1 Korɛnt 2 - Kálara Zyɛ̌m Edwán é mpʉ̌n

¹ Obɨɔ ga bam aa! É jɔʼ me a ze gʉʼ bɨn ye lé eze pɛʼle bɨn mokan, le elɛʼle bɨn lwib odim mo Zyɛm ɨ, me a baaze ba e pɨʼ ó, me ólwib e bɨn e mokan é lʉo-lʉo nkʉ e lwib ocyoo.

² Ebe, me a nʉa tiʼa é leme wam ó, me ókʉ ka lɛɛ e bɨn ó njɨ sa lé etiibe e Yesʉs-Krɨst ɨ, mʉr bé a bomlo e mosen, bɨnɔ é klos kʉ ɨ.

³ No yaa ó me a ze gʉʼ bɨn ye mpʉ cyɛʼ-bol, lé ejoʼo bʉa ndwe le esaʼ.

⁴ Lwib yam ndwe e mbi me a cen mpaŋla mo Zyɛm ɨ, byé a baabe bɨlwib ndɨ lwɨŋla e l'ocyoo o mbi jɔʼ yi. Sa yé a tine bɨn ó, bɨn buʼla sikʉlʉ yaa ɛ, yé a be ó, bɨsyɛɛla Mbɨambɨa Sisim a sa e nkul we e.

⁵ No ó bɨn bé a nʉa pim é buʼo e nkul lé eduho boo Zyɛm ɨ, abe waa lé eduho é l'ocyoo o bʉr ɨ.

Ocyoo mo Zyɛm

⁶ É jɔʼ bɨh lé eyeʼle bʉr o ndɨ e pɨʼ otamabʉr ɨ, bɨh bé edwe be sikʉlʉ ocyoo. Me dam lɛɛ no, sikʉlʉ yaa, yé abe yɛɛ yaa ndɨ lwɨŋla e l'ocyoo o bʉr o mbi jɔʼ yiʼ ɨ. Yé abe sikʉlʉ mɨnjwɨɨbʉr mɨ mbi jɔʼ yi lé edwe bʉr ɨ. To kœb ó, mɨnjwɨɨbʉr myaa, myé mu ó kunokuno le egbahɔ.

⁷ Bɨh bé eyeʼle bʉr ó, ocyoo mo Zyɛm. Wé a taare be ó é lwib odim, sa Zyɛm a bɛa fol ɨ. Nye l'apa cye kʉ e si, nye a bɛa bà jwɨʼ ó, nye dwe ó bɨna ga ocyoo waa ndwe e kum tɨ.

⁸ Abe e guu njwɨɨbʉr é mbi jɔʼ yi, wé a gʉa we. Nkʉ myé a be ó be, gʉa we nɛʼɛ, mpa myé a baacyèl Tî ga wina ndɨ e moncɛnba ɛ, é klos kʉ.

⁹ Yé ó mpʉ yé ndɨ tila é Kalara Zyɛm ɨ. Yé ó tila ó: «Sa mʉr ngwar l'apa joʼo, nkʉ bee e, sa mʉr ndɨ apa jwɨʼ é leme we lʉʉ dobo e, Zyɛm a kʉmsa ye ó, ebe bʉr o ndɨ ekpɛl nye e.»

¹⁰ Bɨna ga ó ndɨ baa Zyɛm a gwih sa yiyɛh é zi Sisim we e. Sisim we, wé ó ndɨ egʉa sa yiyɛh, dam be bɨjwɨʼ nye ndɨ e bye é mo si ɨ.

¹¹ É nko paʼ mamʉr, sa lé egʉa mɨpɛhla mɨ mʉr ɨ, yé ó njɨ sisim we ndɨ nye é nyʉl ɨ. No nteme, yé ó njɨ Mbɨambɨa Sisim nye ome ó ndɨ egʉa mɨpɛhla mo Zyɛm.

¹² Bɨna ga bɛɛ, bé a baabœɔ ga bɨbla sisim ndɨ ejwɨʼ si nwaʼ ɛ. Bɨna bé a ntɨhɔ ga ó, Sisim lé eduho boo Zyɛm ɨ. Ebe no ó bɨna bé ógʉa ga motʉm mɨmɛh Zyɛm a ntɨh bɨna ga ɛ.

¹³ Bɨh bé edwe bɨn ó sikʉlʉ yaa. Bɨh bé alwib e mokan mo ocyoo o si nwa, njɨ e mokan Mbɨambɨa Sisim lé edwe bɨh ɨ. Ebe no ó bɨh lé entɛŋ bɨn sikʉlʉ Mbɨambɨa Sisim lé etaare dwe bɨh ɨ.

¹⁴ Mʉr ndɨ ndu, abe e Mbɨambɨa Sisim ɨ, nye abe e nkul ebi ocyecye lé eduho é Sisim waa ɛ. Ocyecye waa, wé ó nye ogʉ. Nye abe e nkul egʉa we, ebe, mʉr ndɨ epahle ocyecye waa ɛ, nye ó njɨ waa ndɨ e Mbɨambɨa Sisim ɨ.

¹⁵ Mʉr ndɨ e Mbɨambɨa Sisim ɨ, nye epahle lɔb wiwɛh. Sa gwar, mʉr ndɨ ndu ɨ, nye abe e nkul elwib lɔb mo mʉr ndɨ e Mbɨambɨa Sisim ɨ.

¹⁶ Ebe, yé ó tila ó: «Zé lé egʉa mɨpɛhla mo Da ɛ? Zé ndɨ e nkul edwe nye motɨɨ ɛ?» To kœb ó, bɨna ga bɛɛ ó ndɨ e mɨpɛhla mo Krɨst é mɨleme!