Bìoball air-loidhne

Rôm 6 - Kálar Nzyɛ̌m : Ejwán é Sáá

Bʉr o mû sí pûhla e Yésʉs bá, bɨ́ bǐ twiʼ

¹ Yé bé nó wá, mɨná bé ókǎ lɛ́ɛ gá nyá? Nzê mɨná tôʼ le esâ syóm dóló lɨ́ esú ó, Nzyɛ̌m lɛ̂ʼlaa mɨná gá mpam ɨ́ buo buo ɛ̌?

² Yé abá be nó! Mɨná gá bé ó bʉr o b'á dwe ɨ́ nkǒ páʼ mísyóm bá. Yé ngá kǎ sâ ó, mɨná tôʼ le esâ gá syóm dóló?

³ Nzê bɨ̌n bé agʉ́a ó, ɨ́ jɔʼ mɨ́ná bé á duŋɔɔ gá yɨ́, mɨná bɨ́bɛ̂h, bé á si pûhla gá e Yésʉs-Krîst ɛ̌? Ɨ́ ndubó waá, mɨná bé á dwe gá e Yésʉs ó sɔ́má.

⁴ Mɨná gá e Krîst, bé á si dwe, dɨlɔɔ ɨ́ ndubó waá sɔ́má, lɨ́ esú ó, mɨná páhaa gá e nkul mé Nzyɛ̌m Sɔ́ŋ dí e kûm nyá. Mpʉ nyɨ́ɛ á pah lɨ́ odwe yɨ́, yé jala ó, mɨná nʉ́aa gá kʉ̌ tyen dwân píe ndubó.

⁵ Yé bé mɨná gá le onɔ́ɔ́, bé á dwe ó, eswie egwár mpúhlá nó, lɛ́ɛ́, mɨná gá le onɔ́ɔ́, bé ópǎh jwɨʼ gwár ntémé.

⁶ Mɨná bé lɨ́ egʉ́a gá ó, ɨ́ jɔʼ bé á jʉ̂ Yésʉs-Krîst, lɨ́ ebomlo nyé e binzâŋ, le ebɨ́nɔɔ nyé ɨ́ kolôs kʉ́ yɨ́, Nzyɛ̌m á si bomlo metum me myâ gá mɨ́ná tɨ̂ʼ ntémé ɨ́ kolôs gwár yaá. Nye á sâ nó ó lɨ́ esú lé éteʼle nyʉ̂l dí egwɨ̂m mísyóm nyɨ́, le ntémé ó, mɨná ayɨ́ kǎ báʼǎ di gá bitúʼǎ lɨ́ esâ mísyóm myaá.

⁷ Ebě, mʉr mû sí dwe nyá, nyé akǎ bě túʼǎ lɨ́ esú lé ésâ mísyóm.

⁸ Yé bé mɨná gá e Krîst á si dwe sɔ́má nó, go ó, mɨná bé ɨ́ jala le egʉ́a gá ntémé ó, mɨná gá le nɔ́ɔ́, bé óbáʼǎ tiʼe gá sɔ́má.

⁹ Mpʉ mɨ́ná bé lɨ́ egʉ́a gá ó, Yésʉs-Krîst á si pah ɨ́ soo yɨ́, nó yé lɛ́ʼlé ó, nye ákǎ báʼǎ dwe ó tɨ̂ʼ yɨ́. Eswie, lé akǎ jwɨ́ɨ nyê.

¹⁰ Jɔʼ nyé á dwe yɨ́, nye á dwe ó, esaŋ egwár lɨ́ esú lé ébúra e misyóm mí bʉ̂r. Ɨ́ báánâ, nye mû kǎ tiʼe ó, njɨ lɨ́ esú mé Nzyɛ̌m.

¹¹ Sɨ́sáʼ gá ntémé nó. Sísímsáá gá ó, bɨ̌n bé ó bʉr o b'á dwe nkǒ páʼ mísyóm bá. Símsáá gá ó, bɨ̌n mû tiʼe ó, ɨ́ páʼ mé Nzyɛ̌m ɨ́ mpúhlá nyɨ́n e Yésʉs-Krîst.

¹² Mpʉ yé dí nó yɨ́, ayɨ́ kǎ kam gá ó, syóm, wé báʼa jwɨ́ɨ bɨ́n. Wé ayɨ́ kǎ nʉǎ jwɨ́ɨ ɨ́ nkǒ páʼ ményʉ́l mɨ́n, maá me dí edwe má. Ayɨ́ kǎ bîr gá ó, syóm, wé ntáŋaa bɨ̌n ɨ́ nkul, ó bɨ̌n sâʼ wé mejóʼo, nkʉ̂ dû bíbɨ́bla bígwɨ́má byé.

¹³ Abîr gá bitíl ményʉ́l bín ó, byé díʼee bisá bɨ́n ósâ syóm e tɨ̂ʼ bí. Syóm, wé ámû jaá nʉa bítíl ményʉ́l bín byaá, wê nzě sâ mísyóm e tɨ̂. Bɨ̌n bé ó bʉr o b'á nyɛɛ dwe, nzě kǎ pah bá. Tímláá gá Nzyɛ̌m bɨ̌n bʉr o tɨ̂, ti e bitíl ményʉ́l bín. Byé díʼee bɨ̌n bisá bɨ́n ótó sâ ótîtyěl o bísyɛ́ɛla e byé bí.

¹⁴ Ebě, syóm, wé ajala le ekǎ jwɨ́ɨ bɨ́n, ebě, bɨ̌n bé akǎ be bʉ̂r o dí ɨ́ mpila métié tʉ́ŋlʉ̌ bá. Ɨ́ báánâ, bɨ̌n mû ó baá Nzyɛ̌m mû sí lɛ̂ʼle mpâm bá.

Mʉr nyɨnyɛ̂h, nye ó túʼǎ ɨ́ páʼ njwɨ́ɨ nyé sɨ́sá méjóʼo nyá

¹⁵ Mɨná bé akǎ be gá ɨ́ mpila métié yaá tʉ́ŋlʉ̌, yé abe nó? Mɨná mû gá ó, bʉr o dí elɛ̂ʼlɔɔ mpâm mé Nzyɛ̌m bá. Mpʉ yé dí nó yɨ́, nzê mɨná bé ɨ́ jala le esɨ̂sa gá misyóm ɛ́? Heʼé, yé abá be nó.

¹⁶ Bɨ̌n bé lɨ́ egʉ́ǎ mbɨ̂mbɨá ó, bɨ́n séá e mʉr, sâ nyé mejóʼo nó, bɨ̌n mû ó bitúʼǎ ɨ́ páʼ njwɨ́ɨ bɨ́n sɨ́sá méjóʼo nyá. Bɨ́n ósâ mâ twíí misyóm mejóʼo nó, lɛ́ɛ́, bɨ̌n mû ó sí dâʼre éswie ɨ́ menyʉ́l mɨ́n ó tɨ̂ʼ yɨ́. Bɨ́n sí sâ ó, bɨ̌n sá ó Nzyɛ̌m mejóʼo nó, lɛ́ɛ́, bɨ̌n bé óláŋɔɔ ɨ́ sɔ́má ótîtyěl o bʉ̂r.

¹⁷ Mɨná dwêʼ gá Nzyɛ̌m nzyǒo. Bɨ̌n bʉr o b'á nyɛɛ be bitúʼǎ bí syóm bá, bɨ̌n mû ɨ́ báánâʼ ó, sí sâ méjóʼo e milémé mín mímyɛ̂h, lɨ́ edû mbi mílɛ́ʼlá mû lɨ́ ebaʼle bɨ́n mí.

¹⁸ Nzyɛ̌m á si táa góo, le edwih bɨ́n ɨ́ nkul mé Syóm. Bɨ̌n mû ɨ́ báánâʼ ó, bitúʼǎ byé, lɨ́ esú lé ésâ bísyɛ́ɛla bi dí otîtyěl bí.

¹⁹ Mě lwib ó, ɨ́ mpʉ mínzɨnzɨ mi bʉ̂r dí epǎ lwib yɨ́. Mě sá nó ó, ɨ́ mpʉ bɨ́n dí e metyɛʼ ɨ́ misísǐm mín yɨ́. Bɨ̌n bé á bɨbe ɨ́ jɔʼ myâ ó, sí kam ó, bɨ̌n díʼee bitúʼǎ. Bɨ̌n bé á sâ bisyɛ́ɛla ɨ́ jɔʼ yaá ó, njɨ byaá dí edulo mpîr ɨ́ nyʉ̂l bí le byaá dí egbah mémpéné bí. Bɨ̌n bé á didi ó, lɨ́ onzǎmnzǎm. Nó ó, ɨ́ báánâ, tímláá gá Nzyɛ̌m bitíl ményʉ́l bín. Byé séaa e né syɛ́ɛ́ ótîtyěl, bɨ̌n nkʉ̂ gúmo njɨ e né.

²⁰ Jɔʼ bɨ́n á nyɛɛ be bitúʼǎ ɨ́ nkul mé Syóm yɨ́, bɨ̌n bé á bɨbe ó, omyanzyɛh o bʉ̂r, túmá koo e bisyɛ́ɛla bi bí eduho ɨ́ jwɨ́ɨ́ émbɨa bí.

²¹ Wáǎ nyɔm bɨ́n á bi, duho ɨ́ misyóm bɨ́n á sɨsâ mí? Bɨ̌n mû ɨ́ báánâʼ ó, lɨ́ ejóʼo sôn lɨ́ esímsa bísyɛ́ɛla bí ébébe byaá. Ndumló bísyɛ́ɛla byaá wɨ́ɛ, wé ó eswie.

²² Ɨ́ báánâ, Nzyɛ̌m, nyɨ́ táǎ góo, le edwih bɨ́n ɨ́ nkul mé Syóm. Bɨ̌n mû ó osyɛ̂l o mésá bé! Mpumó mû lɨ́ egúmo ɨ́ bicwiʼ bín nyɨ́, nye ó kʉ̌ tyen dí ejala e Nzyɛ̌m wɨ́. Ndumló tɨ̂, wé ó twǐʼ njʉ̌m dǐ.

²³ Myɛ́na mé syɛ̂l misyóm, mé ó njɨ eswie. Tó kœb ó, ndwéá Nzyɛ̌m á dwe bʉr edwɛ́na wɨ́, wé ó twǐʼ njʉ̌m dǐ ɨ́ mpúhlá gá nyɨ́ná e Tî Yésʉs-Krîst.

« Roimhe

Air adhart »

Lean sinn:

Ceanglaichean taic

Sanasan