1 Korɛnt 3 - Kálara Zyɛ̌m Edwán é mpʉ̌n

Osyɛl o mosa mo Zyɛm

¹ Obɨɔ ga bam aa! É l'ocyecye, me a baalwib e bɨn mpʉ mʉr lé ejala le elwib e baa b'a bi Mbɨambɨa Sisim ɨ. Me a fuo lwib e bɨn ó, mpʉ me lé ejala le elwib e bʉr o si nwa, nkʉ ntɔʼ mpʉ bɨcyee byé a lwanbe kʉ di é zyɛŋa wɔɔ boo Krɨst ɨ.

² Me a dwe-dwe bɨn ó, monyaŋ, abe mode mo otamabʉr, ebe, bɨn bé a baabe e nkul ekoʼo me lé ede. Ze pyal é banana, bɨn bé abe e nkul ekoʼo me,

³ ebe, bɨn bé etiʼe-tiʼe ó, kʉ be mpʉ bʉr o si nwa. Bɨn mu ó lé esa mpɔʼa monkɔm ndwe le esiila motwii. Zê bɨn bé abee naa ó, bɨn bɨ kʉ nʉa dweʼle tiʼ mo bʉr o si nwaʼ ɛ? Bɨn bé ekʉ kœʼ ebò e cyen bʉr o si nwaʼ lé ebul kœʼ œ.

⁴ É l'esama lɨn, yé ó: nwaʼ mʉr, nye elɛɛ ó: «Me ó mpʉn mo Pol!» Nuu, nye ó: «Mɛm, me ó mpʉn mo Apolos!» Zê bɨn bé abee naa ó, bɨn bé ekœʼ ebò e cyen ndɨ enyin boo bʉr o si nwaʼ ɛ?

⁵ Zé nyɛɛ ndɨ Apolos? Zé ndɨ Pol? Bɨh bé ó ofuʼa bɨn, bʉr o b'a be bɨn e nyɔm ó, bɨn jyɛʼɛ taa buʼo yin boo Krɨst ɨ. Mʉr nyiwɛh, nye esa ó, syɛɛ-Zyɛm Da Yesʉs a lomo nye ó, nye saʼ ɛ.

⁶ Mɛm, me a si bè mpœʼ; Apolos nyɛɛ ze sʉ modibe. Sa gwar, Zyɛm ó b'a sa ó, yé paha.

⁷ No ó ndɨ elɛʼle ó, mʉr lé ebè ndwe e waa lé esʉ modibe e, bé abe sɔʼɔ. Mʉr ngwar lé ejala e duu ɨ, nye ó njɨ Zyɛm, waa a sa ó, mpœʼ paha ɛ.

⁸ Mʉr lé ebè e, bé e waa lé esʉ modibe e, bé ó jwɨʼ gwar. Zyɛm ódwe mʉr myɛna ó, nye osi jwɨʼ bim syɛɛ nyiha mʉr a sea nye e.

⁹ Ebe, bɨh e Zyɛm ó ndɨ é l'empomo e syɛɛ egwar. No ó, bɨn bɛɛ ó ndɨ peme mo Zyɛm. Bɨn nteme, bé ó mbɛr mo Zyɛm.

¹⁰ Mocyɛʼ mo mpom mo Zyɛm, mé ó b'a sa ó, me sea mpʉ cyela nkan. Me a si dihbe ecyel nkan. Nuu mʉr nyɛɛ ze sil fumo. Yé ejala ó, mʉr nyiwɛh diʼe ncye é mbi fuma nye lé efumo-fumo e,

¹¹ ebe, nkan mbɛr mu ó si cyɛb. Nkan waa ó ndɨ Yesʉs-Krɨst. Abe e mʉr ndɨ e nkul eka cyel nkan fih.

¹² Baʼ bʉr, bé ófumo é nkan waa ó, e gol, nkʉ e mɔn, nkʉ e mokoʼ moncɛnba. Bʉʉ bʉr bɛɛ, bé ófumo e bɨlɨ, nkʉ e bɨka, nkʉ e sʉ.

¹³ Syɛɛ mʉr nyiwɛh lé esea ɛ, nyɔm syɛɛ yaa, wé ónyin é pono é dobo le etiʼ e mɨlɔb, ebe, nyɔm sa yiyɛh, wé ónyin é sʉlʉlʉ ó, é moho waa. Nyɔm tɨ, wé ónyin ó, é siʼe yé ólɛʼle syɛɛla mo mʉr ɨ. ǃƗ syɛɛla si dihbe siʼe yaa nɛʼɛ, gʉa ó, mpaŋ syɛɛla yaa, yé a kʉ be ó e nyɔm é l'efu mo Zyɛm.

¹⁴ Yé be mʉr a be ó si fumo é nkan e sa lé edihbe siʼe mbɨmbɨa nɛʼɛ, nye óbi myɛna mo tɨ.

¹⁵ Yé si ka be ó, syɛɛla mo mʉr, yi diʼe é siʼe yaa nɛʼɛ, mʉr a sa ye e, nyi dimle myɛna mo tɨʼ é jɔʼ yaa. Nye mʉr tɨʼ ósyɛbɔ é siʼe. Sa gwar, nye óbe ó mpʉ mʉr a kpɛɛ, ntaa siʼe e.

¹⁶ Zê bɨn bé agʉa ó, bɨn bé ó kʉ be Mpah Zyɛm ɛ? Zê bɨn bé lé ejeʼe ó, Mbɨambɨa Sisim, nye edi é bɨn ɛ?

¹⁷ ǃƗ mʉr si gbɛɛ Odia mo Zyɛm waa nɛʼɛ, Zyɛm ópɛʼ nye modwɛʼla, ebe, Odia mo Zyɛm, wé ó sa ndɨ e l'ekɛn ɨ. To kœb ó, bɨn ó ndɨ mpaŋ Odia mo Zyɛm!

¹⁸ Daʼ kʉa ga bɨn bʉr o tɨ. ǃƗ mʉr esama lɨn si láa ó, nye ó cɨcyoo é nko paʼ bɨsa bɨ mbi jɔʼ yiʼ nɛʼɛ, nye taara di mpʉ gʉ. Nye òka bi mpaŋ ocyoo,

¹⁹ ebe, ocyoo o mbi jɔʼ yi, wé ó ogʉ é mih mo Zyɛm. Bɨna bé egʉa ga no, ebe, yé ó tila é Kalara Zyɛm ó: «Zyɛm, nye elam mɨcɨcyoo ó, é zi ocyoo wɔɔ.»

²⁰ Yé ó tila nteme ó: «Da, nye egʉa ó, mɨpɛhla mɨcɨcyoo, myé ó mbɛh e mbɛh.»

²¹ No ó, mʉr beʼ l'adoʼo e bɨsyɛɛla bɨ bʉr, ebe, sa yiyɛh, yé ó yaa yin!

²² Dam be mɛm Pol bé e Apolos ndwe e Sefas, bé ó é l'efu lɨn, ka kɛl si nwaʼ bé e tiʼ ndwe e l'efie, jɔʼ yiʼ ndwe e bɨjɔʼ lé eze e, sa yiyɛh, yé ó yaa yin!

²³ No ó, bɨn bɛɛ, bé ó baa mo Krɨst. Krɨst nyɛɛ, nye ó waa mo Zyɛm.