1 Korɛnt 12 - Kálara Zyɛ̌m Edwán é mpʉ̌n

Bɨntɔɔ Zyɛm lé edwe bwan be e

¹ Obɨɔ ga bam aa! Me akpɛl ó, bɨn jeʼa lɔb bɨntɔɔ Zyɛm lé enol bɨna ga ɛ.

² Bɨn bé egʉa ó, é jɔʼ bɨn bé a be mɨnjeʼe-Zyɛm ɨ, bɨn bé a be ó lé edwiibɨ bɨbaŋabaŋa bɨdweʼle, bibyɛh njɨ bɨgʉ́ʼ e bɨgʉ́ʼ! É til jɔʼ yaa, bɨsa bɨ ozyɛm baa, bé a yɨm bɨn ó, bɨn saʼ syɛɛla yiyɛh bé a kpɛl ɨ.

³ No ó, me mu ó lé eze tɨe bɨn é nko paʼ waa: mʉr ndɨ elwib é zi Sisim mo Zyɛm ɨ, nye abe e nkul elɛɛ ó: «Yesʉs, nye e bɨkɔ́ɔlʉ!» Ndwe nteme, ǃɨ Mbɨambɨa Sisim be l'abe é mʉr tʉŋlʉ nɛʼɛ, kʉ gʉa ó, mʉr waa, nye abe e nkul elɛɛ ó: «Yesʉs ó ndɨ Tî!»

⁴ Yé é buo mɨmbi bɨntɔɔ Mbɨambɨa Sisim lé enol bɨn ɨ. Sa gwar, Sisim wɛɛ njɨ ngwar.

⁵ Yé é buo mɨmbi bɨsyɛɛ bɨna lé esea ga ɛ. Sa gwar, bɨna bé esea ga bɨsyɛɛ byaa ó, é l'efu e Njwɨɨ ngwar.

⁶ Yé é buo mɨmbi bɨsyɛɛla Mbɨambɨa Sisim ndɨ e nkul esa é zi bʉr ɨ. To kœb ó, Sisim ngwar e ngwar waa ó lé esa bibyɛh é bʉr be bɨbɛh.

⁷ Mʉr nyiwɛh, nye e bɨntɔɔ Mbɨambɨa Sisim a nol nye ó, nye toʼ, to gul bʉr e bya ɛ.

⁸ Mbɨambɨa Sisim, nye enol nwaʼ mʉr bɨntɔɔ ó, nye diʼe e l'ocyoo é lwib. Nye enol nuu mʉr bɨntɔɔ bɨ ngwɨa é bɨsa nye lé elwib ɨ.

⁹ Nye enol nwaʼ mʉr bɨntɔɔ bɨ buʼo; nol nuu mʉr bɨntɔɔ bɨ etiʼ mɨsyoblʉ.

¹⁰ Nye enol nwaʼ mʉr bɨntɔɔ bɨ esa mosima; nol nuu mʉr bɨntɔɔ bɨ egwih mɨlɔb mo Zyɛm. Nye enol nuu mʉr bɨntɔɔ bɨ egʉa mɨmbɛʼ paʼra moleme bé e Mbɨambɨa Sisim. Nye enol nuu mʉr bɨntɔɔ bɨ elwib bɨlɔblɔb. Nye enol nuu mʉr bɨntɔɔ bɨ edwir bɨlwib byaa.

¹¹ Yé ó e mʉr ngwar ó ndɨ esa bɨsyɛɛla byaa bibyɛh: Mbɨambɨa Sisim. Nye enol mʉr nyiwɛh bɨntɔɔ ó, mpʉ nye lé ekpɛl ɨ.

Nyʉl ngwar, bɨfum bɨ nyʉl é buobuo

¹² Krɨst, nye ó mpʉ nyʉl mʉr. Nyʉl, nye ó sa gwar, nye yɛɛ e bɨfum bɨ nyʉl é buobuo. Nye dam be e bɨfum bɨ nyʉl é buobuo, nyʉl waa, nye ó njɨ ngwar.

¹³ Bɨna ga bɨbɛh bé a si nʉa ndubo ngwar, ntɔʼ ka di nyʉl ngwar é zi Sisim ngwar. Sisim ngwar ó b'a ze di é mɨleme ga mina. Bɨna ga bé ó jwɨʼ gwar yaa, mʉr dam be Yʉden, nkʉ mʉr kul fih, nye dam be elʉa, nkʉ mʉr ndɨ é dia otî ɨ.

¹⁴ Nyʉl, nye abe njɨ fum nyʉl gwar. Nye ó bɨfum bɨ nyʉl é buobuo.

¹⁵ ǃƗ kʉ si lɛɛ ó: «Me abe mbo. Ebe no ó me ndɨ, abe fum nyʉl» nɛʼɛ, wé aŋa di, abe fum nyʉl ebe no.

¹⁶ ǃƗ egwal si lɛɛ ó: «Me abe dih. Me abe fum nyʉl» nɛʼɛ, lé aŋa di, abe fum nyʉl ebe no.

¹⁷ Nkʉ nyʉl be ó be, be njɨ dih e dih nɛʼɛ, mpa nye be ó, l'aka joʼo bɨduu. Nkʉ nye be ó be, be njɨ egwal le egwal nɛʼɛ, mpa nye be ó, l'aka joʼo monumo.

¹⁸ É l'ocyecye, Zyɛm a gba bɨfum bɨ nyʉl bibyɛh é nyʉl ó, mpʉ nye a kpɛl ɨ.

¹⁹ Nkʉ nyʉl a be ó be, be njɨ fum nyʉl gwar nɛʼɛ, mpa bɨna bé aka lwib ga é lɔb «nyʉl».

²⁰ Bɨfum bɨ nyʉl, byé ó é buo, nyʉl nyɛɛ yɛɛ ngwar.

²¹ Dih, lé abe e nkul elɛɛ e mbo ó: «Me agwɨm sɔʼɔ e go.» Lʉ, wé abe e nkul elɛɛ e mokʉ ó: «Me agwɨm yʉʉ sɔʼɔ e bɨn.»

²² To kœb ó, bɨfum bɨ nyʉl bɨna lé ecyɛl ga ɛ, byé abe e nkul edi, abe.

²³ Bɨfum bɨ nyʉl bɨna lé ebul bee ga ó, byé ó, abe e duu ɨ, byé ó bɨna lé elaŋle komlo ga, laa byʉʉ ɨ. Bɨfum bɨ nyʉl lé esa bɨna ga fwon ɨ, byé ó ndɨ ebula buurɔ e mɨmpaŋ mɨkan.

²⁴ Byaa ndɨ asa bɨna ga fwon ɨ, byé agwɨm buurɔ e sɔʼɔ. Zyɛm a dira bɨfum bɨ nyʉl ó, lé edwe fum nyʉl ndɨ esa bɨna ga fwon ɨ, modile.

²⁵ No ó, mpɔʼa monkɔm, nye abe é nyʉl. Bɨfum bɨ nyʉl bibyɛh, byé ecwɨɨla paʼra wɔɔ.

²⁶ ǃƗ fum nyʉl gwar si bi tuu nɛʼɛ, byʉʉ bibyɛh, byé ósia e tuu waa nteme. ǃƗ yʉʉ fum nyʉl si dweŋɔ modile nɛʼɛ, bé e byʉʉ bɨfum bɨ nyʉl bibyɛh, byé ósoho.

²⁷ Bɨn bɨbɛh, bé ó nyʉl mo Krɨst. Mʉr nyiwɛh ndɨ é l'esama lɨn ɨ, nye ó ndɨ fum nyʉl waa.

²⁸ No ó, Zyɛm a cyel bʉr é Mbɛr-Zyɛm ó, é mbi wi: é cye efoʼ, mɨlʉmlʉ; é cye mba, ogwiha o mɨlɔb; é cye lɛl, oyeʼle o mɨlɔb mo Zyɛm. Pie tɨ, nye a si cyel osyɛl o mosima be e bʉr nye a nol bɨntɔɔ bɨ ejomo bʉr ɨ, ndwe e baa nye a nol bɨntɔɔ bɨ efuʼo mɨnjyebnjyeb ɨ, kɛl baa nye a nol bɨntɔɔ bɨ ejwɨʼ bʉr o mbɛr Zyɛm ɨ, bé e baa nye a nol bɨntɔɔ bɨ elwib bɨlɔblɔb ɨ.

²⁹ Ntʉʼ bɨbɛh ndɨ mɨlʉmlʉ, nkʉ ogwiha o mɨlɔb, nkʉ oyeʼle o mɨlɔb mo Zyɛm, nkʉ osyɛl o mosima,

³⁰ nkʉ bʉr o ndɨ etiʼ mɨsyoblʉ ɨ. Ntʉʼ bɨbɛh lé elwib bɨlɔblɔb, nkʉ dwir sa bʉr lé elɛɛ é zi bɨlwib byaa ɛ.

³¹ Gwɨmɨ ga mɨndwɛa lé ejala le ebul dweŋɔ modile e. Me muno ze lɛʼle bɨn zi fih, zi ndɨ elaa mozi monɨ mɨmɛh lé embɨa ɛ.