Mɨngwiha 21 - Kálar Nzyɛ̌m : Ejwán é Sáá

Edwán é jʉ́o, bé le edwán é sí

¹ Me á si bee edwán é jʉ́o le edwán é sí, ebě, jʉ́ó ésôʼ bé e sí ésôʼ, byé á be ó sí laa. Mâŋ, mé á bé akǎ be.

² Me á si bee ntémé nkana dí tí yɨ́: edwán é Yerʉ́zalɛm. Me á bee yé ó, ɨ́ jɔʼ yé á be, yé mû sí duho kwá mé Nzyɛ̌m ɨ́ jʉ́o kʉ́, sulo sí yɨ́. Yé á be ó kʉmsá mpʉ̌ bíŋ mʉ́má dí edweŋɔɔ bísá bí nyaŋá ó, yé óbwâm, tô nko njʉ̂m wé dí yɨ́.

³ Me nzě jóʼo twíí á duho ɨ́ mecwɨ́ɨ́ mé jwɨ́ɨ nyɨ́. Nye á lwib kʉ́kʉ́ ó: «Bɛɛngɛ́ɛ! Nzyɛ̌m, nyɨ́ komlo ódiá wé páʼ bʉ̂r e bʉr. Nye ódi ó ɨ́ bê. Bé óbe ó bʉr o Mpóʼo nyé. Nzyɛ̌m mʉr tɨ̂ʼ ódi páʼ nyɔ́ɔ́.

⁴ Nye ótin myɛ́ɛlé mɨ́mɛ̂h ɨ́ míh mɔ́ɔ́. Bé ákǎ jóʼo mégunwa. Bé ákǎ dwe. Eswie akǎ be. Bé ákǎ jɨ médwê. Bisá bí myâ byaá, byé ódîm.»

⁵ Nó ó, waá á be ɨ́ mecwɨ́ɨ́ mé jwɨ́ɨ nyá, á nze lɛ́ɛ ó: «Beyɨɨ gá, me mû ó lɨ́ esâ bísá bíbyɛ̂h medwán e medwán!» Nye nzě lɛ́ɛ e me ó: «Cɛmaa bílwǐb bî. Byé ó milɔ̌b mimpâ le otyeetye.»

⁶ Nye e me ó: «Yɨ́ síe! Me ó mʉr esôʼ ndu e waá epíhe. Me ntémé, me ó menyɛ̌l mé sá yɨ́yɛ̂h ti e meswéhlɨ́ mé tɨ̂. Mʉr dí ejóʼǒ dwéh médíbé nyá, mɛm ódwe nyé mǎ edwɛ́na. Medíbé maá, mé ó maá me dí egʉ̂, duho lɨ́ enó é twiʼ má.

⁷ Waá óntaa, búla le onkɔ́ɔ́ nyá, ónʉa médíbé maá, jala e nkɔb líʼe nyé. Me óbe ó Nzyɛ̌m wé. Nye óbe mé ó mwân.

⁸ Baábʉ́bʉ́á bɨ́ɛ, bé le ohááden, bʉr o dí e milémé mébomo, ojʉ̂l o bʉ̂r, osyɛ̂l o bímolá, oleme ti e baá o dí edwe bíkpɛʼkpɛ̂ʼ bí ónzyɛ̌m kûm bá, ndu e baányâ-mikóo bɨ́bɛ̂h, bɨ́ɛ, bé ójaá kœb ódiá wɔ́ɔ́ ó, njɨ ɨ́ bɨ́ siʼe. Yé ó lwɨ́ŋlá e siʼe ti e pir. Yé ɨ́ buú díʼa. Tɨ̂ʼ ó bʉ̂r dí edwe éswie embá yɨ́.»

Edwán é nkana mé Nzyɛ̌m

⁹ Nyʉ́ʉ́ éngeles á si nze kwá nyǎm. Nye á be ó mʉr ngwár ɨ́ beéngeles nzaangbá bé á nkɨnkɛ́ɛ mempéle nzaangbá ɨ́ mebô má. Mempéle maá ó b'á be milwɨ́ŋlá e mitúú mí épíhe. Nye e me ó: «Ntáʼ! Me múo nzě lɛ̂ʼle gó eséhe Mâ Nteme ngá bâ lɨ́.»

¹⁰ Tyé e tyé yaá, me á be ó, ɨ́ nkul Sísǐm mé Nzyɛ̌m. Éngeles waá nzě tô e me lɨ́ ecwɨ́ʼ énɨ́nɨ́ɨ́ kʉ́. Lé á be ó, ɨ́ buú jaa kʉ́. Bɨ̌h mû gʉ̂ʼ nɛ́ɛ: nye á si lɛ̂ʼle me Yerʉ́zalɛm, nkana dí tí yɨ́. Yé á be lɨ́ esulo sí ɨ́ nteeen, duho ɨ́ jʉ́o kʉ́, nkǒ Nzyɛ̌m dí yɨ́.

¹¹ Yé á ntíntyɛnwa ó, mentyɛnwa mé Nzyɛ̌m, ɨ́ mpʉ ékóʼ é diamant. Yé á ntíntyɛnwa ó, mpʉ̌ jaspe ɨ́ ncwɛ̌n ntɨ̂ ncwɛ̌n.

¹² Bé á si kɛb nkana e kôʼ ɨ́ pibe pibe ɨ́ nká. Kôʼ waá, wé á be ntémé ó, kʉ́ ɨ́ jaa jaa. Mebê mé énî ɨ́ nkana, mé á be ó kám e mebá. Beéngeles kám le obá, bé á be ó tɨ̂ʼ ɨ́ mebê maá. Tɨ̂ʼ ɨ́ mebê maá kʉ́, bé á si cɛma míé ménzweh kám e mebá mé bʉ̂r o b'Ɨ́zraɛ̂l.

¹³ Ɨ́ mempah mé nkana mɨ́mɛ̂h menâ, yé á be ó e mebé mélɛ̂l. Mâʼ mébé mélɛ̂l, mé á be ó, ɨ́ nko méjɨma me dʉ́o. Mâʼ mélɛ̂l, ɨ́ nko méjá mé dʉ́o. Mʉ́ʉ́ mélɛ̂l, ɨ́ tín, mâʼ melɛ̂l ɨ́ nko tie.

¹⁴ Bé á si gbâ mekóʼ kám e mebá tʉ́ŋlʉ̌ kôʼ waá. Bé á be ó sí cɛma míé mé bʉ̂r o mílʉ́mlʉ́ kám le obá Mâ Nteme á títye e bé bá, ɨ́ mekóʼ maá.

¹⁵ Éngeles á lwilwib e me nyá, á be ó e lɨ́ nyé á jwɨjwɨʼ bisɔ̂ʼ e tɨ̂ʼ yɨ́ ɨ́ mbô. Yé á be ó lúlá e gʉ̂l. Nye á be ó lɨ́ etó jwɨ̌ʼ nkana, ndu e mebê, le kóʼ wé.

¹⁶ Nkana, yé á be sumá ó, mipáʼ mínâ; mipáʼ mímyɛ̂h mityé. Éngeles waá á si jwɨʼ nkana e jwɨʼ nyé á be e tɨ̂ʼ yɨ́. Ejaa é nkana, lé á be ó tâŋ okíloméra otɔ́ɔ́sin obá e minter mimbá (2.200). Mpwaʼ mo le etô e kʉ́, byé á be ntémé ó, jwɨʼ gwár yaá.

¹⁷ Nó ó éngeles á si jwɨʼ kôʼ. Wé á be ɨ́ jaa kʉ́. Bé á jwɨʼ wé ó e meniʼra mé mbô nter e mekám ménâ e menâ. (Jwɨʼ yaá, yé ó mpʉ bʉ̂r dí eboó jwɨjwɨʼ bísɔ̂ʼ yɨ́.)

¹⁸ Bé á sâ kôʼ waá ó, le ekóʼ é jaspe lɨ́. Nó ó, kuó nkana wɨ́ɛ, wé á be sumá ó e gʉ̂l. Yé á ntíntyɛnwa ó, mpʉ̌ lá.

¹⁹ Pâʼ kóʼ wé á duho sí wɨ́, wé á tityɛ̂b ó, ɨ́ mimbi mékóʼ me dí ɨ́ buú mbɨa lɨ́ ebee mí. Mé á be ó menyʉ̂l menyʉ̂l. Mekóʼ bé á sumo kôʼ e tɨ̂ʼ má ó dí: laá lé ésôʼ jaspe; laá émbá: saphir; laá élɛ̂l: agate; laá énâ: émeraude;

²⁰ laá étɛ̂n: onyx; laá ésaman: sardoine; laá e nzaangbá: chrysolithe; laá e mwôm: béryl; laá lé ébǔ: topaze; laá e kám: chrysoprase; laá e kám le egwár: turquoise; laá e kám e mbá: améthyste.

²¹ Bidibla mébé mé nkana kám e mebá, byé á be ó misɛ́á le ekóʼ é pérel. Minkpǎʼ mí nkana mímyɛ̂h, myé á be ó e gʉ̂l. Yé á be lɨ́ entyɛnwǎ mpʉ̌ lá.

²² Me á bé abee mpáh Nzyɛ̌m tɨ̂ʼ ɨ́ nkana yaá, ebě, Dâ Nzyɛ̌m, Nzyɛ̌m nkul nyɨnyɛ̂h mʉr tɨ̂ʼ ó dí edila mpáh nyaá, bé e Mâ Nteme.

²³ Bʉr ó nkana yaá, bé ajɨ mímbah, nkʉ̂ myaá mi dʉ́o, nkʉ̂ myaá mí álomó, ebě, mentyɛnwa mé Nzyɛ̌m, mé lɨ́ epan gʉ̂. Mâ Nteme ó dí eláma ɨ́ nkana yaá.

²⁴ Bʉr o bíkúl bíbyɛ̂h, bé ótye mbɨ̂mbɨá ɨ́ lɔ̌b myɛ́n njʉl waá ngá pan wɨ́. Ojwɨ́ɨ́ ó sí yɨ̂ʼ bɨ́bɛ̂h, bé ónze le okúm le ogbaa wɔ́ɔ́, nî ɨ́ nkana yaá.

²⁵ Mebé mé nkana, mé ádiblɔɔ ɨ́ yʉ́ʉ́ jɔʼ, ebě, pum, wé ákǎ dwíne gʉ̂.

²⁶ Bé ónze le okúm le ogbaa wɔ́ɔ́, sá bʉ̂r ó sí yɨ̂ʼ dí egúmlo yɨ́. Bé ótó níŋle byé ɨ́ nkana yaá.

²⁷ Nó ó, bisá mélwaʼwo bíɛ, byé ákóʼó nî gʉ̂. Bʉr o dí esâ bísyɛ́ɛlǎ Nzyɛ̌m dí ɨ́ buú bene bí bá, bé e baányâ-bibɛr, bé ákóʼó nî ntémé gʉ̂. Bʉr o ngá nî gʉ̂ʼ bá, bé óbe ó njɨ baá bé á boo be e míe micɛmá ɨ́ mekaná mé twiʼ mé Mâ Nteme bá.