Mɨngwiha 6 - Kálar Nzyɛ̌m : Ejwán é Sáá

Bisitâm bísaman bí ésôʼ

¹ Mé ká dwɛ̂ʼ nɛ́ɛ: bee Mâ Nteme lɨ́ egbɛ́ɛ̌ sitâm esôʼ. Jɔʼ yaá ó gúú kublakúbla tír lɨ́ otír onâ baá, á lwib kʉ́kʉ́. Twíí nyé á jwɨjwɨ̂ʼ ó mpʉ míndum mi mpíé. Nye ó: «Ntáʼ!»

² Mé ká bee nɛ́ɛ: beě mpáŋá kablá, bee ntémé mʉr ɨ́ koo wé kʉ́ ɨ́ kɛlɨ̂. Mʉr waá á be ó e lá dɔ̂m ɨ́ mebô. Bé á si bôr nye káráá dúu gʉ̂l. Nye ntɔ̂ʼ tô le entaa bʉ̂r ɨ́ dɔm. Nye á be ó, lɨ́ ebáʼǎ tô le entaa bʉ̂r.

³ Píe tɨ̂ʼ nɛ́ɛ: Mâ Nteme nzě bʉ̂ sitâm mbá. Gúú kublakúbla tír, wé ntɔ̂ʼ lɛ́ɛ ó: «Ntáʼ!»

⁴ Yʉ́ʉ́ kablá, yé ntɔ̂ʼ pyâl. Yɨ́haá, yé ó be ó e nyʉ̂l kaá e kaá. Mʉr á be tɨ̂ʼ kʉ́ nyá, á si dweŋɔɔ nkul ekaʼ dɔ̂m ɨ́ sí yɨ́yɛ̂h ó, bʉr, bé jwɨ́ɨla páʼ nyɔ́ɔ́. Bé á si dwe nye pasoŋ ɨ́ jaa jaa.

⁵ Jɔʼ nyé á bʉ̂ sitâm lɛ̂l yɨ́, gúú kublakúbla tír, wé ntɔ̂ʼ lɛ́ɛ ó: «Ntáʼ!» Mé ká bee nɛ́ɛ: beě kablá dwínɨ́ɨ́. Mʉr á be tɨ̂ʼ kʉ́ nyá, á si bi kílo ɨ́ gúú mbô.

⁶ Me ntɔ̂ʼ jóʼǒ lwǐb, lwǐb yaá lɨ́ eduho témé mikublakúbla mí ótír minâ myaá. Yé á nwɨɨla ó e lwǐb mʉ̂r, lɨ́ elɛ́ɛ ó: «Líra pǔ blê gwár, yé mû ó tâŋ nzǎŋ mɔnɨ́ ngwár. Olíra bé orge olɛ̂l, bé ó tâŋ nzǎŋ mɔnɨ́ ngwár. Sâ gwár, andáma múlo ti e menyoʼ.»

⁷ Jɔʼ nyé á bʉ̂ sitâm nâ yɨ́, kublakúbla tír epíhe nzě lɛ́ɛ ó: «Ntáʼ!»

⁸ Mé ká bee nɛ́ɛ: beě kablá nyʉ̂l biká. Mʉr á be tɨ̂ʼ kʉ́ nyá, á be e díe ó, «Eswie.» Bʉr o bé á be kwár odwe bá, bê nzě dudû nyé ɨ́ koo píhe. Ɨ́ bʉr ó sí bɨ́bɛ̂h, bé á si dwe bé nkul ejʉ̂ bʉ̂r ɨ́ buo buo, jala e nkɔb mpwár ɨ́ menkɔb menâ. Nye ójʉ̂ bé ó, le opasoŋ, ndu e nza, ndu e binumo mékpaa. Otír ó méntwǐʼ ntémé, bé ójʉ̂ bʉ́ʉ́ bʉ̂r.

⁹ Jɔʼ Mâ Nteme á gbɛ́ɛ sitâm tɛ̂n yɨ́, me ntɔ̂ʼ dwɛ̂ʼ lɨ́ empah lé alatâr, nzě bee tɨ̂ʼ ó, misísǐm mi bʉ̂r. Bé á jʉ́ŋɔɔ ó, ɨ́ lɔ̌b lɔ́ɔ́ mé Nzyɛ̌m, ti e mboʼlá bé á boʼlo wɨ́.

¹⁰ Bê nzě bʉ̂ bítím. Bé ó: «Dâ ɛ̌, go ó mʉr dí tí nyá. Go ó dí Nzyɛ̌m otyeetye. Bʉr ó sí, baá bé á jʉ̂ bɨ̌h bá, go ókǎ tíʼe bé milɔ̌b ɨ́ yáǎ jɔʼ? Go ókǎ kuna bɨ́h metié mɨ́h dɨ́n?»

¹¹ Nó nyé á nʉa bidur ɨ́ pumo pumo, bôr bɨ́bɛ̂h, le elɛ́ɛ bé ó, bé gbálaa bá tîtííǎ. Nye ó: «Bónáá gâ. Yé jala ó, bʉ́ʉ́ bʉ̂r ó njoo yɨ́n ti e bɨ́ɔɔ́ bɨ́n, bé páa nyɛɛ́ jʉ́ŋɔɔ ntémé mpʉ bɨ́n. Sá tɨ̂ʼ ó bɨ́n le onɔ́ɔ́, bé ósâ sɔ́má ntinɨ̂ yɨ́.»

¹² Nó ó, me á si dwɛ̂ʼ, bee Mâ Nteme lɨ́ egbɛ́ɛ̌ sitâm saman. Sí, yé ntɔ̂ʼ kubla ɨ́ buo buo. Dʉ́o, lé á be ó, lé mû dwîdwîn ɨ́ viʉ́t. Álomó ntinɨ̂ á be ó, nye mû ɨ́ cʉʼ mpʉ nyʉ̂l metié.

¹³ Ocwícwén, bé á si duho ɨ́ jʉ́o kʉ́, duma sí mpʉ bíbyɔ́ɔ bi mpúmó dí eduho ɨ́ lɨ́ figyê, kur sí ɨ́ jɔʼ nkúo dí ekwoolo e nkul yɨ́.

¹⁴ Jʉ́o, yé á si dîm ɨ́ mîh ɨ́ sɔ̌s, ɨ́ mpʉ mícɛmá dí edîm ɨ́ jɔʼ bé dí epíle mékaná yɨ́. Mecwɨ́ʼ mɨ́mɛ̂h ndu e mitíhé mímyɛ̂h, byé á si pʉʼa ɨ́ bigúmó byɔ́ɔ́, tóŋɔɔ ɨ́ bigúmo biswîh.

¹⁵ Bʉr ó sí yɨ̂ʼ bɨ́bɛ̂h, bé á si swab. Bé á to swab ó, ɨ́ bibáh mékóʼ, ndu e mecwɨ̂ʼ dí páʼ mekóʼ má. Bɨ́bɛ̂h, bé á si swim mikám, lɨ́ etó swabɔɔ. Damá jóʼo ójwɨ́ɨ́ ó sí yɨ̂, otɔ́má bʉ̂r, okúmá; okapitɛ̂n ti e minjɨ́h mí bʉ̂r; bitúʼǎ le onzyɛh o bʉ̂r; bɨ́bɛ̂h, bé á si to swab.

¹⁶ Bé á lɨlɛ́ɛ e mecwɨ̂ʼ ndu e mekóʼ ó: «Dumaa gá bɨ̌h ɨ́ menyʉ̂l. Bɨ̌n e sól bɨ́h, ebě, waá dí ɨ́ mecwɨ́ɨ́ mé jwɨ́ɨ nyá, ámû jaá kǎ báʼǎ bee bɨ́h. Ndu e ntémé ó, Mâ Nteme ámû jaá lɛ̂ʼle bɨ́h nkpaa nyé.

¹⁷ Ebě, móhó nɨ́nɨ́ɨ́, wɨ́ pyâl: móhó bé ólɛ̂ʼle nkpáa nyɔ́ɔ́ ó wɨ̂. Nzé ókǎ tyɛ̂b ɨ́ mpǒm nyɔ́ɔ́ ɛ̌?»