Rôm 8 - Kálar Nzyɛ̌m : Ejwán é Sáá

Twǐʼ Nzyɛ̌m dí edwe bʉ̂r yɨ́

¹ Nó ɨ́ báánâ, bʉr o mû sí pûhla e Yésʉs-Krîst bá, Nzyɛ̌m, nyé akǎ láa bé bibaa bí ébébe, nkʉ̂ dwe bé bintɨ́ʼá bí tɨ̂.

² Me á nyɛɛ be ó túʼǎ ɨ́ lɔ̌b tíná mé Syóm, bé le eswie. Me á be ó, ɨ́ mpila yɔ́ɔ́. Sísǐm mé Nzyɛ̌m nzě tíne mé ó, me bíʼee twiʼ ɨ́ mpúhlá nyɨ́h e Yésʉs-Krîst. Nye ó b'á dwih me ɨ́ mpila yaá, pɛʼ mé tɨ̂ʼ ɨ́ fá.

³ Yé á bé abána ó, mɨná bíʼee gá twiʼ ɨ́ mbaʼlá métié, ebě njwɨr myâ wɨ́ná, wé á be ɨ́ tyɛʼ. Metyɛʼ mé njwɨr myâ waá, mé ntɔ̂ʼ teʼle métié maá. Sá métié mé Moyɨ̂z, mé á be akoʼo lɨ́ esâ yɨ́, Nzyɛ̌m nyɨɛ á si bana sâ yê. Nye á dwe mɨná gá twiʼ ó ɨ́ nzɨ̌ Mwân wé nyé á ntɨh ɨ́ sí yɨ̂ʼ nyá. Mwân waá nzě byɛ̂l mʉ̂r. Nyʉ̂l bipúno nyé, nye á kʉ nwɨɨla ó e nyaá gá nyɨ́ná, osyɛ̂l o mísyóm. Nye á nze ó ɨ́ lɔ̌b syóm gá wɨ́ná. Nye á nze pɛʼ ó wê. Nzyɛ̌m nzě dwě Yésʉs mebě, le entɨ̂ʼ nyʉ̂l bipúno nyé ɨ́ jɔʼ nyé á búra e misyóm myaá yɨ́.

⁴ Nye á sia e bintɨ́ʼá ɨ́ nyʉ̂l nyé ó, nye nkʉ̂ lóŋlo ótîtyěl o bísyɛ́ɛla bíbyɛ̂h Nzyɛ̌m á boo lɛ́ɛ ó, bʉr sâʼ bí. Mɨná bi gá mepwaʼ bísyɛ́ɛla byé byaá ó, ebe mɨ́ná dí edû gá kʉ̌ tyěn Sísǐm mé Nzyɛ̌m dí etɨ́e wɨ́. Mɨná bé akǎ dû gá njwɨr myâ gá wɨ́ná.

⁵ Baá dí edû njɨ njwɨr myâ gá wɨ́ná bá, sá dí epálwo bé ɨ́ miléme yɨ́, yê ɨ́ jɔʼ yɨ́yɛ̂h ó, njɨ sâ njwɨr wɔ́ɔ́ dí egwɨ̂m yɨ́. Baá dí edû métwɨ́ɨ́ mé Sísǐm mé Nzyɛ̌m bá, sá dí epálwo bé ɨ́ miléme yɨ́, yé ó sá Sísǐm waá dí ekpɛl yɨ́.

⁶ Yé bé njwɨr myâ gá wɨ́ná, wé lɨ́ epalwo mʉ̂r ɨ́ léme nó, eswie ó ngá jala e mʉr waá. Ɨ́ jɔ̌ʼ Sísǐm mé Nzyɛ̌m dí edi mʉ̂r ɨ́ léme yɨ́, mʉr waá óbǐ mpǎŋ twiʼ. Lémé wé, wé ólóno ɨ́ mepyɛbla.

⁷ Baá mílémé myɔ́ɔ́ dí edû njɨ njwɨr myâ bá, bé lɨ́ elwímla e Nzyɛ̌m, asâ métié mé mejóʼo. Milémé myɔ́ɔ́ abá be e nkul esâ métié maá mejóʼo.

⁸ Baá dí edû njwɨr myâ gá wɨ́ná bá, Nzyɛ̌m, nye ákóʼó bee bé mbɨ̂mbɨá.

⁹ Bɨ̌n bɨɛ, bé abe tʉ́ŋlʉ̌ bʉr o dí edû njwɨr myâ gá wɨ́ná bá. Bɨ̌n bɨɛ dú ó, Sísǐm mé Nzyɛ̌m, ebě, Sísǐm waá, wé ó, ɨ́ bɨ̌n. Mʉ̂r óbe, abe e Sísǐm mé Krîst waá ɨ́ nyʉ̂l nyé nó, go ó, mʉr waá, nyé abe mʉ̂r mé Krîst ó tɨ̂ʼ yɨ́.

¹⁰ Krîst damá bě tyeetye ɨ́ bicwiʼ bín, menyʉ́l mɨ́n, mé dína ó mimúu ɨ́ lɔ̌b mé syóm. Sâ gwár, misísǐm mín, mí tiʼe, ebě, Nzyɛ̌m, nyɨ́ dwe bɨ́n nkam ɨ́ míh mé.

¹¹ Nó ntémé, Sísǐm mé Nzyɛ̌m, mʉr á pɛh Yésʉs, dwih nyé lɨ́ odwe nyá, dí ɨ́ bɨ̌n nó, go ó, Nzyɛ̌m ópɛh ményʉ́l mɨ́n, maá me dí elaǎ mpʉ̌ ngúl mpáá má. Nye ódwe mé twiʼ ó e nzɨ̌ Sísǐm wé dí ɨ́ menyʉ́l mɨ́n maá wɨ́.

¹² Bɨ́ɔɔ́ bâm! Okɛ́l bâm! Yé bé nó wá, go ó, mɨná gá bé e mpʉ́lá nɨ́nɨ́ɨ́. Sâ gwár, nyé abe mpʉ́lá ɨ́ nkǒ páʼ njwɨr myâ gá wɨ́ná. Nó ó, yé ajɨ ó, mɨná dúʼoo gá njwɨr myâ waá.

¹³ Bɨ́n dú njwɨr myâ gá wɨ́ná nó, go ó, eswie, lé ójala e bɨ̌n. Bɨ́n lélé nkûl e nzɨ̌ Sísǐm mé Nzyɛ̌m, ntɔ̂ʼ jʉ̂ bísyɛ́ɛla bi nyʉ̂l bipúno nó, lɛ́ɛ́, bɨ̌n bɨ́ tiʼe!

¹⁴ Baá bɨ́bɛ̂h dí edû nzɨ́ Sísǐm mé Nzyɛ̌m dí etɨ́e nyɨ́ bá, bé ó dí bwán mé Nzyɛ̌m.

¹⁵ Bɨ̌n e Sísǐm mé Nzyɛ̌m ó mû. Nyé abě mbǐ sísǐm dí e nkul edil bɨ́n ɨ́ dǐ ótúʼǎ, nkʉ̂ waá ngá sâ ó, bɨ̌n báʼa jóʼo bʉ́á wɨ́. Nye ótyêl bɨ́n ɨ́ tyé bwán mé Nzyɛ̌m. Nye ó dí edwe mɨ́ná gá nkul ó, mɨná jébaa gá Nzyɛ̌m kʉ́kʉ́ ó: «Abba, Dâ!»

¹⁶ Sísǐm wé, wé mʉr tɨ̂, wé lɨ́ eboʼlo ɨ́ milémé gá míná tʉ́ŋlʉ̌ ó, mɨná gá kʉ́ bě tyeetye ó bwán mé Nzyɛ̌m.

¹⁷ Yé bé mɨná gá mû ó bwân mé Nzyɛ̌m nó, go ó, mɨná gá ntémé bé ó bʉr o ngá bi ménkɔb kwá mé Nzyɛ̌m bá. Yé óbe ɨ́ páʼ gá wɨ́ná ó, jwɨʼ gwár e gwár e mpʉ̌ Krîst, mɨ́ɔɔ́ gá wɨ́ná, ngá bi mé ménkɔb yɨ́. Mɨ́ná gá le onɔ́ɔ́, bé ósia e mitúú mímpwár, lɨ́ esú ó, mɨná bíʼee gá kûm mpwár nó, mɨná bé ónʉa gá membɨa maá, jala e nkɔb líʼe gá nyɨ́ná.

Nkɛ̌ʼ mɨ́ná dí ebóno gá nyɨ́

¹⁸ Mbeá wâm, wé ó wɨ̂: mitúú mɨ́ná dí esia gá e myé ɨ́ báánâʼ mí, myé ó sá dí dwêh yɨ́. Sá dí ɨ́ bwǎʼ lɔ̌b, laa mítúú myaá yɨ́, yé ó kûm Nzyɛ̌m ngá lɛ̂ʼle mɨ́ná gá nyɨ́.

¹⁹ Ebě, bisá bíbyɛ̂h Nzyɛ̌m á komlo bí, byé lɨ́ egwɨ̂m ébee bwán Nzyɛ̌m ngá lɛ̂ʼle byé ɨ́ ponó bá.

²⁰ Bisá bíbyɛ̂h byaá, byé mû ó ɨ́ tyé dí dwêh yɨ́. Ntʉ byé á gbáa edi nó. Nzyɛ̌m mʉr tɨ̂ʼ ó b'á lɛ́ɛ ó, myé díʼee ɨ́ tyé yaá, tó pyâl ɨ́ tíl mélû yaá.

²¹ Bisá bíbyɛ̂h byaá, byé e mpûʼla nyɨ̂ʼ ɨ́ miléme: ó Nzyɛ̌m ópɛʼ byé ɨ́ bébebébe tyé yaá. Byé ópʉʼa ɨ́ mpila yaá ɨ́ fá, bé e bwán mé Nzyɛ̌m bɨ́bɛ̂h. Byé ábo. Byé óbáʼǎ dweŋɔɔ kûm ɨ́ jɔ̌ʼ Nzyɛ̌m ngá dwe bwán bé kûm yɨ́.

²² Jɔʼ yɨ́yɛ̂h Nzyɛ̌m dína apǎ lɛ̂ʼle bwán bé ɨ́ ponó yɨ́, mɨná bé lɨ́ egʉ́a gá ó, bisá bíbyɛ̂h nyé á komlo bí, byé ótô le eduʼ, le ejóʼo mékpaa mpʉ ábubúm dí ejaʼra e mǐn nyá.

²³ Yé abě njɨ nó. Nzyɛ̌m mû ó sí ntɨh mɨ́ná gá Sísǐm wé. Mɨná bé á nyɛɛ bi gá ó, etʉ́m laá. Damá jóʼo nó, milémé gá míná dína ó lɨ́ etíme. Yé ó nó, tó kumo ó, dʉ́ó Nzyɛ̌m ósîl étyêl mɨ́ná gá ɨ́ tyé bwán bé yɨ́. Dʉ́o laá ó nyé ngá dwih ményʉ́l gá mɨ́ná ɨ́ mpila ébébe yɨ́.

²⁴ Nzyɛ̌m á tiʼ mɨná gá ó, mɨná díʼee gá e mpûʼla ɨ́ miléme. Mʉ̂r sí bee bísá nyé á nyɛɛ bóno e mpûʼla bí nó, go ó, mpûʼla nyaá, nyé akǎ be, ebě, ɨ́ jɔʼ mʉ̂r mû sí bee yʉ́ʉ́ sɔ̂ʼ yɨ́, wáǎ mbi lémé wé dí e nkul ebáʼǎ lóno ɨ́ mpûʼla ó, nye óbee yé yɨ́?

²⁵ Sá mɨ́ná dína apǎ bee gá yɨ́, mílémé gá míná, myé ólóno ɨ́ mpûʼla ó, mɨná bé óbee gá yé nó, go ó, mɨná bé ɨ́ jala le edûhwo gá mpʉ̂n nyaá e bíhwó.

²⁶ Sísǐm mé Nzyɛ̌m, wɨ́ nzě kɛm mɨ́ná gá ɨ́ nkǒ páʼ étyɛʼ e nyʉ̂l gá lɨ́ná. Ɨ́ nkǒ páʼ mé Nzyɛ̌m, mɨná gá bé ɨ́ tyɛʼ, agʉ́ǎ mpʉ mɨ́ná jálá le ejɨʼla gá yɨ́. Sísǐm mé Nzyɛ̌m mʉr tɨ̂, nyě jɨjɨʼlá e Nzyɛ̌m ó, ɨ́ medilá gá mɨ́ná. Nye lɨ́ ejɨʼla e lémé wé wɨ́wɛ̂h, mpʉ̌ sá lɛ́ɛ́, nye lɨ́ ejóno. Abe le ekǎn egwár e dí e nkul epâʼlǎ sá nyé dí elɛ́ɛ yɨ́.

²⁷ Nzyɛ̌m Sɔ́ŋ, nye lɨ́ egʉ́a sá Sísǐm mé Nzyɛ̌m dí egwɨ̂m yɨ́. Nye ó mʉr dí ebeě sá dí ɨ́ milémé gá míná yɨ́ nyá. Sísǐm mé Nzyɛ̌m jɨʼlá e né ó, ɨ́ medilá mé óbûʼla ɨ́ mimbi mi dí ejala e né mí.

²⁸ Mɨná bé lɨ́ egʉ́a gá ó, Nzyɛ̌m, nye lɨ́ eboó komlo bísá bíbyɛ̂h ó, byé díʼee e nyɔm lɨ́ esú é bʉ̂r o dí ekpɛl nyé, baá nyé á jébe ɨ́ mitíʼá mí lémé wé bá.

²⁹ Ebě, baá Nzyɛ̌m á boo gʉ́a bá, nye á twâr bé ó, bé díʼee mpʉ Mwân wé. Bé ódǐ mpʉ Mwân mé Nzyɛ̌m nó, Mwân waá, nye ósûʼla ó, medwéʼé mé Mwân, le ontwóm ɨ́ buo buo.

³⁰ Bʉr o nyé á boo twâr bá, bé ó nyé á jébe bá. Baá nyé á jébe bá, bé ó nyé á dwe nkam ɨ́ míh mé bá. Bʉr o nyé á dwe nkam bá, bé ó nyé á dwe ntémé kûm bá.

Kpɛ̌l mé Nzyɛ̌m

³¹ Nó mpʉ yé dí nó yɨ́, mɨná bé ókǎ báʼǎ lɛ́ɛ gá nyá? Nzyɛ̌m bé ɨ́ nkɔ̌m gá nyɨ́ná nó, nzé ókǎ báʼǎ tyɛ̂b mɨ́ná gá ɨ́ nkɔ̌m kɔ́m nkɛ́ɛ́ ɛ́?

³² Nzyɛ̌m nyɨɛ á bé akamle e Mwân wé. Nye á syɛ́ɛla twiʼ Mwân wé ó e bicwiʼ gá bíná, mɨná gá óbɛ̂h. Nzyɛ̌m pǎ nyɛɛ́ dwe mɨ́ná gá Mwân wé, á dwɛʼra e bisá bíswîh bíbyɛ̂h! Nye óbánǎ dwe mɨ́ná gá byǎ ntémé mpʉ nyé á pa dwe mɨná gá Mwân wé yɨ́.

³³ Nzé dí e nkul epʉgʉ́ pur bʉ̂r ó Nzyɛ̌m á twâr bá? Nzyɛ̌m mʉr tɨ̂ʼ ó b'á boo sâ ó, mɨná bíʼee gá nkam ɨ́ míh mé.

³⁴ Nzé óláa mɨ́ná gá bibaa bí ébébe, le edwe mɨ́ná gá bintɨ́ʼá? Abe e mʉr! Yésʉs-Krîst á si dwe, búra e mɨná gâ. Yé abě njɨ nó. Nye á si pah, duho lɨ́ odwe, tó di ɨ́ mecwɨ́ɨ́, ɨ́ mbó éjʉ́m mé Nzyɛ̌m Sɔ́ŋ. Nye ó mʉr nkɔ̌m, waá dí ekamle e mɨná gá nyá.

³⁵ Nzé ókoʼo lɨ́ ebɛ̂ʼ páʼ gá nyɨ́ná e Yésʉs-Krîst, mʉr á bu kpɛl mɨná gá nyá? Nzê mitúú e mindɛ̌l? Nzê tíblá, nkʉ̂ nza? Nzê sɔ́ɔlʉ mímbôr, nkʉ̂ dɔm, nkʉ̂ pasoŋ? Kʉ́ kâr káráa!

³⁶ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Ɨ́ lɔ̌b mé Nzyɛ̌m ó bɨ́h bé lɨ́ ejʉ́ŋɔɔ ɨ́ dʉ́ó lɨ́lɛ̂h yɨ́. Ɨ́ míh mé bʉ̂r, bɨ̌h bé ó mpʉ bínteme múo tó tíʼɔɔ bí.»

³⁷ Damá jóʼo mébébe maá mɨ́mɛ̂h me dí epyâl mɨ́ná gá ménɨ̌, mɨná gá bé ó binkɔ́ɔ́ ɨ́ nzɨ̌ mé Krîst, mʉr dí ekpɛl mɨ́ná gá nyá.

³⁸ Yé ó nó. Mɨ́ kʉ́ gʉ́a ó, damá be éswie, damá bě twiʼ, damá be bééngeles, damá be mísísǐm mí édúrʉ́ʉ́ mi dí e jwɨ́ɨ mí, damá be ɨ́ báánâ, damá be ɨ́ bijɔʼ bi dí enze bí, damá be báányâ-nkul,

³⁹ damá be bísâ bi dí ɨ́ jʉ́o kʉ́, nkʉ̂ byaá bi dí ɨ́ sí tʉ́ŋlʉ̌ bí, damá be wáǎ mbǐ sɔ̂ʼ Nzyɛ̌m á komlo yɨ́, tó tôʼ. Sâ gwár dí ɨ́ sɔ́má yaá yɨ́, yé ákóʼó bɛ̂ʼ páʼ gá nyɨ́ná e Nzyɛ̌m, mʉr dí elɛ̂ʼlě kpɛ̌l yé ɨ́ nzɨ̌ mé Yésʉs-Krîst, Tî gá wɨ́ná nyá.