Yʉanes 5 - Kálar Nzyɛ̌m : Ejwán é Sáá

Yésʉs lɨ́ etiʼ mʉ̂r á be nzwoó nyá

¹ Píe tɨ̂, nyʉ́ʉ́ nzɔ́ɔ oYúden nzě pyâl. Yésʉs nzě tô Yerʉ́zalɛm.

² Ɨ́ nkana yaá, yé e béh éjwɨa kúnókúno le Ebé é Bwá ó Bínteme. Béh yaá, yé jébɔ́ɔ́ ɨ́ lwǐb ébrœ̂ ó, “Betzéda”. Mempáh, mé á be ó tɨ̂, metɛ̂n, ɨ́ nkpâh béh yaá.

^3-4 Ɨ́ mempáh maá ó mímbêl ɨ́ buo buo, myé á jɨjâ yɨ́, táare e bʉr o b'á bíle bá, le baántím, le bʉr o dí etɨ́a bá, le bʉr o b'á be e bitíl bí nyʉ̂l ɨ́ swâm swâm bá.

⁵ Nyʉ́ʉ́ mʉ̂r á be ó tɨ̂, nyé osí bíle tâŋ mimbû mekám mélɛ̂l e mwom.

⁶ Jɔ̌ʼ Yésʉs á bee nye njáʼ sí, gʉ́a ntémé ó, nyɨ́ boó bíle ékpaa laá yɨ́, nó ó nyé á lɛ́ɛ e mʉ̌r nɨ̌ ó: «Nzê go lɨ́ egwɨ̂m étiʼe ɛ̌?»

⁷ Mbêl waá, wé e né ó: «Dâ ɛ̌, mé abe e mʉr tó dubo mé ɨ́ béh ɨ́ jɔʼ médíbé dí epɨ̂ʼla yɨ́. Jɔʼ yɨ́yɛ̂h mé mû lɨ́ esáa ó, me tô duba yɨ́, nyʉ́ʉ́ mʉ̂r dí ɨ́ kpâhwa, laa mé nyá, nye lɨ́ etó duba lɨ́ esôʼ.»

⁸ Yésʉs, nye e né ó: «Gbɔlwaa sí. Go e nkɛ́ɛ́ myɛɛla gô. Bʉŋláa.»

⁹ Tyé e tyé yaá, mʉ̌r nɨ̌ nzě tiʼe, nzě nkɛ́ɛ̌ kala yé, ntɔ̂ʼ táare étye. Ɨ́ mpʉ yé á syɛ́ɛ ɨ́ móhó sábat yɨ́,

¹⁰ oYúden ntɔ̂ʼ lɛ́ɛ e mʉr á tiʼɔɔ nyá ó: «Mûh, yé ó móhó sábat. Nó ó metié gá mɨ́ná, mé akam ó, go nkɛ́yɨɨ kala yô.»

¹¹ Nye ó: «Mʉr tiʼ mé nyá, nye ô lɛ́ɛ́ mé ó: “Nkɛ́yɨ́ɨ́ kala yô. Bʉŋláa.”»

¹² Bé e né ó: «Nzê lɛ́ɛ́ gó ó: “Nkɛ́yɨ́ɨ́ kala yô. Bʉŋláa”?»

¹³ Sâ gwár, mʉr á tiʼɔɔ nyá, á bé agʉ́a díé é mʉ̂r á tiʼ nye nyá, ebě, Yésʉs á si laa, ntɔ̂ʼ nî lɨ́ entumo e bʉ̂r o b'á bě gúmo yaá bá.

¹⁴ Píe tɨ̂, Yésʉs nzě tó bɔma e mʉr waá ɨ́ mpáh Nzyɛ̌m. Nye e né ó: «Mě lɛ́ɛ́ gó, ɨ́ jɔʼ yɨ̂, go mû ó sí tiʼe. Akǎ báʼǎ sâ syóm. Sá dí ɨ́ buú bébe yɨ́, yé ámû jaá pyâl gô.»

¹⁵ Mʉ̌r nɨ̌ nzě laa, tó lɛ́ɛ óYúden ó, nkúná mʉr á tiʼ nye nyá, á be ó Yésʉs.

¹⁶ Nó óYúden bé á to le etíblě syɛ́ɛ́ mé Yésʉs yɨ́, ebě, nye á si sâ mbǐ syɛ́ɛla waá ɨ́ móhó sábat.

¹⁷ Nó ó Yésʉs á nze lɛ́ɛ e bé ó: «Sɔ́ŋ wǎm séá ó bijɔʼ bíbyɛ̂h, nzě kumo ɨ́ báánâ. Mɛm ntémé, me lɨ́ eséa.»

¹⁸ Ɨ́ lɔ́ɔ́ wé waá ó óYúden bé á to dóló le esáa ó, bé jʉ́ ó nye yɨ́. Bé á bé asáa éjʉ̂ nyé njɨ ɨ́ lɔ̌b mémpéné mé móhó sábat nyé á ntaa má. Bé á sáa ejʉ̂ nye ntémé ó, ebě, nye á lɛ́ɛ ó, Nzyɛ̌m, nye ó sɔ́ŋ wé, ánta nye. Bʉr baá, bé á bee ó, nye á be lɨ́ epɨra e Nzyɛ̌m.

Jwɨ́ɨ́ mé Mwân mé Nzyɛ̌m

¹⁹ Yésʉs nzě báʼǎ nʉǎ lwǐb. Nye ó: «Mě lɛ́ɛ́ bɨ́n lɨ́ otyeetye ó, Mwân mé Nzyɛ̌m, nyé abe lɨ́ esâ yʉ́ʉ́ sɔ̂ʼ e nkul nyé mʉr tɨ̂. Nyě jaá sâ ó, njɨ syɛ́ɛla nyé dí ebee Sɔ́ŋ wé lɨ́ esâ yɨ́, ebě, syɛ́ɛla yɨ́yɛ̂h Sɔ́ŋ dí esâ yɨ́, yé ntémé ó Mwân wé dí esâ yɨ́.

²⁰ Ebě, Sɔ́ŋ, nye lɨ́ ekpɛl Mwân wé. Nye lɨ́ elɛ̂ʼle nyé sá nyé mʉr tɨ̂ʼ dí esâ yɨ́. Nye ólɛ̂ʼle nyé bisyɛ́ɛla nyé ókǎ tô le esɨ̂sa bí. Byé ólaa byaá bî, bɨ̌n nkʉ̂ buú kâm.

²¹ Ebě, jwɨʼ gwár mpʉ Sɔ́ŋ dí epɛh ódwe, báʼǎ dwe bé twiʼ yɨ́, nó ntémé ó Mwân ódwe baá nyé kpɛ̂l bá twiʼ.

²² Sɔ́ŋ, nyé abe lɨ́ etíʼe bʉ̂r milɔ̌b. Nye á be ɨ́ boó dwe Mwân wé nkul nyɨnyɛ̂h ó, nye tíʼaa milɔ̌b mímyɛ̂h,

²³ ó bʉr bɨ́bɛ̂h, bé dwêʼ Mwân dúu jwɨʼ gwár e gwár e mpʉ bé dí edwe Sɔ́ŋ yǎ yɨ́. Mʉr dí adwe Mwân dúu nyá, nyé adwe ntémé Sɔ́ŋ, mʉr á pa ntɨh nye nyá dúu.

²⁴ «Mě lɛ́ɛ́ bɨ́n lɨ́ otyeetye ó, mʉr ngá jôʼlǒ lwǐb yâm le edyɛ̂ʼwo e mʉr á ntɨh me nyá, nyɨ́ bǐ twǐʼ njʉ̌m dǐ. Nye ákǎ tíʼɔɔ mílɔ̌b. Nyɨ́ boó duho lɨ́ eswie, ntaa ɨ́ twǐʼ njʉ̌m dǐ.

²⁵ Mě lɛ́ɛ́ bɨ́n lɨ́ otyeetye ó, jɔʼ, yé lɨ́ enze. Yé ntémé, yɨ́ pyâl: jɔʼ ódwe, bé ójóʼo twíí Mwân mé Nzyɛ̌m yɨ́. Baá bé ójóʼo nyé bá, bé ótiʼe.

²⁶ Ebě, jwɨʼ gwár mpʉ̌ Nzyɛ̌m Sɔ́ŋ dí e twǐʼ njʉ̌m dǐ ɨ́ nye mʉr tɨ̂ʼ yɨ́, nó ntémé ó nyé á sâ ó, Mwân díʼee e twiʼ yaá.

²⁷ Nye ntémé á si dwe Mwân nkul etíʼe mílɔ̌b, ebě, nye ó dí Mwân mé Mʉr.

²⁸ Mʉr akâm gâ. Jɔʼ yé múo nzě pyâl, jɔʼ ódwe bɨ́bɛ̂h dí ɨ́ mesoo bá, bé ójóʼo twíí Mwân mé Mʉr yɨ́.

²⁹ Bé opah ɨ́ mesoo. Baá bé á sâ embɨa bá, bé ópah, bǐ twǐʼ njʉ̌m dǐ. Baá bé á sâ ebébe bá, bɨ́ɛ ntémé ópah; bé otíʼɔɔ mílɔ̌b.»

Oboʼlo mé Yésʉs

³⁰ «Mé abe e nkul esâ yʉ́ʉ́ sɔ̂ʼ e mɛm mʉr tɨ̂. Mě tíʼé mílɔ̌b ó, njɨ̌ mpʉ̌ Nzyɛ̌m dí elɛ́ɛ mé yɨ́. Etíʼ é mílɔ̌b lâm, lé ó tîtyěl, ebě, mé abe lɨ́ esâ mpʉ mé dí egwɨ̂m yɨ́, njɨ̌ mpʉ mʉ̂r á ntɨh me nyá dí egwɨ̂m yɨ́.

³¹ Yé bé mě boʼló ó lɔ̌b wâm mɛm mʉr tɨ̂ʼ nó, lɛ́ɛ́, mboʼlá waá, wé abe le otyeetye.

³² Sâ gwár, yé e nyʉ́ʉ́ mʉ̂r dí eboʼlǒ lɔ̌b wâm nyá. Mɛm, me lɨ́ egʉ́a ó, mboʼlá nyé dí eboʼlo, dumo e me wɨ́, wé ó tyeetye.

³³ Bɨ̌n bʉr o tɨ̂ʼ, bé á si lómo bʉr e mempáŋla kwá mé Yʉánɛs. Nye ntémé á si boʼlo lɨ́ otyeetye.

³⁴ Ɨ́ wâm pâʼ, mé agwɨ̂m ó, mʉr bôʼlaa mekǎn mâm. Mě báʼá lɛ́ɛ bɨ́n mekǎn mâʼ ó, ebě, me lɨ́ egwɨ̂m ó, bɨ̌n tíʼaa.

³⁵ Yʉánɛs á be ó mpʉ̌ twimá éláma dí ekʉn nzɨ́ lɨ́; bɨ̌n nzě kpɛl ó, bɨ̌n sóhaa tâŋ mâ jɔʼ ɨ́ njʉl éláma waá.

³⁶ Sâ gwár, mɛm, mě e mboʼlá, laá mboʼlá mé Yʉánɛs, ebě, bisyɛ́ɛlǎ Nzyɛ̌m Sɔ́ŋ á dwe me ó, me sâʼ bí, byé ó mé dí esâ. Byé boʼlo ó, Nzyɛ̌m Sɔ́ŋ ó b'á ntɨh me.

³⁷ Ntémé, Nzyɛ̌m Sɔ́ŋ, mʉr á ntɨh me nyá, nye mʉr tɨ̂ʼ á be ó sí boʼlo ɨ́ lɔ̌b wâm. Bɨ̌n bé apǎ jóʼo twíí nyé. Bɨ̌n ntémé apǎ bee mpóm nyé.

³⁸ Mekǎn me Sɔ́ŋ wǎm, mé aséa bɨ́n ɨ́ miléme, ebě, bɨ̌n bé adyɛ̂ʼwo e mʉr nyé á ntɨh bɨ̌n nyá.

³⁹ Bɨ̌n bé lɨ́ etoʼo Mékaná mé Nzyɛ̌m, lɨ́ ejwɨʼ ó, bɨ̌n bé óbǐ twǐʼ njʉ̌m dǐ tɨ̂. Tó kœb ó, Mekaná mé Nzyɛ̌m maá, mé ó dí eboʼlo bɨ́n lɔ̌b wâm!

⁴⁰ Sâ gwár, bɨ̌n bé akpɛl énze kwá nyǎm, lɨ́ enzě bǐ twiʼ.

⁴¹ «Mé abe lɨ́ esáa kûm dí eduho e bʉr nyɨ́.

⁴² Sâ gwár, me lɨ́ egʉ́a bɨ́n: me lɨ́ egʉ́a ó, bɨ̌n bé akpɛ̌l Nzyɛ̌m.

⁴³ Mɛm á nze ó ɨ́ díé mé Sɔ́ŋ wǎm, bɨ̌n l'akpɛl énʉa mê. Sâ gwár, nyʉ́ʉ́ mʉ̂r ká nze ɨ́ lé díe nye mʉr tɨ̂ʼ nɛ́ɛ: bɨ̌n bé ónʉa nyê.

⁴⁴ Bɨ̌n jaá kpɨkpɛl ébi kûm ó, njɨ páʼ nyɨ́n. Bɨ̌n bé akpɛl ébi kûm dí eduho kwá mé waá dí Nzyɛ̌m nye omér nyá. Yé bé nó wá, á bɨ̌n bé ódyɛ̂ʼwo e Nzyɛ̌m nyá?

⁴⁵ Sâ gwár, ajwɨʼ gá ó, me ópur bɨ́n ɨ́ míh mé Dâ. Moyɨ̂z, mʉr bɨ́n á pa dyɛ̂ʼwo e né nyá ó ngá pur bɨ́n.

⁴⁶ Yé bé tyeetye ó, bɨ̌n bé á si bûʼla lɔ́ɔ́ mé Moyɨ̂z nó, lɛ́ɛ́, bɨ̌n bɨ́ dyɛ̂ʼwo e me, ebě, nye á cɨcɛma ó, lɔ̌b wâm.

⁴⁷ Bɨ́n óbe, abûʼlǎ sá nyé á cɛma yɨ́ nó, á bɨ̌n bé ógwá bûʼlǎ lɔ́ɔ́ wâm nyá?»