Yʉ̂d 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Yʉ̂d, syɛ̂l mesâ mé Yésʉs-Krîst, mɨ́ɔɔ́ mé Jacques ó dí ecɛma bɨ́n mekaná mâ. Mě cɛmá ó, bɨ̌n bʉr ó Nzyɛ̌m Sɔ́ŋ á kpɛl, baá nyé á jébe le ebaʼle mbɨ̂mbɨá ɨ́ nzɨ̌ mé Yésʉs-Krîst bá.

² Njɨ́ʼá nkóó, le mepyɛbla, ti e kpɛ̌l, byé díʼee e bɨ̌n ɨ́ ntʉʉʉ́.

Bibɨ́bla bí ólɛ̂ʼla

³ Bʉr ó kpɛ̌l bâm, léme, wé á nyɛɛ be me ɨ́ báná báná ó, me tílaa bɨ̌n lɔ̌b swîh: mpʉ̌ twǐʼ njʉ̌m dǐ e njʉ̌m dǐ dí jwɨʼ gwár lɨ́ esú gá lɨ́ná yɨ́. Me nzě kǎ bee ó, me ó lɨ́ bi ó, me tílaa bɨ̌n ó, bɨ̌n lwímlaa dɔm. Lwímláá gá lé, lɨ́ ekamle e búʼó gá yɨ́ná Nzyɛ̌m á boo ntɨh bʉr bé yɨ́.

⁴ Bʉ́ʉ́ bʉ̂r, bɨ́ nî ɨ́ sɔ́má yɨ́n ɨ́ myaaa, bɨ̌n l'agʉ́a. Mekaná mé dí edwe bé mebě, le ekab bé bintɨ́ʼá má, mɨ́ boó cɛmɔɔ. Bɨ́ɛ bé ó minjéʼe-Nzyɛ̌m. Bé jaá gwɨ̂m ó, njɨ edirǎ nyɔm e mpam mé Nzyɛ̌m gá wɨ́ná, bé nkʉ̂ sâ bímolá nzam le ekomo. Bé ntémé, bé lɨ́ ekɛ́lǎ Yésʉs-Krîst. Nye omér ó dí Tyɛ̂b esôʼ le Tî gá wɨ́ná.

⁵ Yê tyeetye ó, bɨ̌n bɨ́ boó gʉ́ǎ lɔ̌b waá wɨ́wɛ̂h. Damá jóʼo nó, me páa símsa bɨ́n yɨ́ɛ lɔ̌b wɨ̂: Dâ Nzyɛ̌m ó b'á pɛʼ bʉr o b'Ɨ́zraɛ̂l ɨ́ sí Egɨ̂ptɛn. Píe tɨ̂, nye nzě kǎ jʉ̂ baá bɨ́bɛ̂h bé á bɨbene lɨ́ edyɛ̂ʼwo e né bá.

⁶ Símsáá gá ntémé beéngeles o b'á be akpɛl édi ɨ́ mecwɨ́ɨ́ mɔ́ɔ́ bá. Bé á si kpɛ́ɛ bidǐ bimpâ byɔ́ɔ́, kǎ tó gbáŋɔɔ ɨ́ mpǐl. Nzyɛ̌m á si gbâ bé lɨ́ edúrʉ́ʉ́ tʉ́ŋlʉ̌, bé mû mikɛ́ʼá. Okuluu bɔ́ɔ́, bé ódi ó, kɔ́m ti e kɔ́m, atiɔɔtiɔɔ. Tɨ̂ʼ ó beéngeles baá dí ebónǒ tíʼá mílɔ̌b épíhe yɨ́.

⁷ Símsáá gá ntémé bʉr ó Sodôm, e Gómɔr ti e bʉr o b'á di ɨ́ bwá bínkana byé á be ɨ́ mepʉ́la mɔ́ɔ́ bá. Bʉr baá, bé á si bɛ́ma bé bʉr o tɨ̂ʼ lɨ́ esâ bímolá. Bé á si syɛŋa bijoó e mbi mʉ̂r bé dí abe lɨ́ ekœb ɨ́ joó wɨ́. Nó ó, bé á si ka bi bintɨ́ʼá ɨ́ siʼe dí edúǒ kɔ́m ti e kɔ́m yɨ́. Nzyɛ̌m á sâ bé syɛ́ɛla yaá ó, lɨ́ elɛ̂ʼle bʉ̂r bɨ́bɛ̂h mveʼle.

⁸ Damá jóʼo nó, bʉr o dí edumo e lɔ̌b wɨ̂ʼ bá, bé ó nó: pɨʼ milémé myɔ́ɔ́, nyé ajɨma ɨ́ jô. Bé lɨ́ elœʼ ményʉ́l mɔ́ɔ́, le epyêh jwɨ́ɨ́ mé Nzyɛ̌m le entuhlo bééngeles dí e kûm bá.

⁹ Tó kœb ó, njwɨ́ɨ beéngeles Michel mʉr tɨ̂ʼ á bé antuhlo sɔ́ŋ meleme, mʉr bé e nɔ́ɔ́ á pa pére mekǎn, lɨ́ edǐ gʉ́ǎ mpʉ̌ múú mé Moyɨ̂z, wé á jala le edebe yɨ́ nyá. Ɨ́ jɔ̌ʼ Michel á dwe sɔ́ŋ meleme mebě yɨ́, nye á bé antuhlo nyê. Nye á jaa lɛ́ɛ ó: «Dâ Nzyɛ̌m, nye ntɨ́ʼɨɨ go!»

¹⁰ Bʉr baá bɨ́ɛ ntuhlo ó, sá yɨ́yɛ̂h bé dí agʉ́a yɨ́. Yaá bé dí egʉ́a yɨ́ yɨ́ɛ, yé lɨ́ edímle bê. Sá ngwɨ́á yɔ́ɔ́ yaá, yé antaǎ bím ótír ó dwǐʼ dí egʉ́a bísɔ̂ʼ yɨ́.

¹¹ Nkoó, nye ó e bʉr baá! Ebě, bɨ́ dû nzɨ́ Kayɨ̂n á kar nyɨ́. Bé á si dîm, lɨ́ edû nzɨ́ mikóo mé Balâm, ebě, bé á gwɨ̂m ó myɛ́na. Bé á ka to dwe ó mpʉ bʉ̂r ó Korê bé á dwe ɨ́ jɔʼ bé á gbɔba e Moyɨ̂z yɨ́.

¹² Jwɨʼ yɔ́ɔ́, yé lɨ́ entɨ̂ʼ ɨ́ páʼ wɨ́n. Bé buú ntɨ̂ʼ ó, ɨ́ jɔʼ bɨ́n le onɔ́ɔ́ dé méde ɨ́ Mbɛ̌r-Nzyɛ̌m yɨ́. Bé dɨ́dé ó, lɔ̂ʼwǎ lɔ́ʼwáa, ajóʼo bá sôn. Bé jaá gbɨgbâ méde ó, njɨ ɨ́ myɔ́ɔ́ mínum. Bé ó mpʉ médwíne me mpíé, pubó dí etíne, mpíé nyɨɛ akǎ nwɨ́ɨ má. Bé ntémé, bé ó mpʉ bílɨ́ bi dí abe lɨ́ egúmo mpúmó ɨ́ jɔ̌ʼ nkóno bí. Byé lɨ́ edwe nzɔ̂ʼ bá, ebě, byé lɨ́ emuna sí.

¹³ Bé nwɨɨla ntémé ó e mbi óbóʼó ó mâŋ dí epyêl mégûl ɨ́ ntomo ntomo wɨ́. Bé lɨ́ esâ ébébe, ajóʼo bá sôn. Bé nwɨɨla ó, le ocwícwén o dí adû bítyé byɔ́ɔ́ bá. Sá tɨ̂ʼ ó Nzyɛ̌m dí ejaá bɨbaʼle bé bidiá byɔ́ɔ́ njɨ lɨ́ edúrʉ́ʉ́ e dí ɨ́ nkom nkom lɨ́ yɨ́. Edúrúú laá, lé ódidi nó ó, kɔ́m ti e kɔ́m.

¹⁴ Énɔk á be ó ngwih ebaalé mé Ádam. Nye á si gwîh milɔ̌b mé Dâ Nzyɛ̌m, dumo e bʉr baá. Nye á lɛ́ɛ ó: «Paá jóʼo gâ: Tî gá wɨ́ná ónze ó e beéngeles bé dí tí bá, tâŋ mekám mé ótɔ́ɔ́sin,

¹⁵ lɨ́ enzě tíʼe bʉ̂r bɨ́bɛ̂h milɔ̌b. Nye ólɛ̂ʼle mínjéʼe-Nzyɛ̌m mímyɛ̂h misyóm myɔ́ɔ́. Misyóm myaá, myé nyɨ́nyɨ́n ó, ɨ́ mpʉ bé dí esâ bísyɛ́ɛlǎ Nzyɛ̌m nyɨɛ dí ebene bí yɨ́. Nye ólɛ̂ʼle bé ntémé mpʉ mínjéʼe-Nzyɛ̌m dí esâ Nzyɛ̌m nkěh ɨ́ mbi mékǎn bé dí ecɨ nyé má.»

¹⁶ Bʉr baá, bê ɨ́ jɔʼ yɨ́yɛ̂h ó, lɨ́ elwib ɨ́ bébe bébe dumo e Nzyɛ̌m. Bê ɨ́ jɔʼ yɨ́yɛ̂h ó, lɨ́ etítíne nkɔ̂b nyé dwídwé bé nyɨ́. Bé jaá dû ó, njɨ bigwɨ́má byɔ́ɔ́. Bé lɨ́ elwib bílwǐb bí jáálé. Bé lɨ́ edwáawo bʉ̂r mempǒm, bɨ́ɛ lɨ́ egʉ́a ó, bé e nkul edira wɔ́ɔ́ nyɔm tɨ̂.

Júhwáá gâ

¹⁷ Bʉr ó kpɛ̌l bâm, símsáá gá mekǎn bʉ̂r o mílʉ́mlʉ́ mé Tî gá wɨ́ná Yésʉs-Krîst á lɛ́ɛ má.

¹⁸ Bé á lɛ́ɛ bɨ̌n ó, mbi wɨ̂: «Ɨ́ melú mé ósûʼla má, yé óbe ó e bʉr ó kpêʼle ngá dû mpʉ bígwɨ́má byɔ́ɔ́ dí etíne bé yɨ́ bá. Bigwɨ́má byɔ́ɔ́, byé kʉ́ lɛ̂ʼle ó, bé lɨ́ ejéʼě Nzyɛ̌m.»

¹⁹ Bɨ́haá, bé ó dí egbâ mpɔ́ʼá menkɔ̌m páʼ bʉr. Nkul le pɨʼ nyɔ́ɔ́, nye ó njɨ nyaá nyʉ̂l bipúno. Sísǐm mé Nzyɛ̌m, wé apǎ nî bé ɨ́ miléme.

²⁰ Bɨ̌n bɨɛ, bʉr ó kpɛ̌l bâm, búʼó bɨ́n dí e yé, yaá dí tí yɨ́, nʉaa gá pîm ɨ́ búʼó yaá. Jɨjɨʼlaa gá ntémé e nzɨ̌ Sísǐm mé Nzyɛ̌m.

²¹ Baʼlaa gá bicwiʼ bín, lɨ́ edi baá Nzyɛ̌m dí ekpɛl bá. Bɨ̌n e bónó móhó Tî gá wɨ́ná Yésʉs-Krîst ngá báʼǎ nze wɨ́. Nye ónze ó, nzě jɨ̂ʼ mɨ́ná gá nkoó. Bónáá gá nye. Nye ódi e bɨ̌n ó, tô tóʼ, tó pyâl pyáláa ɨ́ twǐʼ njʉ̌m dǐ.

²² Jɨ́ʼɨ́ɨ́ gá bʉr o dí le elíʼa bá nkoó.

²³ Tiʼɨɨ gá baá mû sí lʉ́ŋa ɨ́ siʼe bá. Syɛbɨɨ gá bé ɨ́ siʼe yaá. Jɨ́ʼɨ́ɨ́ gá bʉr nkoó. Milémé mín jɨ́ʼɨɨ bé nkoó, lɨ́ ekɛ̂n bɨ́n dí ejóʼo ɨ́ bisyɛ́ɛla byɔ́ɔ́ lɨ́. Benaa gá syɛ́ɛla ébébe yɔ́ɔ́ yɨ́yɛ̂h, kumǒ kumáa e mikán bé á bubwâr ɨ́ menyʉ́l mɔ́ɔ́ mí, ebě, myé mû ó sí bil mpîr.

Ndwéá kûm épíhe

²⁴ Kûm, mpwaʼ, nkul le jwɨ́ɨ, byé díʼee e mʉr dí e nkul ekamle e bɨ̌n ó, bɨ̌n sá atwe, waá ntémé dí e nkul etyêl bɨ́n ɨ́ míh mé, abe e sá ébébe nyé óboʼlo bɨ́n e tɨ̂, le bisʉhʉʉ ɨ́ buo buo nyá.

²⁵ Nye omér ó dí Nzyɛ̌m. Kûm dwéŋɔɔ Nzyɛ̌m, dí Tiʼbʉr gá wɨ́ná nyá, ɨ́ nzɨ̌ mé Yésʉs-Krîst, Tî gá wɨ́ná, táare ɨ́ mimbú mí píhe, le ɨ́ báánâ, tó kumǒ kumáa ɨ́ twǐʼ njʉ̌m dǐ e njʉ̌m dǐ. Amɛn.