1 Korɛnt 9 - Kálara Zyɛ̌m Edwán é mpʉ̌n

Nkul mojwɨ̀ʼa mo lʉmlʉ mo Yesʉs-Krɨst

¹ Zê me abe mʉr ndɨ é dia otî ɨ? Ntʉʼ me ndɨ lʉmlʉ mo Krɨst ɛ? Zê me a baasi bee Da Yesʉs ɛ? Ntʉʼ bɨn ndɨ mpumo a gumo, duho é syɛɛ me a sea é zi Tî ga wina ɛ?

² ǃƗ bʉr ofih si kɛla ó, me abe lʉmlʉ mo Krɨst nɛʼɛ, gʉŋa ga ó, me ó kʉ be lʉmlʉ we cyecye é nko paʼ win! Mpʉ bɨn mu é zyɛŋa win boo Da Yesʉs ɨ, bɨn mu ó dweʼle, sa ndɨ elɛʼle ó, me a si sea syɛɛ lʉmlʉ mo Krɨst.

³ Bɨn bʉr o ndɨ ebee ó, bɨn bé e nkul elwib lɔb wam ɨ, mbi me lé ekomo nkar si ɨ, wé ó wi:

⁴ Bé dɨʼe dwe bɨh mode e monwoʼ. Mode monɨ, mé ó dɔɔ.

⁵ Bɨh e Barnabas, bɨh bé ejʉʼa ó, bɨh beʼ e bʉba ndɨ okristen ɨ, é jɔʼ bɨh bé óto é bɨcyen bih ɨ. Ntʉʼ syɛɛla yaa mɨlʉmlʉ mɨfih bé e l'obɨɔ mo Da ndwe e Sefas nye mʉr tɨʼ lé ebɛa sa-sa ɛ?

⁶ Myʉʉ mɨlʉmlʉ, mi dweŋɔ nkul ó, bé filɨ mobo si, aka sea bɨsyɛɛ. Zê bɨh e Barnabas bé ome ó b'a baadweŋɔ nkul waa ɛ?

⁷ Wáa mʉr bɨzima ndɨ esea syɛɛ bɨzima, nyɛɛ lé ejɛna nye mʉr tɨʼ mɔn ngɔn ɨ? Wáa mbèl motin mo orezɛŋ ndɨ ebè peme, ntɔʼ tìne mpumo ndɨ eka cyèl é motin maa ɛ? Wáa mʉr ndɨ ekoblo daa e bɨntœme mo nuu mʉr, ndɨ anʉa modibe monyaŋ, de me e? Yé abe e mʉr!

⁸ Atoŋlo ga ó, mɨnkar myam, myé ebɔma ó, njɨ e myaa mɨ bʉr, ebe, lɔɔ ngwar me lé elɛɛ ɛ, wé ó tila nteme é motie mo Moyiz.

⁹ Yé ó mpʉ yé ndɨ tila é motie mo Moyiz ɨ. Yé ó tila ó: «É jɔʼ ntɛɛ mu lé esea syɛɛ epɛʼ mɨlœla e mpʉn ɨ, apɨr ntɛɛ nʉm ó, yé l'ayi de.» Zê Zyɛm, nye elɛɛ no ebe nkʉnkoo nye ejoʼo bɨntɛɛ ɛ?

¹⁰ Zê nye a baalwib no é l'efu lɨh ɛ? É l'ocyecye, lwib yaa, yé a kʉ tilɔ ó, é l'efu lɨh! Yé ejala ó, mbèl mompœʼ bé e waa ólwal ɨ, bɨbɛh, bé sea ó, e mbɛla é mɨleme, ó bé óbi nkɔb mpumo wɔɔ.

¹¹ Bɨh o b'a sea é l'esama lɨn, mɨsisim min ntɔʼ dira nyɔm e syɛɛ yih yaa. Zê yé ó bwaʼbwaʼ sɔʼɔ ó, bɨh tœbɨ mobi mɨn ɛ?

¹² Bʉʉ bʉr pa taare be e nkul esa syɛɛla yaa é l'esama lɨn, a dwɛʼra e bɨh bɛɛ! Bɨh ó ndɨ e nkul ngwar waa é buobuo. To kœb ó, bɨh bé a baadira nyɔm e nkul waa. Bɨh bé edihbe sa yiyɛh ó, lé ekpɛɛ ó, bɨh bé amu jaa gba bʉʉ bʉr mokɔbla é zi, bé l'aka koʼo lé ebuʼla Mbɨambɨa Lɔɔ mo Krɨst.

¹³ Zê bɨn bé agʉa ó, opara ndɨ esea é Mpah Zyɛm ɨ, bé ebi sa ede yɔɔ tɨʼ ɛ? Zê bɨn bé lé ejeʼe ó, baa ndɨ ediʼ otir tɔɔ motwina ɛ, bé edwe Zyɛm ma é taa mɨndwɛa ye? Bé ede nuu nkɔb motwina maa, jala e nkɔb wɔɔ.

¹⁴ É mbi waa ó Da Yesʉs a bɛa lɛɛ ɛ. Nye a lomo bʉr o ndɨ elɛɛ Mbɨambɨa Lɔɔ ó, bé biʼe tiʼ yɔɔ e we.

¹⁵ Sa gwar, mɛm, me apa dira ba nyɔm e sa gwar me a jala le ebi ɨ. Me nteme, me atile bɨn mɨlɔb miʼ ó, me nkʉʼ taare lé edira nyɔm waa e bɨn. Yé a ngbaa bul mbɨa me ó, me dwèʼ, abe ó, bɨn jɛna me syɛɛ yaa. Nkʉ mʉr a be ó be, jɛna me syɛɛ yam bɨn ye nɛʼɛ, mpa mɨ fib zi lé edoʼo e syɛɛ yam!

¹⁶ Mpʉ me lé elɛɛ Mbɨambɨa Lɔɔ ɛ, me abe lé esa no ó, me óbi zi lé edoʼo tɨ, ebe, me é mpila ó, me lɛŋɨ we. A vwaʼ e me, nkʉ me alɛɛ lɔɔ waa.

¹⁷ Nkʉ me a be ó be, pɛh syɛɛ elɛɛ lɔɔ waa nɛʼɛ, mpa yé ó syɛɛ me lé ebono myɛna e tɨʼ ɨ. No ó, é mpʉ yé ndɨ ó, me a lomɔ ó loma, agban gbana syɛɛ yaa ɛ, me ekʉ lɛɛ lɔɔ we ó, é l'efu le eloŋlo syɛɛ me a timlɔ ɛ.

¹⁸ No ó, myɛna mam, mé yé? Mé ó, me lɛŋɨ Mbɨambɨa Lɔɔ edwɛna. Me dam be lé elɛɛ Mbɨambɨa Lɔɔ, me apa dira nyɔm e nkul mojwɨ̀ʼa wam me ndɨ e nye e.

¹⁹ Me dam be mʉr ndɨ é dia otî ɨ, me a si bana dwir me mʉr tɨʼ elʉa é nko paʼ mo mʉr nyiwɛh, ó me gʉa sea e nye. Yé eduho é gwɨma ó, me dula bʉr é buobuo.

²⁰ É jɔʼ me ndɨ esyɛŋa zi e l'oYʉden ɨ, me ekʉ nwɨɨla ó, e l'oYʉden, ó me dula be. Me dam be, abe é monkara mo mɛra motie, é jɔʼ me lé esyɛŋa zi e bʉr o ndɨ é nkara waa ɛ, me mu ó lé enwɨɨla ó, e waa ndɨ é nkara waa ɛ. Me esa no ó, me dula baa dina é nkara waa ɛ.

²¹ É jɔʼ me ndɨ esyɛŋa zi e bʉr o ndɨ adu motie mo Moyiz ɨ, bɨh e boo nɔɔ, bé e l'ebò e cyen egwar. Yé anwɨɨla ó, me ó é monkara mo mɛra motie. Me esa no ó, me nkʉʼ dulo bʉr o bɨkul bɨfih onɨ. É l'ocyecye, me agwɨm dwih nyʉl wam é nkara motie mo Zyɛm, ebe, me ó é nkara mo Krɨst.

²² É jɔʼ me ndɨ esyɛŋa zi e bʉr l'apa nʉa pim é buʼo e, me enwɨɨla ó, mpʉ bʉr l'apa nʉa pim é buʼo e. Me esa no ó, me nkʉʼ dulo be. Me esaa enwɨɨla e mɨmbi mɨ bʉr mimyɛh é l'efu le etiʼ bʉʉ bʉr.

²³ Me esa bɨsyɛɛla byaa bibyɛh ó, é l'efu le elɛɛ Mbɨambɨa Lɔɔ. Me esa no nteme ó, me nkʉʼ bi mombɨa mo tɨ, jala e nkɔb wam.

²⁴ Zê bɨn bé agʉa ó, yé é buo ofima é jwɨʼla mɨkam mokʉ ɛ? Ntʉʼ bʉr bɨbɛh lé epaʼlɔ mompɔʼ, njɨ mʉr ngwar. No ó, fimɨ ga, bɨn gaʼ, bi mompɔʼ!

²⁵ Bʉr o ndɨ efwɛmla ɛ, bé emɛr mɨleme é mɨlɔb é buobuo é l'efu ó, bé ntaŋa, bœrɔ mopʉʼlʉ ndɨ elaa mpʉ ngul mpaa ɛ. No ó, bɨna bɛɛ, bé esaa ga ó, bɨna biʼe ga myɛna mé ódi njʉmdia e njʉmdia ɛ.

²⁶ No nteme ó me ndɨ efim ɨ. Mih mam, mé ekʉ ka dwɛʼ ó njɨ fum bé a tulo njɨ kam ɨ. No nteme ó me ndɨ mpʉ mpaŋ ŋmɛha bɨkura ɛ. Me aŋmɛh bɨŋmɛhŋmɛh.

²⁷ Me ejwɨʼ nyʉl wam é buobuo. Me egba nye é dia olʉa. Me amu jaa fib mompɔʼ, mɛm, mʉr a bɛa lɛɛ bʉr Mbɨambɨa Lɔɔ ɛ.