Rôm 15 - Kálar Nzyɛ̌m : Ejwán é Sáá

Sá bʉ̂r dí ekpɛl yɨ́

¹ Mɨná gâ, bʉr o b'á nʉa pîm ɨ́ búʼó bá, bé ɨ́ jala le edûhwo bʉ̂r o dí e búʼó ɨ́ tyɛʼ tyɛʼ bá. Mɨná bé ajala le esáa gá minyɔm gá míná.

² Mʉr nyɨnyɛ̂h ɨ́ sɔ́má gá yɨ́ná, nye sâʼ syɛ́ɛla mɨ́ɔɔ́ wé mʉr ókpɛl yɨ́. Nye sâʼ yaá yé óbɛ̌m be e nyɔm ɨ́ páʼ mɨ́ɔɔ́ waá ó, nye gwɨ́aa ɨ́ búʼó yɨ́!

³ Damá jóʼǒ Krîst mʉr tɨ̂, nye á bé asáǎ nyɔm wé. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Baányâ-melwɨ́ɨ dí elwɨlwɨ́ɨ gó bá, bé mû kǎ lwɨ́ɨ ó, me.»

⁴ Yé á cɛmɔɔ nó ó, lɨ́ esú lé écɨ̂l mɨ́ná gâ, jwɨʼ gwár e gwár e mpʉ̌ sá yɨ́yɛ̂h, yé á cɛmɔɔ ɨ́ Mekaná mé Nzyɛ̌m yɨ́. Mekaná mé, mé lɨ́ ecɨ̂l mɨ́ná gâ, ó milémé gá míná nkʉ̂ lóno ɨ́ mpûʼla. Myé lʉ́lónó ɨ́ mpûʼla ó, ɨ́ lɔ̌b nkûl mékaná mé dí egbâ mɨ́ná gá ɨ́ miléme nyɨ́, le bíhwó mɨ́ná dí esâ gá nyɨ́.

⁵ Nzyɛ̌m, mʉr dí egbâ mɨ́ná gá nkul ɨ́ miléme, waá dí esâ ó, mɨná sâʼ gá bíhwó nyá, nye tyɛ́bɨɨ bɨ̌n ɨ́ miléme, ó bɨ̌n díʼee e mbǐ pahlá ngwár, mpʉ̌ Yésʉs-Krîst ngá tɨ́e bɨ́n yɨ́,

⁶ lɨ́ esú ó, bɨ̌n gúmlaa waá dí Nzyɛ̌m mé Tî gá wɨ́ná, Yésʉs-Krîst, waá dí Sɔ́ŋ wé nyá, twíí mpwár!

⁷ Nwɨnwɨɨlaa gá páʼ nyɨ́n mpʉ̌ Yésʉs-Krîst á nʉa bɨ̌n yɨ́. Sáʼ gá nó lɨ́ esú lé édwě Nzyɛ̌m kûm.

Krîst, nye ó syɛ̂l mesâ me bʉ̂r bɨ́bɛ̂h

⁸ Me lɨ́ eboʼlo bɨ́n lɔ́ɔ́ wɨ̂: Krîst á si dwir nye mʉr tɨ̂ʼ syɛ̂l mesâ lɨ́ esú lɨ́h, Yúden. Nye á sâ nó ó, lɨ́ esú lé élɛ̂ʼle bɨ́h mpʉ̌ Nzyɛ̌m dí mʉr otyeetye yɨ́. Nó ó nyé á lɨl menkɛ̌ʼ Nzyɛ̌m á dwe bimpám bíh má yɨ́.

⁹ Nye á nze séa ntémé ó, lɨ́ esú é bíkúl bíswîh, ó bé gʉ́ŋaa mpʉ̌ Nzyɛ̌m dí ejɨ̂ʼ bʉ̂r nkoó yɨ́, bé nkʉ̂ gúmlo nyé tɨ̂. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Sá tɨ̂ʼ ó mé ngá gúmlo gó témé bikûl bi dí abe óYúden bí yɨ́. Me ódyɛɛ gó mejéme ɨ́ dúú díé lô.

¹⁰ Nzyɛ̌m lɛ́ɛ́ ntémé ó: Bɨ̌n bʉr o dí abe óYúden bá, sohaa gâ, bɨ̌n e bʉr o mé Nzyɛ̌m.

¹¹ Yé ntémé, yê cɛmá ó: Gúmláá gá Dâ Nzyɛ̌m, bɨ̌n, bʉr o mésí mɨ́mɛ̂h. Séʼláá gá nye, bɨ̌n, bikúl bíbyɛ̂h.

¹² Ngwíha milɔ̌b Ésayie á lɛ́ɛ ntémé ó: Nyʉ́ʉ́ mʉ̂r óbyɛ̂l ɨ́ mpóʼo mé Yesê mpʉ̌ ntoʼdu pɨ́páh ɨ́ kǔm lɨ́ yé á twɛlɔɔ yɨ́. Nye ónzě di njwɨ́ɨ ɨ́ páʼ bʉ̂r o dí abe óYúden bá. Milémé myɔ́ɔ́, myé ólóno ɨ́ mpûʼla ó, ebě, bé lɨ́ ebóno nyê.

¹³ Nó ó, Nzyɛ̌m dí egbâ bʉ̂r mpûʼla ɨ́ miléme nyá, nye tyɛ́bɨɨ bɨ̌n ɨ́ miléme, ó bɨ̌n sóhaa ɨ́ jɔʼ yɨ́yɛ̂h. Nye lóŋlaa bɨ̌n mepyɛbla ɨ́ miléme, ɨ́ nkul búʼó yɨ́n. Nó ó mílémé mín ngá lóno ɨ́ mpûʼla e nkul Sísǐm wé yɨ́.

Pɔ̂l, nye ó mʉr milʉ́mlʉ́ lɨ́ esú é bʉ̂r o dí abe óYúden bá

¹⁴ Bɨ́ɔɔ́ bâm! Okɛ́l bâm! Mɛm mʉr tɨ̂, me lɨ́ egʉ́a mbɨ̂mbɨá ó, bɨ̌n bé ó lwɨ́ŋlá e mpam. Bɨ̌n bé lɨ́ egʉ́a bísá bíbyɛ̂h. Le ntémé ó, bɨ̌n bé e nkul edwidweela métwɨ́ɨ́ páʼ nyɨ́n.

¹⁵ Damá jóʼo nó, mě cɛmá bɨ́n mekaná mâʼ ó e gúú mbi ményan ɨ́ léme. Byúú bípéh bí tɨ̂, byê cɛmɔɔ ó, lɨ́ esú lé éjɨm bítɔŋlá bín. Mě cɛmá bɨ́n nó ó, ebě, Nzyɛ̌m, nye lɨ́ elɛ̂ʼle mé mpam.

¹⁶ Nye á bě sí sʉ mé metyɛʼ me mpóm, ó me díʼee syɛ̂l mesâ mé Yésʉs-Krîst lɨ́ esú é bʉ̂r o dí abe óYúden bá. Me mû ó mpʉ pára dí eliŋ bʉ̂r baá ndwéá Nzyɛ̌m dí ekpɛl, waá Sísǐm wé, wé á pubo wɨ́ nyá. Syɛ́ɛ́ pára mé dí esâ yɨ́, yé ó syɛ́ɛ́ étúnǒ Mbɨambɨa Lɔ́ɔ dí eduho kwá mé Nzyɛ̌m wɨ́.

¹⁷ Nó ó, ɨ́ mpúhlá nyɨ́h e Yésʉs-Krîst, mě e nkul enkʉ́na ɨ́ lɔ̌b bísyɛ́ɛ́ mé dí eséǎ Nzyɛ̌m bí.

¹⁸ Me álwǐb sá swîh, njɨ̌ syɛ́ɛ́ Yésʉs-Krîst á séa e nzɨ̌ nyǎm, ó me dúlaa bʉr o dí abe óYúden bá, nze e bé ɨ́ míh mé Nzyɛ̌m yɨ́. Bé mû ó lɨ́ esâ nyé mejóʼo ɨ́ lɔ̌b bílwǐb mé á lwilwib bí byaá, ti e bisyɛ́ɛla mé á sɨ̂sa bí.

¹⁹ Me á sɨséa ntémé ó e mesimá, le bisá bí ékâm, ti e bisyɛ́ɛla bi nkûl Sísǐm mé Nzyɛ̌m wé á sâ bí. Me á nze túno Mbɨambɨa Lɔ́ɔ dí edumo e Yésʉs-Krîst wɨ́ ó, bigúmó bíbyɛ̂h, táare ɨ́ Yerʉ́zalɛm, tó kumǒ Ilirikɔ̂m.

²⁰ Léme, wé á be me ɨ́ báná báná ó, me túnaa Mbɨambɨa Lɔ́ɔ ɨ́ bigúmó bíbyɛ̂h bʉ̂r dína apǎ jóʼo bé lɨ́ etwóolo díé mé Yésʉs-Krîst tɨ̂ʼ bí. Me á bé akpɛl étúno wé kwá bʉr o b'á nyɛɛ dweŋɔɔ lɛ́ʼlá waá bá. Bʉr, bé ámû lɛ́ɛ, dumo e me ó, mɛm á jaa susumo mimbɛ̌r ó, njɨ ɨ́ mempɔɔnʉ mé onkán. Mě kpɛl ó, yé díʼee ɨ́ wâm pâʼ mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó:

²¹ Bʉr o b'á be alɛ́ɔɔ lʉ́ʉ́ ékǎn dí edumo e Nzyɛ̌m lɨ́ bá, bé ó ngá bee ɨ́ sʉ́lʉ́lʉ́. Baá bé á be apǎ jóʼo yʉ́ʉ́ sɔ̂ʼ dí edumo e né yɨ́ bá, bɨ́ɛ ó ngá jóʼo.

²² Sá tɨ̂ʼ ó mé á be akoʼo lɨ́ enzě bee bɨ́n, mɛm yɨ́ɛ e gwɨ́má ésâ nó ɨ́ bijɔʼ ɨ́ buo buo yɨ́.

²³ Táare ɨ́ mimbú mí píhe, me á si kʉ gwɨ̂m enze, lɨ́ enzě bee bɨ́n. Sâ gwár, yé á bé abána. Tó kœb ó, ɨ́ báánâ, syɛ́ɛ́ yâm, yɨ́ síe ɨ́ bipéh bí sí bî.

²⁴ Me lɨ́ ebúʼla ó, me óbee bɨ́n ɨ́ jɔʼ mé ólaa lɨ́ etô Panyá yɨ́. Me ódi kwá nyɨ́n bá tîtííǎ lɨ́ esú lé émo e bɨ̌n. Píe tɨ̂, mé olaa. Nó ó, mě kpɛ̌l ó, bɨ̌n súʼaa me ɨ́ tyen yâm yaá.

²⁵ Nó ó, ɨ́ báánâ, me páa nyɛɛ́ tô Yerʉ́zalɛm, lɨ́ etó súʼo óbûʼla o dí gʉ̂ʼ bá,

²⁶ ebě, obûʼla ó sí Masedónia ndu e yaá Akayɨ̂, bé á tíʼe ɨ́ miléme ó, bé syɛŋ ó, mingúlá lɨ́ esú lé óbûʼla ó Yerʉ́zalɛm dí lɨ́ entéʼe bá.

²⁷ Bé bʉr o tɨ̂, bé á si jóʼo bisʉhʉʉ lɨ́ esâ nó. Syɛ́ɛla yaá, yé óbe ntémé ó mpʉ mpʉ́lá bé á jala le ejána nyɨ́. OYúden baá ó b'á nyɛɛ kɛm bʉr o dí abe óYúden bá lɨ́ esú ó, bé bíʼee metyɛʼ me mpóm mé Nzyɛ̌m. Nó ó, ɨ́ báánâ, yé jala ó, bʉr o dí abe óYúden bá, bé súʼaa bɨ́ɛ, lɨ́ edwe bé bisâ bi dí esâ bé sɔ́ɔlʉ bí.

²⁸ Nó ɨ́ jɔʼ mé óbe, me mû sí tô bé e mingúlá myaá, le egʉ́a ó, bɨ́ bi myé yɨ́, mé obúla, tô Panyá, cɨɨ gʉ̂ʼ kwá nyɨ́n yɨ́.

²⁹ Me lɨ́ egʉ́a ó, pyálá mé ópyâl kwá nyɨ́n yɨ́, me óbe ó e metyɛʼ me mpóm mé Yésʉs-Krîst.

³⁰ Nó ó, bɨ́ɔɔ́ bâm, sá mé dí edî bɨ́n ɨ́ díé mé Tî gá wɨ́ná, Yésʉs-Krîst, le ɨ́ kpɛ̌l Sísǐm mé Nzyɛ̌m dí egbâ ɨ́ milémé gá míná yɨ́, yé ó, mɨná lwímlaa gá ɨ́ nzɨ̌ minjɨʼla lɨ́ esú lâm.

³¹ Jɨʼlaa gá ó, mě sá abil ɨ́ mebó mé bʉ̂r ó Yʉ́da dí adyɛ̂ʼwo e Nzyɛ̌m bá. Jɨʼlaa gá ntémé ó, obûʼla ó Yerʉ́zalɛm nʉ́aa mingúlá mé ótô bé e myé mí mbɨ̂mbɨá.

³² Nó ó mé ngá pyâl kwár nyɨ́n lwɨ́ŋlá e bisʉhʉʉ yɨ́, Nzyɛ̌m ókpɛl nó, me nkʉ̂ gʉ́a gbala mbɨ̂mbɨá páʼ nyɨ́n.

³³ Nzyɛ̌m dí egbâ mɨ́ná gá mepyɛbla ɨ́ miléme nyá, nye díʼee e bɨ̌n óbɛ̂h. Amɛn.