Mɨngwiha 8 - Kálar Nzyɛ̌m : Ejwán é Sáá

Mâ nteme, nye lɨ́ ebʉ̂ sitâm épíhe ɨ́ mekaná

¹ Nó Mâ Nteme á bʉ̂ sitâm nzaangbá. Jɔʼ nyé á pɛʼ yé yɨ́, bisá bíbyɛ̂h bi dí ɨ́ jʉ́o kʉ́ bí, byé ntɔ̂ʼ di ɨ́ puuu, tâŋ péh éwala.

² Píe tɨ̂, me ntɔ̂ʼ bee bééngeles nzaangbá bé á tityɛ̂b ɨ́ míh mé Nzyɛ̌m bá. Bé á si dweŋɔɔ osébe.

^3-4 Nyʉ́ʉ́ éngeles swîh á be ó e bélé gʉ̂l ɨ́ mbô, bélé bé dí edîʼ ótú ó dúu e tɨ̂ʼ jɔʼ yɨ́yɛ̂h yɨ́. Nye á si nze tyɛ̂b kúnókúno le alatâr á sáŋɔɔ ɨ́ gʉ̂l nyá. Nye á be ó, ɨ́ mpǒm mecwɨ́ɨ́ mé Nzyɛ̌m. Bé á si dwe nye béle le otú ɨ́ buo buo, ó nye díʼɨɨ wê. Nye nzě dîʼ wê. Jɔʼ ótú wé á dudúo yɨ́, dúluu, yé á pipyâl ó, duho ɨ́ bélé yé á be ɨ́ mbó wé yɨ́. Júluu, yé á bɨbére ó béráa, tô nkǒ Nzyɛ̌m á be ɨ́ mecwɨ́ɨ́ mé jwɨ́ɨ yɨ́, mpúhlá e minjɨʼla mi bʉ̂r bé bɨ́bɛ̂h.

⁵ Nó ó éngeles á si nʉa béle yaá, nʉa ntémé siʼe duho lɨ́ alatâr waá, kɛl yé ɨ́ béle. Béle mû lwɨ́ŋlá e siʼe tʉ́ŋlʉ̌. Nye ntɔ̂ʼ guho yé kâʼ sí. Jɔʼ nyé á guho yé nó yɨ́, mindum mi mpíé, myé ntɔ̂ʼ ntíŋla. Me nzě jóʼo métwíí ntémé. Mindweh, myê nzě sâ. Sí nzě buú kubla ntémé.

Osébé ó dɔ̂m nzaangbá

⁶ Nó ó, beéngeles nzaangbá bé á be le osébé nzaangbá bá, bê nzě di ɨ́ cǎr ó, bé lʉ́aa bê.

⁷ Nó ó waá esôʼ á lʉ́o sébé wé. Metánaá mpúhlá e siʼe, ndu e metié, byé ntɔ̂ʼ swɨɨ ɨ́ sí yɨ́yɛ̂h. Ɨ́ sí yɨ́yɛ̂h, bisí ɨ́ buo buo, byé á si díʼe, jala e nkɔb mpwár ɨ́ menkɔb melɛ̂l. Bilɨ́ ɨ́ buo buo, byé á si díʼe ntémé, jala e nkɔb mpwár ɨ́ menkɔb melɛ̂l. Bwá bíká dí epâh sí e sí bá, bé á si síe lɨ́ edíʼe.

⁸ Nó ó éngeles mbá á lʉ́o sébé wé. Bwaʼbwǎʼ sɔ̂ʼ mpʉ écwɨ̂ʼ, yé á be ó lɨ́ epyêl mínjʉl. Bé ntɔ̂ʼ guho yé ɨ́ mâŋ tʉ́ŋlʉ̌. Nó ó, medíbé mé mâŋ ɨ́ buo buo, mé á si liŋa metié, jala e nkɔb mpwár ɨ́ menkɔb melɛ̂l.

⁹ Nó ó, bisâ ɨ́ buo buo, byé á títíʼe ɨ́ mâŋ bí, byé á si síe lɨ́ edwe, jala e nkɔb mpwár ɨ́ menkɔb melɛ̂l. Nó ntémé ó, bisitíma ɨ́ buo buo, byé á si twiʼlɨ, jala e nkɔb mpwár ɨ́ menkɔb melɛ̂l.

¹⁰ Éngeles lɛ̂l nzě lʉ́o sébé wé. Bwaʼbwaʼ twítwén ntɔ̂ʼ tɨ̂l, duho ɨ́ jʉ́o kʉ́, nkaŋa sí. Nye á be lɨ́ edúo ɨ́ tuuu mpʉ éláma. Nye á duma ó, ɨ́ mentíbé le menó ɨ́ buo buo, jala e nkɔb mpwár ɨ́ menkɔb melɛ̂l.

¹¹ Twítwén waá, díé lé, lé á be ó «Medwie». Nye á si liŋ mentíbé ɨ́ buo buo ɨ́ dwie dwie mpʉ édwie é mpʉ̌n, jala e nkɔb mpwár ɨ́ menkɔb melɛ̂l. Bʉr o b'á de medíbé maá bá ɨ́ buo buo, bé ntɔ̂ʼ síe lɨ́ edwe, lɨ́ edwie e médíbé maá.

¹² Nó ó éngeles nâ á nze lʉ́o sébé wé. Le nyé á lʉ́o, le ntɔ̂ʼ dʉ́o á dwira nyʉ̂l yɨ́. Péh nyʉ̂l nyé ntɔ̂ʼ dwíne, jala e nkɔb mpwár ɨ́ menkɔb melɛ̂l, jwɨʼ gwár e gwár e mpʉ álomó á dwíne yɨ́. Ocwícwén ntémé ntɔ̂ʼ dwíne, jala e nkɔb mpwár ɨ́ menkɔb melɛ̂l. Nó byé á bé agwá kǎ pan. Dʉ́o, bé le álomó, bé á jaa ka pɨpan ó, njɨ ɨ́ bwá bíjɔʼ. Píe tɨ̂, byé á lɨlɛŋ byúú bíjɔʼ ó, akǎ panɔɔ.

¹³ Jɔʼ mé á dwɛ̂ʼ yɨ́, me á si bee mpele nʉ̌n lɨ́ epiilɨ lɨ́ ejwoo. Nye á lɛ́ɛ e twíí kʉ́kʉ́ ó: «Nkoó e bʉr o dí ɨ́ sí yɨ̂ʼ bá, ebě, yé e beéngeles olɛ̂l dínǎ apǎ lʉ́o ósébé bɔ́ɔ́ bá. Nkoó e bʉr, ɨ́ jɔʼ bé ólʉ́o bé yɨ́!»