1 Pyɛr 2 - Kálara Zyɛ̌m Edwán é mpʉ̌n

¹ Ebe no, myaha ga bɨsyɛɛla biʼ bibyɛh: bɨn, e bɨlwib bɨkʉʉŋʉ, e bɨlwib bɨba bɨba, e zii ndwe e mɨmbi movoʼ mimyɛh.

² Gwɨmɨ ga ó, bɨn jwɨʼɨ mɨmpaŋ mɨyeʼla, myaa ndɨ ejala e bɨn ɨ. Myé ó ngo sa ó, bɨn gwɨa é zi we, bɨn ntɔʼ bi tiʼ molu mo mpoʼ mɨmɛh. Saʼ ga no mpʉ bɨcyee ndɨ egwɨm monyaŋ ɨ,

³ ebe, «Bɨn mu ó lé egʉa Da, gʉa nteme ó, nye é mbɨa.»

Kublakubla ekoʼ ndwe e mɨpɛha mɨ bʉr mo Zyɛm

⁴ Dihla ga be kunokuno e mʉr ndɨ kublakubla ekoʼ, laa bʉr, bé a pyeh ɨ. Zyɛm nyɛɛ a si pɛh nye, ebe, nye a bee nye ó, mpʉ sa ndɨ é bul buo dime e.

⁵ Zyɛm, nye efumo mbɛr, waa Sisim mo Zyɛm ódi tɨʼ ɨ. Diʼe ga mokoʼ mo mbɛr waa, maa lé etiʼe é mih mo Zyɛm, maa lé ebɨrɔ tɨʼ é fumo waa ɛ. Bɨn bé ófuʼla mɨsaŋ mɨ opara é mih mo Zyɛm. Motwina bɨn bé ódwe nye é zi Sisim we e, nye óbee me mbɨmbɨa ó, dumo e Yesʉs-Krɨst.

⁶ Ebe, yé ó tila é Kalara Zyɛm ó: «Me a be ó si pɛh ekoʼ ndɨ é buo dime e. Lé ó me a komo é nkana Sion ɨ. Lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ. Waa nyiwɛh ójyɛʼ taa buʼo ye boo nye e, nye ákwoʼ ka bil fwon.»

⁷ Bɨn bʉr o ndɨ e buʼo yaa ba ɔɔ! Bɨn mu ó lé ebi kum lé eduho boo Zyɛm ɨ. Baa ndɨ abe e buʼo e, bɛɛ, bé ebee nye ó, mpʉ «Ekoʼ ofim o mbɛr bé a pyeh ɨ, lé mu ó ekoʼ lé esa ó bɨpab bɨ mbɛr, byé diʼe ocɨcyel ɨ.»

⁸ Yé ó tila é Kalara Zyɛm, tiibe e Krɨst ó: «Nye ó ekoʼ lé ódumo bʉr ɨ. Lé ó ebɔʼ bé óbɨm é mɨleme e.» Bé ekʉ duma, ebe, bé esa lɔɔ Zyɛm ebɨh. Yé ó nkɔb Zyɛm a bɛa tiʼe é leme we ó, bé óbi ɨ.

⁹ Sa gwar, bɨn bé ó bʉr nye a bɛa pɛh ó, bɨn diʼe nye opara le kul bʉr ndɨ ti ɨ. Bɨn bé ó kul bʉr ndɨ yaa ye e, é l'efu ó, bɨn gumla mbɨambɨa njwɨr mo Mʉr a jebe bɨn ɨ. Njɨblɨ we waa, wé ó b'a dwih bɨn é l'edurʉ, cen bɨn é myɛn ndɨ é nge-ngɨ-nge e.

¹⁰ Molu pihe, bɨn bé a baabe kul bʉr ye. No ó, banana, bɨn mu ó kul bʉr ndɨ yaa mo Zyɛm ɨ! Molu pihe, abe e mʉr a jwɨʼ bɨn nkoo. No ó, banana, Zyɛm nye mʉr tɨ, nyi kʉ jwɨʼ bɨn nkoo!

¹¹ Obɨɔ o kpɛl bam aa! Me ejwɨʼla e bɨn ó, bɨn diʼe mpʉ mɨndìndìl ndwe mɨngbaalaŋa é mɨlal mɨ si nwa. Diʼe ga é l'ecyooŋʉ, lé esyɛhle lɔb esa bɨsyɛɛla bɨpuno bin lé egwɨm, byaa ndɨ elwimla e mɨsisim min ɨ.

¹² Kœʼœ ga mbɨambɨa ebò e cyen teme bʉr o ndɨ abuʼla ɛ. Bé dam fœʼ bɨn, bé óbana ka bee mɨmpaŋ bɨsyɛɛla bɨn lé esa-sa ɛ, ntɔʼ láa bɨn bɨbaa bɨ embɨa tɨʼ é dobo Zyɛm óbâʼle ze bee bɨna ga e boo nɔɔ ɛ.

Esa mɨnjwɨɨbʉr mojoʼo

¹³ Filɨ ga monyʉl si e njwɨɨ lal nyiwɛh ebe kum bɨn lé edwe Da ɛ. Saʼ ga njwɨɨbʉr win mojoʼo, ebe, wé ó ndɨ e nkul mojwɨ̀ʼa.

¹⁴ Saʼ ga ongoman nye ólomlo bɨn ɨ, mojoʼo. Bé ó ndɨ bʉr o ndɨ ejala le edwe bɨbɨbla bɨ bʉr bibyɛh bɨntɨʼa ɛ. Bé nteme ó ngo gumlo baa lé esa bɨsyɛɛla bɨ ncwɨncwɨa ɛ.

¹⁵ Sa Zyɛm lé egwɨm é win paʼ, yé ó: bɨn cwɨa e bʉr, bɨgʉ nkʉʼ di é jwɨm, aka lwib sa ndɨ asiŋa ɛ.

¹⁶ Zyɛm a sa ó, bɨn diʼe é dia otî. É dia otî yin yaa, yé ajala le efuʼla sa bɨn buuro ebɨ-leme lɨn e tɨʼ ɨ. Kœʼœ ga ebò e cyen lé elɛʼle mpʉ bɨn ndɨ molʉa mo Zyɛm ɨ.

¹⁷ Dwaaba ga bʉr bɨbɛh. Kpɛlɨ ga obuʼla o Mbɛr-Zyɛm. Dwaaba ga Zyɛm. Dwaaba ga mʉr lal ga wina kɛɛza.

¹⁸ Bɨn molʉa ɛɛ! Saʼ ga omasa bɨn mojoʼo e duu yiyɛh. Bɨn bé ejala le edwaabe omasa bɨbɛh, abe njɨ baa ndɨ é tala njwɨr ndwe e baa ndɨ ecwɨa e bɨn ɨ. Dwaaba ga nteme baa lé ebâm e bɨn ɨ.

¹⁹ ǃBé si dwe mʉr mobe mo mpene, ntɔʼ kab mʉr waa bɨntɨʼa tɨʼ nɛʼɛ, ǃɨ mʉr waa si sia e bɨntɨʼa byaa ebe nye lé edwaabe Zyɛm nɛʼɛ, nye ósʉŋɔ mocyɛʼ mo mpom mo Zyɛm.

²⁰ ǃBɨn si sa syem, bɨn ntɔʼ dihbe ebiʼe nɛʼɛ, ebe yé bɨn lé enkɛɛ monyʉl ó, bʉr seʼla bɨn ɨ? To kœb ó, bɨn bé ósʉŋɔ mocyɛʼ mo mpom mo Zyɛm é jɔʼ bɨn bé ócwɨa e bʉr, bɨn ntɔʼ sia e bɨntɨʼa le bihbe e.

²¹ Zyɛm a jebe bɨn ó, bɨn saʼ nye syɛɛla yaa, ebe, Krɨst nye mʉr tɨʼ a si sia e mɨtuu é l'efu e nyɔm win. Nye a lɛʼle bɨn tɨʼ ó, dweʼle bɨn lé ejala le edu ɨ. Nye a sa no ó, bɨn nkʉʼ du mobò me. Yé ó tila ó:

²² «Nye a baasa syem. Nʉm we, wé a baapyɛl bɨlwib bɨkʉʉŋʉ.»

²³ É jɔʼ bé a lwɨɨ-lwɨɨ nye e, nye a baabala molwɨɨ maa. É jɔʼ nye a sia e mɨtuu ɨ, nye a baabɛŋ bʉr o dɔm be. Nye a kʉ ka sa ó njɨ nʉa tiʼ ye, timle Zyɛm ya, nyɛɛ mʉr lé etiʼe mɨlɔb é l'ocɨcyel ɨ.

²⁴ Krɨst nye mʉr tɨʼ a si nkɛɛ mɨsyem ga mina é nyʉl we, ntɔʼ dwè é klos. Nye a sa no ó, bɨna dwèʼ ga é nko paʼ mo Syem, bɨna nkʉʼ kœʼ ga ebò e cyen ndɨ cɨcyel ɨ. Bɨna bé a be ga ó mɨsyoblʉ. Bɨna ntɔʼ ka tiʼe ga ebe mopɨɨ me,

²⁵ ebe, bɨn bé a be-be ó, mpʉ bɨntœme byé a pɔhba ɛ. No ó, banana, bɨn bɨ ze fiʼ, to kœb Kobla bɨntœme. Nye nteme ó ndɨ Mbɔʼlʉ mɨsisim min.