Títos 3 - Kálar Nzyɛ̌m : Ejwán é Sáá

Sɨ́sáʼ bísyɛ́ɛla bimpâ

¹ Jɨ́mɨ́ɨ́ bʉ̂r bitɔŋlá ɨ́ milɔ̌b mî: bé díʼee ɨ́ jwɨ́ɨ́ bʉ̂r o dí e nkul jwɨ́ɨ bá. Bé sâʼ bé mejóʼo. Bé díʼee ntémé ɨ́ cǎr lɨ́ esú lé ésâ bísyɛ́ɛla bimpâ mimbi mímyɛ̂h.

² Bé sá asâ nyʉ́ʉ́ mʉ̂r mesyɛ́ɛla. Bé ayɨ́ di báányâ-bitɔm. Bé díʼee e lémé mpâm, ɨ́ tyɛ̌ʼ njwɨr ɨ́ nkǒ páʼ bʉ̂r bɨ́bɛ̂h.

³ Ebě, mɨná gá bɨɛ á nyɛɛ be ó nó: bigʉʼlʉgʉ́, baajóʼo-mélɨ́, sí dîm. Mɨná bé á didi gá ó, bitúʼǎ bígwɨ́má mimbi mimbi. Mɨná bé á títíʼe gá ó, lɨ́ esâ bʉ̂r ebébe é léme le nzwíí. Bɨ́ɛ ntémé lɨ́ esíe bɨ́ná gâ. Mɨná bɨɛ ntémé, bé á si nwimla páʼ gá nyɨ́ná.

⁴ Jɔʼ yaá ó Nzyɛ̌m, Tiʼbʉr gá wɨ́ná á ka lɛ̂ʼle mɨná mpam nyé yɨ́.

^5-6 Nye á tíʼ mɨná gá ó, ɨ́ nzɨ̌ njɨ́ʼá nkóó wé. Nye á bé atíʼ mɨ́ná ɨ́ lɔ̌b bísyɛ́ɛla bimpâ mɨ́ná bé á sâ lɨ́ otîtyěl gá wɨ́ná bí. Nye á tíʼ mɨná ó, ɨ́ pubá nyé á pubo mɨná gá e Sísǐm wé wɨ́. Pubá waá, wé ó b'á dwe mɨná gá mbyɛ́lá dwân, le esâ ó, mɨná díʼee medwán mé bʉ̂r. Nye á si kab mɨná gá Sísǐm wé ɨ́ ntʉʉʉ́ ɨ́ nzɨ̌ mé Yésʉs-Krîst, Tiʼbʉr gá wɨ́ná.

⁷ Nye á si tíʼ mɨná, sâ ó, mɨná bíʼee gá nkam ɨ́ míh mé ɨ́ nzɨ̌ mpam nyé. Mɨná bé ódi gá ntémé ɨ́ baá nyé á dwe twǐʼ njʉ̌m dǐ, jala e nkɔb líʼe nyɔ́ɔ́ bá. Mpûʼla, nye mɨná gá ɨ́ miléme ó, mɨná bé óbi gá nkɔb nyaá.

⁸ Lwǐb nɨ̌, yé ó yaá jálá le ebúʼlɔɔ yɨ́. Mě kpɛl ó, go nkʉ̂ gʉ́a dwe bʉ̂r milɛ́ʼlá mínɨ̌. Ɨ́ gúmo yaá ó bʉ̂r o b'á dyɛ̂ʼwo e Nzyɛ̌m bá, bé ósɨsâ bísyɛ́ɛla bimpâ yɨ́. Bisyɛ́ɛla byaá, byé e nyɔm ɨ́ nkǒ páʼ bʉ̂r bɨ́bɛ̂h.

⁹ Diʼeě e mpaŋ ncɛ́rá e bʉr o dí elwib bísá mílɔ̌b mi dí abe e nyɔm, le myaá dí dwêh mí. Bé lɨ́ edǒ mpʉ bígʉ̌, le epére mékǎn, lɨ́ edǐ gʉ́ǎ lɔ̌b lɔ́ɔ́ ntán wɔ́ɔ́. Bé lɨ́ ekpɛl égœ́a e bʉr, ti e l'esâ míngamla ɨ́ lɔ̌b métié mé Nzyɛ̌m.

¹⁰ Mʉr kpɛ́l ésâ mpɔ́ʼá menkɔ̌m nyá, go e cɨ́l nyé jɔʼ gwár, nkʉ̂ nzɔʼ bá. Píe tɨ̂, bɨ̌n bé ayɨ́ kǎ be e ndwáala e né.

¹¹ Go ɨ́ jala le egʉ́a ó, mbi mʉ̂r waá, wé lɨ́ edû kʉ̌ tyen dí lɨ́ onzyɛ́h ónzyɛ́h wɨ́. Nye ó syɛ̂l misyóm. Lwǐb yé, yé mʉr tɨ̂ʼ ó dí edwe nyé mebě.

Meswɨhlɨ

¹² Páʼ Artémas bé e Tisikôs, me ólómlo gó mʉr ngwár ɨ́ sɔ́má yɔ́ɔ́. Ɨ́ jɔʼ mʉ̂r tɨ̂ʼ ókumo kwá nyǒ yɨ́, go e sá mímbi mímyɛ̂h ó, go tôʼ kœb mé ɨ́ Nikɔ́pɔlis, ebě, mɨ́ tíʼe ɨ́ lémé wâm ó, kóló, yé ólaa mé ó gʉ̂.

¹³ Gbáʼ nkûl lɨ́ esúʼǒ Zénas, kɔmlʉ gá wɨ́ná, bé e Ápolos, ɨ́ tyen yɔ́ɔ́. Sáʼ ó, sɔ̂ʼ ayɨ́ gwíi bé téme-nzɨ̌.

¹⁴ Yé jɨ ó, bʉr o dí ɨ́ páʼ gá wɨ́ná bá, bé jɨ́ʼɨɨ elóŋlo bísyɛ́ɛla bimpâ. Nó yaá ó bɨ́n ngá gwá súʼo báántéʼenteʼe ompâ yɨ́. Mʉ̌r sá abîr ó, nye tíʼaa ɨ́ sí yɨ̂ʼ, agúmo mpúmó.

¹⁵ Sɔ́má yâm yɨ́yɛ̂h, yé lɨ́ esoho gô. Sohaa ósó gá bɨ́ná, baá o dí ɨ́ buú kpɛl bɨ́h ɨ́ mpúhlá gá nyɨ́ná bá. Nzyɛ̌m sʉ́ʼoo bɨ̌n óbɛ̂h metyɛʼ me mpóm mé.