1 Tesalonika 2 - Kálara Zyɛ̌m Edwán é mpʉ̌n

Syɛɛ Pol a sea ɨ Tesalonika ɛ

¹ Obɨɔ ga bam aa! Bɨn bʉr o tɨ, bɨn bé egʉa ó, zea me a ze bee bɨn ɨ, wé a baabe mbɛh.

² Bɨn bé egʉa nteme mpʉ bɨh bé a sia e tuu le cere é nkana Filipi, bɨh l'apa pyal bɨn ye e. É jɔʼ bɨh bé a pyal bɨn ye e, Zyɛm Sɔŋ wih a sa ó, bɨh tʉmɨ monyʉl, ó bɨh lɛŋɨ bɨn Mbɨambɨa Lɔɔ mo Krɨst teme bʉr o ndɨ esa bɨh mongan ɨ.

³ É jɔʼ bɨh bé a baŋle bɨn ɨ, bɨh bé abe asyɛŋ mpaŋla waa e bɨgwìh, nkʉ e sa lé elœʼ mʉr é mih mo Zyɛm ɨ, nkʉ lé ecwɨɨ é mozi bɨkʉʉŋʉ.

⁴ Bɨh bé a lwib e bɨn ó, lé edu mpʉ Zyɛm lé ekpɛl ɨ. Nye a ntɨh bɨh Mbɨambɨa Lɔɔ we ó, bɨh lɛŋɨ bʉr wa. Bɨh bé a baasaa enyin mbɨmbɨa é mih mo bʉr, njɨ é mih mo Zyɛm, waa lé epahle mɨleme ga mina ɛ.

⁵ Bɨn bé egʉa nteme ó, bɨh bé a baabe lé ekʉa bɨn é zi moseʼla. Bɨh bé a baadwe bɨn sikʉlʉ yaa e bʉʉ otwɨɨtwɨɨ. Zyɛm, nye ó mboʼla wih é nko paʼ waa.

⁶ Bɨh bé a baabe lé esaa ó, nuu mʉr seʼla bɨh. Bɨh bé agwɨm moseʼla mɨn, nkʉ maa mo bʉʉ bʉr.

⁷ Bɨh bé a be yɛɛ ó, bɛm lɛʼle bɨn jwɨɨ yih, ebe, bɨh bé ó mɨlʉmlʉ mo Krɨst. To kœb ó, bɨh bé a nʉa bɨn ó, e mɨnjwɨr é cyɛʼ cyɛʼ, mpʉ abyɛɛ lé epoblo bwan be e.

⁸ Bɨh bé a be ó si bul kpɛl bɨn. Ebe no ó bɨh bé a lɛɛ bɨn njɨ Mbɨambɨa Lɔɔ ndɨ eduho boo Zyɛm ɨ, wé ome e. Bɨh bé a kʉ gwɨm ó, bɨn dira mɨnyɔm e bɨh nteme. Bɨh bé a be é bul bam e bɨn é mɨleme.

⁹ Obɨɔ ga bam aa! Bɨh bé a si kʉ sea bɨsyɛɛ bɨ nkul, mpʉ bɨn bʉr o tɨʼ lé egʉa ɛ. É jɔʼ yiyɛh bɨh bé a lɛɛ-lɛɛ bɨn Mbɨambɨa Lɔɔ ndɨ eduho boo Zyɛm ɨ, bɨh bé a be nteme ó, lé esea bɨsyɛɛ mobo, moho e pum. Bɨh bé a sa no ó, bɨh beʼ l'agba bɨn tuu é nyʉl lé enkɛɛ mbeʼ wih.

¹⁰ Bɨh bé a be paʼra win, obuʼla ó, e mɨleme é sɔɔɔ é mih mo Zyɛm, mpʉ bɨn boo Zyɛm nye mʉr tɨʼ ndɨ e nkul eboʼlo e. Bɨh bé a be nteme ó ocɨcyel o bʉr. Ebò e cyen lɨh, alɨŋa ba.

¹¹ Bɨn bé ekʉ gʉa nteme ó, bɨh bé a si cwɨa e mʉr nyiwɛh é l'esama lɨn mpʉ sɔŋ lé ecwɨa e bwan be e.

¹² Bɨh bé a si tɨe bɨn, le esa ó, bɨn tʉmɨ nyʉl ndwe le eboʼlo ó, bɨn bé ejala le ekœʼ ebò e cyen Zyɛm lé ekpɛl ó, bʉr kœʼœ œ. Tiʼa ga no, ebe, nye a jebe bɨn ó, bɨn niʼe é jwɨ̀ʼa ye, gumo kum we ndɨ epan ɨ.

¹³ Ebe no ó bɨh lé edwe Zyɛm ekiba é bɨjɔʼ bibyɛh ɛ, ebe, é jɔʼ bɨh bé a gwih bɨn mɨlɔb mo Zyɛm ɨ, bɨn bé a si mɛʼle mye. Bɨn bé a baamɛʼle mye mpʉ baambɛhambɛha mɨlɔɔ lé eduho é pɨʼ mo mamʉr ɨ. Bɨn bé a kʉ mɛʼle mye ó, mpʉ lɔɔ waa ndɨ ɨ: lɔɔ ndɨ eduho boo Zyɛm, waa mu lé esea é mɨleme mɨ obuʼla ɛ.

¹⁴ Obɨɔ ga bam aa! Bʉr o mɨmbɛr mɨ Zyɛm ndɨ é zyɛŋa wɔɔ boo Yesʉs-Krɨst, myaa ndɨ é lal Yʉda ɛ, bé a si sia e mɨtuu. Mɨtuu myaa, myé ó b'a kumo nteme e mbɛr Zyɛm win. Bɨn bɨ nʉa dweʼle tiʼ yɔɔ, ebe, bʉr o kul yin, bɨ tíile bɨn é mpʉ oYʉden bɛɛ lé ebɛa sa-sa obɨɔ bɔɔ ndɨ ejyɛʼ taa buʼo boo Yesʉs ɨ.

¹⁵ OYʉden baa ó b'a jʉ Da Yesʉs. Bé ó b'a taare jʉ ogwiha o mɨlɔb. Bé nteme ó b'a fo bɨh é lal wɔɔ. Bé ó bʉr Zyɛm lé ekʉ kpaa empime e be e. Bé elwimla ó, e bʉr bɨbɛh.

¹⁶ Bé ejɨ kamle bɨh lé eto le elɛɛ bɨkul bɨfih mpʉ Zyɛm ndɨ e nkul edwe be tiʼ molu mo mpoʼ mɨmɛh ɛ. É syɛɛla yaa, bé mu ó si loŋlo mɨsyem myɔɔ, bim Zyɛm a mɛʼle ó, bé saʼ ɛ. Bɨ gba Zyɛm empime é leme. No ó, banana, nyi ka kpaa empime e be.

Syɛɛ Timote a sea ɨ Tesalonika ɛ

¹⁷ Obɨɔ ga bam aa! É jɔʼ bɨna bé a bɔʼa lé ebɛɛla mompom ɨ, gʉŋa ga ó, yé a baabe e mpɔʼa mɨleme. Bɨh bé a si bul gwɨm bee bɨn. Mɨleme, myé a be ó bɨh é ntɨɨɨŋ ó, bɨh bâʼla pyal bɨn ye.

¹⁸ Bɨh bé a si bul gwɨm ze gʉʼ bɨn ye—mɛm Pol a si gwɨm sa no, laa jɔʼ gwar, to kœb ó, Satan a be ó lé ekamle bɨh lé esa no.

¹⁹ Ozé b'a loŋlo mɨleme mih e mbɛla wiʼ ɛ? Bɨsʉhʉ bɨh lé epa kʉ soho e, byé lé eduho é l'ozé ɛ? Yáa sɔʼɔ bɨh bé ólɛʼle Tî ga wina Yesʉs, yaa bɨh bé ódoʼo e ye e? É jɔʼ nye óze e, bɨn ó ngo sa ó, nye bœrɨ me epʉʼlʉ é lʉ é jɔʼ me ócyɛb é mih me e!

²⁰ Bɨh bé ekʉ jala le edoʼo e bɨn! Bɨn ó ndɨ egba bɨh bɨsʉhʉ é mɨleme.