1 Korɛnt 10 - Kálara Zyɛ̌m Edwán é mpʉ̌n

Syɛhla ga bɨbaŋabaŋa bɨdweʼle ndɨ mɨkpɛʼa ɛ

¹ Obɨɔ ga bam aa! Me egwɨm ó, bɨn gʉŋa sa yé a pyal é bɨmpam bih ɨ, é kpɛhla. Bé e boo Moyiz ó b'a kœʼ é nkur tʉŋlʉ. Bɨbɛh, bé a si ntaa Maŋ mo Akaa-e-kaa e mokʉ.

² Bɨbɛh, bé a si syɛŋa é Moyiz é jɔʼ bé e boo nɔɔ, bé a kœʼ é nkur tʉŋlʉ, le é jɔʼ bé a ntaa maŋ ɨ. Tɨʼ ó bé a ze nʉa ndubo é Moyiz ɨ.

³ Mode mompwar Mbɨambɨa Sisim a dwe be e, bɨbɛh, bé a be ó si de me,

⁴ bɨbɛh nyʉlɔ modibe mompwar Mbɨambɨa Sisim a dwe be e. Bé a nyʉl-nyʉl modibe ó, maa mé a gʉ-gʉ é l'ekoʼ Zyɛm a ntɨh be e. Ekoʼ laa, lé a be ó lé edu be zi e zi. No ó, ekoʼ laa, lé a be ó Krɨst.

⁵ Dam be ó, bé a si nʉa ndubo é Moyiz, buobuo bʉr o sama yɔɔ, bé a baabe cɨcyel é mih mo Zyɛm. Ebe no ó bɨha, bé a sie lé edwè é feha si ɨ.

⁶ Bɨsyɛɛla byaa, byé ó bɨna ga dweʼle, sa lé elɛʼle bɨna ga ó, bɨna l'ayi be ga e bɨbebebebe bɨgwɨma mpʉ bé a be e bye e.

⁷ Yé ajala ó, bɨn bula dwiibɨ bɨbaŋabaŋa bɨdweʼle mpʉ bʉʉ bʉr o sama yɔɔ, bé a sa-sa ɛ. Yé ó mpʉ yé ndɨ tila é Kalara Zyɛm ɨ. Yé ó tila ó: «Bʉr, bé a be ó, ze diŋɔ si, deŋɔ mode, nyʉlɔ monwoʼ; mʉŋɔ si, bwalɔ mozɔɔ.»

⁸ Bɨna l'ayi gba ga monyʉl lé esa bɨmala mpʉ bʉʉ bʉr o sama yɔɔ, bé a dɨ sa, to pyal é jɔʼ ebebe, lé a ka laŋle e. Bʉr otɔɔyin mowʉm moba e l'olɛl (23 000), bé ntɔʼ dwè é moho ngwar, lé ejala e syɛɛla yaa.

⁹ Bɨna bé ajala le eboblo ga Krɨst, mpʉ bʉʉ bʉr o sama yɔɔ, bé a sa ɛ. Onyʉa ze lʉ be, bé ntɔʼ sie lé edwè.

¹⁰ Atooro ga Zyɛm, mpʉ bʉʉ bʉr o sama yɔɔ, bé a dɨ tooro nye e, engles efie ntɔʼ jʉ be.

¹¹ Bé a bɔma e bɨsyɛɛla byaa ó, dweʼle yɔɔ, yé nkʉʼ bal bʉr, bʉʉ bʉr ze tile é lʉ wɔɔ é Kalara Zyɛm ó, bɨna liʼɨ ga lé epahle tɨ, ndwe le edweʼe sa bɨna mu lé ebee ga é l'esie e mbi jɔʼ yiʼ ɨ.

¹² No ó, mʉr lé ebuʼla ó, nye ó cɨcyel é lyanbe e, nye diʼe ncye, lé ekpɛɛ ó, nye amu jaa twe, aka mʉa!

¹³ Mobʉbla bɨn bé a ntaa ɛ, mé epyal bɨn e bʉr bɨbɛh no. To kœb ó, Zyɛm, nye ó mʉr ebuʼla. Nye aŋa bir ó, bɨn boblɔ e mbi mobʉbla wé óntaa bɨn é nkul ɨ. É jɔʼ mobʉbla, mé ópyal-pyal bɨn ɨ, nye ókar bɨn zi fih. Bɨn bé òjyɛl tɨ, bɨn nteme l'aka sa bɨsyɛɛla bɨ ebebe bɨn bé a ngbaa sa ɛ.

¹⁴ Ebe no, obɨɔ o kpɛl bam aa! Anyamle dwiibɨ ga bɨbaŋabaŋa bɨdweʼle.

¹⁵ Me elwib e bɨn ó, mbi mʉr lé ejala le elwib e mɨpɨpɨʼ mɨ bʉr ɨ. Bɨn bʉr o tɨ, pahla ga sa me lé elɛɛ ɛ.

¹⁶ Bele monwoʼ ga yina, yé nyá ɛ? Yé ó bɨna ga zi Zyɛm lé esʉ bɨna ga mocyɛʼ mo mpom me tɨʼ ɨ. Bɨna bé edwe ga nye ekiba é lɔb bele yaa. É jɔʼ bɨna mu lé enyʉl ga monwoʼ mo tɨʼ ɨ, bɨna bé esyɛŋa ga lé enʉa nkɔb é motié mo Krɨst. Bler bɨna lé epɛ̂ʼla ga é jɔʼ bɨna mu lé ede ga ɛ, tɨʼ ó bɨna lé esyɛŋa ga lé enʉa nkɔb é nyʉl mo Krɨst ɨ.

¹⁷ Bler, yé ó njɨ gwar. Bɨna dam buo ga, bɨna ga bé yɛɛ ó nyʉl ngwar, ebe, bɨna ga bé ó e nkɔb e bler gwar.

¹⁸ Bwa b'Ɨzraɛl, baa lé ebyɛl no é nko paʼ bɨpuno e, mbe ga mpʉ bé ndɨ ɨ. Bʉr o ndɨ ede nkɔb tir a diʼɔ é taa mɨndwɛa tɔɔ motwina ɛ, bé edi é zyɛŋa wɔɔ boo Zyɛm é zi edɨɨ laa.

¹⁹ Yé me be lé egwɨm lɛɛ ɛ? Me alɛɛ ó tir a bàŋɔ é mpah bé ndɨ edwiibɨ bɨbaŋabaŋa bɨdweʼle e, nye a be ó si dweŋɔ nuu zyɛm é l'ocyecye. Me alɛɛ ó, bɨbaŋabaŋa bɨdweʼle ndɨ mɨkpɛʼa ɛ, byé ó ozyɛm.

²⁰ Me ekʉ lɛɛ ó nɛɛ: ntʉʼ Zyɛm bé lé edwiibɨ ɨ. Mɨndwɛa mɨnjeʼe-Zyɛm lé etiʼe e, myé edweŋɔ ó moleme. Me akpɛl ó, bɨn diʼe é zyɛŋa win boo bɨbaŋabaŋa bɨdweʼle byaa ebe ndɨa tir go.

²¹ Bɨn bé abe e nkul ede bele monwoʼ mo Da Yesʉs le yaa moleme. Bɨn bé abe e nkul ede mode mo Da Yesʉs ndwe e maa moleme.

²² Zê bɨna bé lé ejɨ ga ó, Da Yesʉs taara baʼ bɨna ga ɛ? Zê bɨn bé lé ebuʼla ó, bɨna ó ndɨ elaa ga nye é nkul ɛ?

Mʉr, nye ejala le esea ó, njɨ ebe kum mo Zyɛm

²³ Bʉʉ bʉr, bé elɛɛ ó: «Yé abe e syɛɛla ndɨ kɔmlʉ.» Yé ó no! Sa gwar, ntʉʼ sa yiyɛh ndɨ e nyɔm. «Yé abe e syɛɛla ndɨ kɔmlʉ.» Yé ó no! Sa gwar, ntʉʼ sa yiyɛh ndɨ e nkul elɨl bʉr é buʼo mbɨmbɨa.

²⁴ Mʉr beʼ l'asaa nyɔm we, wé ome. Mʉr saŋa sa ndɨ e nyɔm é l'efu e bʉʉ bʉr ɨ.

²⁵ Deʼ ga sa yiyɛh bé lé ebɛma é mompɛma ɛ, abe e tia é mɨleme min!

²⁶ Ebe, yé ó tila ó: «Si nwaʼ ndwe e sa yiyɛh ndɨ tɨʼ ɨ, byé egumo ó e Da.»

²⁷ ǃƗ mʉr ndɨ abe mbuʼla, si jebe go ó, go toʼ, to de dina é mbɛr we nɛʼɛ, ǃgo si mɛʼle to nye ye wa, deʼ sa yiyɛh nye ódwe go e, abe e tia é leme go.

²⁸ ǃƗ mʉr si ka gwih e go ó: «Tir nwaʼ kʉ bàŋɔ muh ó, é mpah bé ndɨ edwiibɨ ozyɛm bé a dɨ kpaʼ» nɛʼɛ, gwɔɔ bene. Go ejala le ebir tir waa l'adeŋɔ é l'efu le ecwɨa e mʉr a gwih go lɔb waa ɛ. Go ejala le esa no ebe mɨpɛhla mɨ leme.

²⁹ Me alɛɛ ó, go saʼ no ebe mɨpɛhla mɨ leme go. Me ekʉ lɛɛ ó, go duʼo myaa mɨ leme mo nyiha mʉr. Zê yé ó cɨcyel é jɔʼ mʉr lé edwe me mobe é lɔb bɨsyɛɛla me lé esa ngbàa me mu é dia otî ɨ?

³⁰ ǃMe si dwe Zyɛm ekiba é lɔb sa me lé ede nɛʼɛ, bʉr bé ajala le efœʼ me é lɔb ndɨa mode waa, mɛm yɛɛ si kʉ dwe Zyɛm ekiba tɨ!

³¹ Ebe no, bɨn dam de mode nkʉ nyʉl monwoʼ, nkʉ bɨn dam sa yaa sɔʼɔ: saʼ ga syɛɛla yaa yiyɛh é l'efu le edwiibɨ Zyɛm tɨ!

³² Kœʼœ ga mpaŋ ebò e cyen é mbi ndɨ ó, bɨn l'ayi ka sa syɛɛla ndɨ ekol oYʉden ebɔʼ lé ódumo be e. Syɛhla ga nteme syɛɛla ndɨ ekol bʉr o bɨkul bɨfih ebɔʼ lé ódumo be e. Akol bʉr o Mbɛr-Zyɛm ebɔʼ lé ódumo be e.

³³ Saʼ ga mpʉ me. Me egba nyʉl ó, bʉr bɨbɛh, bé kpɛlɨ me é sa yiyɛh me lé esa ɛ. Me asaa nyɔm wam, njɨ waa buobuo bʉr, ó bé biʼe tiʼ molu mo mpoʼ mɨmɛh.