1 Pyɛr 3 - Kálara Zyɛ̌m Edwán é mpʉ̌n

¹ Bɨn bʉba ɛɛ! Saʼ ga ojʉm bɨn mojoʼo. ǃƗ nuu mʉr é sama bʉrʉm baa si sa lɔɔ Zyɛm ebɨh nɛʼɛ, nye óbana buʼla yɛɛ ebe mbɨambɨa ebò e cyen myɛl lé ekœʼ œ. Yé aŋa jɨ é nko paʼ mʉma nɨ ó, nye lɛŋɨ njʉm lʉʉ ekan,

² ebe, ojʉm bɔɔ baa, bé óbee mpʉ bɨn lé edwaabe Zyɛm ɨ. Bé óbee ebò e cyen bɨn ndɨ ekœʼ é pememe e.

³ Ojaa go, wé l'ayi duho njɨ é mbi pena mʉma lé epene lʉ ɨ, nkʉ é mbi mbwara nye lé ebwar mokɔm mo gol ɨ, nkʉ é mbi mompor nye lé ebwar ɨ.

⁴ Laa ó, ojaa win, wé diʼe no, fuo gba ga yɛɛ ojaa é leme tʉŋlʉ. Ojaa waa, wé abe e nkul esie. Leme win diʼe é pyɛɛɛ. Diʼe ga é tala njwɨr. Ojaa waa, wé é buo dime é mih mo Zyɛm.

⁵ Molu pihe, bʉba bé a be mɨsaŋ é mih mo Zyɛm ɨ, mɨleme myɔɔ, myé a be ó lwɨŋla e mbɛla é nko paʼ mo Zyɛm. Bé ntɔʼ gba mpaŋ ojaa waa é monyʉl mɔɔ tʉŋlʉ. Bé a dɨ sa ojʉm bɔɔ ó, njɨ mojoʼo.

⁶ Diʼe ga mpʉ mo Sara. Nye a si sa Abraham mojoʼo, jebe-jebe nye ó, Da! No ó, diʼe ga mɨsile mo Sara lé esa bɨsyɛɛla bɨ ncwɨncwɨa, le epɛʼ bʉa é mɨleme min.

⁷ Bɨn bɛɛ ojʉm, jyeʼla ga bʉba bɨn ndwe le edwe be duu, ebe, bɨn bé egʉa mpʉ bé ndɨ é cyɛʼ ɛ. Bé ejala le ebi tiʼ molu mo mpoʼ mɨmɛh mpʉ bɨn bɛɛ. ǃBɨn si be, asa no nɛʼɛ, yé ógba bɨn mokɔbla é mɨnjwɨʼla.

Esia e mɨtuu, lé esa sa ndɨ cɨcyel ɨ

⁸ Sa epihe, yé ó nɛɛ: diʼe ga e mbi pɛhla ngwar. Joʼa ga njwɨʼa-nkoo ngwar. Kpɛla ga paʼra win kpɛl obuʼla. Lɛʼla ga kpɛl ndɨ eduho é leme tʉŋlʉ ɨ. Filɨ ga monyʉl si paʼra win.

⁹ Mʉr beʼ l'abala ebebe e l'ebebe. Laa ó, go bala molwɨɨ go lwɨɔ ɛ, fuo sʉ yɛɛ baanya-molwɨɨ mocyɛʼ mo mpom. Zyɛm a jebe bɨn ó, bɨn saʼ no, bɨn nkʉʼ sʉŋɔ nkɔb é mocyɛʼ mo mpom nye lé esʉ bʉr be e.

¹⁰ Ebe, yé ó tila ó: «Mʉr nyiwɛh lé egwɨm tiʼe mbɨmbɨa ndwe le ebee molu mo embɨa ɛ, nye beʼ l'alɛɛ sa ndɨ é bebe e. Nye gwaʼa bɨlwib bɨkʉʉŋʉ.

¹¹ Nye gwɨma ebebe nye a dɨ sa ɛ, le edwir leme. Nye dɨʼe sa njɨ embɨa. Nye saŋa zi edi é motala paʼra bʉr e bʉr, le ekœʼ nteme tɨ.

¹² Ebe, mih mo Da, mé edwɛʼ-dwɛʼ ó, njɨ baa ndɨ ocɨcyel ɨ. Nye ejoʼlo ó mɨnjwɨʼla myɔɔ. Nye epem ó baa bɨbɛh lé esa ebebe e.»

¹³ Zé a ngbaa sa bɨn cere é jɔʼ mɨleme, myé ó bɨn é ntɨɨɨŋ ó, bɨn saʼ embɨa ɛ?

¹⁴ ǃBɨn si sia yɛɛ e mɨtuu ebe mɨmpaŋ bɨsyɛɛla bɨn lé esa nɛʼɛ, Zyɛm ósʉ bɨn mocyɛʼ mo mpom tɨ. Ajoʼo ga bʉa e bʉr. Mɨleme beʼ l'akolo bɨn tɨ.

¹⁵ É mɨleme min tʉŋlʉ, cyelɨ ga Krɨst é dia ndɨ ti ɨ, lé elɛʼle ó, nye ó kʉ be tî win. ǃƗ mʉr si dî bɨn tia é lɔb sa lé egba bɨn mbɛla é mɨleme nɛʼɛ, bɨn bé òkpahbe bɨha nye tia waa.

¹⁶ Saʼ ga no e njwɨr é tala tala, lé edwaabe bʉr o lé edî no e. Mɨpɛhla mɨleme min, myé diʼe njɨ myaa ndɨ é pyɛɛɛ ɛ. ǃƗ bʉr ka fœʼ bɨn, bɨn yɛɛ lé ekœʼ mbɨambɨa ebò e cyen é Krɨst nɛʼɛ, bé ófuʼla ka bil fwon ebe movoʼ bé a fœʼ bɨn ɨ.

¹⁷ ǃƗ Zyɛm si gwɨm ó, nye kab ó go tuu nɛʼɛ, yé é bul mbɨa é nko paʼ go ó, go sia e tuu waa, duho é bɨsyɛɛla bɨ ncwɨncwɨa byo, byaa bʉr lé ebene e, abe ó, go sia e tuu waa duho é yʉʉ syɛɛla ebebe yo e.

¹⁸ Ebe, Krɨst nye mʉr tɨʼ a si dwè jɔʼ gwar é bɨjɔʼ bibyɛh, é lɔb mɨsyem min. Cɨcyel mʉr waa a bana jala ó e l'ozyɛhozyɛh o bʉr, lé esaa ó, nye pyala e bɨna ga é mih mo Zyɛm. Nye a si jʉŋɔ é nko paʼ nyʉl we, nye ze tiʼe pie tɨʼ ebe nkul mo Mbɨambɨa Sisim.

¹⁹ É nyʉl sisim we ó nye a to lɛɛ lɔɔ mpa boo mɨsisim myé a be mɨmbʉʼ ɨ.

²⁰ Molu pihe, bé a taare be-be ó, bʉr o pyeh, lé esa lɔɔ Zyɛm ebɨh. É til molu yaa, Zyɛm a bono-bono ó e bihbe, to pyal é jɔʼ Noe a sil kpaʼ ntwaŋ byɛl ɨ. É til molu yaa yiyɛh, yé a kʉ be ó njɨ ma dœh e bʉr, agum buo, njɨ bʉr mwom, ó b'a tiʼe é byɛl waa tʉŋlʉ ɨ. Bé a tiʼe ó, gumo bé a ngbaa dwè é modibe e.

²¹ Modibe maa, mé edweʼle ó, ndubo mu lé edwe bɨn tiʼ é bananaʼ ɛ. Wé esa no ó, ebe, wé ó gwɨma bɨna lé egwɨm ga ɛ, ó Zyɛm puba bɨna ga, to pyal é mɨleme ga mina tʉŋlʉ, ó mɨpɛhla mɨ tɨʼ nkʉʼ di é pyɛɛɛ. Nye epubo bɨna ga mɨleme myaa ó, ebe pɛ̀ha foo mo Yesʉs-Krɨst. Ndubo ga wina, wé atiʼ bɨna ga ebe mobomo wé lé epɛʼ é nyʉl ɨ.

²² Nye a si bere é jobo kʉ. Nye mu ó é mbo ejʉm mo Zyɛm Sɔŋ, gumo nye lé ejwɨʼ beengles, le mɨsisim ndɨ e mojwɨ̀ʼa ndwe e myaa ndɨ e nkul ɨ.