Mɨngwiha 4 - Kálar Nzyɛ̌m : Ejwán é Sáá

Bé lɨ́ edwě Nzyɛ̌m kûm ɨ́ jʉ́o kʉ́

¹ Píe tɨ̂, mé ká bee nɛ́ɛ: bee ébê mběʼ ɨ́ jʉ́o kʉ́. Me ntɔ̂ʼ báʼǎ jóʼo twíí esôʼ. Twíí nyaá ó b'á lwib ɨ́ mpʉ sébé. Nye á lɛ́ɛ e me ó: «Ntáʼ kâʼ kʉ́, me lɛ̂ʼlaa go bisyɛ́ɛla bi dí ejala le esyɛ́ɛ bí.»

² Tyé e tyé yaá, me á be ó ɨ́ nkul Sísǐm mé Nzyɛ̌m. Nó ó, me á si bee mecwɨ́ɨ́ mé jwɨ́ɨ ɨ́ jʉ́o kʉ́. Nyʉ́ʉ́ mʉ̂r á be ó tɨ̂ʼ ndîndǐl.

³ Nye á be ɨ́ buú ntyɛnwa. Mentyɛnwa mé, mé á nwɨɨla ó e jaspe nkʉ̂ sardoine. Nkulyɛ̂n á be ó lɨ́ ebɔma mécwɨ́ɨ́ mé jwɨ́ɨ́ yé ɨ́ nká. Nkulyɛ̂n waá á be ó lɨ́ epan ɨ́ mpʉ émeraude.

⁴ Bidiá bí ójwɨ́ɨ mekám mébá e binâ, byé á be ó lɨ́ ebɔma mécwɨ́ɨ́ mé jwɨ́ɨ yaá ɨ́ nká. Otɔ́má bʉ̂r mekám mébá le onâ, bé á be ó tɨ̂, mindîndǐl, e mikán ɨ́ pumo pumo ɨ́ menyʉ̂l ndu e bikáráá bí gʉ̂l ɨ́ milʉ̂.

⁵ Nó ó, mecwɨ́ɨ́ mé jwɨ́ɨ yaá, mé á be lɨ́ esâ míndweh. Me á be lɨ́ ejóʼo métwíí ntémé, duho tɨ̂. Mindum mi mpíé, myé á be ó lɨ́ entíŋla ntémé. Yé á be tɨ̂ʼ ntémé ó e meláma nzaangbá lɨ́ edúo ɨ́ pan pan. Mɨ́ɛ, mé ó misísǐm nzaangbá mi dí etyɛ̂b ɨ́ míh mé Nzyɛ̌m mí.

⁶ Yʉ́ʉ́ sɔ̂ʼ ɨ́ bɛl bɛl, yé á be ó, lɨ́ empǒm e mécwɨ́ɨ́ mé jwɨ́ɨ yaá, ɨ́ mpʉ mâŋ dí epan ɨ́ ngé ngɨ ngé mpʉ «cristal» má. Yé á be ó e mikublakúbla mí ótír ónâ, bɨ́ɛ lɨ́ etyɛ̂b ɨ́ mempah mécwɨ́ɨ́ mé jwɨ́ɨ. Mimo ndu e mikoo myɔ́ɔ́, myé á be ó e mîh lwɨ́ŋlá.

⁷ Tír esôʼ, nye á nwɨɨla ó e ngbampɨɨ. Waá mbá nwɨɨla e njɨ́h ntœœ. Waá lɛ̂l, nye á be ó e mpǒm nwɨɨla e mpǒm mʉr. Nó ó, waá nâ, nye á nwɨɨla ó e mpele nʉ̌n nɨ́nɨ́ɨ́ lɨ́ epiilɨ.

⁸ Otír baá bɨ́bɛ̂h onâ, bé á be ó e mempabaá mésaman. Mempabaá mɔ́ɔ́, mé á be ó lwɨ́ŋlá e mîh, damá jóʼo sí mempabaá, damá jóʼo ntémé kʉ́. Bé á be ó lɨ́ edyɛɛ méjéme móhó e pum. Bé á didyɛɛ, le enzě lɛ́ɔɔ ó: «Ti, ti, Dâ, dí Nzyɛ̌m nkul nyɨnyɛ̂h nyá, nye ó waá dí ti nyá. Go ó b'á boo be. Go ó dína. Go ntémé, go óbáʼǎ nze.»

⁹ Nó ó míkublakúbla mí ótír myé á dyɛɛ nye jɨ̂m le egúmlo mʉ̂r á be ɨ́ mecwɨ́ɨ́ mé jwɨ́ɨ, waá dí e twǐʼ njʉ̌m dǐ nyá. Bé á si dwe nye nzyǒo ɨ́ mejéme mɔ́ɔ́.

¹⁰ Jɔʼ yɨ́yɛ̂h bé á sɨsâ nó yɨ́, otɔ́má bʉ̂r mekám mébá le onâ baá, bé á si pipíʼa sí ɨ́ mpǒm mʉr á be ɨ́ mecwɨ́ɨ́ mé jwɨ́ɨ nyá, lɨ́ edwe mʉ̂r dí e twǐʼ njʉ̌m dǐ nyá kûm. Bé á be lɨ́ epɨpɛʼ bíkáráá bí gʉ̂l byɔ́ɔ́ ɨ́ milʉ̂, didyɛ́ʼɔɔ byé sí ɨ́ míh mé. Bé ó:

¹¹ «Dâ Nzyɛ̌m wɨ́h! Yé jala ó, bʉr gúmlaa go, ebě, go ó tîtyěl mʉr. Go lɨ́ ejala ntémé ó, bé sêʼlaa go, le edwe gó nkul nyɨnyɛ̂h. Ebě, go ó b'á komlo bisá bíbyɛ̂h. Ɨ́ gwɨ́má yô ó, gó á komlo byé yɨ́. Sá tɨ̂ʼ ó byé dí tɨ̂ʼ yɨ́.»