó lé elɛɛ-lɛɛ e bɨn ó, bɨna bé ótíilɔ. Yé nteme, yé a si pyal no, mpʉ bɨn lé egʉa ɛ.

⁵ Ebe no, é mpʉ me a baaka be e nkul edihbe e, yé ó me a fuo lomo Timote ó, nye ntaʼ gʉʼ bɨn ye, ó nye gʉŋa cye buʼo yin mu ɨ. Leme, wé a si kolo me é lɔb win, ó yʉʉ jɔʼ, mpʉ Satan lé eboblo bɨn ɨ, bɨn bé a si to gʉmla é yʉʉ bebebebe zi. Me a dɨ syɛl ba e bɨn, mɛm lé etoŋlo ó, syɛɛ bɨh bé a sea bɨn ye e, yi dwè ntuʼ.

⁶ No ó, banana, Timote lwanbe kʉ pyal bɨh wâ, lé eduho nko bɨn ndɨ ɨ, le mbɨambɨa mɨlɔɔ mpʉ bɨn ndɨ ejyɛʼ taa buʼo yin boo Krɨst, le ekpɛla ɛ. Nye elɛɛ nteme ó, bɨn bé etoŋlo bɨh bɨtoŋla bɨmpa, ndwe le elɛɛ nteme mpʉ bɨn lé egwɨm bee bɨh ɨ. Yé ó jwɨʼ gwar e gwar e mpʉ bɨh nteme lé egwɨm bee bɨn ɨ.

⁷ Ebe no, obɨɔ ga bam aa! Dam be mɨtuu le bɨntɨʼa bɨh lé edi tɨʼ tʉŋlʉ ɨ, buʼo yin, yi sa ó, bɨh soha, mɨleme fila si, ebe, bɨn bé ejyɛʼ taa buʼo yin boo Yesʉs.

⁸ É jɔʼ yi, bɨh mu ó si kʉ tiʼe, ebe, bɨn bé ecyɛb é nkʉʼʉ é zyɛŋa win boo Da Yesʉs.

⁹ Bɨh gʉŋa ó, bɨh dweʼ Zyɛm ekiba é lɔb win nyá ɛ? Bɨh mu ó lé esoho é mih mo Zyɛm é buobuo é lɔb win.

¹⁰ Moho e pum, bɨh bé elaŋle jwɨʼla e Zyɛm ó, bɨna bɛɛla ga mompom. Bɨh bé egwɨm ó, bɨh fwahla syɛɛ bɨh bé a taare sea bɨn ye e, ó buʼo yin, yé l'ayi luʼo ba.

¹¹ Bɨh bé ejwɨʼla e Zyɛm Sɔŋ ga wina nye mʉr tɨʼ bé e Tî ga wina Yesʉs ó, bé dibɨ bɨh zi ó, bɨh pyala gumo bɨn ndɨ ɨ.

¹² Da Yesʉs cyɛba bɨn é mɨleme, ó leme ncwɨncwɨa bɨn ndɨ e we e, wé nyinɨ. Nye saʼ nteme ó, bɨn kpɛlɨ nteme bʉr ofih é buobuo, kpɛl yaa, yé nkʉʼ bwaʼ. Yé syɛŋɨ no, bɨn kpɛlɨ be mpʉ bɨh lé ekpɛl bɨn ɨ.

¹³ Nye gbaʼ bɨn nkul é monyʉl ó, mɨleme min, myé diʼe é sɔɔɔ, alɨŋa ba, abe e mobe é jɔʼ bɨn bé ócyɛb é mih mo Zyɛm Sɔŋ ga wina ɛ. Diʼe ga no, to pyal é dobo Tî ga wina Yesʉs óbula ze, bé e mɨsaŋ beengles mye mimyɛh ɛ.