Mɨngwiha 13 - Kálar Nzyɛ̌m : Ejwán é Sáá

¹ Myɔ́ɔ́ waá ntɔ̂ʼ tó tyɛ̂b ɨ́ pɨ̌n mâŋ. Nó ó, me á si bee tír lɨ́ epâm ɨ́ medíbé mé mâŋ. Nye á be ó e milʉ̂ nzaangbá ndu e bintóo kám. Bikáráá bí dúu, byé á be ó mipɛná ɨ́ bintóó bíbyɛ̂h. Ɨ́ lʉ́ wɨ́wɛ̂h, bé á si cɛma yʉ́ʉ́ bɨ́bla díe, lé á sâ Nzyɛ̌m nkěh lɨ́.

Otír ó ményan obá

² Tír waá á be ó mpʉ nkœ́œ. Nye á be ó tír metɔrʉ, mpʉ̌ ûrs. Num wé, wé á be ó mpʉ̌ nǔm ngbampɨɨ. Njʉ̌m myɔ́ɔ́, wé á si dwe tír waá nkul nyé, ndu e diá jwɨ́ɨ́ yé, ndu e nkul jwɨ́ɨ̌ nɨ́nɨ́ɨ́ nyé.

³ Gúú lʉ̂ ɨ́ milʉ́ mí tír waá, wé á be ó e boʼo pɨ́ɨ́. Tó kœb ó pɨ́ɨ́ nyaá á si dwéele. Bʉr ó sí bɨ́bɛ̂h, bé á si kâm nye, nzě kǎ dudúŋɔɔ nyê.

⁴ Bʉr bɨ́bɛ̂h, bé á si dwe njʉ̌m myɔ́ɔ́ kûm, ebě, wé ó b'á dwe tír waá jwɨ́ɨ́ yé. Bé ntémé, bé á be lɨ́ edwe tír waá nye mʉr tɨ̂ʼ kûm. Bé ó: «Nzé dí enwɨɨla e tír nyâ? Nzé ntémé dí e nkul elwímla e né, ntaa nyé ɨ́ dɔm?»

⁵ Tír waá á si dweŋɔɔ nkul ó, nye dwêʼ nye mʉr tɨ̂ʼ mesʉ̂m le esâ Nzyɛ̌m nkěh. Nye á dweŋɔɔ nkul esâ nó ó, ongɔn mekám ménâ le obá.

⁶ Nó nyé á ka nyɛl epyêh kuó mé Nzyɛ̌m, le díé lé, ndu e jʉ́o, gúmó Nzyɛ̌m dí edi yɨ́, ndu e bʉr bɨ́bɛ̂h o dí edi tɨ̂ʼ bá.

⁷ Nye nzě dweŋɔɔ nkûl elwímla dɔ̂m e bʉr o mé Nzyɛ̌m le entaa bé ɨ́ nkul. Nye á dweŋɔɔ ntémé ó, nkul jwɨ́ɨ ɨ́ bʉr o bíkûl e biloo e mpum bʉ̂r, le bʉr o bílwǐb bíbyɛ̂h.

⁸ Nó ó, bʉr ó sí yɨ̂ʼ bɨ́bɛ̂h, bé ódwe nyé kûm, pɛ̌ʼ njɨ baá Nzyɛ̌m á boo cɛma míé mɔ́ɔ́ ɨ́ mekaná mé twiʼ bá. Mekaná maá, mé á boo be cɛmá ó, táare ɨ́ jɔ̌ʼ kʉ́ e sí, byé á be apǎ bě kuhá yɨ́. Mé gúmó ó e Mâ Nteme bé á boo jʉ̂ nyá.

⁹ «Mʉ̂r óbe e megwǎl mé éjóʼo nó, nye jóʼaa sá mé múo nzě lɛ́ɛ yɨ̂:

¹⁰ Nzyɛ̌m, nyě lɛ́ɛ́ ó: Yé bé kɛl swîh, kɛl kɛl ó jálá le etô lɨ́ okómó nó, nye óbánǎ tô. Yé bé kɛl swîh, kɛl kɛl ó jálá le ejʉ́ŋɔɔ e pasoŋ nó, nye óbánǎ dwe nó.» (Wâʼ ɨ́ gúmó yɨ̂, yé lɛ́ʼlé ó, yé mbɨa ɨ́ páʼ bʉ̂r o dí egúmo e Nzyɛ̌m bá ó, bé díʼee ntémé e bíhwó. Bé dyéʼee koo e Nzyɛ̌m.)

¹¹ Me nzě bee nyʉ́ʉ́ tír menyan swîh lɨ́ epâm ɨ́ bibwǎh. Nye á be ó e bintóó bíbá. Bintóó byé, byé á nwɨɨla ó e byaá bi Mâ Nteme. Nye á lwilwib ó, mpʉ̌ njʉ̌m myɔ́ɔ́.

¹² Nye á be ntémé ó e nkul mpʉ tír esôʼ. Nye á sɨséa syɛ́ɛ́ yé ó, ɨ́ mpǒm tír esôʼ waá. Nye ó b'á sâ ó, bʉr ó sí yɨ́yɛ̂h, bé dwêʼ tír esôʼ kûm. Tír waá ó b'á be e boʼo pɨ́ɨ́ ɨ́ lʉ̂, á bě sí dwéele nyɨ́.

¹³ Nye nzě sâ bísyɛ́ɛla bí ékâm, le esâ ntémé ó, siʼe, yé dúhaa ɨ́ jʉ́o kʉ́, njʉl tɨ̂ʼ nzě buma ɨ́ sí yɨ̂, bʉr bɨ́bɛ̂h lɨ́ ebee.

¹⁴ Ebě, nye á si dweŋɔɔ nkul esâ mésimá nó ɨ́ míh mé tír esôʼ waá. Nye á si bana dímle bʉr ó sí yɨ̂ʼ bɨ́bɛ̂h, lɨ́ elɛ́ɛ e bé ó, bé kpáʼaa mveʼle ngá nwɨɨla e tír esôʼ, waá á pa kparɔɔ e pasoŋ, adwe nyá.

¹⁵ Tír waá á be ó sí dweʼɔɔ nkûl egúmlǒ ngúl wé ɨ́ kpɛʼkpɛ̂ʼ mveʼle yaá, ó yé lwíbɨɨ. Ndu e ntémé ó, yé jʉ́ʼoo bʉr bɨ́bɛ̂h á be adwe nye kûm bá.

¹⁶ Nó nyé á lɛ́ɛ mekǎʼ me bʉ̂r bɨ́bɛ̂h ó, bé twɛ́laa bijwɨʼ byé lɨ́ koo ékœ̂h ɨ́ mbó éjʉ́m, nkʉ̂ ɨ́ mpǒm. Nye á lɛ́ɛ ó, táare e baántéʼenteʼe o bʉ̂r, kumo e minjɨ́h mí bʉ̂r, okúmá ti e mindyêbndyéb, bitúʼǎ le otî.

¹⁷ Mʉr nyɨnyɛ̂h á be atwɛlɔɔ mpɔɔ́ nyaá nyá, á bé abe e nkul ekǎ bwâm, nkʉ̂ bɛ́ma yʉ́ʉ́ sɔ̂ʼ pátele. Mpɔɔ́ nyaá, nye ó bikaŋá métɔ́ɔ. Nye lɨ́ elɛ̂ʼle díé é tír esôʼ.

¹⁸ Wâʼ ɨ́ gúmó yɨ̂, yé jɨ ó, mʉr díʼee e mpǎŋ ocwóó. Twóó mʉr nye omér ó ngá gʉ́ǎ sá bíkaŋá byaá dí elɛ̂ʼle yɨ́. Byé kʉ́ lɛ̂ʼle ó, mbi tír waá dí yɨ́. Byé ó dí: minter mísaman, e mekám mésaman, le ɨ́ saman (666).