Rôm 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pɔ̂l, syɛ̂l mesâ mé Yésʉs-Krîst ó dí ecɛma bɨ́n mekaná mâ. Nzyɛ̌m á twâr me ó, me díʼee mʉr milʉ́mlʉ́ wé. Nye á tyêl me lɨ́ empah ó, me tôʼ le etúnǒ Mbɨambɨa Lɔ́ɔ́ wé.

² Mbɨambɨa Lɔ́ɔ waá, Nzyɛ̌m á si boo kɛʼ ɨ́ nzɨ̌ ogwíha o mílɔ̌b ó, nye óntɨh mɨ́ná gá wǎ. Nkɛ̌ʼ nyaá, nye ó cɛmá ɨ́ Mekaná mé dí ti má.

³ Mbɨambɨa Lɔ́ɔ waá dumo ó e Mwân wé. Ɨ́ nkǒ páʼ ébyɛ̂l e bípúno, nye á be ó mʉr mbɛ̌r bʉ̂r mé David.

⁴ Ɨ́ nkǒ páʼ sísǐm wé dí ti wɨ́, nye njwɨrá ó, «Mwân mé Nzyɛ̌m», Yésʉs-Krîst, Tî gá wɨ́ná. Nzyɛ̌m á lɛ̂ʼle mɨná gá ó, nyě e njwɨrá waá ó e nkul ɨ́ buo buo ɨ́ lɔ̌b pahá sóo wé.

⁵ Nzyɛ̌m á si cwɨ́a e bɨ̌h ɨ́ nzɨ̌ mé Yésʉs-Krîst, le etyêl bɨ́h bʉr o mílʉ́mlʉ́ bé, lɨ́ esú é bíkúl bíbyɛ̂h, ó byé dyéʼee koo e né, le esâ nyé mejóʼo. Nye á sâ bɨ̌h syɛ́ɛla yaá ó, lɨ́ esú lé édwe díé é Mwân wé kûm.

⁶ Bɨ̌n ntémé, bé ɨ́ tólɔ́ɔ bʉr baá, ebě, Yésʉs-Krîst á jébe bɨ̌n ó, bɨ̌n dyɛ̂ʼwaa e né.

⁷ Mě cɛmá ó, bʉr bɨ́bɛ̂h o dí Rôm, baá Nzyɛ̌m á kpɛl, le etwâr ó, bé díʼee mitwárá mí bʉ̂r myé bá. Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

Pɔ̂l lɨ́ egwɨ̂m étó bee bʉ̂r ó Rôm

⁸ Sá ésôʼ, me lɨ́ edwě Nzyɛ̌m nzyǒo ɨ́ díé mé Yésʉs-Krîst ɨ́ lɔ̌b wɨ́n, ebě, ɨ́ sí yɨ́yɛ̂h, bʉr bé lɨ́ ejóʼo mílɔ́ɔ́ mín mpʉ bɨ́n dí ebúʼlǎ Yésʉs-Krîst yɨ́.

⁹ Ɨ́ jɔʼ yɨ́yɛ̂h, me lɨ́ ejɨʼla e né ɨ́ lɔ̌b wɨ́n. Nzyɛ̌m mʉr tɨ̂ʼ boʼlo ó, mě lɛ́ɛ́ ó otyeetye. Nye ó mé dí eboó séǎ syɛ́ɛ́ yé e tiŋé ɨ́ lémé wâm nyá. Mě séá yé ó e nzɨ̌ etúnǒ Mbɨambɨa Lɔ́ɔ dí edumo e Mwân wé wɨ́.

¹⁰ Mě jɨʼlá e né ɨ́ jɔʼ yɨ́yɛ̂h ó, nye sʉ́ʼoo me metyɛʼ me mpóm mé, ó me kœ́bɨɨ jɔʼ énzě bee bɨ́n, ɨ́ mitíʼá mí lémé wé tʉ́ŋlʉ̌.

¹¹ Ebě, me lɨ́ ejóʼǒ dwéh ébee bɨ́n lɨ́ esú lé édwe bɨ́n nyʉ́ʉ́ nkûl Sísǐm mé Nzyɛ̌m, ó bɨ̌n nʉ́aa pîm ɨ́ búʼó.

¹² Sá mé dí elɛ́ɛ yɨ́, yé ó, mɨná sâʼ gá menkɔ̌m páʼ gá nyɨ́ná. Búʼó bɨ́n dí ebúʼlǎ Krîst yɨ́, le yaá yâm, byé ó ngá gbâ mɨ́ná gá nkul ɨ́ miléme.

¹³ Bɨ́ɔɔ́ bâm! Okɛ́l bâm! Mě kpɛl ó, bɨ̌n gʉ́ŋaa ó, ɨ́ bijɔʼ ɨ́ buo buo, me á be ó le jwɨʼ ó, me ónzě bee bɨ́n. Me á jaa bʉbɔma sɔ̂ʼ ó, njɨ e mingamla. Sâ gwár, me ónze yɨ́ɛ lɨ́ esú lé énzě séǎ Nzyɛ̌m syɛ́ɛ́ ɨ́ sɔ́má yɨ́n. Me á gwɨ̂m ó, syɛ́ɛ́ yâm, yé gúmaa ntémé mpumó kwá nyɨ́n ɨ́ mpʉ yé á gúmo mpumó ɨ́ mʉ́ʉ́ mésí méswîh yɨ́.

¹⁴ Me ó lɨ́ bi ó, me túnaa Mbɨambɨa Lɔ́ɔ kwá bʉr ó lwǐb grɛ̂k, le kwá bʉr o bílwǐb biswîh. Me túnaa wé kwá ogwɨ́a o mékaná, le kwá bigʉʼlʉgʉ́.

¹⁵ Sá tɨ̂ʼ ó mé dí e tiŋé ɨ́ léme ó, me túnaa Mbɨambɨa Lɔ́ɔ kwá nyɨ́n ntémé, bɨ̌n bʉr ó Rôm yɨ́.

Nkul Mbɨambɨa Lɔ́ɔ

¹⁶ Mé ajóʼo bá sôn ɨ́ Mbɨambɨa Lɔ́ɔ mé dí etúno wɨ́, ebě, wé ó nkul mé Nzyɛ̌m lɨ́ esú lé étiʼ mʉ̂r nyɨnyɛ̂h ngá bûʼla wé nyá, táare le oYúden, kala e baá o dí abe óYúden bá.

¹⁷ Mbɨambɨa Lɔ́ɔ waá, wé lɛ́ʼlé ó, mpʉ̌ Nzyɛ̌m dí edwe bʉ̂r nkam ɨ́ míh mé yɨ́. Yé tááré ó, ɨ́ búʼó, tó swîʼ ɨ́ búʼó. Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: «Tîtyěl mʉr ótiʼe ó, ɨ́ búʼó.»

Mʉr nyɨnyɛ̂h, nye ó syɛ̂l misyóm

¹⁸ Nzyɛ̌m, nyɨ́ lɛ̂ʼle mɨ́ná gá ɨ́ sʉ́lʉ́lʉ́, duho ɨ́ jʉ́o kʉ́ mpʉ nyé dí elɛ̂ʼle nkpáa, duho ɨ́ bibɨ́bla bísyɛ́ɛla bíbyɛ̂h yɨ́. Nye lɨ́ elɛ̂ʼle nkpáa ɨ́ lɔ̌b bʉ̂r o dí elwímla le otyeetye, jaá dudû njɨ bisyɛ́ɛla bi dí onzyɛ́h ónzyɛ́h bí bá.

¹⁹ Sá dí esâ ó, mʉr gʉ́ŋaa Nzyɛ̌m yɨ́, yé lɨ́ enyɨ̂n bʉ̂r bɨ́bɛ̂h ɨ́ ponó. Bʉr bɨ́bɛ̂h, bé lɨ́ ebeě sâ yaá, ebě, Nzyɛ̌m mʉr tɨ̂ʼ á si lɛ̂ʼle bé yǎ.

²⁰ Táarě Nzyɛ̌m á kuho sí, njwɨr wé dí abeɔɔ wɨ́, (nó, yé ó nkul nyé dí njʉ̌m dǐ e njʉ̌m dǐ nyɨ́, ndu e tyé Nzyɛ̌m yé,) wé lɨ́ enyɨ̂n bʉ̂r ɨ́ mîh ɨ́ ponó, ɨ́ jɔʼ mɨ́ná dí egwá dwɛ̂ʼ gá le epahle bísyɛ́ɛla byé yɨ́. Nó ó, bʉr o dí elwímla e Nzyɛ̌m bá, bé akǎ be e nkar ɨ́ míh mé.

²¹ Damá jóʼǒ mpʉ bé á kʉ gʉ́a ó, Nzyɛ̌m, nye ó tɨ̂ʼ yɨ́, bé á bé adwe nyé kûm jálá e né nyɨ́, nkʉ̂ pʉgʉ́ bá dwe nyé nzyǒo. Bé á jaa pɨpahle sɔ̂ʼ ó, njɨ bisâ bi dí abá be e nyɔm bí. Bé ó bigʉʼlʉgʉ́, lúʼo pɨ̂ʼ. Milémé myɔ́ɔ́, myé jaá di ó, njɨ lɨ́ edúrʉ́ʉ́.

²² Bé damá nkʉ́na ó, bé ó ocwóó, nkúná bé kǎ tó sûʼla ó bigʉʼlʉgʉ́.

²³ Líʼe ó, bé dwêʼ Nzyɛ̌m, waá dí adwe nyá kûm, bé á ka dwe kûm ó bikpɛʼkpɛ̂ʼ. Bé á kpaʼ bikpɛʼkpɛ̂ʼ byaá ó, mveʼle bʉ̂r, binʉ̌n, otír, nkʉ̂ onyʉ́a, bisâ bi dí elaǎ mpʉ̌ ngúl mpáá bí.

²⁴ Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bi mpîr bé á gwɨgwɨ̂m bí yɨ́. Nó ó bé dí esɛ́ɛla bísá bí ésɔ́m páʼ nyɔ́ɔ́, nyâʼ lɨ́ esâ nyʉ́ʉ́ yɨ́.

²⁵ Bé á si syɛ́ɛla otyeetye mé Nzyɛ̌m e bibɛr. Gúmó bé á jala le egúmlo le eséǎ Kwihbʉr syɛ́ɛ́ yɨ́, bé á jaa ka dwe kûm ó, njɨ bisá nyɨ́ɛ á komlo bí. Kûm díʼee e Nzyɛ̌m waá, njʉ̌m dǐ e njʉ̌m dǐ. Amɛn.

²⁶ Sá tɨ̂ʼ ó Nzyɛ̌m á bîr ó, bé sâʼ bisyɛ́ɛla bí ésɔ́m bé á kʉ bu gwɨ̂m bí yɨ́. Bʉbá bɨ́ɛ beně mbi bé á komlɔɔ ó, bé sɨ̂saʼ wɨ́. Líʼɔɔ̌ mpǎŋ syɛ́ɛla yaá, nzě lœʼ ményʉ́l mɔ́ɔ́ ó e bisyɛ́ɛla bi dí ajala e mbǐ kwɨmlá wɔ́ɔ́ bí.

²⁷ Bʉrʉ̂m sâ ntémé njɨ jwɨʼ gwár yaá. Bé lɨ́ ebene ékǎ dû bʉ́bá mpʉ bé á komlɔɔ ó, bé dûduŋɔɔ yɨ́. Líʼɔɔ̌ syɛ́ɛla yaá, bé kǎ jóʼo yɨ́ɛ ó, dwéh ékœb bʉ́ʉ́ bʉ́rʉ̂m ɨ́ bijoó mpʉ bʉ́bá. Bʉrʉ̂m e bʉrʉ̂m, bé lɨ́ esɛ́ɛla bísá bí ésɔ́m páʼ nyɔ́ɔ́. Bé lɨ́ edâʼre bíntɨ́ʼá ɨ́ menyʉ́l mɔ́ɔ́. Bintɨ́ʼá byaá, byé ó dí myɛ́na bé dí ebi má, lɨ́ esú é syóm bé dí esâ wɨ́.

²⁸ Bʉr baá, bé á bé abee ó, yé jala ɨ́ páʼ wɔ́ɔ́ ó, bé kámaa Nzyɛ̌m. Nó ó Nzyɛ̌m á nzoo ka bîr bé ó, bé díʼee e pɨʼ ontúl óntúl yɨ́. Nyě bír bé ó, bé sâʼ bisyɛ́ɛla bí ésɔ́m bi dí ajala e bé bí.

²⁹ Bé lɨ́ eswâhle bísyɛ́ɛla bíbyɛ̂h bi dí egbah métié bí. Byé ó dí: jélé, gwɨ́má bísá byé onkán, ebébe é léme, nzwíí, ntaa sʉ́ŋa, ejwɨ́ɨ́ é bʉ̂r, gwɨ́má égœ́a e bʉr, mikóo, sɛ́á mépɨʼ mé ébébe, mesyɛ́ɛla.

³⁰ Bé lɨ́ eswêʼ míé mé bʉ́ʉ́ bʉ̂r. Bé ó ontɨ̂m le obɨn mé Nzyɛ̌m. Bé lɨ́ edîʼ mpêl. Bé lɨ́ esâ énkɛ́ɛ e nyʉ̂l le jáálé. Bé jaá sɨsáa ó, njɨ mepɨʼ mé ékûhlo mʉ́ʉ́ mébébe meswîh. Bé ajóʼo ósɔ́ŋ le onyɔ̌ŋ bɔ́ɔ́.

³¹ Bé ó bigʉʼlʉgʉ́. Bé adira ménkɛ̌ʼ mɔ́ɔ́. Bé e cére ɨ́ miléme. Bé abe e njɨ́ʼá nkóó.

³² Damá jóʼǒ mpʉ bʉ̂r baá, bé lɨ́ egʉ́a ó, Nzyɛ̌m á lɛ́ɛ ó, baá bɨ́bɛ̂h dí esâ mímbi mí ébébe myaá bá, bé dáʼré ó, eswie ɨ́ menyʉ́l mɔ́ɔ́ yɨ́, bɨ́ɛ, bé ó njɨ lɨ́ etô dóló le esɨsâ bísyɛ́ɛla byaá. Yé abě njɨ nó yé omér. Jɔʼ bé dí ebee bʉ́ʉ́ bʉ̂r lɨ́ esâ syóm yɨ́, bé e bisʉhʉʉ ɨ́ miléme. Bé e bé ó: «Sɨ́sáʼ gá njɨ mpʉ́nʉ̌.»