Rôm 14 - Kálar Nzyɛ̌m : Ejwán é Sáá

Sá adwe mɨ́ɔɔ́ gǒ mʉr mebě

¹ Beŋlaa gá mɨ́ɔɔ́ dína apǎ nʉa pîm ɨ́ búʼó nyá. Búʼó yé le yaá yɨ́n, byé ósyɛ́ɛla nó, apére gá mekǎn e né ɨ́ lɔ̌b bwá mílɔ̌b mi dí epahlɔɔ mímbi mimbi tʉ́ŋlʉ̌ Mbɛ̌r-Nzyɛ̌m mí.

² Ɨ́ lɔ̌b méde, nyâʼ mʉ̂r, nyě beé ó, nye óbɛ̌m dě dœʼ yɨ́yɛ̂h, agbah métié mé Nzyɛ̌m. Nyʉ́ʉ́ mʉ̂r dí agwá be e búʼó nyá, jaá dɨdě njɨ micwíʼ.

³ Mʉr waá dí ede mímbi méde mímyɛ̂h nyá, nyě sá apyêh búʼó mʉ̂r dí eti tír nyá. Mʉr dí eti tír nyá, nyě sá adwe baá o dí ede mímbi méde mɨ́mɛ̂h bá mebě, ebě, Nzyɛ̌m á si beŋle mɨ́ɔɔ́ wɨ́n waá.

⁴ Gua, go nzé, gó dí edwe syɛ̂l mesâ nye onkán mebě nɨ̌? Nyé sí sâ ébébe nó, njwɨ́ɨ wé ó jálá le elɛ̂ʼle nyé lǎ. Nyé sí sâ émbɨa nó, njwɨ́ɨ wé ntémé ó jálá le elɛ̂ʼle nyé lǎ. Nye átwe yɨ́ɛ twêʼ, ebě, Tî Yésʉs, nyě e nkul esúʼo nyé lɨ́ esú ó, nye ayɨ́ twe.

⁵ Bâʼ bʉ̂r, bé jwɨʼ ó, myúú mímóhó, myé lɨ́ elaa myúú ɨ́ dúu ɨ́ míh mé Nzyɛ̌m. Bʉ́ʉ́ bʉ̂r bɨ́ɛ jwɨjwɨʼ ó, mimóhó mímyɛ̂h, myé ó mbi ngwár ɨ́ mbeá wé. Bisyɛ́ɛla bi mʉ̂r nyɨnyɛ̂h, byé ɨ́ jala le eduduho ó, lɨ́ otîtyěl o mípahlá mí lémé wé.

⁶ Mʉr dí ebee ó, gúú móhó, wê nye ó, sá dí ti yɨ́ nyá, nyě sá nó ó, nye gúmlaa Tî Yésʉs tɨ̂. Mʉr dí edě sá yɨ́yɛ̂h nyá, nye lɨ́ egúmlo Tî Yésʉs tɨ̂, ebě, nye lɨ́ edwě Nzyɛ̌m nzyǒo ɨ́ sá nyé dí ede yɨ́. Waá dí eti yʉ́ʉ́ dœʼ nyá, nyě sá nó ó, nye nkʉ̂ gúmlo Tî Yésʉs e nzɨ̌ biti nyaá. Nye ntémé, nye lɨ́ edwě Nzyɛ̌m nzyǒo ɨ́ dœʼ nyɨ́ɛ dí ekam éde yɨ́.

⁷ Abe e mʉr ngwár ɨ́ sɔ́má gá yɨ́ná dí etiʼe, nkʉ̂ dwe, lɨ́ esú lé, nye mʉr tɨ̂.

⁸ Tíl mélú mɨ́ná gá dína ɨ́ twiʼ yɨ́, yé e nyɔm lɨ́ esú ó, mɨná gúmlaa Tî Yésʉs e tɨ̂. Jɔʼ mɨ́ná dí edwe gá yɨ́, mɨná dwé gá ó, mɨná gúmlaa gá nye ntémé. Nó ó, mɨná damá tiʼe gá, nkʉ̂ ntémé dwe, mɨná óbɛ̂h gúmó gá ó e Tî Yésʉs.

⁹ Ebě, Krîst á si dwe, nzě pah, ó nye díʼee Njwɨ́ɨ ɨ́ páʼ bʉ̂r o dí ɨ́ twiʼ bá, ndu e baá o mû sí dwe bá.

¹⁰ Ɨ́ mpʉ yé dí nó yɨ́, gua, go nzé, gua mʉr dí edwe mɨ́ɔɔ́ gǒ mʉr mebě nɨ̌? Gua ntémé, go nzé, gua mʉr dí epyêh mɨ́ɔɔ́ gǒ mʉ̌r nɨ̌? Mɨná gá óbɛ̂h, bé ótó tyɛ̂b gá ɨ́ mpǒm diá tîʼ milɔ̌b gá wɨ́ná, Nzyɛ̌m.

¹¹ Ebě, yê cɛmá ó: Dâ Nzyɛ̌m káálé ó: «Yé bé me dína ó, ɨ́ twiʼ nó, me ókʉ́ bánǎ sâ ó, mʉr nyɨnyɛ̂h bɨ́ʼɨɨ mebóó sí ɨ́ mpǒm nyǎm. Mʉr nyɨnyɛ̂h gúmlo mê, mɛm, mʉr dí Nzyɛ̌m nyá.»

¹² Nó yé lɛ́ʼlé ó, mʉr nyɨnyɛ̂h ɨ́ sɔ́má gá yɨ́ná ókar ɨ́ míh mé Nzyɛ̌m.

Sá agbâ ébɔ̌ʼ ɨ́ nzɨ̌, nkʉ̂ twehle mɨ́ɔɔ́ gǒ

¹³ Ɨ́ mpʉ yé dí nó yɨ́, mɨná gwáʼaa gá edweela mébě páʼ gá nyɨ́ná. Gbáʼ gá nkul. Ayɨ́ sâ gá sá dí e nkul esâ ó, mɨ́ɔɔ́ wɨ́n bɨ́mɨɨ ebɔ̌ʼ yɨ́.

¹⁴ Ɨ́ mpúhlá nyɨ́h e Tî Yésʉs, me lɨ́ egʉ́a ntémé ó, ntʉ̌ dœʼ yé mʉr tɨ̂ʼ dí e nkul elœ̌ʼ lémé mʉ̂r. Sâ gwár, mʉr dí edě dœʼ yaá, nyɨɛ lɨ́ ejwɨʼ ó, yé ólœ̌ʼ lémé wé nyá, yé ó tyeetye: dœʼ yaá, yé ó lwǎʼ ɨ́ lémé mʉ̂r waá.

¹⁵ Yé bé sá gó dí ede yɨ́, yé óbɛ̌m ntɨ̂ʼ mɨ́ʉ̌ ɨ́ nkǒ páʼ búʼó nó, go ó, gʉ́ bɔ́ʼa e mpaŋ nzɨ́ ɨ́ jɔʼ gó dí edě sâ yaá yɨ́ ó tɨ̂ʼ yɨ́. Gó alɛ̂ʼle nyé kpɛ̌l ɨ́ kʉ̌ tyen gô. Sá asâ ó, mʉ̌r Krîst á dwe, búra e né nyá, dímɨɨ ɨ́ nkɔb bʉr ɨ́ lɔ̌b mbi méde gó dí ede wɨ́.

¹⁶ Syɛ́ɛla bɨ́n bɨɛ dí ebee ó, yé ɨ́ jala le esáŋɔɔ yɨ́, yé bé bʉr, bé óswêʼ míé mɨ́n e tɨ̂ʼ nó, anzoó sâ gá yê!

¹⁷ Mpóʼo mé Nzyɛ̌m, nyé abe mpóʼo mede le menyoʼ. Nye ó mpóʼo otîtyěl, mepyɛbla, ndu e bisʉhʉʉ mɨ́ná dí ebi gá e nzɨ̌ Sísǐm mé Nzyɛ̌m bí.

¹⁸ Ebě, mʉr dí eséǎ Yésʉs-Krîst syɛ́ɛ́ ɨ́ mbi waá nyá, Nzyɛ̌m, nye lɨ́ ebee nyé mbɨ̂mbɨá. Bʉr ntémé kam nyê.

¹⁹ Mpʉ yé dí nó yɨ́, mɨná gbâʼ gá nkul lɨ́ esâ bísyɛ́ɛla bi dí esâ ó, sɔ́má gá yɨ́ná tíʼaa ɨ́ mepyɛbla bí, ti e byaá ngá sâ ó, bʉ́ʉ́ bʉ̂r, bé gwɨ́aa ɨ́ búʼó bí!

²⁰ Syɛ́ɛ́ Nzyɛ̌m á séa yɨ́, mʉ̌r sá andáma nyé yǎ ɨ́ lɔ̌b méde! Yê tyeetye ó, yé abe e mede me dí lwǎʼ ɨ́ míh mé Nzyɛ̌m. Mé bɨ́bébé ó, ɨ́ jɔ̌ʼ ndéá méde waá, dí esâ ó, mʉr dúmaa lɨ́ ebébe yɨ́.

²¹ Yê mbɨ̂mbɨá ɨ́ páʼ gô ó, gǒ sá ade tír, nkʉ̂ menyoʼ, nkʉ̂ sâ syɛ́ɛla yɨ́yɛ̂h dí e nkul edulo mɨ́ʉ̌ ó, nye dúmaa lɨ́ ebébe yɨ́.

²² Sá gó mû sí bûʼla yɨ́, baʼlaa yé ɨ́ lémé gô tʉ́ŋlʉ̌. Bɨ̌n e Nzyɛ̌m obá nkʉ̂ gʉ́a yê. Nzyɛ̌m ósʉ métyɛʼ me mpóm mé ó, ɨ́ mʉr dí edû kʉ̌ tyen mʉ̂r tɨ̂ʼ á pa kam wɨ́ nyá. Mʉr waá, nye ábeě sá nyé ójʉba e tɨ̂ʼ ɨ́ kʉ̌ tyen wé waá.

²³ Tó kœb ó, mʉ̂r ódě dœʼ e mesónó ɨ́ léme nó, nye óbi mébě ɨ́ míh mé Nzyɛ̌m ɨ́ ndéá waá, ebě, wé aduho ɨ́ búʼó yé. Ebě, syɛ́ɛla yɨ́yɛ̂h dí aduho ɨ́ búʼó yô yɨ́, yê go ó syóm.