1 Korɛnt 16 - Kálara Zyɛ̌m Edwán é mpʉ̌n

Mozyɛŋ é l'efu le obɨɔ ndɨ enteʼe e

¹ É nko paʼ mozyɛŋ é l'efu e mɨsaŋ mɨ bʉr mo Zyɛm, me elɛɛ bɨn ó nɛɛ: mpʉ me a bɛa liʼe nʉm é mɨmbɛr mɨ Zyɛm ndɨ é lal Galat ɨ, saʼ ga jwɨʼ gwar e gwar yaa.

² É dobo e sono lɨlɛh, mʉr, nye ejala le ekomo é l'empàh e mbɛr we, mɔn jwɨʼ e bim nye a bi ɨ. Nye óbaʼle ye, to pyal é jɔʼ me óka ze e, é l'efu ó, bɨn l'ayi ka bâʼle di é mozyɛŋ é l'epyal lam.

³ É jɔʼ me ópyal ɨ, bɨn bé ólɛʼle me bʉr o bɨn bé ópɛh ɛ. Me ótile okalara bé ólɛʼle bʉr bɨbɛh ó, bé ó é dia mɨlʉmlʉ myam ɨ. Me òcen be ó, bé toʼ e mɨngula min myaa Yerʉsalɛm.

⁴ Yé óbe si nyin nteme ó, me ejala le eto nteme Yerʉsalɛm nɛʼɛ, bé óliʼle me.

Bɨjwɨʼ mo Pol

⁵ Me óze gʉʼ bɨn ye ó, me osi pa cwɨɨ Masedwan.

⁶ Me ódi ba ma jɔʼ bɨn ye, bɛm be é jɔʼ kolo wiwɛh. Bɨn bé òcen me nko mé óto e.

⁷ Me aŋa ze gʉʼ bɨn ye é banana, ebe, me amu jaa cyɛb bɨn ye, njɨ cɨcyel. Me ebuʼla ó, me ódi ba e bɨn, ǃɨ Da si mɛʼle wa.

⁸ Me egwɨm di wâʼ Efɛɛz, to pyal é jɔʼ bɨna bé óbe si jeme ga ebʉʼ e Paŋtekot ɨ.

⁹ Ebe, mpaŋ jɔʼ, yi pyal me ó, me sea bwaʼbwaʼ syɛɛ e buobuo nkul, dam ka be buobuo bʉr o ndɨ esa me mongan ɨ.

¹⁰ ǃƗ Timote si pyal bɨn gʉʼ nɛʼɛ, bɨn bé à baʼle nye mbɨmbɨa, ebe, nye esea ó, Da Yesʉs syɛɛ, mpʉ me nteme lé esea nye ya ɛ.

¹¹ Ebe no, mʉr acyɛl ga nye. Gulɨ ga nye, ó nye toʼ é cyen ye dolo, leme we loŋla e motala. Nye pyala kaʼ nko me ndɨ ɨ, ebe, bɨh e bʉʉ obuʼla ndɨ wâʼ ɛ, mu ó lé ekʉ bono nye.

¹² É lɔb mo mɨɔ ga wina Apolos, me a cen nye ó, gʉʼ bɨn ye bé e bʉʉ obuʼla. To kœb ó, nye agwɨm sa no é banana. Nye óto yɛɛ, é jɔʼ nye óbe e l'epʉla ɛ.

Motɨɨ mo epihe

¹³ Diʼe ga nkehe. Cyɛba ga é nkʉʼʉ é buʼo. Diʼe ga e leme onkɔɔ. Lela ga nkul.

¹⁴ Dɨʼe sa ga bɨsyɛɛla bin bibyɛh e leme ncwɨncwɨa.

¹⁵ Bɨn bé egʉa Stefanas bé e mbɛr bʉr we. Bɨn bé egʉa ó, bé a be ó bʉr be efoʼ bé a jyɛʼ taa buʼo yɔɔ boo Zyɛm é lal Akayi ɨ. Bé ó b'a taare gba monyʉl lé efuʼo mɨsaŋ mɨ bʉr. No ó, obɨɔ ga bam aa!

¹⁶ Me elɛɛ bɨn ó nɛɛ: bɨn cyɛba é mɨkoo myɔɔ pihe. Dwaaba ga nteme bʉr o bé e boo nɔɔ lé esea empomo e syɛɛ gwar ɨ, ebe syɛɛ bé lé edihbe e.

¹⁷ Me ejoʼo embɨa e l'epyal mo Stefanas bé e Fortunatwis ndwe e Akayɨkus. Bé a si loŋlo embɨa bɨn bé a ngbaa sa me e.

¹⁸ Bé nteme, bé a si bâʼle gba me nkul é nyʉl, mpʉ bé a taare gba bɨn nya ɛ. Ebe no, gʉa seʼle ga mbi bʉr waa.

¹⁹ Bʉr o mɨmbɛr mɨ Zyɛm ndɨ é lal Azia ɛ, bé esoho bɨn. Akilas bé e Priska ndwe e bʉr o mbɛr Zyɛm ndɨ eze gwɨhla é mbɛr wɔɔ ɛ, bé esoho bɨn nteme é zyɛŋa wɔɔ boo Krɨst.

²⁰ Obuʼla bɨbɛh ndɨ kaʼ ɛ, bé esoho bɨn. Swɨhla ga mbɨmbɨa paʼra win, lé edwiila momuʼ ndwia ndɨ ti ɨ.

²¹ Me etile ekan lɨʼ ó, e mbo wam: Moswɨhlɨ mo Pol!

²² ǃƗ mʉr bé akpɛl Da Yesʉs nɛʼɛ, Zyɛm káala nye. Da, ntaʼ!

²³ Da Yesʉs, nye sʉʼo bɨn mocyɛʼ mo mpom me.

²⁴ Me ekpɛl bɨn bɨbɛh é zyɛŋa ga wina boo Yesʉs-Krɨst.