Bìoball air-loidhne

Rôm 16 - Kálar Nzyɛ̌m : Ejwán é Sáá

Meswɨhlɨ mé Pɔ̂l

¹ Mě kpɛl ó, bɨ̌n gʉ́ŋaa kɛ́l gá wɨ́ná Fébe. Nye ó dí diâkɔn Mbɛ̌r-Nzyɛ̌m dí ɨ́ Kaŋkreâ wɨ́.

² Jɔʼ nyé ópyâl gʉ̂ʼ kwá nyɨ́n yɨ́, bɨ̌n e béŋlé nyé mbɨ̂mbɨá ɨ́ díé mé Tî Yésʉs, mebeŋla me dí ejala e bʉr o mé Nzyɛ̌m má. Dwéʼ gá nye sá yɨ́yɛ̂h ngá sâ nyé sɔ́ɔlʉ yɨ́, ebě, nye mʉr tɨ̂ʼ á si súʼo bʉr ɨ́ buo buo ti e mɛm mʉr tɨ̂ʼ ntémé.

³ Sohaa gá me Prǐska, bé e njʉ̂m wé Akílas, bʉr o bɨ́h le onɔ́ɔ́ dí eséǎ syɛ́ɛ́ mé Yésʉs-Krîst bá!

⁴ Jɔʼ mé á gwa dwe yɨ́, bé á si tiʼ me. Bé á be ó, bé búrá ó e me, lɨ́ esú lé étiʼ mê. Bɨ̌h e bʉr ó páʼ mé Mbɛ̌r-Nzyɛ̌m dí lɨ́ esú é bíkûl e biloo wɨ́, bɨ̌h bé lɨ́ ebuú dwe bé nzyǒo tɨ̂.

⁵ Sohaa gá ntémé Mbɛ̌r-Nzyɛ̌m dí enzě gwɨ̂hla ɨ́ mbɛ̌r wɔ́ɔ́ wɨ́. Me lɨ́ esohǒ Epayɨ́netɔs, dí só kpɛ̌l wǎm nyá. Nye ó b'á be mʉr esôʼ ɨ́ sí Azía á dyêʼ koo e Krîst nyá.

⁶ Me lɨ́ esoho ntémé Maria, mʉr á bu séa bɨ̌n syɛ́ɛ́ nyá.

⁷ Me lɨ́ esoho ntémé mimbyɛ́l myâm, Androníkus, bé e Yʉniâs. Bɨ̌h le onɔ́ɔ́ ó b'á be ɨ́ mbʉʼ. Bé ó b'á nyɛɛ dyɛ̂ʼwo e Krîst e me. Ɨ́ sɔ́má bʉ̂r o mílʉ́mlʉ́ bé, bé ó bʉr o jálá le ebuú sêʼlɔɔ bá.

⁸ Me lɨ́ esoho ntémé Amplɨátɔs, dí só kpɛ̌l wǎm ɨ́ mpúhlá gá nyɨ́ná e Tî Yésʉs nyá.

⁹ Me lɨ́ esohǒ Úrbanos, dí mʉr bɨ́h e né dí eséǎ syɛ́ɛ́ gwár ɨ́ mpúhlá nyɨ́h e Yésʉs-Krîst nyá. Me lɨ́ esoho ntémé só kpɛ̌l wǎm Stákus.

¹⁰ Me lɨ́ esohǒ Ápelɛs. Nye á si sia e mitúú ɨ́ mpúhlá nyɔ́ɔ́ e Krîst. Nó ntémé ó mɨ́ná dí ekʉ́ gʉ́a gá tyeetye ó, nyě e búʼó yɨ́. Me lɨ́ esoho ntémé bʉr ó mbɛ̌r bʉ̂r mé Arîstobul.

¹¹ Me lɨ́ esohǒ mbyɛ́l wâm Erodíon. Me lɨ́ esoho ntémé bʉr ó mbɛ̌r bʉ̂r mé Nákisʉs, baá o dí egúmo e Tî Yésʉs bá.

¹² Me lɨ́ esoho ntémé Trifɛ́na, bé e Trifósa, bʉbá dí eséǎ lelelelě syɛ́ɛ́ mé Tî Yésʉs bá. Me lɨ́ esoho ntémé Pɛrsída, kɛ́l gá wɨ́ná. Nye á si kʉ séa Tî Yésʉs syɛ́ɛ́.

¹³ Me lɨ́ esohǒ Rufûs, mʉ̌r Tî Yésʉs á twâr nyá. Me lɨ́ esoho ntémé nyɔ̌ŋ wé, dí me ntémé áyo nyá.

¹⁴ Me lɨ́ esoho ntémé Asinkrît, Flegônta, bé e Ermês, le Patrobâs, le Ermâs ti e bʉ́ʉ́ óbûʼla, bé e boo nɔ́ɔ́ dí gúmo gwár bá.

¹⁵ Me lɨ́ esoho ntémé Filolɔ̂g, bé e Yʉlía. Sohaa gá me ntémé Nerée, bé e kɛ́l, le Olɛmpâ. Me lɨ́ esoho ntémé bʉ́ʉ́ bʉ̂r o mé Nzyɛ̌m bɨ́bɛ̂h bé e boo nɔ́ɔ́ dí gúmo gwár bá.

¹⁶ Bɨ́báráá gá mbɨ̂mbɨá páʼ nyɨ́n. Bʉr ó Mbɛ̌r-Nzyɛ̌m bɨ́bɛ̂h, bé lɨ́ esoho bɨ́n.

¹⁷ Nó ó, bɨ́ɔɔ́ bâm, me lɨ́ ejɨʼla e bɨ̌n ó, bɨ̌n e báʼ bʉ̂r o dí egbâ nzyɛ́ɛ́lá mecwíí páʼ bʉr e bʉr, le baá dí egbâ mebɔ̌ʼ ɨ́ nzɨ̌ me bʉ́ʉ́ bʉ̂r bá. Bé lɨ́ esâ nó ó, bé nkʉ̂ kamle e milɛ́ʼlá bɨ́n á dweŋɔɔ mí. Diʼee gá ncɛrá e bê.

¹⁸ Mimbi mi bʉ̂r myaá, ntʉ Tî gá wɨ́ná Krîst bé dí eséa. Bé jaá séǎ syɛ́ɛ́ ó, njɨ lɨ́ esú é mímo myɔ́ɔ́. Bé lɨ́ edímle bʉ̂r o dína apǎ gʉ́a ébɛ̂ʼ páʼ émbɨa le ebébe bá, e nzɨ̌ lwǐb mépɨʼ ti e meswɨ̂ʼlʉ.

¹⁹ Bʉr bɨ́bɛ̂h, bé lɨ́ egʉ́ǎ mpʉ bɨ́n dí esâ Tî Yésʉs mejóʼo yɨ́. Nó ó, me lɨ́ ebuú soho ɨ́ lɔ̌b wɨ́n. Mě kpɛl ntémé ó, bɨ̌n díʼee le ocwóó, lɨ́ esú ó, bɨ̌n sâʼ embɨa. Nó ó, ɨ́ nkǒ pâʼ ébébe, anyamlě sâ gá lê!

²⁰ Nzyɛ̌m, mʉr dí egbâ bʉ̂r mepyɛbla ɨ́ miléme nyá, nye ó waá mû kúno etyéelě Sátan sí ɨ́ mebo mɨ́n nyá. Metyɛʼ me mpóm mé Tî gá wɨ́ná Yésʉs, mé díʼee e bɨ̌n.

²¹ Timotɛ̂, mʉr bɨ́h e nɔ́ɔ́ dí eséa nyá, nye lɨ́ esoho bɨ́n. Mimbyɛ́l myâm mî, Lʉ́siʉs, Yásɔn, ndu e Sosípatros, myé lɨ́ esoho ntémé bɨ̌n.

²² Nó ó, mɛm, Tɛ́rtios, cɛma mekaná mâ, dí ɨ́ mpúhlá e Tî Yésʉs nyá, me lɨ́ esoho bɨ́n ntémé.

^23-24 Gáywis, nye lɨ́ esoho bɨ́n ntémé. Nye ó waá á tira me ntɔ́ɔ ɨ́ mbɛ̌r wé nyá, jwɨʼ gwár mpʉ nyé dí ebɨbaʼle bʉ̂r ó Mbɛ̌r-Nzyɛ̌m bɨ́bɛ̂h yɨ́. Erâst, mʉr dí ebaʼle ékúró é bímɔnɨ́ bí nkana yɨ̂ʼ nyá, bé e mɨ́ɔɔ́ gá wɨ́ná Kwártos, bé lɨ́ esoho bɨ́n ntémé.

Pɔ̂l lɨ́ egúmlǒ Nzyɛ̌m

²⁵ Sâ bwaʼ nkûl Nzyɛ̌m dí e né nyɨ́ e! Nkul nyaá ó mû lɨ́ elɨl bɨ́n mpʉ̌ Mbɨambɨa Lɔ́ɔ́ mé dí elɛ́ɛ le etúno wɨ́ dí yɨ́. Mbɨambɨa Lɔ́ɔ waá, wé dumo ó e Yésʉs-Krîst. Wé lɨ́ edû ntémé lwǐb ódîm, yé á boo be solá,

²⁶ yaá mû sí nyɨ̂n ɨ́ ponó yɨ́. Lɔ́ɔ waá, wé á boo be ó cɛmá lɨ́ mekaná mé ógwíha o mílɔ̌b. Bikúl bíbyɛ̂h, byé mû kǎ gʉ́a wé ó, dû mpʉ̌ Nzyɛ̌m á boo tyêl etié lɨ́ esú lɔ́ɔ́ yɨ́. Nzyɛ̌m dí njʉ̌m dǐ e njʉ̌m dǐ nyá, á lɛ̂ʼle byé lɔ́ɔ́ mé Yésʉs waá ó, byé nkʉ̂ dyɛ̂ʼwo e né, le esâ nyé mejóʼo.

²⁷ Ɨ́ Nzyɛ̌m nye omér, waá dí Twóó ocwóó nyá, kûm díʼee e né ɨ́ Mwân wé, Yésʉs-Krîst, njʉ̌m dǐ e njʉ̌m dǐ. Amɛn.

« Roimhe

Air adhart »

Lean sinn:

Ceanglaichean taic

Sanasan