Rôm 13 - Kálar Nzyɛ̌m : Ejwán é Sáá

Obûʼla, bé jálá le esâ ójwɨ́ɨ bɔ́ɔ́ mejóʼo

¹ Mʉr nyɨnyɛ̂h, nye sâʼ ojwɨ́ɨ́ ó sí yé mejóʼo, ebě, nkul jwɨ́ɨ nyɨnyɛ̂h, nye ó nyaá Nzyɛ̌m á tyêl nyɨ́. Bʉr o dí e jwɨ́ɨ bá, Nzyɛ̌m ó b'á tyêl bê.

² Nó ó, mʉr dí egbɔba e njwɨ́ɨ nyá, nyě kʉ́ lwímla ó e sá Nzyɛ̌m á tyêl yɨ́. Baá dí esâ nó bá, bɨ́haá, bé dáʼré ó, bintɨ́ʼá ɨ́ menyʉ́l mɔ́ɔ́.

³ Baá dí esâ émbɨa bá, bé abe e bʉ́á ɨ́ miléme lɨ́ etyɛ̂b ɨ́ mempǒm mé ójwɨ́ɨ. Tó kœb ó, bʉr o dí esâ ébébe bá, bé ó dí e bʉ́á nyaá ɨ́ milémé myɔ́ɔ́. Nzê gǒ gwɨ́m ó, mipahlá mí lémé myô, myé díʼee ɨ́ pyɛɛɛ jɔʼ yɨ́yɛ̂h ɨ́ míh mé ójwɨ́ɨ baá ɛ̌? Sáʼ émbɨa bé, bé nkʉ̂ sêʼle gô!

⁴ Ebě, njwɨ́ɨ, nye ó syɛ̂l mesâ mé Nzyɛ̌m dí lɨ́ esú lé ésâ gó embɨa nyá. Bɨ́n sí sâ ébébe nó, kpɛ́yɨ́ɨ́ gá njwɨ́ɨ ɨ́ jɔʼ yaá, ebě, nkul jwɨ́ɨ nyé á bi nyɨ́, nye á bé abi nyé dwêh. Nye ó syɛ̂l mesâ mé Nzyɛ̌m, mʉr dí elɛ̂ʼle nkpáa mé Nzyɛ̌m nyá. Nye ó mʉr mpɔlá, le edwe bʉ̂r o dí esâ ébébe bá bintɨ́ʼá.

⁵ Sɨ́ǎ yaá ó bɨ́n jálá le esâ ójwɨ́ɨ mejóʼo yɨ́. Abuú bě njɨ lɨ́ ekpɛ́ɛ nkpáa le bintɨ́ʼá mé Nzyɛ̌m. Bɨ̌n sá ntémé nye mejóʼo maá ó, ebe bɨ́n dí egwɨ̂m ó, mipahlá mí lémé mín díʼee myaá mi dí ɨ́ pyɛɛɛ mí.

⁶ Sɨ́ǎ yaá ntémé ó bɨ́n dí ejánǎ tœ́a yɨ́, ebě, Nzyɛ̌m á si tyêl ojwɨ́ɨ ɨ́ bidǐ byɔ́ɔ́ lɨ́ esú ó, bé tírwaa e syɛ́ɛ́ yaá.

⁷ Jɛ́náá gá bʉr bɨ́bɛ̂h mempʉ́lá bɨ́n dí bé e mé má. Bwámáá gá bitœ́a kwá bʉr o dí ebɛ́ma byé bá. Jwááwáá gá baá o dí ejala e dúu bá. Gúmláá gá baá o dí ejala e kûm bá.

Kpɛ̌l páʼ bɨ́ɔɔ́ e bɨ́ɔɔ́

⁸ Adi gá nyʉ́ʉ́ mʉ̂r e mpʉ́lá. Damá jóʼo nó, bɨ̌n bé yɨ́ɛ ó e mpʉ́lá bɨ́n jálá le ejɨjána nyɨ́. Nye ó kpɛ̌l páʼ nyɨ́n. Mʉr dí ekpɛl mʉ̂r njoo yé nyá, nyɨ́ baʼle métié mé Nzyɛ̌m mɨ́mɛ̂h.

⁹ Metié mé Nzyɛ̌m, mé dí elɛ́ɛ ó: Asâ médyɛ̂n. Ajʉ̂ mʉ̂r. Adíbe. Agwɨ̂m sá yé onkán má, ndu e mʉ́ʉ́ mɨ́mɛ̂h, mé tó syɛŋa ó, lɨ́ etié egwár lɨ̂ʼ tʉ́ŋlʉ̌: Kpɛlɨɨ mɨ́ɔɔ́ gǒ mʉr mpʉ gó kpɛ́l gó mʉr tɨ̂ʼ yɨ́.

¹⁰ Mʉr dí ekpɛl mʉ̂r njoo yé nyá, nyé abe e nkul esâ nyé ebébe. Gó kpɛ́l bʉ̂r nó, lɛ́ɛ́, gʉ́ baʼle métié mɨ́mɛ̂h mbɨ̂mbɨá.

¹¹ Sáʼ gá nó, ebě, bɨ̌n bé lɨ́ egʉ́ǎ jɔʼ mɨ́ná gá mû tɨ̂ʼ yɨ́. Ɨ́ báánâ, yé ó jɔʼ bɨ́n jálá le ejɨma ɨ́ bijô yɨ́. Jɔ̌ʼ Nzyɛ̌m á boo pɛ̂h ó, nyě tǐʼ ó mɨ́ná gá yɨ́, yé mû ó kúno epyâl. Yé akǎ cɛrǎ mpʉ yé á nyɛɛ be ɨ́ jɔʼ mɨ́ná bé á nyɛɛ bûʼla gá yɨ́.

¹² Pum mû ó téme elaa; móhó lɨ́ esîhle. Mɨná bírɨɨ gá bisyɛ́ɛla bi dí esáŋɔɔ lɨ́ edúrʉ́ʉ́ bí. Mɨná bwáraa gá mimbór mí dɔ̂m lɨ́ esú ó, mɨná lwímlaa gá e myé ɨ́ móhó.

¹³ Mɨná, bʉr o dí etye ɨ́ móhó bá, mɨná tíʼaa gá mpʉ dí ejala yɨ́. Mɨná bé ayɨ́ lɔ̂ʼwa gá lɨ́ ede méde, nkʉ̂ puro ményoʼ, nkʉ̂ lœʼ ményʉ́l gá mɨ́ná ɨ́ nzɨ̌ bijoó, nkʉ̂ sâ bímolá nzam le ekomo. Mɨná bé ayɨ́ kǎ gœ́a páʼ gá nyɨ́ná, nkʉ̂ síila páʼ gá nyɨ́ná.

¹⁴ Diʼee gá ɨ́ mpúhlá le Tî Yésʉs-Krîst. Bwáráá gá nye mpʉ̌ kán. Atoŋlo gá mpʉ bɨ́n dí e nkul elóŋlo bísyɛ́ɛla bí njwɨr myâ wɨ́ná yɨ́.