Yʉanes 9 - Kálar Nzyɛ̌m : Ejwán é Sáá

Mʉr á byɛ̂l ántím nyá

¹ Yésʉs lɨ́ ekǎ laa yʉ́ʉ́ gúmo nɛ́ɛ: nye nzě bee nyʉ́ʉ́ mʉ̂r á byɛ̂l e ntím nyá.

² Ompʉ́n bé, nzě dî e né ó: «Lɛ̂ʼla, mʉr nyâʼ á byɛ̂l e ntím ɨ́ yé? Nzê ɨ́ lɔ̌b syóm wé, nye mʉr tɨ̂ʼ ɛ̌? Nzê ɨ́ lɔ̌b syóm óbyɛ́l bé, bé á sâ wɨ́ ɛ́?»

³ Yésʉs, nye e bé ó: «Yé abe ɨ́ lɔ̌b syóm wé, nkʉ̂ waá óbyɛ́l bé. Nye á byɛ̂l e ntím ó, lɨ́ esú ó, bisyɛ́ɛla mé Nzyɛ̌m, byé nyɨ́nɨɨ e né.

⁴ Mɨná sâʼ gá syɛ́ɛla me Mʉ̂r á ntɨh me nyá, yé dína móhó, ebě, pum, wé mû ó lɨ́ enzě dwíne, mʉr akǎ be e nkul eséa.

⁵ Jɔʼ yɨ́yɛ̂h mé dína ɨ́ sí yɨ̂ʼ yɨ́, me ó dí njʉl dí ɨ́ sí yɨ̂ʼ wɨ́.»

⁶ Jɔ̌ʼ Yésʉs á be ɨ́ lɛ́ɛ nó yɨ́, nye nzě syɛɛ métyéelé sí, nzě pulo bwá bíbwǎh e metyéelé mé, ntɔ̂ʼ lœm ántím byǎ ɨ́ mîh.

⁷ Nye e né ó: «Tóʼ, tó jwɨɨ mîh ɨ́ béh Siloâm.» (Díe laá, lé páʼlɔ́ɔ́ ó: “Lʉ́mlʉ́.”) Ántím nzě tó jwɨɨ mpóm. Nyé ká búla nɛ́ɛ: nye mû ó lɨ́ ebee.

⁸ Jyɛɛ́ yé ndu e baá bé á bɨbee nye ɨ́ diá nkóó bá, bé ó: «Ɔ́ɔ! Ntʉ mʉ̂r á didi wâʼ ndîndǐl lɨ́ egwâm bísâ nyâʼ ɛ̌?»

⁹ Bâʼ bʉ̂r, bé ó: «Nye ó nɨ̌ ʉ.» Bʉ́ʉ́, bé ó: «Yaá! Yé abe nyê. Bé e nɔ́ɔ́, bé nwɨɨla yɨ́ɛ ó, nwɨɨláa.» Mʉ̌r nɨ̌, nye e bé ó: «Yé ó mɛm mʉr tɨ̂.»

¹⁰ Bê nzě gɔ́na le edî nyé metíá. Bé e né ó: «Míh mô, mé á bɔ́a nyá?»

¹¹ Mʉ̌r nɨ̌, nye e bé ó: «Mʉr dí e díe ó, Yésʉs nyá, nye bé ɨ́ pulo bwá bíbwǎh, lœm mé byǎ ɨ́ mîh. Nye e me ó, me tôʼ ɨ́ béh Siloâm, tó jwɨɨ mpóm. Me ntɔ̂ʼ tô. Jɔʼ mê jwɨɨ mpóm yɨ́, me ntɔ̂ʼ kʉ́ táare ébee ɨ́ sʉ́lʉ́lʉ́.»

¹² Bê nzě dî e né ó: «Mʉr waá, nye nkoó?» Nye ó: «Mé agʉ́ǎ nko nyé dí yɨ́.»

OFarizyɛ̂n, bé lɨ́ edî ántím metíá

¹³ Bʉr baá nzě nʉa mʉ̂r á bɨbe e ntím nyá, tô e né súm óFarizyɛ̂n, bé á be yɨ́.

¹⁴ Náǎ yé ó, Yésʉs á pulo bibwǎh, jomo mʉ̂r nɨ̌ mîh ó ɨ́ móhó sábat.

¹⁵ Nó yaá ó óFarizyɛ̂n bé á dî e mʉ̌r nɨ̌ sá yé á sâ ó, nye béyɨɨ yɨ́. Nye ó: «Nye bé ó sí lœm mé bwá bíbwǎh ɨ́ mîh. Me nzě tó jwɨɨ mpóm. Nó ó, báánâ, me mû ó lɨ́ ebee.»

¹⁶ Bâʼ óFarizyɛ̂n, bé ó: «Mʉr sá mbǐ syɛ́ɛla wɨ̂ʼ nyá, nyé abe e nkul eduho kwá mé Nzyɛ̌m, ebě, nyé adû mémpéné mé móhó sábat.» Bʉ́ʉ́, bé ó: «Nyá? Syɛ̂l misyóm, nyé abe e nkul esâ mbi ésimá wɨ̂.» Bʉr ntɔ̂ʼ bɔ́ʼa ménkɔb mebá.

¹⁷ OFarizyɛ̂n nzě báʼǎ díŋɔɔ mʉ̂r á tiʼɔɔ nyá ó: «Guá lɛ́ɛ́ yé, dumo e mʉr bɛ́ɛ́ gó mîh nyá?» Nye ó: «Yé ó ngwíha milɔ̌b mé Nzyɛ̌m.»

¹⁸ (OYúden, bé á be ɨ́ jɔʼ yaá ó, akpɛl ébûʼla ó, nye á bɨbe ó ántím, nye ntɔ̂ʼ kǎ bee.) Bê nzě jébe sɔ́ŋ ndu e nyɔ̌ŋ wé,

¹⁹ nzě díŋɔɔ bé metíá. Bé e bé ó: «Nzê yê tyeetye ó, mʉr nyâ, nye ó mwân wɨ́n ɛ̌? Nó ó, bɨ̌n kʉ́ bánǎ lɛ́ɛ ó, nye á byɛ̂l ó e ntím ɛ́? Nó ó, yê ka sá ó, nye béyɨɨ ɨ́ báánâʼ mpʉʼ yɨ́ ɛ́?»

²⁰ Obyɛ̂l bé nzě yala e bé ó: «Bɨ̌h bé lɨ́ egʉ́a ó, yé ó mwân wɨ́h. Bɨ̌h bé lɨ́ egʉ́a ntémé ó, nye á byɛ̂l ó e ntím.

²¹ Sâ gwár, bɨ̌h bé agʉ́ǎ sâ sá ó, nye béyɨɨ yɨ́. Bɨ̌h bɨɛ, bé agʉ́a mʉ̂r bɛ́ɛ́ nyé mîh nyá. Jíʼéé gá nye mʉr tɨ̂. Nye mû ó mbi mʉ̂r jálá le ebɛ̂ʼ myé mílɔ̌b wɨ́.»

²² (Náǎ yé ó, Sɔ́ŋ ndu e nyɔ̌ŋ, bé á lwilwib nó ó, ebě, bé á be ó lɨ́ ekpɛ́ɛ óYúden, ebě, oYúden baá, bé á bě sí di twíí páʼ nyɔ́ɔ́ ó, mʉ̂r sí lɛ́ɛ ó, Yésʉs, nye ó Mʉ̌r Nzyɛ̌m á lœm múló mé jwɨ́ɨ nó, nye sóŋɔɔ ɨ́ mpáh minjɨʼla nyɔ́ɔ́.

²³ Nó yaá ó óbyɛ́l bé, bé á lɛ́ɛ ó: “Nye mû ó mbi mʉ̂r jálá le ebɛ̂ʼ myé mílɔ̌b wɨ́. Jíʼéé gá nye mʉr tɨ̂ʼ” yɨ́.)

²⁴ OFarizyɛ̂n nzě báʼǎ jébe mʉ̂r á tiʼɔɔ nyá. Bé e né ó: «Lɛ́yɨ́ɨ́ ótyeetye ɨ́ míh mé Nzyɛ̌m. Bɨ̌h bé lɨ́ egʉ́a ó, mʉ̌r nɨ̌, nye ó syɛ̂l misyóm.»

²⁵ Nye ó: «Mɛm mé agʉ́a yâm nkʉ̂ nye syɛ̂l misyóm, nkʉ̂ nyé abe nyê. Sá mé dí ejaá gʉ́a yɨ́, yé ó njɨ gwár: me á bɨbe ó ántím. Nó ó, ɨ́ báánâ, me mû ó lɨ́ ebee ɨ́ púúm.»

²⁶ Bê nzě báʼǎ dî e né ó: «Nye pa sá gó nyá? Nye bɛ́ɛ́ gó mîh nyá?»

²⁷ Nye ó: «Me bé ó sí boó lɛ́ɛ bɨ́n. Nó ó, bɨ̌n bé akpɛl éjóʼo. Bɨ̌n kǎ kpɛl ó, me báʼa lɛ́ɛ bɨ̌n yé swîh ɛ̌? Nzê bɨ̌n ntémé mû ó lɨ́ egwɨ̂m édi ómpʉ́n bé ɛ́?»

²⁸ Bê nzě táare élwɨ́ɔɔ nyê. Bé e né ó: «Gua, go óbɛ̌m di mpʉ́n wé. Sâ gwár, bɨ̌h bɨɛ, bé ó ompʉ́n mé Moyɨ̂z.

²⁹ Bɨ̌h bé lɨ́ egʉ́a ó, Nzyɛ̌m á be ó sí lwib e Moyɨ̂z. Sâ gwár, mʉr nyâ, bɨ̌h bé agʉ́ǎ nko nyé á duho yɨ́.»

³⁰ Mʉ̌r nɨ̌, nye e bé ó: «Sá ékâm, yé ó bɨ̌n bé agʉ́ǎ nko nyé á duho yɨ́, nyɨɛ bé yɨ́ɛ ó sí bɛ́ɛ mé mâm mîh.

³¹ Mɨná bé lɨ́ egʉ́a gá ó, Nzyɛ̌m, nyé abe lɨ́ ejóʼo ósyɛ̂l o mísyóm. Nyě jaá jôʼlo ó, njɨ mʉr dí edwe nyé kûm, waá dí esâ gwɨ́má yé nyá.

³² Mɨná bé apǎ jóʼo gá lʉ́ʉ́ dʉ́o bé lɨ́ elɛ́ɛ ó, kɛl, nyɨ́ pǎ tiʼ mʉ̂r á byɛ̂l e ntím nyá.

³³ Yé bé mʉr waá, nyé aduho kwá mé Nzyɛ̌m nó, lɛ́ɛ́, nye bé abe e nkul esâ sɔ̂ʼ nó.»

³⁴ Bé e né ó: «Gbaa gó á byɛ̂l, go ó njɨ témé misyóm. Gǒ lɛ́ɛ́ ó, gǒ lɛ́ʼlé ó, bɨ̌h ɨ́?» Ntɔ̂ʼ soŋɔɔ nyé ɨ́ mpáh minjɨʼla nyɔ́ɔ́.

Mʉr nyɨnyɛ̂h dí esâ syóm nyá, nye ó ántím

³⁵ Yésʉs ntɔ̂ʼ jóʼo ó, mʉr nyé á tiʼ nyá, bé á be ɨ́ so nyé ɨ́ mpáh minjɨʼla nyɔ́ɔ́. Nye nzě bɔma e né. Nye e né ó: «Nzê go lɨ́ edyɛ̂ʼwo e Mwân mé Mʉr ɛ̌?»

³⁶ Nye e né ó: «Dâ ɛ̌, lɛ́yɨ́ɨ́ mé waá dí ejébɔɔ “Mwân mé Mʉr” nyá, ó me dyɛ̂ʼwaa e né.»

³⁷ Yésʉs, nye e né ó: «Go lɨ́ ebee nyê. Nye ntémé ó dí elwib e go ɨ́ báánâʼ nyá.»

³⁸ Mʉ̌r nɨ̌, nye e né ó: «Dâ ɛ̌, mɨ́ dyɛ̂ʼwo e go!» Nye ntɔ̂ʼ bɨʼ mébóó sí ɨ́ mpǒm mé Yésʉs.

³⁹ Yésʉs, nye ó: «Me á nze ɨ́ sí yɨ̂ʼ ó, lɨ́ enzě tíʼe bʉ̂r milɔ̌b. Me á nze sâ ó, baántím, bé béyɨɨ; baá o dí ebee bá, líŋaa baántím.»

⁴⁰ Bʉ́ʉ́ óFarizyɛ̂n, bé e boo nɔ́ɔ́ bé á be bá, nzě jóʼɔɔ̌ lwǐb nɨ̌. Bé ntɔ̂ʼ dî e né ó: «Nzê bɨ̌h bɨɛ ntémé bé ó baántím ɛ́?»

⁴¹ Yésʉs, nye e bé ó: «Yé bé bɨ̌n bé á bɨbe ó baántím nó, lɛ́ɛ́, bɨ̌n á gwa be ó mbɨ̂mbɨá, syóm akǎ be. Nó mpʉ bɨ́n lɛ́ɛ́ ó, bɨ̌n bé lɨ́ ebee yɨ́, nó yaá ó bɨ́n dína lɨ́ edi e misyóm mín yɨ́.»