Rôm 11 - Kálar Nzyɛ̌m : Ejwán é Sáá

Nzyɛ̌m lɨ́ ejɨ̂ʼ bʉ̂r o b'Ɨ́zraɛ̂l nkoó

¹ Nó ó mé dí edî ó nɛ́ɛ: ɨ́ mpʉ yé dí nó yɨ́, nzê Nzyɛ̌m á si myah bʉr bé ɛ́? Heʼé, yé abá be nó. Mɛm mʉr tɨ̂, me ó mʉr Ɨ́zraɛ̂l. Me á byɛ̂l ó, lɨ́ onzweh mé Benjamin. Me ó, ɨ́ mpóʼo mé Abraham.

² Nzyɛ̌m á bé amyǎh kúl bʉ̂r nyé á boo lɛ́ɛ ó, yé ó bʉr bé yɨ́. Nzê bɨ̌n bé agʉ́ǎ mpʉ bé á cɛma ɨ́ Mekaná mé Nzyɛ̌m, dumo le Elie yɨ́? Elie á be ó sí pur bʉ̂r o b'Ɨ́zraɛ̂l ɨ́ míh mé Nzyɛ̌m. Nye á lɛ́ɛ ó:

³ Dâ ɛ̌, bɨ́ sîl éjʉ̂ ógwíha o mílɔ̌b bô. Bé ntémé, bɨ́ sîl égbah báalatâr bé á didîʼ mindwéá myô tɨ̂ʼ bá. Yé jaá kǎ lîʼ ó, njɨ me omér lɨ́ edû gô. Bé kǎ sáa ntémé ó, bé jʉ́ ó me.

⁴ Nzyɛ̌m nyɨɛ á ka yala e né nyá? Nye á lɛ́ɛ e né ó: Heʼé, gó abe gó omér. Mɨ́ baʼle bʉ̂r otɔ́ɔ́sin nzaangbá o dí edû mé bá. Abe e lʉ́ʉ́ dʉ́o bé á bɨʼ mebóó mɔ́ɔ́ sí, jɨʼla e Báal.

⁵ Ɨ́ myǎ bʉ̂r gá wɨ́ná wɨ̂, yé ntémé, yé e mâ dœ́h é bʉ̂r lé á lîʼ ɨ́ kúl bʉ̂r o b'Ɨ́zraɛ̂l lɨ́, bʉ̌r Nzyɛ̌m á boo twâr ɨ́ mpam nyé lɨ́ esú lɔ́ɔ́ bá.

⁶ Nye á twâr bé ó, ɨ́ mpam nyé. Nye á bé atwâr bé ɨ́ lɔ̌b bísyɛ́ɛla bimpâ byɔ́ɔ́. Yé bé nye á twâr bé ó, ɨ́ lɔ̌b bísyɛ́ɛla byaá nó, lɛ́ɛ́, mpam á bé akǎ be mpâm.

⁷ Nó, yê yé? Bʉr o b'Ɨ́zraɛ̂l, bé á bé abǐ sá bé á sɨsáa yɨ́. Baá Nzyɛ̌m á twâr bá bɨɛ, bé ó b'á bi yê. Baá bʉ́ʉ́ bɨ́bɛ̂h, milémé myɔ́ɔ́, myé á be ɨ́ buú lele lɨ́ ebúʼla.

⁸ Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Nzyɛ̌m á si sâ ó, milémé myɔ́ɔ́, myé díʼee ɨ́ lele lele. Nye á si dible míh mɔ́ɔ́, ó bé ayɨ́ kǎ bee. Nye ntémé á si dibe megwǎl mɔ́ɔ́, ó bé ayɨ́ jóʼo. Nzě kumo ɨ́ dʉ́ó lɨ̂ʼ mûh, bé ó njɨ nó.

⁹ David ntémé á lɛ́ɛ ó: Edɨ́ɨ́ é méde lɔ́ɔ́, lé díʼee mpila dí ó, bé óbil tɨ̂ʼ yɨ́. Lé díʼee ebɔ̌ʼ lɨ́ esú lɔ́ɔ́. Bé dúmaa tyeetye. Nzyɛ̌m nkʉ̂ dwe bé bintɨ́ʼá,

¹⁰ Nzyɛ̌m díblaa bé mîh, ó bé ayɨ́ kǎ bee. Nzyɛ̌m dwêʼ bé bintɨ́ʼá ɨ́ jɔʼ yɨ́yɛ̂h. Nye sâʼ ó, mikoo myɔ́ɔ́, myé nyɛ́mlɨɨ.

¹¹ Nó ó, me lɨ́ edî tíá ó: nzê oYúden, bé á jaa twe ó, dumǎ tyeetye ɛ̌? Heʼé, yé abá be nó, ebě, Nzyɛ̌m á si tiʼ bʉr o byúú bíkûl biswîh ɨ́ lɔ̌b ébébe lɔ́ɔ́ bé á sâ lɨ́. Nye á dwe byé twǐʼ njʉ̌m dǐ ó, lɨ́ egbâ óYúden egú ɨ́ miléme.

¹² Jɔʼ bʉ̂r o b'Ɨ́zraɛ̂l, bé á gbah metié yɨ́, Nzyɛ̌m ntɔ̂ʼ nzě liŋ ébébe laá okúm le ogbaa lɨ́ esú é bʉ̂r ó sí bɨ́bɛ̂h. Nzyɛ̌m pǎ nyɛɛ́ kaale bʉ̂r o bíkúl bíbyɛ̂h okúm wé ɨ́ jɔʼ óYúden, bé á sâ nye ebɨ̌h yɨ́, á dwɛʼra e mpam nyé ólɛ̂ʼle mɨ́ná gá le onɔ́ɔ́ nyɨ́, ɨ́ jɔʼ óYúden baá bɨ́bɛ̂h ngá báʼǎ nze kwá nyé yɨ́! Nye ólɛ̂ʼle mɨ́ná gá le onɔ́ɔ́ mpam ɨ́ ntʉʉʉ́.

¹³ Ɨ́ báánâ, me mû ó lɨ́ enzě lwib e bɨ̌n, bʉr o dí abe óYúden bá. Me ó mʉr milʉ́mlʉ́ Nzyɛ̌m á lómlo bʉr o dí abe óYúden bá nyá. Me lɨ́ ekʉ́ buú nkʉ́na ɨ́ lɔ̌b syɛ́ɛ́ mé dí eséa lɨ́ esú lɨ́n ó,

¹⁴ me nkʉ̂ gbâ kúl bʉ̂r yâm, oYúden, egú ɨ́ miléme. Jáŋá bʉ́ʉ́ bʉ̂r ɨ́ sɔ́má yɔ́ɔ́, bé ónzě bǐ twǐʼ njʉ̌m dǐ e nzɨ̌ nyaá.

¹⁵ Nzyɛ̌m pǎ nyɛɛ́ sâ sáá e bʉr ó sí yɨ̂ʼ ɨ́ jɔʼ nyé á bene oYúden yɨ́, á dwɛʼra le embɨa nyé ósâ bé le onɔ́ɔ́ ɨ́ jɔʼ nyé óbáʼǎ nʉa bé yɨ́! Yé ónwɨɨla ó e pahá sóo. Bé óbe ó mpʉ ódwe o dí epah bá.

¹⁶ Péh dœʼ mû sí twámɔɔ, dweŋɔɔ̌ Nzyɛ̌m yɨ́, yé mû ó sá dí ti yɨ́. Mede mɨ́mɛ̂h me dí tɨ̂ʼ má, mé mû ntémé ó, sá dí ti yɨ́. Bé sí dwě Nzyɛ̌m mikaalé mí lɨ́ nó, go ó, milɔ́ɔ mi dí eduho ɨ́ kuó lɨ́ yaá mí, myé gúmó ntémé ó e Nzyɛ̌m.

¹⁷ Kúl bʉ̂r o b'Ɨ́zraɛ̂l, yé ó mpʉ̌ lɨ́ ólivier, yé á be e milɔ́ɔ́ myé á be agúmo mpumó mí yɨ́. Bê nzě syɛ̂h mílɔ́ɔ myaá, ntɔ̂ʼ nʉa myúú mílɔ́ɔ́ mí lɨ́ ólivier yé á pâh ɨ́ dwǐʼ yɨ́, ntɔ̂ʼ nɛr myé tɨ̂ʼ ɨ́ kuó lɨ́ yaá. Jwɨʼ gwár e gwár yaá ó bɨ́n á nɛrɔɔ ɨ́ kúl óYúden yɨ́. Bɨ̌n ntɔ̂ʼ pûhla e bé lɨ́ edirǎ nyɔm ɨ́ bitûl bi dí eduho ɨ́ mikaalé bí. Bitûl byaá, byé ó dí edwe mépwaʼ ɨ́ milɔ́ɔ mi dí minɛrá ɨ́ kuó lɨ́ mí.

¹⁸ Mpʉ yé dí nó yɨ́, apyêh gá milɔ́ɔ́ mí lɨ́ mû sí syɛ́hɔɔ mí. Bɨ́n ódoʼo nó, bɨ̌n agʉ́a gá ó, ntʉ bɨ́n, milɔ́ɔ, dí enkɛ́ɛ míkaalé. Mikaalé míɛ ó dí enkɛ́ɛ mílɔ́ɔ.

¹⁹ Go óbɛ̌m yala ó: «Yé ó nó, Nzyɛ̌m á syɛ̂h myúú mílɔ́ɔ́ mínɨ̌ ó, me díʼee ɨ́ dǐ bé á pʉʼa yɨ́, nɛrá ɨ́ kuó.»

²⁰ Gʉ́ kʉ́ gwá lɛ́ɛ. Bé á syɛ́hɔɔ ɨ́ lɨ́ yaá ó, ebě, bé á bé abe e búʼó. Bɨ̌n bɨɛ, bé ódi ɨ́ diá nɨ̌ ɨ́ bea bea ó, ɨ́ nzɨ̌ búʼó yɨ́n. Ayɨ́ nkɛ́ɛ gá nyʉ̂l. Sá bɨ́n jálá le esâ yɨ́, yé ó, bɨ̌n kpɛ́yɨɨ Nzyɛ̌m.

²¹ Nzyɛ̌m pǎ nyɛɛ́ be, akamle le oYúden, bʉr o nyé á nyɛɛ komlo mpʉ mílɔ́ɔ́ mímpâ bá, á dwɛʼra e bɨ̌n! Nye ákamle e bɨ̌n.

²² Paá bee gá mpʉ̌ Nzyɛ̌m dí elɛ̂ʼle mpâm, le edi, adûhwo bʉ̂r o dí esâ nyé ebɨ̌h, baá bé á twe omyâtyɛ̌ŋ ɨ́ nkɨ́ŋlɨ́m bá. Nyě kʉ́ lɛ̂ʼle mpâm nyé ó, gua. Gúa óbene édi ɨ́ mpam mé Nzyɛ̌m nyaá nó, lɛ́ɛ́, nye ntémé ókʉ́ syɛ̂h gó mpʉ̌ lɔ́ɔ́ lɨ́ e ngɨ́r ɨ́ léme.

²³ Tó kœb ó, óYúden bɨ́ɛ, bé bé atô le ebɨ̌h lɔ́ɔ́ dóló nó, lɛ́ɛ́, Nzyɛ̌m óbáʼǎ tyêl bé ɨ́ bidǐ byɔ́ɔ́ bé á nyɛɛ be tɨ̂ʼ bí, ebě, nyě e nkul ebáʼǎ nɛr bé ɨ́ bidǐ byɔ́ɔ́, bê di.

²⁴ Bɨ̌n bʉr o dí abe óYúden bá, bɨ̌n bé ó mpʉ mílɔ́ɔ́ mí lɨ́ yé á pâh ɨ́ dwǐʼ yɨ́. Nzyɛ̌m nzě tó syɛ̂h gúú lɔ́ɔ́ tɨ̂, nzě tó nɛr wé ɨ́ mpǎŋ lɨ́. Nzyɛ̌m pǎ nyɛɛ́ nɛ̌r lɔ́ɔ́ lɨ́ dwǐʼ ɨ́ mpǎŋ lɨ́, á dwɛʼra e milɔ́ɔ́ myé á syɛ́hɔɔ ɨ́ lɨ́ yaá mí! Nye ókʉ́ bánǎ nɛr myé tɨ̂.

Nzyɛ̌m cwɨ́á ó e bʉr o dí abe óYúden bá, bé e l'oYúden

²⁵ Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa lwǐb ódîm yɨ̂ʼ ɨ́ pébébé. Bɨ̌n ámû jwɨʼ ó, bɨ̌n bé ó ocwóó. Lwǐb ódîm yaá, yé ó: bʉ́ʉ́ bʉ̂r ɨ́ kúl bʉ̂r o b'Ɨ́zraɛ̂l, bé e miléme mi dí ɨ́ buú lele lɨ́ ejóʼo mi. Milémé myɔ́ɔ́, myé óbe ɨ́ lele lɨ́ ejóʼo ó, tó kumo ɨ́ jɔʼ tólɔ́ɔ obûʼla o dí abe óYúden bá, ókumǒ bím Nzyɛ̌m á boo tíʼe ɨ́ lémé wé ó, nyě dwé ó bé twǐʼ njʉ̌m dǐ yɨ́.

²⁶ Mbi wɨ̂ʼ ó, kúl bʉ̂r o b'Ɨ́zraɛ̂l yɨ́yɛ̂h ngá tiʼe yɨ́. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: Tiʼbʉr óduho ó, Síon. Nye ópɛʼ ébɨ̌h lé ónta mé Yákɔb.

²⁷ Saá mé ngá tyêl páʼ nyɨ́h e nɔ́ɔ́ nyɨ́, óbe ó, mbi wɨ̂: Me ópɛʼ bíbaa bí ébébe lɔ́ɔ́ mé á niʼe ɨ́ lɔ̌b mísyóm myɔ́ɔ́ bí, bíbyɛ̂h.

²⁸ Ɨ́ nkǒ páʼ mé Mbɨambɨa Lɔ́ɔ, oYúden, bé mû ó ontɨ̂m le obɨn. Syɛ́ɛla yaá, yé ó nyɔm ɨ́ páʼ wɨ́n, ó bɨ̌n bíʼee twǐʼ njʉ̌m dǐ. Ɨ́ nkǒ páʼ mé Nzyɛ̌m, bé ó mitwárá. Nyě tó dóló le ekpɛl bé ó, lɨ́ esú é bímpám byɔ́ɔ́.

²⁹ Ebě, jɔ̌ʼ Nzyɛ̌m mû sí tíʼe ɨ́ lémé wé ó, nyě jébé ó mʉr swîh, nkʉ̂ mʉr kɛl, le edwe nyé mindwéá yɨ́, nye ácéne mítíʼá mí ésôʼ myaá píe tɨ̂.

³⁰ Bɨ̌n, bʉr o dí abe óYúden bá, bɨ̌n bé á si sâ Nzyɛ̌m ajóʼo ɨ́ mimbú mí píhe. Ɨ́ báánâ mpʉ óYúden bɨ́ɛ dí ebene édyɛ̂ʼwo e né yɨ́, Nzyɛ̌m kǎ nzě jɨ̂ʼ bɨ́n nkoó.

³¹ Mpʉ óYúden, bé á bene edyɛ̂ʼwo e né yɨ́, Nzyɛ̌m á bîr ó, bé sâʼ ebɨ̌h laá ó, nye nkʉ̂ jɨ̂ʼ bé ntémé nkoó, mbi nyé á nyɛɛ jɨ̂ʼ bɨ̌n nyɨɛ nkoó wɨ́.

³² Nó ó, Nzyɛ̌m á si sâ ó, bʉr bɨ́bɛ̂h díʼee mikómó mí ébɨ̌h lɔ́ɔ́. Nye á sâ nó ó, lɨ́ esú ó, nye jɨ́ʼɨɨ bɨ́bɛ̂h nkoó.

Mɨná gúmlaa gá Nzyɛ̌m

³³ Sâ buo ókúm mé Nzyɛ̌m! Ocwóó wé le ngwɨ́á wé, byé abe le odumo. Nzé dí e nkul egʉ́a mítíʼá mí lémé wé? Nzé dí e nkul egʉ́a bísyɛ́ɛla nyé dí esâ bí?

³⁴ Yê cɛmá ɨ́ Mekaná mé Nzyɛ̌m ó: Nzé dí egʉ́a mípahlá mé Dâ Nzyɛ̌m ɛ̌? Nzé dí e nkul edwe nyé metwɨ́ɨ́?

³⁵ Nzé á pa nyɛɛ kʉl nye sɔ̂ʼ, lɨ́ esú ó, nye óbwóolo nyé yǎ ɛ?

³⁶ Yé abe e mʉr, ebě, nye ó b'á komlo bisá bíbyɛ̂h. Byé á kwɨmlɨ ntémé ó, ɨ́ nzɨ̌ nyé. Sá yɨ́yɛ̂h, yê tɨ̂ʼ ó, lɨ́ esú lé. Mɨná gúmlaa gá nye njʉ̌m dǐ e njʉ̌m dǐ. Amɛn.