1 Pyɛr 4 - Kálara Zyɛ̌m Edwán é mpʉ̌n

Tiʼ mʉr mo Zyɛm

¹ Ebe no ó Krɨst a sia e mɨtuu é nko paʼ nyʉl ɨ. Bɨn bɛɛ, bé ejala le ebɛa bi mbi pɛhla ngwar we, ebe, mʉr mu si sia e mɨtuu é bɨpuno bye e, nyi gwaʼ lé eka sa syem.

² Mbi mʉr waa, wé óka tiʼe-tiʼe é si nwaʼ ó, njɨ lé eloŋlo gwɨma mo Zyɛm. É jɔʼ nye dina mʉr si nwaʼ ɛ, nye ákwoʼ ka loŋlo bɨgwɨma bɨ nyʉl bɨpuno.

³ Bʉr, bɨ bul lɛŋ buobuo jɔʼ lé eloŋlo bɨgwɨma bɨ nyʉl bɨpuno, lé edu ebò e cyen mo bʉr o ndɨ abe oYʉden ɨ. Byé ó bi: egba monyʉl mɔɔ lé esa bɨmala zam e l'ekomo, ebe e bɨgwɨma bɨsa, egba monyʉl lé ebɛble monwoʼ, elɔʼba lé ebwalɔ mozɔɔ, efwaʼ monwoʼ, le edwiibɨ bɨbaŋabaŋa bɨdweʼle. (Sa nɨ, yé ó sa ndɨ kɔmlʉ ɨ!) Bim syɛɛla nɨ, yé kaʼ jala!

⁴ Bʉr o ndɨ abuʼla onɨ, bé mu ó lé ekʉ jehe lé ebee ó, bɨn e boo nɔɔ, bé aka lɔʼba lé enyʉl monwoʼ, le edaʼre fwon é monyʉl mpʉ bɨn e boo nɔɔ, bé a sa-sa ɛ. Bé mu ó lé elwɨɨ bɨn tɨ.

⁵ Bé ófuʼla kar mɨlɔb myɔɔ é l'empom e dia tiʼà mɨlɔb mo Zyɛm. Jɔʼ nye óze tiʼe mɨkubla le odwè mɨlɔb ɨ, yé mu ó kunokuno le epyal.

⁶ Ebe no ó Mbɨambɨa Lɔɔ, wé a lɛɔ boo «odwè» e. Zyɛm a dwe be mobe cye yiyɛh bé a be, bé dina kʉ ɨ, é l'efu ó, é jɔʼ bé ódime mih mpʉ bʉr bɨbɛh lé edime mih ɨ, bé diʼe e mɨsisim mɨkublakubla, mpʉ Zyɛm ndɨ ɨ.

⁷ Efuʼla e bɨsa bibyɛh, lé mu ó kunokuno le epyal. Ebe no, pahla ga mɨlɔb mpʉ mɨpɨpɨʼ. Mɛrɨ ga mɨleme é l'efu ó, bɨn nkʉʼ gʉa sa mɨnjwɨʼla.

⁸ Sa efoʼ, yé ejala ó, bɨn kpɛla paʼra win kpɛl apurapura, ebe, kpɛl, yé esa ó, bɨna pɛʼɛ ga buobuo bɨbaa bɨna bé a dɨ niʼla paʼra ga wina é lɔb mɨsyem ɨ.

⁹ Dɨʼe bɨlan ga e bʉʉ obuʼla. Atʉʼra ga é jɔʼ bɨn lé esa no e.

¹⁰ Mpʉ mʉr nyiwɛh é l'esama ga lɨna a bi we mbi ndwɛa ɛ, nye bɨlana e ndwɛa we waa é l'efu le efuʼo bʉʉ bʉr o mbɛr Zyɛm win. Dɨʼe sa ga no, ebe, bɨn bé ó obɔʼlʉ o mɨlɔb mo Zyɛm, lé ekab bʉr mocyɛʼ mo mpom mo Zyɛm mɨmbi mɨmbi.

¹¹ ǃƗ mʉr si sa ó, nye pyɛl ó mokan nɛʼɛ, yé beʼ yɛɛ maa mé óntɛŋ bʉr mokan mo Zyɛm ɨ. Yé be ó, nye fuʼo ó bʉʉ bʉr nɛʼɛ, nye fuʼa be e nkul Zyɛm nye mʉr tɨʼ a ntɨh nye e. No ó Zyɛm ódwiibɔ é zyɛŋa ga wina boo Yesʉs-Krɨst ɨ. Kum e nkul, byé dweŋɔ nye, njʉmdia e njʉmdia. Amɛn.

¹² Obɨɔ o kpɛl bam aa! Atwɨra ga é jɔʼ bɨn mu lé esia e mobʉbla é nyan nyan ɨ. Mɨtuu myaa ó ndɨ epyal-pyal bɨna ga bɨbɛh.

¹³ Soha ga é buobuo, ebe, bɨn bɨ nʉa nkɔb é mɨtuu mo Krɨst. Ebe no ó bɨn bé óbe e buobuo bɨsʉhʉ é jɔʼ moncɛnba me, mé ónyin é kpɛŋlɛm ɨ.

¹⁴ Mocyɛʼ mo mpom e bɨn é jɔʼ bʉr lé elwɨɨ bɨn é lɔb mo Krɨst ɨ, ebe, Mbɨambɨa Sisim, Sisim kum, nye edi é bɨn é jɔʼ yaa.

¹⁵ Sa gwar, mʉr ngwar é l'esama lɨn beʼ l'abɔma e bɨntɨʼa ebe syɛɛla ebebe ye. Mʉr Mbɛr-Zyɛm, nye ambɨa, be njʉl bʉr, nkʉ zilngan, nkʉ nteme mʉr lé ekpɛl laʼ lʉ é bɨsa byoonkan ɨ.

¹⁶ Sa gwar, mʉr lé ebɔma e bɨntɨʼa ebe nye ndɨ kristen ɨ, nye l'ayi joʼo fwon ebe bɨntɨʼa byaa. Nye gumla njɨ Zyɛm, ebe, nyi mɛʼle ó, nye nkɛŋɨ die mo Krɨst.

¹⁷ É jɔʼ yi, etiʼ e mɨlɔb ga lɨna mu ó si pyal! Zyɛm, nyi taare lé etiʼe mɨlɔb ga mina, bʉr o Mbɛr-Zyɛm. Tiʼa mɨlɔb waa pa taare nyan é nko paʼ ga wina, bʉr be, a dwɛʼra e bʉr o ndɨ esa Mbɨambɨa Lɔɔ ndɨ eduho boo Zyɛm ɨ, ebɨh ɨ!

¹⁸ Ebe, yé ó tila ó: «Ocɨcyel o bʉr pa taare bee mokɔbla lé ebi tiʼ molu mo mpoʼ mɨmɛh, a dwɛʼra e bʉr o ndɨ adwaabe Zyɛm ɨ, ndwe bʉʉ osyɛl o mɨsyem ofih!»

¹⁹ Ebe no, baa Zyɛm a gwɨm ó, nye ntɨh be ó mɨtuu ɨ, bé ejala le etimle bé bʉr o tɨʼ é mobo mo Zyɛm Kwihbʉr, ndɨ mʉr ebuʼla ɛ. Bé òto dolo lé esa bɨsyɛɛla bɨ ncwɨncwɨa.