Mɨngwiha 7 - Kálar Nzyɛ̌m : Ejwán é Sáá

Éngeles, nye lɨ́ egbâ bʉ̂r o mé Nzyɛ̌m bijwɨʼ ɨ́ mempǒm

¹ Píe tɨ̂, me á si bee beéngeles onâ. Bé á tityɛ̂b ó, ɨ́ medumo mé sí ménâ, lɨ́ ekamle ónkúo onâ lɨ́ ekwoolo, lɨ́ ebene ó, onkúo baá, bé ámû jaá ndámǎ sí, le mâŋ ti e bilɨ́.

² Me á si bee ntémé nyʉ́ʉ́ éngeles á duhǒ nko dʉ́o dí ejɨma yɨ́ nyá. Nzyɛ̌m dí kublakúbla nyá, á ntɨh nye ó e sitâm yé ɨ́ mbô. Nó nyé á bee beéngeles onâ baá, baá Nzyɛ̌m á dwe nkul ó, bé ndámaa sí ndu e mâŋ bá. Nye ntɔ̂ʼ nyémle twíí, le elɛ́ɛ ó:

³ «Ayɨ́ ndáma gá sí, nkʉ̂ mâŋ, nkʉ̂ bilɨ́. Mɨná páa sîl égbâ gá bʉr o mé Nzyɛ̌m bisitâm ɨ́ mempǒm.»

⁴ Píe tɨ̂, me á si bee bím bʉ̂r o b'á gbáŋɔɔ bijwɨʼ byaá bá. Bé á be ó otɔ́ɔ́sin nter le otɔ́ɔ́sin mekám ménâ le otɔ́ɔ́sin onâ (144.000). Bʉr o b'á gbáŋɔɔ bijwɨʼ byaá bá, bé á duho ó, ɨ́ mempóʼo mé Ɨ́zraɛ̂l mɨ́mɛ̂h:

⁵ Bʉr o bó ónzweh mé Yʉ́da bé á gbáŋɔɔ bijwɨʼ bá: otɔ́ɔ́sin kám le obá; baá bó ónzweh mé Ruben: otɔ́ɔ́sin kám le obá; baá bó ónzweh mé Gâd: otɔ́ɔ́sin kám le obá;

⁶ baá bó ónzweh mé Áser: otɔ́ɔ́sin kám le obá; baá bó ónzweh mé Nɛftalî: otɔ́ɔ́sin kám le obá; baá bó ónzweh mé Manasê: otɔ́ɔ́sin kám le obá;

⁷ baá bó ónzweh mé Siméon: otɔ́ɔ́sin kám le obá; baá bó ónzweh mé Levî: otɔ́ɔ́sin kám le obá; baá bó ónzweh mé Isakâr: otɔ́ɔ́sin kám le obá;

⁸ baá bó ónzweh mé Zabulôn: otɔ́ɔ́sin kám le obá; baá bó ónzweh mé Yóseb: otɔ́ɔ́sin kám le obá; baá bó ónzweh mé Benjamin bé á gbáŋɔɔ bijwɨʼ bá: otɔ́ɔ́sin kám le obá.

Puŋa bʉ̂r

⁹ Píe tɨ̂, mé ká bee nɛ́ɛ: bee bʉ̂r mebɨ̂ʼ mepǎm, abe e tólɔ́ɔ. Bé á be ó bʉr o bíkûl e biloo e mpum bʉ̂r. Bé ntémé bé á si lwib bilwǐb bíbyɛ̂h. Bé á be ó tɨ̂ʼ bɨ́bɛ̂h ɨ́ mpǒm mecwɨ́ɨ́ mé jwɨ́ɨ ndu e Mâ Nteme. Bé á bě e bidur ɨ́ pumo pumo ɨ́ menyʉ̂l le mpúho melén ɨ́ mebô.

¹⁰ Bé á lɨlɛ́ɛ kʉ́kʉ́ ó: «Nzyɛ̌m dí ɨ́ mecwɨ́ɨ́ mé jwɨ́ɨ nyá, bé e Mâ Nteme, twiʼ, yé duho ó e bê.»

¹¹ Beéngeles bɨ́bɛ̂h, bé á tyɛ̂b ó, mitîtyěl, bɔma mécwɨ́ɨ́ mé jwɨ́ɨ ɨ́ nká, le otɔ́má bʉ̂r, ndu e mikublakúbla mí ótír minâ. Jɔʼ bé á jóʼo mekǎn maá yɨ́, bɨ́bɛ̂h ntɔ̂ʼ píʼe mémpǒm mɔ́ɔ́ sí lɨ́ empǒm e mécwɨ́ɨ́ mé Nzyɛ̌m, bɨ́bɛ̂h lɨ́ edweŋɔɔ nyé kûm.

¹² Bé á lɨlɛ́ɛ ó: «Amɛn! Yé ó nó. Nzyɛ̌m gá wɨ́ná, nyě e meswɨ̂ʼlʉ, le kûm, le ocwóó, le nzyǒo, le dúu, le nkul le onjɨ̂h, njʉ̌m dǐ e njʉ̌m dǐ. Amɛn.»

¹³ Nó ó nyʉ́ʉ́ tɔ́má mʉr á nze dî e me ó: «Nzê go lɨ́ egʉ́a bʉ̂r bâ, baá o dí e bidur ɨ́ pumo pumo bâʼ ɛ̌? Bê duhǒ nkoó?»

¹⁴ Me e né ó: «Dâ ɛ̌, gua ó dí egʉ́a.» Nó nyé á lɛ́ɛ e me ó: «Bʉr bâ, bé ó baá bé á sia e bintɨ́ʼá bínɨ́nɨ́ɨ́ bá. Bɨ́ sohlo bídur byɔ́ɔ́ e metié me Mâ Nteme. Nó ó míkán myɔ́ɔ́ dí ɨ́ pumo pumo yɨ́.

¹⁵ Sá tɨ̂ʼ ó bé dí etyɛ̂b ɨ́ mpǒm mecwɨ́ɨ́ mé Nzyɛ̌m yɨ́. Bé gúmló nyé ɨ́ mbɛ̌r wé ó móhó e pum. Waá dí edi ɨ́ mecwɨ́ɨ́ mé jwɨ́ɨ nyá ó ngá baʼle bê.

¹⁶ Bé ákǎ jóʼo nzâ. Bé ákǎ jóʼo ntémé dwéh médíbé. Dwéhé, yé ákǎ ŋmɛ́ha bé ɨ́ menyʉ̂l. Yé ákǎ kǎh gúmó bé ódi yɨ́.

¹⁷ Ebě, Mâ Nteme dí témé mecwɨ́ɨ́ mé jwɨ́ɨ nyá ó dí mbɔʼlʉ wɔ́ɔ́. Nye ótô e bé, tó pyâl lɨ́ enó e dí tɨ̂ʼ lɨ́, gúmó médíbé mé twiʼ dí eduho yɨ́. Nzyɛ̌m ótin bé myɛ́ɛlé mɨ́mɛ̂h ɨ́ mîh.»