1 Korɛnt 8 - Kálara Zyɛ̌m Edwán é mpʉ̌n

Tir bé lé ebɛma, a taare bàŋɔ é mpah bé ndɨ edwiibɨ ozyɛm bé a dɨ kpaʼ ɛ,

¹ Banana, bɨna kaʼ pahle ga lɔb tir lé ebàŋɔ é mpah bé ndɨ edwiibɨ ozyɛm bé a dɨ kpaʼ ɛ. Bɨna ga bɨbɛh, bé é bul gʉa no, kʉ be mpʉ bɨn lé elɛɛ ɛ. To kœb ó, ngwɨa, wé edwe mʉr ó njɨ nkɛa nyʉl. Kpɛl ó ndɨ esa ó bʉr o mbɛr Zyɛm gwɨa mbɨmbɨa.

² Mʉr ndɨ ejwɨʼ ó, nye si gʉa sɔʼɔ ɛ, nye apa gʉa bim lé ejala ó, nye gʉŋa ɛ.

³ Mʉr ndɨ ekpɛl Zyɛm ɨ, nye ó ndɨ waa Zyɛm lé egʉa ɛ.

⁴ No ó, é lɔb ndɨa tir a pa bàŋɔ é mpah bé ndɨ edwiibɨ bɨbaŋabaŋa bɨdweʼle e, me bɨha bɨn ó, é mbi wi. Bɨna bé ekʉ gʉa ga ó, é jɔʼ okpɔʼ ndɨ edweʼle sa bé lé edwiibɨ no e, yé alɛɛ ó, sa bé a dweʼle e, yé ó kʉ be tɨʼ é l'ocyecye. Bɨna bé egʉa ga ó, Zyɛm, nye ó njɨ ngwar.

⁵ Yé e bɨsɔʼɔ mobeʼe lé ejebɔ ó, ozyɛm, nkʉ ojwɨʼa ɛ. Yé dam be e byʉʉ bɨsa lé ejebɔ ó, ozyɛm é jobo kʉ, nkʉ é si nwaʼ ɛ,

⁶ é mbea ga wina, bɨna ga bé ó njɨ e Zyɛm ngwar, waa ndɨ Sɔŋ ga wina ɛ. Nye ó b'a cye sa yiyɛh. Bɨtiʼ ga bina, byé ekʉ dwɛʼ ó njɨ nye e nye. Yé nteme, yé ó njɨ Tî ngwar, Yesʉs-Krɨst. Sa yiyɛh, yé a cyeŋɔ ó, é zi we. Bɨna bé etiʼe ga ó, é zi we.

⁷ Sa gwar, ntʉʼ bʉr bɨbɛh lé egʉa ocyecye waa. Bʉʉ bʉr, bɨ bɛa jyɛnba é nko paʼ bɨbaŋabaŋa bɨdweʼle bé ndɨ edwiibɨ ɨ. Ze pyal é banana, é jɔʼ bɨha bʉr bé lé ede tir waa ɛ, bɛɛ, bé etoŋlo é jɔʼ yiyɛh mpʉ tir bɨn lé ede e, a be si bàŋɔ é mpah bé ndɨ edwiibɨ bɨbaŋabaŋa bɨdweʼle e. Mbea wɔɔ, wé ó edɨɨ e tir waa, lé ó sa yé ólœʼ be é mih mo Zyɛm ɨ.

⁸ Bɨna bɛɛ, bé ekʉ gʉa ga ó, ntʉʼ sa ede, yé ócen mʉr kunokuno e Zyɛm. ǃBɨna si be ga ade tir nɛʼɛ, bɨna bé adimle ga sɔʼɔ. Bɨna nteme, bé aŋa kɛlɔ ga yʉʉ sɔʼɔ kʉ, nkʉ bɨna bé óde ga tir.

⁹ Syɛɛla bɨn ndɨ e nkul esa, antaa yɛɛ etie e, yé óbɛm be nteme ebɔʼ bɨn ndɨ ekol nuu mʉr, laa lé ódumo nye e. No ó, kanba ga lé esa syɛɛla yaa.

¹⁰ Gwɔɔ mʉr ndɨ elɛɛ ó, go é bul gʉa ɛ, ǃgo si to de tir a bàŋɔ é mpah bé ndɨ edwiibɨ ozyɛm bé a dɨ kpaʼ nɛʼɛ, go amu jaa sa syɛɛla yaa, nuu mʉr ntɔʼ baŋa ye, dam be ó, leme we, wé ó njɨ lé edwe nye mobe tɨ.

¹¹ Mʉr ndɨ e mɨpɛhla é leme nɨ, nye ó ndɨ mɨɔ ga wina Krɨst a dwè é l'efu le e. Nye ajala le edwè é lɔb sa go lé ejebe ó, «mpaŋ ngwɨa» ɛ.

¹² É jɔʼ bɨn lé esa syem é mih mo obuʼla, le egba ecyɛʼ é monyʉl mo bʉr o l'apa lele buʼo e, bɨn bé ekʉ sa syem naa ó, é nko paʼ mo Krɨst!

¹³ Yé be ó, yʉʉ doʼ, yé ó ebɔʼ mɨɔ wam ndɨ e nkul ebɨm, laa lé ódumo nye nɛʼɛ, me ófuo mɛʼle ó, me beʼ l'aka de tir cye tiʼ. Me amu jaa kol nye ebɔʼ nye óbɨm é leme e!