Bìoball air-loidhne

Rôm 7 - Kálar Nzyɛ̌m : Ejwán é Sáá

Mveʼle ɨ́ lɔ̌b ébâ

¹ Bɨ́ɔɔ́ bâm! Okɛ́l bâm! Bɨ̌n bé ó bʉr o dí ekʉ́ gwá gʉ́a métié mé Nzyɛ̌m bá. Bɨ̌n bé lɨ́ egʉ́a ó, etié, lé jaá jwɨ́ɨ ó, njɨ mʉr dína lɨ́ etiʼe nyá.

² Me páa dwě mveʼle: mbɛ́á mʉ́má, wé dǐ nará e njʉ̂m wé ó, jɔʼ njʉ̂m dína ɨ́ twiʼ yɨ́. Njʉ̂m waá sí dwe nɛ́ɛ: kúhó mʉ́má waá, wé mû ó nzyɛh. Nyé akǎ gbâ métié mé ébâ ɨ́ nkɔb.

³ Jɔʼ yɨ́yɛ̂h njʉ̂m dína ɨ́ twiʼ yɨ́, mʉ́má wé sí tó bâ mʉ̂r swîh nó, bé óláa nyé ó, nye ó syɛ̂l medyɛ̂n. Tó kœb ó, njʉ̂m wé ódwe nó, mʉmá waá óbɛ̌m bâ nyʉ́ʉ́ mʉ́rʉ̂m swîh, agbah étié e dí elɛ́ɛ ó: «Mpéné, mʉr asâ médyɛ̂n» lɨ́. Nye mû ó nzyɛh ɨ́ páʼ étié lé ébâ laá.

⁴ Bɨ́ɔɔ́ bâm! Okɛ́l bâm! Bɨ̌n ntémé, bé ó nó. Bɨ̌n bé á si dwe, ntɔ̂ʼ duho ɨ́ mpila métié. Yé á syɛ́ɛ nó ó, ɨ́ jɔʼ bɨ́n á pûhla e Krîst, le ɨ́ jɔʼ nyé á dwe ɨ́ páʼ bípúno yɨ́. Bɨ̌n bé á dwe ó, bɨ̌n nkʉ̂ gúmo e Krîst, mʉ̌r Nzyɛ̌m á pɛh, dwih lɨ́ odwe ó, mɨná nkʉ̂ gúmo gá mpumó lɨ́ esú mé Nzyɛ̌m nyá.

⁵ Jɔʼ yɨ́yɛ̂h mɨ́ná bé á dû gá njwɨr myâ wɨ́ná yɨ́, metié mé Nzyɛ̌m, mé á si dwe bibɨ́bla bígwɨ́má bíná nkul, byé ntɔ̂ʼ sâ ó, bisyɛ́ɛla mɨ́ná bé á tʉtô le esâ gá bí, byé dâʼraa eswie ɨ́ menyʉ́l gá mɨ́ná.

⁶ Ɨ́ mimbú mí píhe, mɨná bé á be gá ó, ɨ́ mpila métié. Nó ó, ɨ́ báánâ, mɨná mû ó, sí dwe gá ɨ́ nkǒ páʼ métié maá. Mɨná bɨ́ duho gá ɨ́ mpila métié mé á nyɛɛ mɨmɛ̂r mɨná gá lɨ́ okómó wɔ́ɔ́ má. Yé á syɛ́ɛ nó ó, mɨná nkʉ̂ séa gá Nzyɛ̌m syɛ́ɛ́ ɨ́ nzɨ̌ dwân, nyaá Sísǐm mé Nzyɛ̌m mû sí kar mɨ́ná gá nyɨ́. Mɨná bé akǎ dû gá nzɨ̌ myâ, nyaá mícɛmá myé, myé á nyɛɛ tɨtɨ́e nyɨ́.

Syóm ti e mempéné

⁷ Yé bé nó wá, mɨná bé ókǎ lɛ́ɛ gá nyá? Nzê metié, mé ó mpúhlá e syóm ɛ́? Heʼé, yé abá be nó. Yé bé metié maá abe nó, lɛ́ɛ́, me á bé agʉ́ǎ sá dí syóm yɨ́. Yé bé mempéné maá alɛ́ɛ ó: Agwɨ̂m sá yé onkán nó, lɛ́ɛ́, me á bé agʉ́ǎ sá dí gwɨ́má sá yé onkán.

⁸ Sâ gwár, le métié, mé á lɛ̂ʼle me ó: «Syóm ó wɨ̂,» le ntɔ̂ʼ syóm waá, wé á bee nzɨ̌ ego mê. Me ntɔ̂ʼ táare égwɨ̂m bísá byé onkán, mimbi mímyɛ̂h. Yé bé metié abe nó, lɛ́ɛ́, syóm, wé ó sá mû sí dwe yɨ́.

⁹ Ɨ́ mimbú mí píhe, jɔʼ mé á be apǎ gʉ́a métié maá yɨ́, me á be lɨ́ etiʼe. Tó kœb ó, le mé á gʉ́a metié maá, le métié maá ntɔ̂ʼ á jɨm syóm ɨ́ jô,

¹⁰ me ntɔ̂ʼ dwe. Nzyɛ̌m á tyêl bʉr metié ó, bé nkʉ̂ tiʼe lɨ́ ebaʼle mê. Tó kœb ó, mé á nze ka jʉ̂ mɛm ó jʉ́ʼóo.

¹¹ Jɔʼ mé á jɨ̂ʼ metié maá yɨ́, syóm, wé á si bee nzɨ̌ ɨ́ me. Wê nzě kʉ́a mé ó, me sâʼ misyóm. Nó ó syóm, wé á ka jʉ̂ me e nzɨ̌ metié yɨ́.

¹² Nó ó, metié, mé ó sá dí ti yɨ́. Mempéné mɨ́mɛ̂h, mé ó sá dí ti yɨ́. Mé ntémé, mé ó tîtyěl ɨ́ míh mé Nzyɛ̌m le mbɨ̂mbɨá.

¹³ Nzê nó, yé lɛ́ɛ́ ó, sá dí ɨ́ buú mbɨa ɨ́ mpʉ métié maá yɨ́, yé á si ntɛŋ eswie ɨ́ me ɛ̌? Heʼé, yé abá be nó. Syóm wé omér, wé ó b'á jaa jʉ̂ me. Syóm waá, wé á si nʉa mpǎŋ mbɨambɨa metié maá, wé ntɔ̂ʼ jʉ̂ mé e tɨ̂. Syɛ́ɛla yaá ó dí elɛ̂ʼle mɨ́ná gá ó, syóm, wê tyeetye ó ambɨǎ sɔ̂ʼ. Syóm, wé á ka sahle ó, nko wé á jʉ̂ mɨná gá e nzɨ̌ metié yɨ́.

¹⁴ Mɨná bé lɨ́ egʉ́a gá ó, metié, mé ó sá dí eduho kwá mé Sísǐm mé Nzyɛ̌m yɨ́. Nó ó, twiʼ yâm yɨ́ɛ, yé duho ó, njɨ ɨ́ nkǒ páʼ nyʉ̂l bipúno. Mɨ́ boó dímlě dǐ ótî yâm. Nó ó mé á ka lîʼ e sɔ̂ʼ njɨ dǐ ótúʼǎ lɨ́ esú é mísyóm.

¹⁵ Mé apʉgʉ́ gʉ́ǎ sá dí etíne ó, me sâʼ bisyɛ́ɛla mé dí esâ bí yɨ́. Mé abe lɨ́ esâ bísyɛ́ɛla byaá ɨ́ lɔ̌b kpɛ̌l yâm. Bisyɛ́ɛla mé dí ebuú bene bí ó mé dí ebuú sâ bí.

¹⁶ Mé sá bísyɛ́ɛla mé dí akpɛl ésâ bí nó, nó yé lɛ́ɛ́ ó, mɨ́ kam ó, metié, mé ɨ́ mbɨa.

¹⁷ Yé bé nó wá, misyóm mé dí esâ mí, ntʉ mɛ̂m mʉr tɨ̂ʼ dí esâ myê. Sá dí esâ myé yɨ́, yé ó syóm dí ɨ́ me wɨ́.

¹⁸ Me lɨ́ egʉ́ǎ mbɨ̂mbɨá ó, sá mpâ, yé abe ɨ́ me. (Sá mê gwa lɛ́ɛ́ yɨ́, yé ó: «ɨ́ njwɨr myá wâm tʉ́ŋlʉ̌».) Ebě, sá mé dí ekam yɨ́, yé ó, me gwɨ́mɨɨ bisyɛ́ɛla bimpâ. Tó kœb ó, nkul dí ó, me sâʼ bisyɛ́ɛla byaá nyɨ́, nyé akúnwo e me.

¹⁹ Embɨa mé dí ekpɛl ésâ lɨ́, ntʉ lé mé dí esâ. Mě jaá sâ ó, njɨ misyóm mé dí akpɛl ésâ mí.

²⁰ Sá mé dí akpɛl ésâ yɨ́, mé sá yé nó, nó yé lɛ́ʼlé ó, ntʉ mé dí e gwɨ́má ésâ yê. Syóm dí ɨ́ me wɨ́ ó dí etíne ó, me sâʼ yê.

²¹ Nó ó, sá mé dí ebee ɨ́ jɔʼ yɨ́yɛ̂h ó yɨ̂: jɔʼ mé gwɨ́m ésâ émbɨa yɨ́, misyóm míɛ ó mé dí ekǎ koʼo ésâ.

²² Lémé wâm wɨ́wɛ̂h, me lɨ́ ekʉ́ jóʼo bísʉhʉ lɨ́ epɨpahle métié mé Nzyɛ̌m.

²³ Tó kœb ó, mě beé ɨ́ nyʉ̂l nyǎm ó, yé e lʉ́ʉ́ étié e dí elwímla le etié e dí eduho ɨ́ bijwɨʼ bí lémé wâm lɨ́. Nkul syóm dí ɨ́ me wɨ́, wé ó dí entaa ócwóó wâm, nzě liŋ mé túʼǎ syóm dí me ɨ́ nyʉ̂l wɨ́.

²⁴ Nkoó e me! Syóm dí ɨ́ nyʉ̂l nyǎm wɨ́, wé lɨ́ etyen mé lɨ́ eswie. Nzé ópɛʼ mé ɨ́ jwɨ́ɨ́ syóm yaá ɛ́?

²⁵ Mɨná dwêʼ gá Nzyɛ̌m nzyǒo ɨ́ nzɨ̌ mé Yésʉs-Krîst, Tî gá wɨ́ná. Yé ó mpʉ mé dí e nkul elɛ́ɛ ó: bijwɨʼ bí lémé wâm, byé kpɛl éséǎ syɛ́ɛ́ ó, yaá métié mé Nzyɛ̌m dí etɨ́e yɨ́. Njwɨr myâ wâm wɨ́ɛ jaá kam ó, njɨ me jóʼaa mpʉ̌ syóm dí ekpɛl ó, me sâʼ misyóm yɨ́.

« Roimhe

Air adhart »

Lean sinn:

Ceanglaichean taic

Sanasan