1 Tesalonika 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol ó lé etile bɨn kalara nwa, bɨh e Silas ndwe e Timote. Bɨh bé etile ó, bʉr o mbɛr Zyɛm ndɨ ɨ Tesalonika ɛ. Bɨn bé ó baa mo Zyɛm Sɔŋ bé e Da Yesʉs-Krɨst. Mocyɛʼ mo mpom le motala, mé swɨŋɨ é bɨn.

Buʼo yin, e kpɛl yin ndwe e l'ebò e cyen lɨn

² Bɨh bé edwe Zyɛm ekiba é bɨjɔʼ bibyɛh é lɔb win, é jɔʼ bɨh lé esa nye mɨnjwɨʼla ɛ.

³ É mɨnjwɨʼla bɨh lé ejwɨʼla e Zyɛm Sɔŋ ga wina ɛ, bɨh bé etoŋlo syɛɛ bɨn bé a sea ebe buʼo yin ɨ. Yé a be nteme ó, e kpɛl bɨn lé ekpɛl Zyɛm ɨ. Bɨh bé etoŋlo nteme mɨtuu bɨn bé a sia e tíila ebe taa buʼo bɨn ndɨ ejyɛʼ boo Tî ga wina Yesʉs-Krɨst ɨ. Bɨh bé esa no ó, é mih mo Zyɛm Sɔŋ ga wina.

⁴ Obɨɔ ga bam, baa Zyɛm lé ekpɛl ɨ, bɨh bé egʉa ó, nyi pɛh bɨn, ó bɨn diʼe baa be,

⁵ ebe, é jɔʼ bɨh bé a lɛɛ bɨn Mbɨambɨa Lɔɔ ɛ, bɨn bé a baanʉa lɔɔ waa e l'epɨh. Yé ó, ebe, é jɔʼ gwar yaa, Zyɛm a si lɛʼle bɨn nkul nɨnɨ we tɨ. Sisim we, wé a si fulo nteme é bɨn. Bɨn bé a ka gʉa é jɔʼ yaa ó, lɔɔ waa, wé a kʉ be ó cyecye. Bɨn bé egʉa nteme mpʉ bɨna bé a be-be ga ɛ. Bɨh bé a tiʼe-tiʼe no ó, é l'efu le edi bɨn e nyɔm.

⁶ Bɨn ntɔʼ nʉa dweʼle tiʼ yih, le yaa mo Da Yesʉs. Bɨn bé a si buʼla lɔɔ Zyɛm, dam be é mɨtuu bɨn bé a sia e mye e. Mbɨambɨa Sisim a be ó si loŋlo mɨleme min e bɨsʉhʉ, dam be mɨtuu min myaa.

⁷ Ebe no ó obuʼla bɨbɛh ndɨ é mɨlal mɨ Masedwan ndwe e Akayi ɨ, bé mu ó lé egwɨm ó, mpa bé mu nteme ó lé enʉa dweʼle bɨtiʼ bin.

⁸ Lɔɔ lé etiibe e Da Yesʉs ɨ, bɨn ó b'a sa ó, wé myɛma, lé eto jaabe! É bɨgumo bibyɛh, bʉr, bé mu ó lé ejoʼo mpʉ bɨn lé ejyɛʼ taa buʼo yin boo Zyɛm ɨ. Lɔɔ waa, wé a baafiʼ é lal Masedwan, nkʉ é lal Akayi. Wé elaa naa. Bɨh bé aka bâʼle nʉa tuu mbɛh lé elɛɛ bʉr yʉʉ sɔʼɔ é lʉ win.

⁹ Bé ó lé elɛɛ bɨh bɛɛ mpʉ bɨn bé a soho bɨh é jɔʼ bɨh bé a ze gʉʼ bɨn ye e, e mpʉ bɨn bé a gwaʼ lé edwiibɨ bɨbaŋabaŋa bɨdweʼle e, lé eka du njɨ Zyɛm ɨ. Bɨn mu ó lé esea syɛɛ é l'efu e mpaŋ Zyɛm, waa ndɨ kublakubla ɛ.

¹⁰ Bé elɛɛ-lɛɛ nteme ó, bɨn mu ó lé ebono Mwan mo Zyɛm óduho é lal mo Zyɛm, waa nye a pɛ̀h é foo e. No, yé ó Yesʉs, waa ndɨ esyɛb bɨna ga é mɨtuu mɨ epihe é jɔʼ Zyɛm ókpaa empime e bʉʉ bʉr ɨ.