1 Korɛnt 7 - Kálara Zyɛ̌m Edwán é mpʉ̌n

Eba

¹ É motia bɨn bé a dî me é kalara win ɨ, me paʼ bɨha, é mbi wi: mʉr mbɨa ó, di zihle.

² No ó, é mpʉ yé é kunbo e mʉr ó, nye lama fwon é zi bɨduo e, yé é mbɨa ó, mʉrʉm nyiwɛh, nye diʼe e we mʉma; mʉma nyiwɛh di e njʉm we.

³ Njʉm, nye ejala le eloŋlo syɛɛla mʉrʉm ye boo myɛl. Mʉma nteme loŋlo syɛɛla mʉma boo njʉm.

⁴ Mʉma, nye abe e nkul ó, nye saʼ nyʉl we njɨ mpʉ nye lé ekpɛl ɨ. Njʉm ó ndɨ ejwɨʼ nyʉl mo mʉma. Jwɨʼ gwar yaa, mʉrʉm, nye abe e nkul ó, nye saʼ nyʉl we njɨ mpʉ nye lé ekpɛl ɨ. Myɛl ó ndɨ ejwɨʼ nyʉl mo njʉm.

⁵ Nwaʼ beʼ l'abene nuu é nko paʼ nyʉl we, alaa ó bɨn bé a si bɛa twe twii ó, bɨn bé aŋa ka syɛŋa é jɔʼ bɨn dina lé ejwɨʼla e Zyɛm ɨ. Pie tɨ, bɨn bé à to dolo e tiʼ eba yin. ǃBɨn si be, asa no nɛʼɛ, bɨn bé amu jaa duma é mobʉbla mo Satan, ebe, bɨn bé abe e nkul emɛr mɨleme é lɔb nɨ.

⁶ Sa me lé elɛɛ bɨn ɨ, yé abe bɨn é mpɨna-mpɨna ó, bɨn saʼ ye. ǃBɨn si gwɨm sa no nɛʼɛ, saʼ ga no!

⁷ Me mʉr tɨ, me egwɨm ó, mpa bʉr bɨbɛh, bé ó mpʉ me. Sa gwar, mʉr nyiwɛh, nye e bye bɨntɔɔ Zyɛm a nol nye e. Nwaʼ mʉr e bye; nuu, e bye.

⁸ Tɨʼ ó me lé elɛɛ e bɨzihle ndwe e mɨkuho ó, yé é mbɨa ó, bɨn diʼe mpʉ me, abe mbɛa ɛ.

⁹ ǃBɨn si kœb ó, yé abana bɨn emɛr mɨleme é lɔb bɨmala nɛʼɛ, bɨn bé à ba, nkʉ to é l'eba. Eba, lé é mbɨa, laa esia e bɨmala e mɨfyɛba.

¹⁰ Mɨmbɛa mɨ bʉr, me ecyel bɨn mpene ó, mbɛa mʉma beʼ l'abɔʼa e njʉm. (É l'ocyecye, ntʉʼ mɛm lé ecyel bɨn mpene nwa. Da Yesʉs nye mʉr tɨʼ ó b'a cyel bɨn nya.)

¹¹ ǃƗ mbɛa mʉma si bɔʼa yɛɛ e nye nɛʼɛ, nye l'aka to é lʉʉ eba. ǃNye si kpɛl nɛʼɛ, bé e njʉm we, bé komla. No nteme, mʉrʉm, nye ajala le ebuulo myɛl.

¹² É mɨlɔb mɨfih, me mʉr tɨ, abe Da Yesʉs, me elɛɛ ó: ǃɨ mʉrʉm si be mbuʼla, myɛl nyɛɛ abe mbuʼla nɛʼɛ, ǃɨ myɛl si mɛʼle ó, nye di ó é l'eba wa, njʉm beʼ l'abuulo nye!

¹³ Jwɨʼ gwar e gwar yaa é nko paʼ mʉma ndɨ mbuʼla, njʉm mʉr ndɨ abe mbuʼla ɛ. ǃƗ njʉm si mɛʼle ó, bé e nɔɔ diʼe é l'eba nɛʼɛ, mʉma ayi pʉʼa é l'eba.

¹⁴ No ó ndɨ elɛʼle ó, mʉrʉm ndɨ abe mbuʼla ɛ, nye ó ndɨ waa mo Zyɛm ebe zyɛŋa wɔɔ boo myɛl. Jwɨʼ gwar e gwar yaa nteme, mʉma ndɨ abuʼla ɛ, nye nteme nye ó waa mo Zyɛm é zyɛŋa wɔɔ boo njʉm ndɨ mbuʼla ɛ. Nkʉ yé be ó be, abe no nɛʼɛ, mpa bwan bɨn, bé ó sa ndɨ elœʼ mʉr é mih mo Zyɛm ɨ. To kœb ó, bwan bɨn nteme, bé ó baa mo Zyɛm.

¹⁵ ǃƗ mʉr ndɨ abuʼla ɛ, si gwɨm jʉ eba e mbuʼla nɛʼɛ, bé fuo mɛʼla ó, eba dwèʼ. É mbi waa, mbuʼla, nkʉ mʉma, nkʉ mʉrʉm, nyi duho é mpila eba yaa é pololo. Saʼ ga no, ebe, Zyɛm a jebe bɨn ó, bɨn tiʼa é motala.

¹⁶ Mʉma ndɨ mbuʼla ɛ, go ógʉa é yé? Diŋa ó, go ó ndɨ e nkul etiʼ njʉmo. Yé abe no? Mʉrʉm ndɨ mbuʼla ɛ, gwɔɔ nteme, go ógʉa é yé? Diŋa ó, go ó ndɨ e nkul etiʼ myɛlo.

Diʼe ga é cye Zyɛm a bɛa cyel bɨn ɨ

¹⁷ Gʉa baʼle ga yɛɛ sa yi: Yé ejala ó, mʉr nyiwɛh diʼe é cye Da a bɛa cyel nye e. Mʉr mbɨa ó, kœʼ ebò e cyen Zyɛm a bɛa sa ó, nye kœʼœ œ. Motɨɨ maa, mé ó me lé entɛŋ mɨmbɛr mɨ Zyɛm mimyɛh ɛ.

¹⁸ Yé be ó, mʉrʉm a si joʼo njɨblɨ mo Zyɛm é jɔʼ nye a be, nye mu sɛa mpʉn nɛʼɛ, nye ajala le ecene mpʉn bé a bɛa sa nye e. Yé be ó, mʉrʉm a si joʼo njɨblɨ mo Zyɛm é jɔʼ nye a baapa saŋɔ mpʉn nɛʼɛ, nye ajala le esaŋɔ mpʉn.

¹⁹ Esaŋɔ mpʉn nkʉ di, asaŋɔ mpʉn, yé alɛɛ sɔʼɔ. Sa ndɨ e nyɔm ɨ, yé ó, go duʼo motie mo Zyɛm.

²⁰ No ó, yé ejala ó, mʉr nyiwɛh Zyɛm a jebe e, nye diʼe é cye nye a bɛa cyelɔ ɛ, nye l'apa bi njɨblɨ we waa.

²¹ Gwɔɔ, mbuʼla ndɨ elʉa ɛ, Zyɛm a jebe go é jɔʼ go a be é dia olʉa nɨ, yé abe no? Dia olʉa yo nɨ, yé ajala le elɛɛ go sɔʼɔ. Sa gwar, ǃɨ Zyɛm si dib go zi esiila bɨdia nɛʼɛ, diʼe é dia otî,

²² ebe, ǃɨ Da Yesʉs si jebe elʉa nɛʼɛ, kʉ gʉa ó, lé mu ó é dia otî é zyɛŋa wɔɔ boo Tî ga wina. ǃƗ Da si jebe mʉr ndɨ é dia otî nɛʼɛ, nye mu ó elʉa mo Krɨst pie njɨblɨ waa.

²³ Zyɛm a si jɛna bwaʼbwaʼ tɔɔ é jɔʼ nye a kʉr bɨn ɨ. No ó, amɛʼle ga ó, bɨn dwirɨ bɨn bʉr o tɨʼ molʉa mo bʉr.

²⁴ Obɨɔ ga bam aa! Yé ekʉ jala ó, mʉr nyiwɛh Zyɛm a jebe e, nye diʼe é cye ye, gumo Zyɛm a bɛa cyel nye e. Nye diʼe tɨ, é zyɛŋa wɔɔ boo Zyɛm!

Motia lé etiibe e mɨndu mosehe e

²⁵ É lɔb mɨloʼo dina apa be e motie ó, bé óbɛa ɛ, me abe e guu tiʼa Da Yesʉs a nʉa é wɔɔ paʼ. Dam be no, me elɛɛ yɛɛ ó, wam pɛhla é cye mʉr Da Yesʉs a jwɨʼ nkoo, waa ndɨ mʉr ebuʼla ɛ.

²⁶ Banana, mpʉ bɨna mu lé ebɔma ga e mɨtuu e mɨndɛl ɨ, bɨna bé é jala le edi ó, mʉr nyiwɛh lé ecyɛb é cye gwar Zyɛm a taare cyel nye e.

²⁷ Zê go a si ba mʉma ɛ? Abòno mopɨʼ mo ebuulo nye. Zê go ó zihle ɛ? Asaa mʉma eba.

²⁸ Sa gwar, ǃyé ójala e mʉrʉm ó, nye baʼ mʉma nɛʼɛ, nye asa syem. ǃƗ esehe si mɛʼle eto é l'eba nɛʼɛ, lé asa syem. To kœb ó, bʉr o ndɨ mɨmbɛa é mbi jɔʼ yiʼ ɨ, bé ósia e mɨtuu e mɨndel é lɔb eba lɔɔ. Mɛm, me egwɨm bɛʼ bɨn guu paʼ mɨtuu myaa.

²⁹ Obɨɔ ga bam aa! Me egwɨm lɛɛ tɨʼ ó, yi liʼ ba ma jɔʼ. Taare é jɔʼ yi, yé ekʉ ka liʼ mɨmbɛa mɨ bʉr ó njɨ myé tiʼa mpʉ sa lɛɛ ó, myé ó bɨzihle.

³⁰ Bʉr o lé ejɨ modwe e, di mpʉ sa lɛɛ ó, bé ajoʼo mompime. Baa lé edwo e, di mpʉ sa lɛɛ ó, bé abe é bɨsʉhʉ. Bʉr o lé ebwam bɨsa ɛ, baʼle bye mpʉ sa lɛɛ ó, bɨsa bé a bwam ɨ, byé ajoʼo e be.

³¹ Bʉr o ndɨ ebi bɨsa bɨ si nwaʼ ɛ, di mpʉ sa lɛɛ ó, bé adira nyɔm e bye, ebe, mbi jɔʼ yi, yé mu ó kunokuno le elaa.

³² Me egwɨm ó, bɨn l'ayi syɛl ba e bɨn bʉr o tɨ, tiibe e l'ebò e cyen lɨn. Mbuʼla ndɨ zihle, waa ndɨ abe e mʉma ɛ, syɛɛ mo Tî ga wina, yé ome ó ndɨ epebre nye é leme. Nye esyɛl ba e nye mʉr tɨ, tiibe e l'ebò e cyen le ó, nye amu jaa bɔʼa e zi Tî ga wina lé ekpɛl ɨ.

³³ Mbɛa mʉrʉm, wé é bul syɛl ba e nye mʉr tɨʼ ó, tiibe e l'ebò e cyen le, ó nye amu fib bɨsa bɨ jobo yi. Wé ekʉ saa ó, njɨ mozi mo esa syɛɛla myɛl lé egwɨm ɨ.

³⁴ Nye mu ó lé edu bɨcwɨa bɨba é jɔʼ gwar. Nkʉ zihle mʉma, nkʉ esehe ndɨ e l'etie ó, lé óba ɛ, nye ekʉ du ó, njɨ mɨlɔb mo Tî ga wina é l'efu ó, nye diʼe saŋ mʉr we, taare é nyʉl we, to kumo é sisim. Mbɛa mʉma wɛɛ pebre-pebre sɔʼɔ ó, njɨ bɨsa bɨ jobo yi, ó wé nkʉʼ sa bɨsyɛɛla njʉm lé egwɨm ɨ.

³⁵ Me elɛɛ no ó, ebe mombɨa mɨn. Me atine mʉr. Me ekʉ ka kpɛl ó njɨ bɨn diʼe é zyɛŋa win boo Da Yesʉs. Me ekpɛl nteme ó, bɨn kœʼœ ebò e cyen ndɨ ejala ɛ. Bɨn bé ókœʼ ó, njɨ le e le. Adi ga é ke-kɨ-ke.

³⁶ ǃƗ mʉr si pahle, bee ó, nye é jeʼe esa, ebe, nye aba sile we nye ndɨ acen é l'eba nɛʼɛ, ǃnye si ka bee ó, sile waa, wé mu ó lé ekɔa mɨmbu, bee nteme ó, nye ó abe e mbi fih wa, nye saʼ mpʉ nye lé ekpɛl ɨ. Nye asa syem. Nye cenɨ we é l'eba.

³⁷ Sa gwar, yé be ó, sɔŋ waa, nyi bee ó, nye ajala le ecen ndu sile waa é l'eba, nye óbaʼle we mbɛr nɛʼɛ, yé be ó, nye ekʉ du bɨgwɨma bɨ leme we nɛʼɛ, lɛɛ ó, syɛɛla ye, yé é mbɨa, ebe, nye abe é nkara ó, nye saʼ ye.

³⁸ Mʉr lé ecen ndu sile é l'eba ɛ, nyi gʉa sa. Waa ndɨ acen ndu sile é l'eba ɛ, nye ó ndɨ elaŋle gʉa sa.

³⁹ Mbɛa mʉma nyiwɛh, nye ejala le ebaʼle njʉm we, cye yiyɛh njʉm we dina kʉ ɨ. ǃƗ njʉm si dwè nɛʼɛ, kʉ gʉa ó, nye mu ó mʉr ndɨ é dia otî ɨ. Nye óbɛm ka to ni é l'eba boo mʉrʉm nyiwɛh nye kpɛl ɨ. Nye à ni é l'eba yɛɛ boo mʉrʉm ndɨ bɛa be é zyɛŋa wɔɔ boo Da Yesʉs ɨ.

⁴⁰ ǃNye si di yɛɛ myazyɛh, aka to é l'eba nɛʼɛ, kʉ gʉa ó, bɨsʉhʉ nye óbi tɨʼ ɨ, byé óbuo, laa byaa nye a ngbaa bi é l'eto é l'eba emba ɛ. Mbea wam ó nɨ. Me ebuʼla ó, me ó mpʉ bɨn, mʉr a bi Mbɨambɨa Sisim ɨ.