Rôm 3 - Kálar Nzyɛ̌m : Ejwán é Sáá

¹ Yé bé nó wá, edi mʉ̂r Yúden, lé óbe gó e nyáa mpíh ɛ́? Lɨ́ etíʼɔɔ mpʉ́n, yé e nyáa mpíh?

² Yé e nyɔm ɨ́ menzɨ̌ mɨ́mɛ̂h. Sá ésôʼ dí e nyɔm yɨ́, yé ó, Nzyɛ̌m á taare edwe mingwíhá mílɔ̌b myé ó, bɨ̌n oYúden.

³ Nó ó, mɨná bé ólɛ́ɛ gá yé, dumo e bʉr o b'á be adyɛ̂ʼwo e Nzyɛ̌m bá? Nzê elele e míléme lɔ́ɔ́, lé e nkul ekamlě Nzyɛ̌m lɨ́ edira ménkɛ̌ʼ mé ɛ́?

⁴ Heʼé, yé abá be nó. Bʉr bɨ́bɛ̂h damá sâ bíbɛr, Nzyɛ̌m nyɨɛ́ jaá lóŋlo ó, njɨ lɔ́ɔ́ wé. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Gua Nzyɛ̌m, ɨ́ jɔʼ gó dí elwib yɨ́, bʉr bɨ́bɛ̂h, bé ókʉ́ gʉ́a ó, gǒ lɛ́ɛ́ ó otyeetye. Bé ósáa édwe gó mebě nó, go ójaá bi ó, njɨ nkam ɨ́ lɔ̌b waá.»

⁵ Bɨ̌n lɛ́ɛ́ ó: «Bisyɛ́ɛla bí ébébe mɨ́ná dí esâ gá bí, nyɔm tɨ̂ʼ, wé ó, bʉr béyɨɨ mpʉ̌ Nzyɛ̌m nyɨɛ dí tîtyěl yɨ́.» Mɨná bé ókǎ lɛ́ɛ gá nyá? Nzê Nzyɛ̌m, nyé abe e mebě ɨ́ jɔʼ nyé dwé mɨ́ná gá bintɨ́ʼá, duho ɨ́ nkpaa dí nye ɨ́ léme nyɨ́ yɨ́ ɛ́? (Gúmó mé dí elwǐb nɨ̌, mě lwǐb ó, ɨ́ mpʉ mínzɨnzɨ mi bʉ̂r dí epǎ lwib yɨ́.)

⁶ Heʼé, yé abá be nó. Yé bé Nzyɛ̌m, nye ó ontúl óntúl nó, nye á gwa tíʼe bʉr milɔ̌b nyá?

⁷ Yé ntémé, yé ó mpʉ bé dí e nkul elɛ́ɛ ó: «Yé bé bibɛr byâm, byé lɨ́ egwá lɛ̂ʼle ótyeetye mé Nzyɛ̌m, le esâ ó, bʉr gúmlaa nye e tɨ̂ʼ nó, nye lɨ́ edwe mé mebě, lɨ́ elɛ́ɛ ó, me ó syɛ̂l misyóm ɨ́ yé?»

⁸ Bɨ̌n bé lɨ́ ekâr élɛ́ɛ ó: «Mɨná sâʼ gá ebébe, embɨa nkʉ̂ buo píe tɨ̂ʼ» ɨ́ yé? Bʉ́ʉ́ bʉ̂r, bé lɨ́ eswêʼ mé díe, lɨ́ elɛ́ɛ ó, bɨ̌h bé á si cɨ mekǎn maá. Nzyɛ̌m ódwe bʉ̂r baá mimbi bíntɨ́ʼá bi dí ejala e bé bí.

Abe e mʉr dí tîtyěl

⁹ Mɨná bé ólɛ́ɛ gá nyá? Nzê bɨ̌h oYúden ó dí elaa bʉ́ʉ́ bʉ̂r ɛ̌? Heʼé, yé abá be nó. Me bé ó sí lɛ̂ʼle ɨ́ kpɛŋlɛm ó, oYúden ti e bʉr o dí abe óYúden bá, bé e mebě. Syóm, wé ó dí ejwɨ́ɨ bɨ́bɛ̂h.

¹⁰ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Abe e mʉr dí tîtyěl. Abe e mʉr. Kâr mʉ̂r ngwár!

¹¹ Abe e mʉr dí egʉ́ǎ sá dí tîtyěl yɨ́. Abe e mʉr dí esáǎ Nzyɛ̌m. Bʉr bɨ́bɛ̂h, bé á si dyɛ̂l ɨ́ bébebébe nzɨ̌. Bɨ́bɛ̂h, bɨ́ dwě ntuʼ ɨ́ jɔʼ gwár.

¹² Abe e mʉr dí esâ bʉ́ʉ́ bʉ̂r embɨa. Kâr mʉ̂r ngwár!

¹³ Minum myɔ́ɔ́, myé ɨ́ bébe, mpʉ mésoo bé alúno gwih má. Bijɨ́m byɔ́ɔ́, byé jaá lwilwib ó, njɨ mikóo. Sá dí eduho ɨ́ minum myɔ́ɔ́ yɨ́, yé ó mpʉ̌ sǔ éjwɨ̂l.

¹⁴ Lwǐb yɔ́ɔ́, yé ó lwɨ́ŋlá e meswomlʉ le otié.

¹⁵ Bé kpáhwá swǐm kám ó, njɨ lɨ́ etó jʉ̂ bʉ̂r.

¹⁶ Gúmó yɨ́yɛ̂h bé laa yɨ́, bé lílíʼé píe koo wɔ́ɔ́ ó, njɨ mekwár ɨ́ tíilʉ̌, líʼe bʉ̂r ɨ́ nyɨna.

¹⁷ Bé agʉ́a nzɨ́ edwe bʉ̂r mepyɛbla.

¹⁸ Bé agʉ́ǎ mpʉ mʉ̂r jálá le edwáawǒ Nzyɛ̌m yɨ́.

¹⁹ Mɨná bé lɨ́ egʉ́a gá ó, sá yɨ́yɛ̂h Mékaná mé Nzyɛ̌m dí elɛ́ɛ yɨ́, mé lɛ́ɛ́ yé ó, lɨ́ esú é bʉ̂r o b'á tyélɔɔ metié mé Nzyɛ̌m bá. Nyě tyél bé metié maá ó, lɨ́ esú lé épɨr bʉ̂r bɨ́bɛ̂h minum, le edwe bɨ́bɛ̂h mebě ɨ́ míh mé.

²⁰ Mʉr ákóʼó bi nkâm ɨ́ míh mé Nzyɛ̌m ɨ́ lɔ̌b mbaʼlá métié. Metié, mé jaá séǎ syɛ́ɛ́ ó, njɨ yaá élɛ̂ʼle mɨ́ná gá ó, mɨná gá bé ó osyɛ̂l o mísyóm.

Mʉ̌r tiʼe ó, ɨ́ lɔ̌b búʼó yé

²¹ Tó kœb ó, ɨ́ báánâ, Nzyɛ̌m, nyɨ́ lɛ̂ʼle ó, bʉr bíʼee nkam abe ɨ́ mbaʼlá métié. Nye mû ó sí kar nzɨ́ swîh nyaá lɨ́ esú lé édwe bʉ̂r nkam. Moyɨ̂z, bé le ogwíha o mílɔ̌b, bé á si nyɛɛ boʼlo lɔ̌b nzɨ́ nyaá.

²² Nzyɛ̌m mû kǎ dwe bʉ̂r nkam ɨ́ míh mé ó, njɨ ɨ́ mbûʼlá bé dí ebúʼlǎ Yésʉs-Krîst wɨ́. Nzyɛ̌m á kar nzɨ̌ nyaá ó, lɨ́ esú é baá bɨ́bɛ̂h dí ebúʼla nyé bá, ebě, bʉr bɨ́bɛ̂h, bé ó jwɨʼ gwár.

²³ Bɨ́bɛ̂h, bé á si sâ syóm. Bisyɛ́ɛla bimpâ byɔ́ɔ́ alwɨ́ŋlɨ, ajala e kûm mé Nzyɛ̌m.

²⁴ Nzyɛ̌m dwé bé nkam ɨ́ míh mé ó, ɨ́ mpam nyé, mʉr ajánǎ sɔ̂ʼ. Nyě dwé bé nkam nyaá ó, ebě, Yésʉs-Krîst á si táa góo, le edwih bé ɨ́ mpila ébébe, pɛʼ bé ɨ́ fá.

²⁵ Nzyɛ̌m á ntɨh nye ó, nye ntáa dwe, búra e misyóm gá míná lɨ́ esú lé éleʼě Nzyɛ̌m ɨ́ nkpaa nyé. Nye á dwe ó, nye nkʉ̂ kɛm bʉ̂r o dí ebúʼlǎ ndwéá métié waá bá. Ɨ́ nzéá Yésʉs-Krîst á nze wɨ́, Nzyɛ̌m á si lɛ̂ʼle mpʉ nyé dí tîtyěl yɨ́. Misyóm bʉ̂r bé á boo sɨ̂sa mí, Nzyɛ̌m á si bu dûhwo myê, kʉ́ lɛŋ myé ɨ́ buo buo, alwib.

²⁶ Nó ó, ɨ́ báánâ, nyɨ́ kǎ lɛ̂ʼle bʉ̂r ó, nye mʉr tɨ̂, nye ó tîtyěl mʉr. Nyě dwé nkâm ó, bʉr o dí edyɛ̂ʼwo e Yésʉs bá.

²⁷ Mpʉ yé dí nó yɨ́, nzê mʉr óbánǎ tô le enkʉ́na ɨ́ bisyɛ́ɛla byé nyé mʉr tɨ̂ʼ ɛ̌? Heʼé, yʉ́ʉ́ sɔ̂ʼ, yé abe nó! Yé dí ekamle e mɨná gá ó, mɨná nkʉ́naa gâ? Nzê metié mé Nzyɛ̌m ó dí ekamle mɨ́ná gá lɨ́ enkʉ́na ɛ́? Yaá! Sá dí esâ ó, mɨná sá ankʉ́na gá yɨ́, yé ó nzɨ̌ búʼó mɨ́ná dí edû gá nyɨ́.

²⁸ Ebě, mbeá wɨ́h, wé ó, mʉ̌r Nzyɛ̌m dwé nkâm nyá, nye ó njɨ waá dí e búʼó nyá. Nyé abi nkâm ɨ́ lɔ̌b mbaʼlá métié.

²⁹ Nzê Nzyɛ̌m, nye ó njɨ waá oYúden le oYúden bé omér ɛ̌? Ntʉ nyé dí Nzyɛ̌m byúú bíkûl ntémé ɛ́? Yé ó nó, nye ó dí kwahaá Nzyɛ̌m wɔ́ɔ́ ntémé!

³⁰ Ebě, Nzyɛ̌m, nye ó njɨ ngwár. Ɨ́ páʼ bʉ̂r o b'á tíʼɔɔ mpʉ́n bá, nyě dwé bé nkam ó, ɨ́ lɔ̌b búʼó yɔ́ɔ́. Bʉr o dí abě tíʼá mpʉ́n bá, bé lɨ́ ebi nkâm ntémé ó, ɨ́ lɔ̌b búʼó yɔ́ɔ́.

³¹ Ɨ́ jɔʼ bɨ́h túnó búʼó gá yɨ́ná yɨ́, nzê bɨ̌h bé lɨ́ egbɛ́ɛ métié ɛ̌? Heʼé, yé abá be nó! Bɨ̌h lɨl métié maá ó, lɨlɨ́ɨ.