1 Korɛnt 5 - Kálara Zyɛ̌m Edwán é mpʉ̌n

Bɨsyɛɛla lé elœʼ monyʉl ga mɨna é zi bɨduo e

¹ Bʉr bé ejoʼo bé lé elɛɛ é gumo yiyɛh ó, yé e mʉr é l'esama lɨn lé esa bɨmala é lɔʼba-lɔʼba, é mbi mɨnjeʼe-Zyɛm ndɨ abe lé esa ɛ. Nuu mʉr é l'esama lɨn, nye ebana tiʼe e myaa sɔŋ!

² Bɨn nteme, bé é buo elɛɛ e nyʉl. Yé a ngbaa mbɨa é nko paʼ win ó, mpa bɨn bé a si bʉ modwe é jɔʼ mʉr esama lɨn waa a sa gwìh no e. Mpa bɨn bɨ dwih nye é l'esama lɨn tʉŋlʉ, dwih dwihɨ.

³ É nko paʼ wam, dam be ó, me ó jaabe é nko paʼ nyʉl, bɨna ga bé ó é nere-nere é nko paʼ sisim. No ó, mɨ bɛa tiʼe lɔb mʉr waa. Yé ó mpʉ sa lɛɛ ó, me ó é mbɛr Zyɛm win tʉŋlʉ!

⁴ É jɔʼ bɨn bé óbâʼle gwɨhla é die mo Da Yesʉs, mɛm nteme tɨʼ é nko paʼ sisim, nkul mo Tî ga wina Yesʉs tɨʼ nteme e bɨna ga ɛ,

⁵ bɨn bé à cen mʉr waa boo Satan, ó Satan lɨrɨ nye é nko paʼ bɨpuno bye. é nko paʼ sisim we, nye óbi tiʼ molu mo mpoʼ mɨmɛh é dobo Tî ga wina óbula ze e.

⁶ Yé ambɨa é jɔʼ bɨn lé edoʼo e bɨn bʉr o tɨʼ ɨ, ebe, kɨkɛna, yé elɛɛ ó: «Levure dam twaʼbe, yé óbana sa ó, time bler wiwɛh, wé vusɨ.»

⁷ Pɛʼɛ ga njʉ̌m levure waa, ó bɨn liʼɨ mɨleme é pupupu. No ó bɨn bé óbe edwan e bler, abe e levure ɨ. Me egʉa ó, bɨn mu ó bɛa be no, ebe, Krɨst a be ó si tiʼɔ tɔɔ ma ntœme, lé esa ó, bɨna jema ga ebʉʼ e Paska le.

⁸ Bɨna l'ayi jeme ga ebʉʼ laa lé ede bler ndɨ e njʉ̌m levure ɨ. Bler yaa, yé ó dweʼle, sa lé elɛʼle ebɨ-leme ndwe e l'ebebe e. Bɨna jema ga ebʉʼ ga lɨna lé ede bler ndɨ ebubɔ, agbaŋɔ levure ɨ. Yiha bler, yé ó lwib ocyecye ndɨ eduho bɨna é mɨmo si ɨ.

⁹ E kalara me a tile bɨn ɨ, me a lɛɛ e bɨn ó, bɨn l'ayi be e nduula e bʉr o ndɨ elama fwon é zi bɨduo e.

¹⁰ Me a baagum lɛɛ ó: «osyɛl o bɨmala bɨbɛh», nkʉ «bʉr bɨbɛh ndɨ ecen mih é bɨsa byoonkan ɨ», nkʉ «bʉr bɨbɛh ndɨ edɛn bɨmɔn byoonkan ɨ», nkʉ «baa bɨbɛh ndɨ edwiibɨ bɨbaŋabaŋa bɨdweʼle e». Nkʉ bɨna bé a be ó be, tiʼe nduula wiwɛh e l'osyɛl o mɨsyem nɛʼɛ, mpa bɨna bɨ fuo pʉʼa ga é si nwa!

¹¹ Me a tile bɨn é kalara waa ó, bɨn tiʼa nduula e mʉr ndɨ elɛɛ ó, nye ó mbuʼla, nyɛɛ yɛɛ lé esa bɨmala, nkʉ waa ndɨ ecen mih é bɨsa byoonkan ɨ, nkʉ mʉr lé edwiibɨ bɨbaŋabaŋa bɨdweʼle e. Bɨn tiʼa nduula e mʉr movoʼ, nkʉ fufwɔʼ monwoʼ, nkʉ ndiblʉ, ó bɨn l'ayi puhba mobo lé ede e mɨmbi mɨ bʉr myaa.

¹² Yé adwɛʼ mɛm ó, me tiʼa bʉr o ndɨ abuʼla ɛ, mɨlɔb. Bɨn ome ó jala le etiʼe mɨlɔb ó, myaa mɨ bʉr o Mbɛr-Zyɛm. Yé abe no?

¹³ Zyɛm ó ngo tiʼe mɨlɔb mɨ bʉr, baa ndɨ abuʼla ɛ. Yé ó tila ó: «Foʼ ga syɛl ebebe é l'esama lɨn.»