Mɨngwiha 2 - Kálar Nzyɛ̌m : Ejwán é Sáá

Mekaná mé á tyenɔɔ Mbɛ̌r-Nzyɛ̌m Éfɛsɔs má

¹ «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí Éfɛsɔs wɨ́ nyá. Lɛ́yɨ́ɨ́ nyé ó: Waá dí emɛ̂r ócwícwén nzaangbá lɨ́ ekœ́h lé éjʉ́m lé nyá, nye lɨ́ etye páʼ bityélátyéla méláma bí gʉ̂l nzaangbá. Nyě lɛ́ɛ́ ó:

² “Me lɨ́ egʉ́ǎ lelelelě syɛ́ɛ́ bɨ́n dí eséa yɨ́, ndu e mbi bɨ́n dí edûhwo mítúú wɨ́. Me lɨ́ egʉ́a ntémé ó, bɨ̌n bé adûhwo ósyɛ̂l bé ébébe. Bɨ̌n bɨ́ pahle bʉ̂r o dí elɛ́ɛ ó, bé ó bʉr o mílʉ́mlʉ́ mé Yésʉs bá, bɨ́ɛ yɨ́ɛ abe bê. Bɨ̌n bɨ́ kʉ́ bee ó, bé ó baányâ-bibɛr.

³ Bɨ̌n bé lɨ́ esâ bíhwó. Bɨ̌n bé lɨ́ edûhwo mítúú ɨ́ lɔ̌b díé lâm, atyɛʼ míléme.

⁴ “Yé e sâ gwár mé dí ebene e bɨ̌n yɨ́. Yé ó: bɨ̌n mû ó agwá kǎ kpɛl mé mpʉ bɨ́n á nyɛɛ kpɨkpɛl me yɨ́. Syɛ́ɛla yaá ó mé dí ebene bɨ́n yɨ́.

⁵ Ebe nó, símsáá gá gúmó bɨ́n á sele ɨ́ jɔʼ bɨ́n á twe yɨ́. Túmáá gá mikoo le mebébe mɨ́n. Bɨ̌n e dwírá míléme. Lóŋláá gá bisyɛ́ɛla bí ésôʼ mpʉ bɨ́n á boo sɨ̂sa yɨ́. Bɨ́n bé adwira míléme nó wá, me ónze kwá nyɨ́n, nzě pɛ̌ʼ tyélátyéla éláma yɨ́n ɨ́ tyé yé.

⁶ Damá jóʼo nó, bɨ̌n bé e nkam lɨ́ ebene bísyɛ́ɛla bi bʉ̂r o dí edû Nikolâ bá. Mɛm ntémé, me lɨ́ ebene byê.

⁷ Mekǎn Sísǐm mé Nzyɛ̌m dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, me ódwe nyé nkul epyâl ɨ́ Paradîs. Nyé odě bumó lɨ́ twiʼ.»

Mekaná mé á tyenɔɔ Mbɛ̌r-Nzyɛ̌m Smírna má

⁸ «Cɛmaa mékaná ntémé éngeles dí edwéelě Mbɛ̌r-Nzyɛ̌m, waá dí ɨ́ Smírna wɨ́ nyá. Lɛ́yɨ́ɨ́ nyé ó: Waá dí mʉr esôʼ ndu e waá epíhe, waá á dwe, báʼǎ pah nyá, nye lɨ́ elɛ́ɛ bɨ́n ó:

⁹ me lɨ́ egʉ́a mítúú mín, le edyêb lɨ́n. Lɨ́ otyeetye, bɨ̌n bé ó, misʉ́sʉ́ mí bʉ̂r. Me lɨ́ egʉ́a ntémé melwɨ́ɨ bʉ̂r dí elwɨ́ɨ bɨ́n má. Baányâ-melwɨ́ɨ baá, bé lɛ́ɛ́ ó, bé ó bʉr ó kúl óYúden. Sâ gwár, bé abe óYúden ompâ. Bé ó bʉr o mpáh minjɨʼla mé Sátan.

¹⁰ Ayɨ́ jóʼo gá bʉ́á ɨ́ lɔ̌b bíntɨ́ʼá bé ngá dwe bɨ́n bí. Paá bee gâ: Sɔ́ŋ meleme ómɛ̂r bɨ́n bʉ́ʉ́ bʉ̂r, gbâ bé ɨ́ mbʉʼ, lɨ́ edǐ bóblo bɨ́n. Bɨ̌n bé ósia e mitúú, tó kumo ɨ́ melû kám. Gwá baʼle gá búʼó, tó kumo lɨ́ eswie. Sá tɨ̂ʼ ó mé ódwe bɨ́n twǐʼ njʉ̌m dǐ yɨ́. Bɨ̌n bé óbi myɛ́na maá, mpʉ̌ nkɔ́ɔ́ dí ebórɔɔ̌ káráá yɨ́.

¹¹ Mekǎn Sísǐm mé Nzyɛ̌m dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, nye ádwe éswie embá.»

Mekaná mé á tyenɔɔ Mbɛ̌r-Nzyɛ̌m Pɛ́rgamos má

¹² «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Pɛ́rgamos wɨ́ nyá. Lɛ́yɨ́ɨ́ nyé ó: Waá dí e pasoŋ njebá myoo mipáʼ mímbá nyá, nyě lɛ́ɛ́ ó:

¹³ “Me lɨ́ egʉ́ǎ gúmó bɨ́n dí edi yɨ́. Tɨ̂ʼ ó dí diá jwɨ́ɨ́ mé Sátan. Bɨ̌n bé lɨ́ edyɛ̂ʼwo e me. Damá jóʼo ɨ́ jɔʼ bé á jʉ̂ Antipâs yɨ́, bɨ̌n bé á bé agwâʼ ésâ nó. Antipâs ó dí egwá boʼlo mílɔ̌b myâm. Nye ntémé, nye á be ó mʉr ebúʼlɔɔ. Sá tɨ̂ʼ ó bé á mɛ̂r nye ɨ́ sɔ́má yɨ́n, jʉ́ŋɔɔ nyé yɨ́. Tɨ̂ʼ ntémé ó dí odiá mé Sátan.

¹⁴ Yé e sâ gwár mé dí ebene e bɨ̌n. Yé ó metwɨ́ɨ́ bʉ́ʉ́ bʉ̂r ó sɔ́má yɨ́n dí edû má. Syɛ́ɛla yaá ó mé dí ebene bɨ́n yɨ́. Bé lɨ́ edû mílɛ́ʼlá mé Balâm. Nye ó waá á dulo Bálak lɨ́ ebébe, tɨ́e nyé egbâ mébɔ̌ʼ mé óbɨma bʉ̂r o b'Ɨ́zraɛ̂l ɨ́ miléme ó, bé sâʼ ebébe má, ebě, nyɨɛ Bálak á sâ ó: nʉa tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá, nzě tímle nyé bʉr o b'Ɨ́zraɛ̂l. Bɨ́ɛ ntɔ̂ʼ de nyê, nzě sáŋɔɔ ntémé bimolá.

¹⁵ Yê tyeetye ó, bʉ́ʉ́ bʉ̂r ɨ́ sɔ́má yɨ́n, bé lɨ́ esâ mpʉ̌ Nikolâ dí elɛ̂ʼle yɨ́.

¹⁶ Ebe nó, túmáá gá mikoo e mebébe mɨ́n. Bɨ̌n e dwírá míléme. Bɨ́n bé asâ nó wá, mé okpâhwǎ nze kwá nyɨ́n. Mé olwímla e bʉr baá e pasoŋ dí eduho ɨ́ num wâm nyá.»

¹⁷ Mekǎn Sísǐm dí elɛ́ɛ bʉ̂r ó Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ. Mʉr nyɨnyɛ̂h óntaa, búla le onkɔ́ɔ́ nyá, me ódwe nyé mede dí eduho ɨ́ jʉ́o kʉ́ má. Mede maá, mé ó lɨ́ esǒ. Me ntémé ódwe nyé ekóʼ épúmó. Díé lé, lé óbe ó tɨ̂ʼ cɛmá. Díe laá, lé ó edwán é díé lé. Nyʉ́ʉ́ mʉ̂r swîh, nyé abe e nkul egʉ́a lê, njɨ waá dí ebi lé nyá.

Mekaná mé á tyenɔɔ Mbɛ̌r-Nzyɛ̌m Teatîr má

¹⁸ «Cɛmaa mékaná. Go e tyén éngeles dí edwéelě Mbɛ̌r-Nzyɛ̌m, waá dí ɨ́ Teatîr wɨ́ nyá. Lɛ́yɨ́ɨ́ nyé ó: Lɔ́ɔ́ wɨ̂, wé duho ó, ɨ́ num Mwân mé Nzyɛ̌m. Míh mé, mé ó mpʉ̌ njʉ̌l siʼe. Mekʉ̌ mé, mé ó mpʉ̌ nkóhó dí ɨ́ buú pan yɨ́.

¹⁹ Me lɨ́ egʉ́ǎ syɛ́ɛ́ yɨ́yɛ̂h bɨ́n dí eséa yɨ́, le kpɛ̌l yɨ́n, syɛ́ɛ́ ménkɔ̌m bɨ́n dí esâ má. Me lɨ́ egʉ́ǎ búʼó yɨ́n ti e bíhwó nyɨ́n. Bisyɛ́ɛla bín byaá, byé mû ó sí buo, laa byaá bɨ́n á nyɛɛ sɨsâ bí.

²⁰ Yé e sâ gwár mé dí ebene e bɨ̌n yɨ́. Yé ó: Yezábɛl, waá bɨ́n á bana dûhwo ó, nye díʼee ɨ́ sɔ́má yɨ́n nyá. Sá tɨ̂ʼ ó mé dí ebene bɨ́n yɨ́. Mʉmá nɨ̌ dímlé bɨ́n ó, ɨ́ jɔʼ nyé dí elɛ́ɛ ó, nye ó ngwíha milɔ̌b yɨ́. Nye lɨ́ edwe ósyɛ̂l o mésâ bâm milɛ́ʼlá míkóo, ó bé sâʼ bimolá. Nyě títíné bé ntémé ó, bé dêʼ tír á pa baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá.

²¹ Me á si dwe nye jɔʼ ó, nye túmaa koo le bimolá nyé dí esɨ̂sa bí. Nó ó, nyé akpɛl édwirǎ léme.

²² Sá tɨ̂ʼ ó mé ódyêʼ nyé ɨ́ joó ékpaa yɨ́. Me ntémé, me ósâ ó, bʉrʉ̂m o dí esâ médyɛ̂n e né bá, bé bɔ́maa e mitúú ɨ́ buo buo. Alaa ó, bé ódwira míléme, bírɔɔ bísyɛ́ɛla bí ébébe byɔ́ɔ́ byaá.

²³ Me ntémé, me ójʉ̂ bwán bé. Ɨ́ nzɨ̌ nyaá ó bʉ̂r ó Mbɛ̌r-Nzyɛ̌m bɨ́bɛ̂h ngá gʉ́a ó, mɛm ó dí egʉ́a bíjwɨʼ ndu e bigwɨ́má bí bʉ̂r yɨ́. Me ójána mʉ̂r nyɨnyɛ̂h ɨ́ sɔ́má yɨ́n ó, dû mpʉ bísyɛ́ɛla byé dí yɨ́.

²⁴ Nó ó, bɨ̌n, bʉr o dí adû bébebébe lɛ́ʼlá wɨ̂ʼ bá, bɨ̌n bé adû mísolá mílɛ́ʼlá Sátan dí edwe, myaá bʉ́ʉ́ bʉ̂r dí elɛ́ɛ ó, myé ó tyeetye mí. Mé akɛl bɨ́n gúú mběʼ swîh.

²⁵ Mě lɛ́ɛ́ bɨ́n ó, sâ gwár yɨ̂: sá bɨ́n dí e yé yɨ́, baʼlaa gá yê, tó kumo ɨ́ jɔʼ mé óbáʼǎ nze yɨ́.

²⁶ Bʉr o ngá ntaa, búla le onkɔ́ɔ́, baá ngá séǎ syɛ́ɛ́ yâm, tó pyâl lɨ́ esíé bá, me ódil bé ɨ́ bidǐ bí ójwɨ́ɨ. Bé ojwɨ́ɨ bʉ̂r o bíkúl bíbyɛ̂h.

²⁷ Bé ópɨpála bé ó e nkul jwɨ́ɨ ɨ́ lele lele mpʉ̌ súmǔ nkóho. Bé óbʉ̂ bé ɨ́ mpʉ mʉ̂r dí ebʉ̂ míkáʼ mí déʼé bipêh bipêh yɨ́. Bé óbi nkûl e me mpʉ mé á nʉa nkul kwá mé Sɔ́ŋ wǎm yɨ́.

²⁸ Me ódwe bé ntémé twítwén dí epan ɨ́ melɔ́ma mé mɛ́n nyá.

²⁹ Mekǎn Sísǐm dí elɛ́ɛ̌ Mbɛ̌r-Nzyɛ̌m má, mé ó ménɨ̌. Mʉr nyɨnyɛ̂h dí e megwǎl mé éjóʼo nyá, nye jóʼaa náǎ.»