1 Korɛnt 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, mʉr Zyɛm a jebe é gwɨma ye ó, me diʼe lʉmlʉ mo Yesʉs-Krɨst ɨ, bɨh e mɨɔ ga wina Sostɛn, ó lé etile bɨn kalara nwa.

² Bɨh bé etile ó, bʉr o mbɛr Zyɛm ndɨ ɨ Korɛnt ɨ. Yesʉs-Krɨst a si pubo bɨn. Zyɛm a jebe bɨn ó, bɨn diʼe mɨsaŋ mɨ bʉr be, bɨn e bʉr bɨbɛh ndɨ esa Tî ga wina Yesʉs-Krɨst mɨnjwɨʼla bɨgumo bɨgumo e. Nye ó Tî ga wina boo nɔɔ.

³ Mocyɛʼ mo mpom le motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Mbɨambɨa motʉm Yesʉs a ntɨh ɨ

⁴ Zyɛm Sɔŋ wam a si sʉ bɨn mocyɛʼ mo mpom me é zi mo Yesʉs-Krɨst. Ebe no ó me lé edwe nye ekiba é lɔb win é jɔʼ yiyɛh ɛ.

⁵ É zyɛŋa win boo nɔɔ, bɨn bé a si tiʼe é mopoʼ, mɨmbi mimyɛh, é laŋle laŋle gumo bɨn bé a dweŋɔ ngwɨa é nko paʼ ocyoo o lwib ndwe e ngwɨa bɨsɔʼɔ ɛ.

⁶ Ebe, bɨn bé a si buʼla sa bɨh bé a boʼlo, tiibe e Yesʉs-Krɨst ɨ.

⁷ Bɨntɔɔ Zyɛm lé enol bwan be e, nyi nol bɨn nteme bya. É jɔʼ bɨn dina lé ebono zea Tî ga wina Yesʉs-Krɨst óze e, bɨn mu ó e bɨntɔɔ Zyɛm a nol bɨn binɨ.

⁸ Nye waa nteme ó ngo gba bɨn nkul é monyʉl, to pyal é l'esie, abe e sa ebebe nye a ngbaa nwahle bɨn e tɨʼ é dobo Tî ga wina Yesʉs-Krɨst óbula ze e.

⁹ Zyɛm, nye ó mʉr ebuʼla. Nye ó b'a jebe bɨn ó, bɨn diʼe é zyɛŋa win boo Mwan we, Tî ga wina Yesʉs-Krɨst.

Mpɔʼa monkɔm é mbɛr Zyɛm tʉŋlʉ

¹⁰ Obɨɔ ga bam aa! É die mo Tî ga wina Yesʉs-Krɨst, me ejwɨʼla e bɨn, ó: diʼe ga twii. Mpɔʼa monkɔm, nye l'aka nyamle be é l'esama lɨn tʉŋlʉ. Me ejwɨʼla ó, bɨn diʼe é zyɛŋa win mbɨmbɨa, mɨpɛhla mɨmpwar, gwɨma gwar.

¹¹ Obɨɔ ga bam aa! Bʉr o ndɨ mbɛr bʉr mo Kloe ɨ, bɨ lɛɛ me ó, bɨn mu ó lé esa mpɔʼa monkɔm.

¹² Me ejoʼo ó, mʉr nyiwɛh é l'esama lɨn, nye mu lwib ó, we mbi. Nwaʼ, nye ó: «Me ó mʉr mo Pol.» Nuu, nye ó: «Me ó mʉr mo Apolos.» Nuu, nye ó: «Mɛm, me ó waa mo Sefas.» Nuu nteme, nye ó: «Me ó waa mo Krɨst.»

¹³ Zê Krɨst mu ó monkɔb monkɔb ɛ? Zê mɛm Pol ó b'a cyèlɔ é klos kʉ lé ejala e bɨn ɛ? Zê bɨn bé a nʉa ndubo ó, é die lam ɛ?

¹⁴ Zyoo e Zyɛm, ebe, me a baadù nuu mʉr é mbɛr Zyɛm win, njɨ Krispʉs bé e Gaywis bé ome.

¹⁵ Abe e mʉr ngwar ndɨ e nkul ebɨn dine kʉ ó, me a si dù bʉr é die lam.

¹⁶ (Yé ó no, me si kʉ jeʼe elɛɛ! Me a be yɛɛ ó si dù nteme mbɛr bʉr mo Stefanas. Me abuʼla ó, me a si dù nuu mʉr pie mɨndubo mɨ bʉr onɨ.)

¹⁷ Krɨst a baalomo me ó, me toʼ le edù bʉr. Nye a lomo me ó, me toʼ, to lɛɛ Mbɨambɨa Lɔɔ. Me tuna we, abe e mokan é lʉo-lʉo, ó efie nye a dwè é klos kʉ ɨ, lé nkʉʼ be, adimle nkul we.

Yesʉs-Krɨst: Nkul ndwe e l'Ocyoo mo Zyɛm

¹⁸ É jɔʼ bɨh ndɨ ebɔma e bʉr o ndɨ egʉmla é bebebebe zi ɨ, é jɔʼ bɨh ndɨ etuno be lɔɔ efie mo Yesʉs é klos kʉ ɨ, mbea wɔɔ, wé ó tuno waa, wé ó lɔɔ ogʉ. No ó, mbɛa ga wina, bɨna ga bʉr o mu lé ebi tiʼ molu mo mpoʼ mɨmɛh ɛ, wé ó anɨnɨn nkul mo Zyɛm.

¹⁹ Yé ó mpʉ yé ndɨ tila é Kalara Zyɛm ɨ. Yé ó tila ó: «Me ógbah mɨcɨcyoo ocyoo wɔɔ. Me ópɛʼ mɨpɨpɨʼ pɨʼ wɔɔ.»

²⁰ No ó, mɨcɨcyoo myɛɛ, myé lɛɛ é yé? Ogwɨa onɨnɨ bɛɛ, bé lɛɛ é yé? Bʉr o ndɨ edihbe mosono e, bé elɛɛ é yé? Sa bʉr o mbi jɔʼ yiʼ lé ejebe ó, «ocyoo» e, Zyɛm, nye ebula jebe ye ó, «ogʉ».

²¹ Zyɛm, é l'ocyoo nye ndɨ e we e, nyi nʉa tiʼa ó, bʉr o mbi jɔʼ yi, bé aŋa gʉa nye njɨ ebe ocyoo wɔɔ. Nye a bee embɨa é nko paʼ we ó, baa nye ódwe tiʼ molu mo mpoʼ mɨmɛh ó, ndɨ ebuʼla mpaŋla bɨh bé a cen be e, mpaŋla waa, nye yɛɛ sa bʉʉ bʉr lé ebee mpʉ lwib bɨgʉ ɨ.

²² OYʉden, bé edî ó, bé taara bee bɨdweʼle bɨ nkul we, ó bé mɛʼla lɔɔ ga wina. Bʉr o Grɛs bɛɛ, bé ómɛʼle lɔɔ ó, njɨ waa bé óbee e l'ocyoo e.

²³ É wih paʼ, bɨh bé elɛɛ ó, Mbɨambɨa Lɔɔ mo Lœma mulo mo Zyɛm a cyèlɔ é klos kʉ ɨ. Lɔɔ waa, wé ekol oYʉden ebɔʼ ndɨ edumo be e. Wé enyin é mbea byʉʉ bɨkul bɨfih ó, wé ó lɔɔ ogʉ.

²⁴ É paʼ bʉr Zyɛm a jebe e, bé dam be oYʉden, nkʉ nteme bʉr o bɨkul bɨfih, bé ebee nkul e l'ocyoo mo Zyɛm ó, é Yesʉs-Krɨst,

²⁵ ebe, syɛɛla mo Zyɛm bʉr lé ebee ó, yé ó ogʉ ɨ, ocyoo ndɨ tɨʼ ɨ, wé elaa ocyoo o bʉr é nkul. Syɛɛla ye ndɨ enyin ó, yé ó yaa cyɛʼ-bol yiyɛh ndɨ ebɛm koʼo e, nkul ndɨ tɨʼ ɨ, nye elaa bʉr é nkul.

²⁶ No ó, obɨɔ ga bam aa! Toŋla ga mpʉ bɨn bé a be cye yiyɛh Zyɛm a be l'apa jebe bɨn ɨ. É l'esama lɨn tʉŋlʉ, yé abuo mɨcɨcyoo mɨ si nwa, abuo mɨnjwɨ̂ʼ mɨ bʉr, abuo osabene.

²⁷ To kœb ó, Zyɛm a pɛh bʉr ó, lé epɛh baa bʉr o si nwaʼ lé ebee ó, bé ó bɨgʉ ɨ, é l'efu le egba mɨcɨcyoo mɨ si nwaʼ fwon é nyʉl. Nye a pɛh bɨcyɛʼ-bol ó, nye gbaʼ mɨnjɨh mɨ bʉr fwon é nyʉl.

²⁸ Nye a si pɛh sa bʉr lé ebee ó, yé ó kʉ be mbɛh le epyaŋɔ, le yaa ndɨ tɨtoʼo e, ó nye nkʉʼ gbah sa bɛɛ lé ebee ó, yé ó sa ndɨ tɨʼ ɨ.

²⁹ Abe e mʉr ngwar ndɨ e nkul edoʼo e bɨsyɛɛla bye é mih mo Zyɛm.

³⁰ Bɨn bé ó é zyɛŋa win boo Yesʉs-Krɨst ó, dumo e Zyɛm. Nye ó b'a sa nteme ó, bɨn biʼe ocyoo mo Yesʉs. Bɨn mu ó ocɨcyel o bʉr é mih me, dumo e Krɨst. Krɨst nteme ó b'a pubo bɨna ga. Nye ó b'a dwih bɨna ga é mpila ebebe é pololo.

³¹ Yé ó mpʉ yé ndɨ tila é Kalara Zyɛm ɨ. Yé ó tila ó: «ǃƗ mʉr si kpɛl doʼo nɛʼɛ, nye doʼa e bɨsyɛɛla mo Da.»