Mɨngwiha 9 - Kálar Nzyɛ̌m : Ejwán é Sáá

¹ Éngeles tɛ̂n ntɔ̂ʼ lʉ́o sébé wé. Me ntɔ̂ʼ bee twítwén lɨ́ etɨ̂l, duho ɨ́ jʉ́o kʉ́, duma sí. Twítwén waá á si dweŋɔɔ osab, ó nye díbɨɨ mengʉŋ me dí epɨ̌r nǔm bɨ́ dí sí ɨ́ kœ́ʼlɛ́ yɨ́ má.

² Nye ntɔ̂ʼ dib mê. Jɔ̌ʼ bɨ́ yaá, yé á be mběʼ yɨ́, me ntɔ̂ʼ beě dúluu lɨ́ epyâl tɨ̂, dúluu yaá mpʉ̌ dúluu dí epyâl ɨ́ duró lé ólûl yɨ́. Yé ntɔ̂ʼ dwíŋle dʉ́o le ejwoo.

³ Mpʉ yé á pyâl tɨ̂ʼ yɨ́, byúú bísɔ̂ʼ ntémé nzě pyâl, bisɔ̂ʼ mpʉ ócémebiká. Océmebiká baá, nzeŋɔɔ kâʼ sí. Bé á be ó si dweŋɔɔ nkûl elʉ̂ bʉ̂r mpʉ bíbámlwál dí elʉ̂ yɨ́.

⁴ Sâ gwár, bé á bé adweŋɔɔ nkûl epɨ̂ʼ bíká, nkʉ̂ bilɨ́, nkʉ̂ mempeʼ. Bé á jaa lʉlʉ̂ ó, njɨ bʉr. Abe ntémé bʉr bɨ́bɛ̂h, njɨ baá bé á be abe e bijwɨʼ mé Nzyɛ̌m ɨ́ mempǒm bá.

⁵ Etié, lé á be tɨ̂ʼ ó, mʉr bé ólʉ̂ nyá, nye l'adwe. Bé ólʉ̂ bé nó ó, tâŋ ongɔn otɛ̂n. Bé ójaʼra ɨ́ mpʉ bʉ̂r dí ejaʼra e mekpaa ɨ́ jɔʼ bíbámlwál dí elʉ̂ bé yɨ́.

⁶ Ɨ́ melû maá, bʉr, bé ósáa éswie. Sâ gwár, yé ábána. Bé ógwɨ̂m ó, bé dwêʼ, eswie lɨ́ɛ kpɨ̂kpɛɛ bé kpɛ́yɨ́ɨ.

⁷ Nó ó, océmebiká baá, bé á nwɨɨla ó e bikablá bi dɔ̂m. Ɨ́ milʉ́ myɔ́ɔ́, bé á be lɨ́ ebubwâr byúú bísɔ̂ʼ, nwɨɨla e bikáráá bí gʉ̂l. Mempǒm mɔ́ɔ́, mé á nwɨɨla ó e maá me bʉ̂r.

⁸ Ɨ́ milʉ́ myɔ́ɔ́, bé á be ó e mpuo mpʉ mpúo bʉbá. Medye mɔ́ɔ́, mé á be ó mpʉ maá míngbampɨɨ.

⁹ Bé á bě e byúú bísɔ̂ʼ ó, ɨ́ mempɨr mpʉ mímbór mí nkóho mi dɔ̂m. Mempabaá mɔ́ɔ́, mé á duduo ó, ɨ́ mpʉ̌ duú bíkálîʼ bi dɔ̂m bi dí edâʼrɔɔ e bikablá ɨ́ buo buo bí.

¹⁰ Bé á be ó e mikʉ̌n ɨ́ mpʉ bíbámlwál. Bé ntémé, bé lʉ́ ó mpʉ byê. Mikʉ̌n myɔ́ɔ́ myaá, myé ó dí edwe bé nkul elʉ̂ bʉ̂r, tâŋ ongɔn otɛ̂n.

¹¹ Njwɨ́ɨ wɔ́ɔ́, nye ó éngeles dí e nkul jwɨ́ɨ ɨ́ bɨ́ dí sí ɨ́ kœ́ʼlɛ́ yɨ́. Bé lɨ́ ejébe nyé ɨ́ lwǐb ébrœ̂ ó «Abadɔ̂n». Yé bé ɨ́ lwǐb grɛ̂k yɨ́ɛ nó, lɛ́ɛ́, yé ó «Apoliôn»: «Ángbɛ̌h».

¹² Sá túú ésôʼ, yé mû ó sí laa. Byúú bísá bí nkóó bíbá, byé dína ó dóló.

¹³ Éngeles saman á nze lʉ́o sébé wé. Nó ó, me ntɔ̂ʼ jóʼo twíí lɨ́ eduho ɨ́ bintóó bínâ bí alatâr mindwéá. Gúmo yaá, yé á sáŋɔɔ ó e gʉ̂l. Yé á be ó, ɨ́ míh mé Nzyɛ̌m.

¹⁴ Twíí nyaá á lɛ́ɛ éngeles saman ó: «Tó tii bééngeles onâ bé á káʼɔɔ ɨ́ pɨ̌n díbé nɨ́nɨ́ɨ́ bé jɨ́jébé Efrât yɨ́.»

¹⁵ Beéngeles onâ baá, bé ó Nzyɛ̌m á boo komlo ó, bé séaa syɛ́ɛ́ ɨ́ mbû waá, le ngɔn waá, ɨ́ móhó ngwár waá ntémé, lɨ́ ewala egwár le egwár laá ntémé. Nye á komlo bé ó, bé tô jʉ̂ bʉ̂r. Nkɔb bʉr mpwár ɨ́ menkɔb melɛ̂l, bé ójʉ́ŋɔɔ. Nó ɨ́ jɔʼ éngeles á jóʼo lɔ́ɔ waá yɨ́, nye ntɔ̂ʼ tó tii bê.

¹⁶ Me á si bee bisója ɨ́ buo buo ɨ́ bikablá kʉ́. Bé á si lɛ́ɛ me bím bísója byé á be yɨ́. Byé á be ó bʉr omilyɔ̂ŋ minter mimbá.

¹⁷ Ɨ́ mpʉʼ ó mé á bee esimá laá yɨ́: me á si bee bikablá, ndu e bʉr o b'á be ɨ́ mikoo myɔ́ɔ́ kʉ́ bá. Bé á bubwâr ó mimbór mí dɔ̂m, wɨ̂ʼ pâʼ ɨ́ cʉʼ mpʉ̌ siʼe, gúú pâʼ ɨ́ mpʉ nyʉ̂l jʉ́o. Gúú pâʼ ntémé, pɨé e pɨé. Milʉ́ bíkablá, myé á be ó mpʉ mílʉ́ míngbampɨɨ. Júluu le siʼe ndu e pir, byé á be lɨ́ eduduho ɨ́ minum bíkablá byaá.

¹⁸ Bintɨ́ʼá bílɛ̂l byaá, byé á si jʉ̂ bʉr ɨ́ buo buo, jala e nkɔb mpwár ɨ́ menkɔb melɛ̂l. Byé ó dí: siʼe, dúluu, ndu e pir, bisá byé á duduho ɨ́ minum bíkablá bí. Byé ó b'á jʉ̂ bʉr.

¹⁹ Bikablá, byé á jʉ̂ bé ó, ebě, byé á be ɨ́ lele nkûl ɨ́ bitíl bí nyʉ̂l bibá: ɨ́ minum ndu e mikʉ̌n myɔ́ɔ́. Mikʉ̌n myɔ́ɔ́, myé á nwɨɨla ó, le onyʉ́a. Mikʉ̌n ntémé, e milʉ̂. Bé á be lɨ́ elʉlʉ̂ bʉ̂r e myê.

²⁰ Bʉ́ʉ́ bʉ̂r o bé á be apǎ dwe ɨ́ bintɨ́ʼá byaá bá, bé á bé akam étúmo míkoo e bisá bé á sɨsâ e mebó mɔ́ɔ́ bí, nkʉ̂ dwira míléme. Bé á si tô dóló le edwe méleme kûm, bé e bikpɛʼkpɛ̂ʼ bí ónzyɛ̌m bé dí ekpaʼ e mebó mɔ́ɔ́ bí. Bé sɨ́sá bîʼ ó e gʉ̂l, byúú e mɔnɨ́ nkóho, ndu e binkóhó bígbáá, byúú e mekóʼ. Byúú, byé lɨ́ ekpaʼɔɔ ɨ́ bilɨ́. Bisâ byaá, byé abee, byé ajóʼo, lúʼo bá sɔ̂ʼ. Byé atyě tyen. Sâ gwár, bɨ́ɛ l'agwâʼ édwe byé kûm.

²¹ Bé á bé adwira míléme, bírɔɔ éjwɨ́ɨ́ é bʉ̂r, sɛ́á mímǐr mí éleme, bimolá ndu e díbe.