1 Korɛnt 6 - Kálara Zyɛ̌m Edwán é mpʉ̌n

Bɨpura é mbɛr Zyɛm tʉŋlʉ

¹ É jɔʼ obuʼla ndɨ e lɔb ɨ, nwaʼ, nye ebana to e nuu mpah mɨlɔb, to le epur nye é mih mo ozyɛhozyɛh o bʉr, ó bé tiʼa we. Nye agum ka mɛʼle ó, bé toʼ e lɔb wɔɔ boo mɨsaŋ mɨ bʉr mo Zyɛm, ó bé komla be wa.

² Zê bɨn bé agʉa ó, mɨsaŋ mɨ bʉr, myé ó ngo tiʼe bʉr o si nwaʼ mɨlɔb ɛ? Bɨn pa taare tiʼe bʉr o si nwaʼ mɨlɔb, a dwɛʼra e bwa mɨlɔb ndɨ titia ɛ!

³ Zê bɨn bé agʉa ó, bɨna bé ólwib ga mɨlɔb beengles bé a byaʼ e Zyɛm ɨ? Bɨna pa taare lwib ga mɨlɔb mɨnɨnɨ myaa, a dwɛʼra e myaa mɨ bʉr o si nwa!

⁴ ǃBɨn si be e mɨlɔb mɨ tiʼ si nwaʼ nɛʼɛ, bɨn bé óbɛm pɛh olɔ̀b bé ótiʼe bɨn mya ɛ, é sama bʉr o ndɨ ecyɛlɔ é Mbɛr-Zyɛm ɨ.

⁵ Me elɛɛ no ó, é l'efu le egba bɨn fwon é nyʉl. Zê é l'esama lɨn, yé eluʼo pɨpɨʼ ngwar ndɨ e nkul elwib mɨlɔb paʼra nwaʼ mbuʼla bé e nuu ɨ?

⁶ A bebe lé ejoʼo ó, obuʼla, bé eto é mpah mɨlɔb lé eto puura é mih mo lɔ̀b ndɨ abuʼla ɛ!

⁷ É jɔʼ bɨn ndɨ e mɨlɔb paʼra win ɨ, yé elɛɛ ó, bɨn mu ó si bîŋɔ le entaŋɔ é dɔm, bɨn bɨbɛh. Ebe yé bɨn ndɨ adihbe ó, bʉr saʼ bɨn ebebe e? Ebe yé bɨn ndɨ amɛʼle ó, bé díba bɨn ɨ?

⁸ Yé enyin ó, bɨn ó ndɨ ozyɛhozyɛh o bʉr ndwe e mɨndiblʉ. Bɨn bé ekʉ sa ebebe laa ó, obɨɔ bɨn e l'okɛl bɨn!

⁹ Bɨn bé egʉa cyecye ó, ozyɛhozyɛh o bʉr, bé ákwoʼ dweŋɔ dia é jwɨ̀ʼa mo Zyɛm, jala e nkɔb wɔɔ. Abir ga ó, mʉr gomla bɨn é bebebebe zi. Osyɛl o bɨmala, baa ndɨ edwiibɨ bɨbaŋabaŋa bɨdweʼle e, osyɛl o mɨfyɛba, otɛba o bʉrʉm, bʉrʉm ndɨ etɛbɔ ɛ,

¹⁰ mɨndiblʉ, bʉr o ndɨ ecen mih é bɨsa byoonkan ɨ, mɨfufwɔʼ monwoʼ, bʉr o ndɨ efœʼ bʉʉ bʉr ɨ, ndwe e baa ndɨ edɛn bɨmɔn byoonkan ɨ... bim bʉr baa bɨbɛh, bé aŋa dweŋɔ ba dia é jwɨ̀ʼa mo Zyɛm.

¹¹ No nteme ó, bʉʉ bʉr o mbɛr Zyɛm win, bé a be-be e! Sa gwar, bɨn bé a si sohlɔ, pubɔ. Bɨn bɨ bi mokebe é mih mo Zyɛm lé ejyɛʼ taa buʼo yin boo Da Yesʉs-Krɨst, cwɨɨ é zi Mbɨambɨa Sisim.

Baʼla ga monyʉl mɨn ebe kum mo Zyɛm

¹² Me óbɛm lɛɛ ó: «Yé abe e syɛɛla ndɨ kɔmlʉ é paʼ wam.» Sa gwar, ntʉʼ syɛɛla yiyɛh ndɨ me e nyɔm. Me óbɛm lɛɛ ó: «Yé abe e syɛɛla ndɨ kɔmlʉ é paʼ wam.» No ó, me aŋa bir ó, me diʼe elʉa e yʉʉ sɔʼɔ.

¹³ Bé elɛɛ-lɛɛ nteme ó: «Mode, mé tɨʼ ó, é l'efu e mo; mo wɛɛ é l'efu e mode.» Yé ó no! Sa gwar, Zyɛm ólɨr bibyɛh. Nyʉl mʉr, nye abe é l'efu ó, mʉr nkʉʼ bul sa bɨmala e mɨfyɛba e tɨ. Nye tɨʼ ó, é l'efu le esea Tî ga wina syɛɛ e tɨ. Tî ga wina, nye tɨʼ ó, é l'efu e monyʉl ga mɨna.

¹⁴ Zyɛm, mʉr a pɛ̀h Tî ga wina é foo e, nye ó ngo pɛ̀h nteme bɨna ga é zi nkul we waa.

¹⁵ Zê bɨn l'apa gʉa ó, monyʉl mɨn, mé ó bɨfum bɨ nyʉl mo Krɨst ɛ? Zê me ónʉa yʉʉ fum nyʉl mo Krɨst, bana to syɛŋ ye e nyʉl mbambama ɛ? Hɨʼɨ, yé abe ba no!

¹⁶ Zê bɨn bé agʉa ó, mʉr lé enara e mɨmbambama ɛ, bé e nɔɔ bɨbɛh, bé mu ó nyʉl ngwar ɛ? Ebe, yé ó tila ó: «Bɨbɛh oba, bé óbe ó nya e puno, sʉn ngwar.»

¹⁷ No ó, mʉr ndɨ é zyɛŋa wɔɔ boo Da Yesʉs ɨ, nye óbe ó e sisim ngwar, bé e nɔɔ.

¹⁸ Gwaʼa ga lé esa bɨmala. Myʉʉ mɨsyem bʉr lé esa ɛ, myé esyɛɛlɨ ó, é mʉr kʉl. To kœb ó, é jɔʼ mʉr si sa bɨmala ɛ, nye esa syem nɨ ó, lé elɨr nyʉl we nye mʉr tɨ!

¹⁹ No ó, zê bɨn bé agʉa ó, monyʉl mɨn, mé ó bana kʉ be odia mo Mbɨambɨa Sisim ɛ? Sisim mu lé edi é bɨn ɨ, wé ó waa Zyɛm a ntɨh bɨn ɨ. Bɨn bé ajoʼo e bɨn bʉr o tɨ,

²⁰ ebe, Zyɛm a si jɛna bwaʼbwaʼ tɔɔ é jɔʼ nye a kʉr bɨn ɨ. No ó, dwiibɨ ga Zyɛm, le ebaʼle monyʉl mɨn ti.