Rôm 4 - Kálar Nzyɛ̌m : Ejwán é Sáá

Mveʼle lɨ́ Abraham

¹ Ɨ́ nkǒ páʼ mébyɛ́l gá mɨ́ná, mɨná gá bé e sɔ́ŋ mpám Abraham. Mpʉ yé dí nó yɨ́, mɨná bé ókǎ lɛ́ɛ gá nyá, dumo e né?

² Yé bé Abraham á si bi nkam ɨ́ lɔ̌b bísyɛ́ɛla bimpâ byé nó, lɛ́ɛ́, nye á be ó e sá énkʉ́na tɨ̂. Sâ gwár, nye á bé abe e sá énkʉ́na tɨ̂ʼ ɨ́ míh mé Nzyɛ̌m.

³ Yê cɛmá ɨ́ Mekaná mé Nzyɛ̌m ó: Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, nye ntɔ̂ʼ láa ó, nye ó tîtyěl mʉr ɨ́ lɔ̌b búʼó yé yaá.

⁴ Mɨná bé lɨ́ egʉ́a gá ó, lóbila, yé óséǎ syɛ́ɛ́ nó, sá mása wé ódwe nyé píe syɛ́ɛ́ yaá yɨ́, yé abe dâh. Yê nye ó myɛ́na. Nyě jánɔ́ɔ́ ó mpʉ́lá.

⁵ Tó kœb ó, mʉ̂r dí asɨ̂sa bísyɛ́ɛla bimpâ nyá, sí dyɛ̂ʼwo e Nzyɛ̌m, le ebúʼla ó, Nzyɛ̌m sá ó dwe mínjéʼe-Nzyɛ̌m nkam nó, Nzyɛ̌m óbeě mpʉ̌ nyé dí edyɛ̂ʼwo e né yɨ́, ntɔ̂ʼ kǎ láa ó, nye ó tîtyěl mʉr.

⁶ Jwɨʼ gwár yaá ntémé ó David á lɛ́ɛ yɨ́. Nye lɨ́ esyɛɛ métyéelé ɨ́ mʉr á láŋɔɔ otîtyěl ɨ́ míh mé Nzyɛ̌m, waá á be asâ bisyɛ́ɛla bimpâ nyá.

⁷ David á cɛma ó: Bʉr o b'á gbah metié, baá Nzyɛ̌m á pɛʼ bibaa mébébe mɔ́ɔ́ bá, bé e metyɛʼ me mpóm. Bé ó baá Nzyɛ̌m á táa góo ɨ́ lɔ̌b mísyóm myɔ́ɔ́ bá.

⁸ Metyɛʼ me mpóm, mé díʼee e mʉ̌r Dâ Nzyɛ̌m óbe, aniʼe bíbaa ɨ́ lɔ̌b mísyóm myé nyá.

⁹ Nzê metyɛʼ me mpóm maá, mé jaá be ó, njɨ lɨ́ esú é bʉ̂r o b'á nyɛɛ tíʼɔɔ mpʉ́n bá ɛ́? Heʼé, bʉr o dí abě tíʼá mpʉ́n bá, bɨ́ɛ ntémé ósʉŋɔɔ métyɛʼ me mpóm, ebě, bɨ̌h alúno lɛ́ɛ ó, Abraham á si dyêʼ koo e Nzyɛ̌m. Nzyɛ̌m nzě beě mpʉ̌ Abraham á dyɛ̂ʼwo e né yɨ́, nye ntɔ̂ʼ láa ó, Abraham, nye ó tîtyěl mʉr.

¹⁰ Ɨ́ yáǎ jɔ̌ʼ Nzyɛ̌m á bee mpʉ̌ Abraham á dyɛ̂ʼwo e né yɨ́, ntɔ̂ʼ láa ó, nye ó tîtyěl mʉr yɨ́ ɛ́? Nzê yé á be ó, ɨ́ jɔʼ nyé á bě sí tíʼɔɔ mpʉ́n yɨ́ ɛ́? Nzê yé á be ó, ɨ́ jɔʼ nyé á be apǎ tíʼɔɔ mpʉ́n yɨ́ ɛ́? Nzyɛ̌m á bee mpʉ Abraham á dyɛ̂ʼwo e né yɨ́, ntɔ̂ʼ láa ó, nye ó tîtyěl mʉr ó, ɨ́ jɔʼ nyé á be, nye dína apǎ tíʼɔɔ mpʉ́n yɨ́.

¹¹ Tíʼá mpʉ́n, wé á tyélɔɔ ɨ́ páʼ mé Abraham ó, mpʉ̌ mveʼle. Wé lɨ́lɛ́ʼlé mɨ́ná gá ó, nye á si dyɛ̂ʼwo e Nzyɛ̌m, ntɔ̂ʼ bi nkâm ɨ́ míh mé Nzyɛ̌m, nye dína apǎ tíʼɔɔ mpʉ́n. Abraham ntɔ̂ʼ kǎ sûʼla sɔ́ŋ bʉr bɨ́bɛ̂h dí edyɛ̂ʼwo e Nzyɛ̌m, baá dí abě tíʼá mpʉ́n bá. Nzyɛ̌m, nye lɨ́ ebeě mpʉ bé dí ebúʼla nyé yɨ́, ntɔ̂ʼ láa ó, bé ó otîtyěl o bʉ̂r.

¹² Nye ntémé, nye ó sɔ́ŋ mpám lɨ́ esú é baá o dí etíʼɔɔ mpʉ́n bá. Sâ gwár, ntʉ waá dí etíʼɔɔ̌ njɨ mpʉ́n nyá dí mâ nta mé Abraham. Yé ó, waá dí etíʼɔɔ mpʉ́n, le edû ntémé kʉ̌ tyen wé nyá. Nye lɨ́ edyɛ̂ʼwo e Nzyɛ̌m mpʉ̌ Abraham á dyɛ̂ʼwo e né, nye dína apǎ tíʼɔɔ mpʉ́n yɨ́.

Bʉr o dí edyɛ̂ʼwo e Nzyɛ̌m bá, bé ó dí edweŋɔɔ nkɛ́ʼ

¹³ Nzyɛ̌m á kɛʼ Abraham, bé le onta bé ó, nye ódwe bé sí yɨ́yɛ̂h, jala e nkɔb líʼe nyɔ́ɔ́. Nzyɛ̌m á bé alɛ́ɛ nó ɨ́ lɔ̌b mbaʼlá Abraham á baʼle metié wɨ́. Nye á kɛʼ bé sí yaá ó, duho lɨ́ otîtyěl nyé á pa dwe Abraham wɨ́. Otîtyěl waá wɨ́ɛ, wé á kʉ be ó, ɨ́ búʼó yé.

¹⁴ Yé bé bʉr o dí enʉǎ sí yaá, jala e nkɔb líʼe nyɔ́ɔ́ bá, bé á dweŋɔɔ yé ó, ɨ́ lɔ̌b mbaʼlá métié wɔ́ɔ́ nó, lɛ́ɛ́, búʼó gá yɨ́ná, yé mû ó dwêh. Le ntémé ó, nkɛ̌ʼ Nzyɛ̌m á dwe mɨná gá nyɨ́, nyé akǎ jala le egbáŋɔɔ ɨ́ nkɔb.

¹⁵ Ebě, metié mé Moyɨ̂z, mé abe e nyɔm waá. Bʉ̂r sí gbah métié maá nó, tyélá Nzyɛ̌m á tyêl bʉr metié wɨ́, ndumló tɨ̂, wé ó njɨ etó kwɨ́ɨ nkpáa mé Nzyɛ̌m. Yé bé metié abe nó, bʉr, bé á gwa gbah mé e nyáa nzɨ́?

¹⁶ Nzyɛ̌m á kɛʼ Abraham, bé le onta bé, sí yɨ̂ʼ ó, ɨ́ lɔ̌b búʼó Abraham á bûʼla nye yɨ́. Nkɛ̌ʼ nyaá, nye bé ó, ntinɨ̂ e ntinɨ̂ njʉ̌m dǐ e njʉ̌m dǐ. Yé á syɛ́ɛ nó ó, Nzyɛ̌m nkʉ̂ dwe bé nyǎ edwɛ́na. Nyě kɛ̌m ó, onta mé Abraham bɨ́bɛ̂h. Yé abe ó, nye á jaa dwe nkɛ̌ʼ nyaá ó, njɨ bʉr o dí ebaʼle métié bá. Nye á kɛʼ ntémé ó, bʉr o dí edyêʼ koo e né, baá o dí enwɨɨla le Abraham ɨ́ nkǒ páʼ búʼó bá. Ebě, Abraham, nye ó sɔ́ŋ gá wɨ́ná, mɨná gá óbɛ̂h. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:

¹⁷ «Me ótyêl gó ntémé sɔ́ŋ bikûl ɨ́ buo buo.» Nye ó sɔ́ŋ gá wɨ́ná, ebě, nye á bě sí dyêʼ koo e Nzyɛ̌m, waá dí epɛh ódwe nyá. Nzyɛ̌m waá ntémé ó dí esâ ó, sá yé á be abe yɨ́, yé díʼee.

¹⁸ Sá Abraham á be ajala le ebóno ó, yé ópyâl nyé yɨ́, nye á bóno sâ gwár yaá ó e mpûʼla ɨ́ léme. Nye ntɔ̂ʼ sûʼla sɔ́ŋ bikûl ɨ́ buo buo. Nkɛ̌ʼ Nzyɛ̌m á dwe nye nyɨ́, nye ntɔ̂ʼ dira ó: Onta bô, bé óbe ó, ɨ́ buo buo.

¹⁹ Jɔ̌ʼ Nzyɛ̌m á kɛʼ Abraham onta baá yɨ́, Abraham nzě bûʼla nkɛ́ʼ nyaá. Búʼó yaá, yé á bé agœ̂ʼ, damá be ó, nye á be ó, nye mû e mimbû nter. Nye á si pahle twiʼ yé, ntɔ̂ʼ bee ó, nye á be ó, nye mû kúno edwe. Nye ntémé á bee ó, Sara á be ó kǔn.

²⁰ Damá jóʼǒ mpʉ yé á be nó yɨ́, nye á be ɨ́ kʉ́ gʉ́a yɨ́ɛ ó, nye óbánǎ bǐ sá Nzyɛ̌m á kɛʼ nye yɨ́. Nye á bé asóŋlo ɨ́ lémé wé tʉ́ŋlʉ̌. Búʼó yé, yé á be ó, lɨ́ elɨl nyê. Nye nzě dwě Nzyɛ̌m kûm ɨ́ lɔ̌b nkɛ́ʼ nyaá.

²¹ Nye á kʉ gʉ́a ó, Nzyɛ̌m á be ó e nkul edwe nyé sá nyé á pa kɛʼ nye yɨ́.

²² Nó yé á cɛmɔɔ ó: Ɨ́ lɔ̌b búʼó yé yaá, Nzyɛ̌m ntɔ̂ʼ láa ó, nye ó tîtyěl mʉr yɨ́.

²³ Mekǎn maá, mé á bé acɛmɔɔ̌ njɨ lɨ́ esú lé, nye omér. Mé á cɛmɔɔ ntémé ó, lɨ́ esú gá lɨ́ná. Mɨ́ná bé ódyêʼ gá koo e Nzyɛ̌m nó,

²⁴ nye óláa mɨ́ná gá ntémé ó, mɨná gá bé ó otîtyěl o bʉ̂r, baá o dí edyɛ̂ʼwo e né bá, nye waá á pɛh Tî gá wɨ́ná Yésʉs, dwih nyé lɨ́ odwe nyá.

²⁵ Yésʉs waá, bʉr, bé á si bɛ́ma nye. Nye nzě búra e misyóm gá míná. Píe tɨ̂, Nzyɛ̌m nzě pɛh nyé ó, nye dwêʼ mɨná gá nkam ɨ́ nzɨ̌ nyé.