Bìoball air-loidhne

Filemɔŋ 1 - Kálar Nzyɛ̌m : Ejwán é Sáá

Meswɨhlɨ

¹ Yé ó mɛm Pɔ̂l, mʉr dí mbʉʼ ɨ́ lɔ̌b mé Yésʉs-Krîst nyá ó dí ecɛma gó mekaná mâ, bɨ̌h e Timotɛ̂ mɨ́ɔɔ́ wɨ́ná. Bɨ̌h cɛmá ó, gua mɨ́ɔɔ́ kpɛ̌l wɨ́h Filémɔn, dí eboó séa e bɨ̌h syɛ́ɛ́ gwár nyá.

² Bɨ̌h cɛmá ntémé ó, kɛ́l gá wɨ́ná Apía, ndu e Arkípɔs, bʉr o mɨ́ná gá le onɔ́ɔ́ dí elwímla dɔ̂m empwár ɨ́ lɔ̌b búʼó bá, ti e Mbɛ̌r-Nzyɛ̌m dí enzě gwɨ̂hlǎ jɔʼ yɨ́yɛ̂h ɨ́ mbɛ̌r gô wɨ́.

³ Metyɛʼ me mpóm le mepyɛbla, mé díʼee e bɨ̌n, duho e Nzyɛ̌m Sɔ́ŋ gá wɨ́ná, bé e Tî Yésʉs-Krîst.

Kpɛ̌l ndu e búʼó mé Filémɔn

⁴ Jɔʼ yɨ́yɛ̂h mé dí ejɨʼla e Nzyɛ̌m lɨ́ esú lô yɨ́, me lɨ́ edwe nyé nzyǒo,

⁵ ebě, mě jʉ́jóʼó bé lɨ́ elɛ́ɛ ɨ́ páʼ gô ó, go lɨ́ ekʉ́ dyɛ̂ʼwo e Tî Yésʉs, le ekpɛl óbûʼla bɨ́bɛ̂h.

⁶ Me lɨ́ ejɨʼla e Nzyɛ̌m mpʉ mɨ́ná dí esyɛŋa lɨ́ edyɛ̂ʼwo e Yésʉs yɨ́, ó go gʉ́ŋaa bisá bí émbɨa bíbyɛ̂h mɨ́ná dí e nkul esâ gá bí, ebě, yé ó sá mɨ́ná ódwe gá Yésʉs-Krîst yɨ́.

⁷ Mɨ́ɔɔ́ wǎm, yé á si bu dwe me bisʉhʉʉ lɨ́ ebeě mpʉ gó dí ekpɛl óbûʼla yɨ́. Yé ntémé, yé á si bu gbâ bé nkul ɨ́ miléme.

Pɔ̂l lɨ́ ekɛ̌m Onezímos

⁸ Me óbɛ̌m lɛ́ɛ gó ó, go sâʼ sá dí ejala yɨ́, ebě, Krîst á si dwe me lémé élwib ɨ́ kpɛŋlɛm, abáawǒ sɔ̂ʼ.

⁹ Damá jóʼo nó, mě dǐ, alwib e go mpʉ́nʉ̌ ó, ebe mé dí ekpɛl gô. Mě jɨʼlá e go ó, jɨʼláa. Me ó dí elwib e go, mɛm Pɔ̂l, dí tɔ́má mʉr e go nyá. Mě báánâʼ ɨ́ mbʉʼ ó, tɨ̂ ɨ́ búʼó dí edumo e Yésʉs-Krîst yɨ́.

¹⁰ Mě jɨʼlá e go ó, dumo e mwân wǎm Onezímos mê byá ɨ́ mbʉʼ wɨ̂ʼ nyá. Me byá nyé ó, ɨ́ nzɨ̌ elɛ́ɛ nyé Mbɨambɨa Lɔ́ɔ.

¹¹ Ɨ́ mimbú mí píhe, nye á bé abe gó e nyɔm ɨ́ gúú pâʼ. Ɨ́ báánâ, nye mû ó e nyɔm ɨ́ páʼ nyɨ́ná e go.

¹² Nye ó mé dí entɨh gó nyǎ gʉ̂ʼ nɨ̌. Yé ó mpʉ mé dí e nkul entɨh gó bumó lémé yâm yé mʉr tɨ̂ʼ yɨ́.

¹³ Jɔʼ yɨ́yɛ̂h mé dína kɛ́ʼá ɨ́ lɔ̌b Mbɨambɨa Lɔ́ɔ yɨ́, gwɨ́má yâm, yé á be ó, nye díʼee wâ, bɨ̌h e né, nye tyɛ́bɨɨ ɨ́ tyé yô, lɨ́ esú lé ésɨ̂sea e me ɨ́ mbʉʼ mé dí tɨ̂ʼ wɨ̂.

¹⁴ Sâ gwár, me á bé abe e nkul esâ nó, mɨná e go apǎ di twíí. Mé atíne gó e nkul, ó go sâʼ me embɨa laá. Mě jaá gwɨ̂m njɨ ó, go sâʼ me lǎ ɨ́ kpɛ̌l yô.

¹⁵ Yʉ́ʉ́ jɔʼ, Nzyɛ̌m ó b'á sâ ó, bɨ̌n e né bɔ́ʼaa bwá mélû, ó nye báʼa búla kwá nyǒ, bɨ̌n e né nkʉ̂ dǐ gúmo gwár jɔʼ yɨ́yɛ̂h.

¹⁶ Ebě, ɨ́ báánâ, nyé akǎ be gó túʼǎ. Nye lɨ́ entaǎ túʼǎ. Nye mû ó mɨ́ɔɔ́ kpɛ̌l wɨ́ná. Mɛm pǎ nyɛɛ́ kpɛl nyé ɨ́ buo buo, á dwɛʼra e gua! Go ókpɛl ntémé nye, ntaa sʉ́ŋa, ebě, bɨ̌n e né, bé ó bɨ́ɔɔ́ e bɨ́ɔɔ́ ɨ́ mpúhlá gá nyɨ́ná e Tî Yésʉs, bɨ̌n ntémé bɨ́ɔɔ́ ɨ́ nkǒ páʼ bípúno.

¹⁷ Gó bé lɨ́ ekʉ́ gʉ́a ó, me ó só gǒ nó, nʉaa nyé mpʉ gó dí enʉa mé mʉr tɨ̂ʼ yɨ́.

¹⁸ Yé bé nye á si sâ go ebébe nó, láŋáá lé ó, mé o sá gô. Yé bé lɔ̌b mpʉ́lá nó, me ó ngá jána nyê.

¹⁹ Mɛ̌m Pɔ̂l, mě cɛmá mékǎn mâʼ ó e mbó wâm mɛm mʉr tɨ̂: Me ókʉ́ jána gô. Ajɨha ó, go ntémé, go ó me e mpʉ́lá. Nó ó, yé ó twiʼ yô.

²⁰ Nó ó, mɨ́ɔɔ́ wǎm, me lɨ́ ejɨʼla e go ɨ́ díé mé Tî gá wɨ́ná ó, go sâʼ lémé wâm ó, wé súlaa sí ɨ́ mpúhlá gá nyɨ́ná e Krîst.

²¹ Lɨ́ ecɛma gó mekaná mâ, me lɨ́ egʉ́a ó, go ósâ mé mejóʼo. Me lɨ́ egʉ́a ntémé ó, go ósâ ɨ́ buo buo, laǎ bím mê lɛ́ɛ́ yɨ́.

²² Me lɨ́ egwɨ̂m ó, go kómlaa me ntɔ́ɔ mbɛ̌r ɨ́ jɔ̌ʼ Onezímos ópyâl gʉ̂ʼ yɨ́, ebě, me lɨ́ ebúʼla ó, Nzyɛ̌m ósâ mɨ́ná mpam ɨ́ nzɨ̌ minjɨʼla mín. Nye ódwe mé jɔʼ énze gʉ̂ʼ kwá nyɨ́n.

Meswɨhlɨ

²³ Epafrâs, mʉr bɨ́h e nɔ́ɔ́ dí ɨ́ mbʉʼ ɨ́ lɔ̌b mé Yésʉs-Krîst nyá, nye lɨ́ esoho gô.

²⁴ Marc, bé e Arîstark, ndu e Demâs, ndu e Luc, bé ntémé bé lɨ́ esoho gô. Bɨ́bɛ̂h, bé ó bʉr o bɨ́h le onɔ́ɔ́ dí eséa mbô ngwár bá.

²⁵ Tî Yésʉs-Krîst, nye sʉ́ʼoo metyɛʼ me mpóm ɨ́ misísǐm mín.

« Roimhe

Air adhart »

Lean sinn:

Ceanglaichean taic

Sanasan