1 Korɛnt 11 - Kálara Zyɛ̌m Edwán é mpʉ̌n

¹ Nʉŋa ga dweʼle tiʼ yam mpʉ me lé enʉa dweʼle tiʼ mo Krɨst ɨ!

É fula, mʉma diʼe e ntʉŋ tiila é lʉ

² Me eseʼle bɨn, ebe, bɨn bé é bul toŋlo me é bɨjɔʼ bibyɛh, ndwe nteme, bɨn bé ebaʼle le edu mɨnjwɨr me a ntɛŋ bɨn ɨ.

³ Me egwɨm ó, bɨn gʉŋa ó, Krɨst, nye ó njwɨʼa mo mʉrʉm nyiwɛh. Njʉm, nye ó njwɨʼa mo myɛl. Zyɛm Sɔŋ, nye ó Njwɨʼa mo Krɨst.

⁴ ǃƗ mʉrʉm si bwar ntʉŋ é lʉ é jɔʼ nye lé ejwɨʼla, nkʉ gwih mɨlɔb mo Zyɛm é gwɨhla yin nɛʼɛ, nye ekʉ samle ó tî we.

⁵ No ó, ǃɨ mʉma nyɛɛ baatiile ntʉŋ é lʉ é jɔʼ nye lé esa mɨnjwɨʼla, nkʉ é jɔʼ nye lé egwih mɨlɔb mo Zyɛm é gwɨhla yin nɛʼɛ, nye esamle nteme ó, tî we. Fwon waa, nye ó mpʉ fwon mʉma ndɨ cwɨa lʉ ɨ.

⁶ ǃƗ mʉma be l'abuuro lʉ nɛʼɛ, nye nteme, nye ejala le ecwɨɔ enkwɨh! É mpʉ yé ndɨ é sa fwon, mʉma lé ecwɨa enkwɨh ɨ, yé ejala ó, nye tiila ntʉŋ é lʉ.

⁷ Bʉrʉm bɛɛ, bé ajala le ebuuro lʉ, ebe, bé enwɨɨla e Zyɛm nye mʉr tɨ. Bʉr, bé egʉa kum mo Zyɛm ó, é mʉrʉm. To kœb ó, bʉr, bé egʉa kum mo mʉrʉm ó, é mʉma.

⁸ Mʉrʉm a baacyeŋɔ, duho é mʉma. Mʉma ó b'a cyeŋɔ, duho é mʉrʉm.

⁹ Mʉrʉm a baacyeŋɔ é l'efu e mʉma. Mʉma a cyeŋɔ ó, é l'efu e mʉrʉm.

¹⁰ Ebe no ó lʉ mʉma, wé lé ejala le edi e ntʉŋ tiila ɛ. Ntʉŋ waa, wé ó nye dweʼle, sa lé elɛʼle ó, nye é jwɨ̀ʼa mo njʉm ɨ. Nye ejala le etiile ntʉŋ nteme ó, ebe beengles ndɨ é gwɨhla yaa ɛ.

¹¹ Sa ndɨ tɨʼ yé ó, Da a si tiile etie ó, bʉba e bʉrʉm, bé ejala le enwɨɨla tiʼ paʼra wɔɔ; nuu mʉr tɨʼ l'adi e tiʼ é nye mʉr tɨ.

¹² Ebe, Zyɛm a si nʉa dwehe gwar é mʉrʉm, ze cye mʉma e tɨ. Jwɨʼ gwar e gwar yaa nteme ó bʉrʉm lé ebi monyʉl mɔɔ ó, cwɨɨ é bʉba ɛ. No ó, sa yiyɛh, yé eduho ó, boo Zyɛm.

¹³ Bɨn bʉr o tɨ, tiʼa ga. É jɔʼ bɨn mu lé eze sa bɨgwɨhla ɛ, é jɔʼ mʉma lé esa Zyɛm mɨnjwɨʼla ɛ, zê yé lé ejala ó, nye dɨʼe l'atiile ntʉŋ é lʉ ɛ?

¹⁴ Njwɨr ebyɛl, wé mʉr tɨ, wé eyeʼle bɨn nteme ó, é jɔʼ mʉrʉm lé ebaʼle mpuo é jaa jaa ɛ, sa yaa, yé ó nye é sa fwon.

¹⁵ To kœb ó, é jɔʼ mʉma ndɨ e mpuo no e, é nko paʼ we, mpuo we, nye ó nye sa duu, ebe, Zyɛm a dwe nye mpuo ó, tɔɔ buro.

¹⁶ ǃƗ mʉr si bâʼle gwɨm do e bɨh é lɔb waa nɛʼɛ, nye gʉŋa ó, bɨh e myʉʉ mɨmbɛr mɨ Zyɛm mimyɛh, bɨh bé abe lé elɛʼle bʉr njwɨr fih.

¹⁷ É jɔʼ bɨgwɨhla bɨn lé eze syɛɛlɨ ɨ, byé é bul sa bɨn bʉr o tɨʼ ebebe, laa embɨa. Me abe e nkul eseʼle bɨn tɨ.

¹⁸ Sa efoʼ, yé ó, é jɔʼ mbɛr Zyɛm win, wé lé eze gwɨhla ɛ, bé elɛɛ me ó, bɨn bé esa-sa mpɔʼa monkɔm, me nteme lé ebuʼla lɔɔ waa.

¹⁹ Yé ekʉ jala ó, mpɔʼa monkɔm dɨʼe nyin paʼra win, ó bé nkʉʼ gʉa dweʼe baa ndɨ egʉa jyɛʼ taa buʼo yɔɔ boo Zyɛm ɨ.

²⁰ Ebe no, é jɔʼ bɨn lé eze gwɨhla ɛ, ndɨa mode win, wé aka dwɛʼ Da Yesʉs.

²¹ É jɔʼ bɨn mu lé ede e, mʉr nyiwɛh, nye efuo ó we nyʉl. To kœb ó, nwaʼ, nye abe e sa ede; nuu nyɛɛ é mpur monwoʼ.

²² Zê bɨn bé abe e mɨmbɛr, bɨgumo bɨn bé óde mode le enyʉl monwoʼ mɨn ɨ? Ntʉʼ pyeh bɨn lé esa Mbɛr-Zyɛm nwaʼ ɛ? Zê bɨn bé lé ekpɛl gba bʉr o ndɨ abe e mode e, fwon é nyʉl ɛ? Yé me ndɨ e nkul elɛɛ bɨn ɨ? Zê me óseʼle bɨn tɨ? Abe e sɔʼɔ! Me aŋa seʼle ba bɨn.

Mode Da Yesʉs lé edwe ompʉn be e

²³ Mbe ga: sikʉlʉ Da Yesʉs a dwe me e, yé ó yi. Yé ó me a ntɛŋ bɨn ɨ. Yé ó: Da Yesʉs, é pum bé a kɛha nye e, a si nʉa bler,

²⁴ dwe Zyɛm ekiba, ntɔʼ pɛ̂ʼ ye bɨpeh. Nye ó: «Nyʉl wam ó nwa, waa mu si dweŋɔ é l'efu lɨn ɨ. Bɨn bé ódɨ sa syɛɛla yiʼ bɨjɔʼ bibyɛh, lé etoŋlo me.»

²⁵ Jwɨʼ gwar yaa, jɔʼ bé a sil de e, nye ntɔʼ bâʼle dwe be bele monwoʼ mo rezɛŋ. Nye ó: «Bele monwoʼ yi, yé elɛʼle edwan e mpʉn Zyɛm lé ede e bʉr é zi motié mam ɨ. É jɔʼ yiyɛh bɨn bé ónyʉl-nyʉl sa ndɨ é bele yiʼ ɨ, bɨn bé ótoŋlo me.»

²⁶ Ebe, jɔʼ yiyɛh bɨn dina lé ede bler yiʼ le enyʉl monwoʼ maʼ ɛ, bɨn bé elɛɛ lɔɔ efie mo Da Yesʉs. Bɨn bé ódɨ sa no, to pyal é dobo nye óbula ze e.

Mbi ndɨa ndɨ ajala ɛ

²⁷ Sa gwar, ǃɨ mʉr si de bler yaa, nkʉ nyʉl monwoʼ maa, mbi ndɨa ndɨ ajala nɛʼɛ, kʉ gʉa ó, nyi daʼre mobe é nyʉl we, ebe, nyi byaʼ nyʉl mo Da Yesʉs ndwe e motié me.

²⁸ No ó, mʉr paʼ taare pahle tiʼ ye. É jɔʼ yaa ó nye óka ze de bler le enyʉl monwoʼ maa ɛ.

²⁹ ǃƗ mʉr si de bler yaa le enyʉl monwoʼ maa, nye l'adweʼe nyʉl mo Krɨst ndɨ tɨʼ nɛʼɛ, nye ódaʼre mobe é nyʉl we, duho é mbi ndɨa we nɨ.

³⁰ Ebe no, yé ó buobuo bʉr é l'esama lɨn ndɨ mɨsyoblʉ ɨ, baʼ, ozyoo, bʉʉ nteme, si dime mih ɨ.

³¹ Nkʉ bɨna bé a be ó be, pahle bɨna ga bʉr o tɨʼ nɛʼɛ, mpa bɨna bé ó, si syɛhle ga nkar é mih mo Zyɛm.

³² Sa gwar, Da Yesʉs, nyi taare lé etiʼe mɨlɔb ga mina. Ebe no ó nye ndɨ eturo bɨna ga mɨlʉ ɨ. Nye esa no ó, bɨna nkʉʼ syɛhle ga tiʼa mɨlɔb epihe, é jɔʼ nye ótiʼe bʉr ofih mɨlɔb, le edwe be mobe é jɔʼ gwar ɨ.

³³ No ó, obɨɔ ga bam, é jɔʼ bɨn lé eze gwɨhla, puhba mobo é nka mode e, mʉr paʼ taare bono ó, bʉʉ bʉr paʼ de.

³⁴ ǃƗ mʉr be lé ejoʼo za nɛʼɛ, nye taara de é mbɛr we, buulo leme. ǃBɨn si gwɨhla é mbi nɨ nɛʼɛ, bɨn l'aka daʼre mobe é monyʉl. É nko paʼ mʉʉ motia mofih mɨn, me óka ze lɛɛ bɨn sa ndɨ ejala e bɨn ó, é jɔʼ me óze gʉʼ bɨn ye e.