Títos 2 - Kálar Nzyɛ̌m : Ejwán é Sáá

Metwɨ́ɨ́ mé óbûʼla

¹ Gua, lɨ́lɛ́ʼláá sá yɨ́yɛ̂h dí ejala e lɛ́ʼlá mpâ mɨ́ná dí edwe gá wɨ́ yɨ́.

² Lɛ́yɨ́ɨ́ ótɔ́má ó bʉ̂r ó Mbɛ̌r-Nzyɛ̌m ó: bé ajala le ede ményoʼ, puro. Bé dwêʼ menyʉ́l mɔ́ɔ́ medile, le etíʼě mpʉ bʉ̂r o dí epahle bá jálá le esâ yɨ́. Sá bé dí ebúʼla yɨ́, yé díʼee mpʉ mɨ́ná dí elɛ̂ʼle gá yɨ́. Bé díʼee bʉr o dí ecwɨ́a e bʉ́ʉ́ bʉ̂r bá. Bé dûhwaa ntémé mitúú.

³ Lɛ́yɨ́ɨ́ mísile mi bʉ́bá jwɨʼ gwár ó, bé dúʼoo mbǐ kʉ̌ tyen dí ejala e mʉr dí edwáawǒ Nzyɛ̌m nyá. Bé sá aswêʼ míé mé bʉ́ʉ́ bʉ̂r. Bé ayɨ́ lɔ̂ʼwa ɨ́ ndéá ményoʼ, nkʉ̂ di bítúʼǎ bi tɨ̂. Bé dwêʼ bʉr mimpaŋ mélɨ́,

⁴ lɨ́ esú lé élɛ̂ʼle méséhé mé bʉ́bá mpʉ mé jálá le ekpɛl ójʉ́m bɔ́ɔ́, ti e bwán bɔ́ɔ́ yɨ́.

⁵ Meséhe maá, mé dwêʼ menyʉ́l mɔ́ɔ́ medile, le ebaʼle ményʉ́l mɔ́ɔ́ lɨ́ esú mé Nzyɛ̌m. Mé séaa ɨ́ mimbɛ̌r myɔ́ɔ́, le ecwɨ́a e bʉr. Mé sâʼ ojʉ́m bɔ́ɔ́ mejóʼo. Sá tɨ̂ʼ ó bʉ̂r, bé óbe, akǎ pyǎ lɔ́ɔ́ mé Nzyɛ̌m yɨ́.

⁶ Tɨ́áá mísohó ntémé ó, myé gʉ́ŋaa epahle mbɨ̂mbɨá.

⁷ Kʉ̌ tyen gô, wé díʼee mbɨ̂mbɨá ɨ́ mipáʼ mímyɛ̂h, lwɨ́ŋlá e bisyɛ́ɛla bimpâ. Dwéʼ bʉ̂r milɛ́ʼlá e léme dí abě mbáʼrá e mikóo wɨ́. Bé béyɨɨ go ntémé e medile.

⁸ Lwǐb yô, yé díʼee lwɨ́ŋlá e lɛ́ʼlá mpâ mɨ́ná dí edwe gá wɨ́. Ɨ́ tɨ̂, bʉ̂r bé óbe, akœ̌b sá ébébe bé ólɛ́ɛ, dumo e lwǐb yô yɨ́. Bʉr o dɔ̂m ónɨ̌, bé ókǎ jóʼo sôn ntémé, bé l'abe e sá ébébe bé ólɛ́ɛ, dumo e mɨná gâ.

⁹ Bitúʼǎ, byé ɨ́ jala le edi ɨ́ jwɨ́ɨ́ ósɔ́ŋ bɔ́ɔ́ ó, ɨ́ bijɔʼ bíbyɛ̂h. Byé sáŋaa menzɨ̌ ó, ojwɨ́ɨ́ bɔ́ɔ́, bé béyɨɨ bisyɛ́ɛla byɔ́ɔ́ mbɨ̂mbɨá. Byé ayɨ́ do e bê.

¹⁰ Byé ajala le ejaa mébô ɨ́ páʼ bísá bí ójwɨ́ɨ́ bɔ́ɔ́. Byé ɨ́ jala le elɛ̂ʼle ó, bé e nkul ebúʼla byé ntinɨ̂ e ntinɨ̂. Sá tɨ̂ʼ ó bé óbuú gbâ dúu ɨ́ lɛ́ʼlá mɨ́ná dí edwe bé, dumo e Nzyɛ̌m, Tiʼbʉr gá wɨ́ná wɨ́ yɨ́.

Bʉr o dí egúmo e Yésʉs-Krîst bá

¹¹ Nó ó, Nzyɛ̌m, nyɨ́ lɛ̂ʼle ɨ́ ponó ó, mpam nyé, nye ó lɨ́ esú lé étíʼ bʉ̂r bɨ́bɛ̂h.

¹² Mpam mé Nzyɛ̌m nyaá ó dí etɨ́e mɨ́ná nzɨ̌ ó, mɨná bírɨɨ gá twiʼ dí ɨ́ bébe yɨ́, ti e bigwɨ́má bí sí yɨ̂, lɨ́ esú lé étíʼě twiʼ pɔ̂hlʉ milɔ̌b. Twiʼ yaá ó dí tîtyěl, yaá dí edû mpʉ̌ Nzyɛ̌m dí ekpɛl yɨ́.

¹³ Mɨná bé ótíʼe nó ó, lɨ́ ebóno mʉ̂r dí egbâ mɨ́ná mpûʼla ɨ́ miléme, waá dí esʉ mɨ́ná metyɛʼ me mpóm nyá. Nye ó Nzyɛ̌m nɨ́nɨ́ɨ́: Tiʼbʉr gá wɨ́ná Yésʉs-Krîst, waá ngá báʼǎ lɛ̂ʼle nyé mʉr tɨ̂ʼ e kûm ɨ́ buo buo nyá.

¹⁴ Nye á si dwe twiʼ yé nye mʉr tɨ̂ʼ lɨ́ esú lɨ́ná, ó nye dwíhɨɨ mɨná ɨ́ mpila mébébé mɨ́mɛ̂h. Nyɨ́ pubo mɨ́ná gá ó, mɨná díʼee kúl bʉ̂r dí egúmo e né yɨ́. Kûl yaá, yé ódi e léme ɨ́ cǎr ó, yé gbâʼ nyʉ̂l lɨ́ elóŋlo bísyɛ́ɛla bimpâ.

¹⁵ Nó ó gó jálá le elwib e bʉr, le tɨ́e bé yɨ́. Lɛ́ʼláá bʉ̂r mebébe mɔ́ɔ́ e nkul jwɨ́ɨ nyǒ nyɨnyɛ̂h. Mʉ̌r sá apyêh gô.