Mɨngwiha 5 - Kálar Nzyɛ̌m : Ejwán é Sáá

Ndíblá mékaná

¹ Nó ó, me á si bee mʉr ndîndǐl ɨ́ mecwɨ́ɨ́ mé jwɨ́ɨ le mekaná ɨ́ mbô. Nye á mɨmɛ̂r nye ó, ɨ́ mbó éjʉ̂m. Bé á cɛma mekaná maá ó, lɨ́ ecɛma lɨ́ epéb ɨ́ mipáʼ mímbá, ntɔ̂ʼ píle lê. Bê nzě nɛ̌r luʼ tɨ̂ʼ ɨ́ bigúmo nzaangbá, ntɔ̂ʼ kǎ gbáŋɔɔ ntémé sitâm ɨ́ bigúmo nzaangbá byaá, ó mʉr swîh ámû jaá dib.

² Me nzě beě njɨ́h éngeles. Yê nzě dî tíá le etyêl kʉ́ ó: «Nzé dí tyé mʉ̂r dí ó, nye pɛ́ʼɛɛ luʼ, bɛ́ɛ mekaná mâʼ nyá?»

³ Nó ó, yé á bé abe e mʉr. Táare ɨ́ jʉ́o kʉ́ ndu e sí, le tʉ́ŋlʉ̌ bibwǎh sí, abe e waá á dweŋɔɔ nkul dí ó, nye bɛ́yɨɨ mekaná maá, dwɛ̂ʼ mé tʉ́ŋlʉ̌.

⁴ Me á si bu jɨ, ebě, yé á bé abe e mbi mʉ̂r dí ó, nye bɛ́yɨɨ nye, dwɛ̂ʼ tʉ́ŋlʉ̌.

⁵ Nó ó, nyʉ́ʉ́ tɔ́má mʉr lɨ́ otɔ́má bʉ̂r baá á lɛ́ɛ e me ó: «Sá akǎ jɨ. Jwɛ́ʼɛ́ɛ, ngbampɨɨ, wɨ́ pyâl, duho lɨ́ onzweh mé Yʉ́da! Wé ó mâ nta mé David, waá á byɛ̂l mpʉ̌ ntoʼdu á pâh ɨ́ kǔm lɨ́ yé á twɛlɔɔ twɛlɨ́ɨ yɨ́ nyá. Wɨ́ɛ, wé á si ntaa sá yɨ́yɛ̂h. Wé ó b'á dweŋɔɔ nkul dí ó, wé pɛ́ʼɛɛ bisitâm nzaangbá byaá, bɛ́ɛ mékaná dí pílá má.»

⁶ Nó ó mé á dwɛ̂ʼ, bee ó, nkúná yé á be ó Mâ Nteme. Nye á si tyɛ̂b páʼ mecwɨ́ɨ́ mé jwɨ́ɨ le mikublakúbla mí ótír minâ, le otɔ́má bʉ̂r baá. Yé á kʉ be ó, kwahaá mpʉ sá lɛ́ɛ́, bé á si jʉ̂ nye. Nye á be ó e bintóo nzaangbá ɨ́ lʉ̂. Nye á be ntémé ó e mîh nzaangbá. Míh mé, mé ó misísǐm nzaangbá myé á lómɔɔ ɨ́ sí yɨ́yɛ̂h mí.

⁷ Mâ Nteme waá nzě sîhle, tô nko mʉ̂r á be ɨ́ mecwɨ́ɨ́ mé jwɨ́ɨ nyá, ntɔ̂ʼ nʉa mékaná maá e mbó éjʉ́m wé.

⁸ Jɔʼ nyé á nʉa nye yɨ́, mikublakúbla mí ótír minâ myaá, le otɔ́má bʉ̂r mekám mébá le onâ baá, nzě bɨʼ mébóó sí ɨ́ mpǒm nyé. Mʉr nyɨnyɛ̂h ɨ́ sɔ́má yɔ́ɔ́ á be ó e mpêr ɨ́ mebô, ndu e mempélé mé gʉ̂l, mɨ́mɛ̂h milwɨ́ŋlá le otú ó dúu lɨ́ edúo. (Otú waá, wé ó mveʼle, sá dí elɛ̂ʼle mínjɨʼla bʉ̂r o mé Nzyɛ̌m dí esâ nyé mí.)

⁹ Bé á didyɛɛ ó, edwán é jɨ̂m. Bé ó: «Go ó jálá le enʉa mékaná mâ, gbɛ́ɛ bísitâm, ebě, go á si jʉ́ŋɔɔ. Go á si dwih bʉr ɨ́ mpila ébébe, tô e bé kwá mé Nzyɛ̌m. Go á si syɛ́ɛla metié mô lɨ́ esú é bʉ̂r baá. Bé ó bʉr o bíkúl bíbyɛ̂h, ndu e bilwǐb bíbyɛ̂h, bʉr o mémpóʼo mɨ́mɛ̂h, ndu e mesí mɨ́mɛ̂h.

¹⁰ Go á si dwir kúl bʉ̂r yô ntinɨ̂ opara, lɨ́ esú lé éséǎ Nzyɛ̌m wɨ́h syɛ́ɛ́. Bé ntémé ó ngá jwɨ́ɨ ɨ́ sí yɨ́yɛ̂h.»

¹¹ Me á si bee ntémé beéngeles otɔ́ɔ́sin otɔ́ɔ́sin, abe e tólɔ́ɔ. Bé á be ó lɨ́ ebɔma mécwɨ́ɨ́ mé jwɨ́ɨ, ndu e mikublakúbla mí ótír minâ, le otɔ́má bʉ̂r baá ɨ́ nká. Me á si jóʼo jɨ́m yɔ́ɔ́ bé á dyɛɛ yɨ́.

¹² Bé á dyɛɛ kʉ́kʉ́ ó e nkul, lɨ́ elɛ́ɔɔ ó: «Mâ Nteme bé á jʉ̂ nyá, nye ɨ́ jala le enʉa nkûl nyɨnyɛ̂h, le okúm, le ocwóó, le onjɨ̂h, le dúu, e kûm ndu e meswɨ̂ʼlʉ.»

¹³ Nó ó, me nzě jóʼo bísá bíbyɛ̂h Nzyɛ̌m á komlo bí lɨ́ elwib, le byaá bi dí ɨ́ jʉ́o kʉ́ bí, le byaá bi dí ɨ́ sí yɨ̂ʼ bí, le byaá bi dí tʉ́ŋlʉ̌ bibwǎh bí, ndu e byaá bi dí ɨ́ mâŋ bí. Bíbyɛ̂h, byê nzě dyɛɛ́ jɨ̂m. Bé ó: «Kûm, le dúu le nkul, byé ó, ɨ́ waá dí ndîndǐl ɨ́ mecwɨ́ɨ́ mé jwɨ́ɨ nyá, bé e Mâ Nteme, njʉ̌m dǐ e njʉ̌m dǐ!»

¹⁴ Jɔʼ bé á didyɛɛ nó yɨ́, mikublakúbla mí ótír minâ myaá, myé á yɨyala ó: «Amɛn!» Otɔ́má bʉ̂r ónɨ̌, bé ntɔ̂ʼ kúrwo sí, píʼe mémpǒm sí ɨ́ míh mɔ́ɔ́, lɨ́ edwe bé kûm.