Mɨngwiha 16 - Kálar Nzyɛ̌m : Ejwán é Sáá

Nkpaa mé Nzyɛ̌m

¹ Píe tɨ̂, me á si jóʼo twíí lɨ́ eduho mpáh Nzyɛ̌m. Twíí nyaá, nye á lɛ́ɛ e beéngeles nzaangbá kʉ́kʉ́ ó: «Nʉaa gá mempélé mɨ́n, maá me dí milwɨ́ŋlá e nkpaa mé Nzyɛ̌m má. Tó sʉ gá mé sí.»

² Nó ó, waá esôʼ á nze tô, tó sʉ ébúʼ mé Nzyɛ̌m sí. Bibɨ́bla mépɨ́ɨ́ ɨ́ kpaa kpaa, byé ntɔ̂ʼ pyâl bʉ̂r ɨ́ menyʉ̂l. Mepɨ́ɨ́, mé á bu pipyâl ó, baá bé á cɛma bijwɨʼ mé tír waá bá. Bé ó b'á dwe kpɛʼkpɛ̂ʼ mveʼle yé kûm.

³ Píe tɨ̂, éngeles mbá nzě tó sʉ ébúʼ mé Nzyɛ̌m ɨ́ mâŋ. Medíbé mé mâŋ, mé ntɔ̂ʼ liŋa bíbúʼ métié mpʉ métié mé múu. Bím bísɔ̂ʼ byé á be mikublakúbla ɨ́ mâŋ bí, byé ntɔ̂ʼ síe lɨ́ edwe.

⁴ Jwɨʼ gwár yaá, éngeles lɛ̂l, nzě tó sʉ ébúʼ mé Nzyɛ̌m ɨ́ misʉm méntíbé ndu e menó. Medíbé maá mɨ́mɛ̂h, mé ntɔ̂ʼ liŋa métié.

⁵ Me nzě jóʼo éngeles dí ejwɨ́ɨ méntíbé ndu e mâŋ nyá. Nye e né ó: «Dâ ɛ̌, go á boo be ó tɨ̂. Go ntémé ó dína. Go ó mʉr dí tí nyá. Go ó tîtyěl mʉr, ebě, go á si tíʼe milɔ̌b myɔ́ɔ́ mbǐ tíʼá wɨ̂,

⁶ ebě, bé á si kʉ jʉ̂ bʉr o gó á twâr bá, bé le ogwíha o mílɔ̌b bô. Metié mɔ́ɔ́, mɨ́ buú swɨɨ sí. Nó ntémé ó gó á lɛ́ɛ ojʉ̂l o bʉ̂r baá ó, bé bɛ́blaa metié yɨ́. Sá dí ejala e bé yɨ́ ó nɨ̌!»

⁷ Me nzě jóʼo nyʉ́ʉ́ twíí á duho lɨ́ alatâr mindwéá nyɨ́. Nye e né ó: «Yé ó nó, Dâ Nzyɛ̌m, Nzyɛ̌m nkul nyɨnyɛ̂h, gǒ le otyeetye. Go lɨ́ etíʼe mílɔ̌b lɨ́ otîtyěl.»

⁸ Éngeles nâ tô e yé béle, tó sʉ ébúʼ mé Nzyɛ̌m ɨ́ dʉ́o. Dʉ́o, lé ntɔ̂ʼ dweŋɔɔ nkûl ó, lé díʼɨɨ bʉr e siʼe yé.

⁹ Jɔʼ bʉ̂r, bé á díʼe nó yɨ́, bé á si tô dóló le epyaŋɔɔ̌ Nzyɛ̌m, nyɨɛ mʉr á dwe bé bintɨ́ʼá byaá nyá. Bé á bé akam étúmo míkoo e mebébe mɔ́ɔ́, nkʉ̂ dwira míléme, le edwe nyé kûm.

¹⁰ Éngeles tɛ̂n tô e yé béle, tô ɨ́ diá jwɨ́ɨ me tír waá, tó sʉ ébúʼ mé Nzyɛ̌m tɨ̂. Edúrúú ntɔ̂ʼ sula ɨ́ sí tír á jwɨ́ɨ yɨ́. Bʉr ntɔ̂ʼ kʉkoʼlo bíjɨ́m byɔ́ɔ́ ɨ́ lɔ̌b mítúú myɔ́ɔ́.

¹¹ Damá jóʼo nó, bé á bé atúmo míkoo e bisyɛ́ɛla bí ébébe byɔ́ɔ́, nkʉ̂ pʉgʉ́ bá dwira míléme. Bé á si tô dóló le elwɨ́ɔɔ̌ Nzyɛ̌m, dí ɨ́ jʉ́o kʉ́ nyá. Bé á sâ nó ó, ɨ́ lɔ̌b mékpaa ndu e mepɨ́ɨ́ mɔ́ɔ́.

¹² Éngeles saman nzě tô e yé béle ɨ́ ngwǎŋ bé jɨ́jébé ó, Efrât wɨ́. Nye nzě tó sʉ ébúʼ mé Nzyɛ̌m tɨ̂. Jɔʼ nyé á sʉ lé yɨ́, ngwǎŋ waá ntɔ̂ʼ jwɨ̂l wɨ́wɛ̂h. Ngwǎŋ waá, wé á jwɨ̂l nó ó, lɨ́ entɛŋ ójwɨ́ɨ. Bé óduhǒ nko dʉ́o dí ejɨma yɨ́, nzě pyâl ɨ́ ngwǎŋ waá, wé osí swâh.

¹³ Me á si bee ntémé mimbɨ́a mísísǐm milɛ̂l. Myé á nwɨɨla ó e baádwam. Wɨ̂ʼ mbɨ́ǎ sísǐm, wé á duho ó ɨ́ nǔm njʉ̌m myɔ́ɔ́. Gúú, wé á duho ó ɨ́ num tír menyan waá. Gúú ntémé ɨ́ num ngwíha milɔ̌b bibɛr wé.

¹⁴ Meleme maá, mé lɨ́ etô le esâ mésimá. Mé lɨ́ etô kwá ojwɨ́ɨ́ ó sí bɨ́bɛ̂h, lɨ́ ebáŋle bé ó, bé syɛ́ŋɨɨ menkul mɔ́ɔ́, lwímla dɔ̂m e Nzyɛ̌m nkul nyɨnyɛ̂h ɨ́ móhó nɨ́nɨ́ɨ́ wé.

^15-16 Bê nzě syɛŋa ntémé nó. Bé á syɛŋa ó, lɨ́ ebɨ̌m e dɔ̂m bé jɨ́jébé ɨ́ lwǐb ébrœ̂ «Armagedɔ̂n» yɨ́. Tî gá wɨ́ná, nyě lɛ́ɛ́ ó: «Paá bee gâ: me lɨ́ enze métwɨrâ, mpʉ̌ ndíblʉ̌. Mʉr dí ɨ́ mpʉ̂n, mikán mimbɔ́rá ɨ́ nyʉ̂l nyá, nye ó waá mé ósʉ métyɛʼ me mpóm nyá. Nyɨɛ, nye ábě suswáh. Nye ábeɔɔ ɨ́ nkɛŋlɛ̂m. Nye ásɔ́ma.»

¹⁷ Me nzě kǎ bee éngeles nzaangbá. Nye nzě mɔa, ntɔ̂ʼ tô e bélé yé, tó sʉ ébúʼ mé Nzyɛ̌m ɨ́ pubó. Twíí nɨ̂nɨ̂n nzě duho ɨ́ mecwɨ́ɨ́ mé jwɨ́ɨ dí ɨ́ mpáh Nzyɛ̌m má. Nye e né ó: «Yɨ́ síe!»

¹⁸ Mindweh mi mpíé, myê nzě pyâl ɨ́ keleb keleb. Nkɛ̂l jʉ́o dumo ɨ́ sɨŋgɨɨm. Sí kʉ́ nzě kubla. Táare ɨ́ jɔ̌ʼ Nzyɛ̌m á tyêl bʉr ɨ́ sí yɨ̂ʼ yɨ́, kumo ɨ́ jɔʼ yɨ̂, bé apǎ beě sí lɨ́ ekublǎ mbi waá.

¹⁹ Nkanǎ nɨ́nɨ́ɨ́ yaá, yé ntɔ̂ʼ bîʼ, nzě bʉ̂l mímyál mílɛ̂l. Binkana biswîh ɨ́ mʉ́ʉ́ mésí ntémé, mé á si duma sí. Nzyɛ̌m á si símsa bisyɛ́ɛla bí Babilɔ̂n, nkanǎ nɨ́nɨ́ɨ́. Nye nzě lɛ̂ʼle bʉ̂r ó nkana yaá bím nkpáa nyé dí yɨ́, le esâ ntémé ó, bé jâʼraa le ebúʼ lé le nkpaa nyé. Bê nzě puro tɨ̂ʼ mpʉ mʉ̂r dí ejaʼra e mpur menyoʼ yɨ́.

²⁰ Mitíhé, myé á si dîm ɨ́ mîh, myáa ɨ́ medíbé. Mecwɨ̂ʼ, mé á bé akǎ kœbɔɔ.

²¹ Metánaá ɨ́ bwaʼ bwaʼ nzě duho ɨ́ jʉ́o kʉ́, nkaŋa bʉ̂r ɨ́ menyʉ̂l. Mé á be ɨ́ dile dile, etánaá egwár lɨ́ epyâl ókílo mekám ménâ e metɛ̂n. Bʉr ntɔ̂ʼ báʼǎ nzě pyǎ Nzyɛ̌m ɨ́ lɔ̌b ntɨ́ʼá yaá. Ebě, metánaá mé ábwaʼbwâʼ maá, mé ó b'á bu ntɨ̂ʼ bʉr, laa byúú bíntɨ́ʼá bíbyɛ̂h.