Mɨngwiha 12 - Kálar Nzyɛ̌m : Ejwán é Sáá

Mʉmá, bé e myɔ́ɔ́ ɨ́ bwaʼ bwaʼ

¹ Píe tɨ̂, sá ékâm, yé á si pyâl ɨ́ jʉ́o kʉ́. Me á si bee mʉmá. Nye á bwâr ó dʉ́o mpʉ̌ kán wé. Álomó á be ó sí mebo mé. Lɨ́ ebɔmǎ lʉ́ wé ɨ́ nká, nye á be ó, le ocwícwén kám le obá, bɨ́ɛ lɨ́ edi tâŋ káráá dúu.

² Mʉmá waá á be ó le ebum. Nye á be ó lɨ́ ejaʼra e mǐn, lɨ́ edǐ byâ. Nó nyé á ka títíme yɨ́.

³ Yʉ́ʉ́ sá ékâm, yé ntɔ̂ʼ nyɨ̂n ntémé ɨ́ jʉ́o kʉ́. Me á si bee myɔ́ɔ́ ɨ́ bwaʼ bwaʼ, wɨ́ɛ e nyʉ̂l kaá e kaá. Wé á be ó e milʉ̂ nzaangbá, ndu e bikáráá bí gʉ̂l ɨ́ milʉ́ myé, ndu e bintóo kám.

⁴ Wé á si syɛ̂m kʉ̌n wé, píle ócwícwén le kʉ̌n wé waá. Ocwícwén baá ɨ́ buo buo, bé á si pílɔɔ ɨ́ kʉ̌n wé, jala e nkɔb mpwár ɨ́ menkɔb melɛ̂l. Wê nzě syɛŋ bê, guho bé kâʼ ɨ́ sí yɨ̂. Wé á tityɛ̂b ó, ɨ́ mpǒm me mʉ́má á be lɨ́ edǐ byâ nyá. Wé á bě e jwɨʼ ó, mʉ́má sí byâ mwân waá nɛ́ɛ: wé onʉa mwân waá, mine nyê.

⁵ Mʉmá waá nzě kǎ byâ mwân, mâ mʉrʉ̂m. Le nyé á byâ nye, le ntɔ̂ʼ bé á nʉa nye, tóŋɔɔ e né ɨ́ míh mé Nzyɛ̌m, gúmó nyé dí ɨ́ mecwɨ́ɨ́ mé jwɨ́ɨ́ yé yɨ́. Mwân waá óbe ó njwɨ́ɨ̌ nɨ́nɨ́ɨ́ ngá pɨpála bíkúl bí sí yɨ̂ʼ bíbyɛ̂h e nkul jwɨ́ɨ ɨ́ lele lele mpʉ̌ súmǔ nkóho nyá.

⁶ Nó ó, mʉmá nyɨɛ á si kpɛ́ɛ, tô ɨ́ lʉá, tó dǐ súm Nzyɛ̌m á boo komlo nye odiá yɨ́. Nzyɛ̌m ó b'á baʼle nye gʉ̂, lɨ́ edwe nyé mede. Nye á didi gʉ̂ʼ ó, tâŋ melû tɔ́ɔ́sin e minter mimbá e mekám mésaman (1.260).

⁷ Nó ó dɔ̂m lé á nze bʉ̂l ɨ́ jʉ́o kʉ́. Michel, bé e beéngeles bé, bé á si lwímla e myɔ́ɔ́ waá. Nó ó, myɔ́ɔ́ waá ntémé, wé á si nʉa bé bééngeles, lwímlɔɔ e bê.

^8-9 Nó ó, Michel, bé e beéngeles bé, bé á si so myɔ́ɔ́ ɨ́ bwaʼ bwaʼ waá, bé e beéngeles bé bɨ́bɛ̂h ntɔ̂ʼ duho kʉ́, nkaŋa sí ɨ́ sɨŋ, ebě, bé á bé akǎ be e mediá ɨ́ jʉ́o kʉ́. Njʉ̌m nyʉ́a wé á boo be tɨ̂ʼ wɨ́, wé ó mʉr dí edímle bʉ̂r ó sí yɨ̂ʼ bɨ́bɛ̂h nyá. Bé lɨ́ ejébe nyʉ́a waá ó: «Sɔ́ŋ meleme», nkʉ̂ «Sátan».

¹⁰ Píe tɨ̂, me á si jóʼo twíí ɨ́ jʉ́o kʉ́. Twíí nyaá á lɨlɛ́ɛ kʉ́kʉ́ ó: «Ɨ́ báánâ, Nzyɛ̌m, nyɨ́ kʉ́ tíʼ mɨ́ná gá mpǎŋ tíʼá! Nyɨ́ lɛ̂ʼle ó, nyě e nkul. Nye ó dí njwɨ́ɨ. Ɨ́ báánâ, mʉr nyé á lœm múló mé jwɨ́ɨ nyá, nyɨ́ lɛ̂ʼle ó, nye ó dí e nkul, ebě, bɨ́ so waá á nwâhle bɨ́ɔɔ́ gá bɨ́ná jɔʼ yɨ́yɛ̂h ɨ́ míh mé Nzyɛ̌m móhó e pum nyá. Bɨ́ guho nyé sí.

¹¹ Bɨ́ɔɔ́ gá bɨ́ná ntémé, bɨ́ ntaa nyé ɨ́ nkul ɨ́ nzɨ̌ metié mé Mâ Nteme, ti e mboʼlá bé á boʼlo, dumo e Yésʉs wɨ́. Bé á bé alíʼa lɨ́ ebîr bícwiʼ byɔ́ɔ́. Bé á si jʉ́ŋɔɔ ɨ́ lɔ̌b mboʼlá wɔ́ɔ́ waá.

¹² Ebe nó, bɨ̌n, bʉr o dí ɨ́ jʉ́o bá, sohaa gâ. Nkoó, nye ó e sí ndu e mâŋ! Bé óbuú tíble bɨ́n, ebě, sɔ́ŋ meleme, nyɨ́ tô gʉ̂, nko bɨ́n dí yɨ́. Wé lɨ́ ebuú kpaa ébúʼ, ebě, nyɨ́ kǎ gʉ́a ó, jɔʼ yé, yɨ́ lîʼ njɨ bá tîtííǎ.»

¹³ Nó ɨ́ jɔ̌ʼ njʉ̌m myɔ́ɔ́, wé á guhɔɔ kâʼ ɨ́ sí yɨ́, nó ó wé á taare etô le etíble mʉ́má á byâ mâ mʉrʉ̂m waá nyá.

¹⁴ Bé ntɔ̂ʼ dwe mʉ́má waá mempabaá mebá mpʉ maá me mpéle ɨ́ bwaʼ bwaʼ. Nye á dweŋɔɔ mempabaá maá ó, nye píilɨɨ e mé, tô ɨ́ lʉá, tó dǐ súm Nzyɛ̌m óbaʼle nyé yɨ́. Nye á si to di gʉ̂ mimbú mílɛ̂l e pêh, lɨ́ eswǎb njʉ̌m nyʉ́ǎ nɨ̌.

¹⁵ Nyʉ́a nzě pyêl médíbé ɨ́ buo buo ɨ́ num wé, yé mû mpʉ̌ mpǎŋ sʉ̌m díbé. Nye á sâ nó ó, medíbé maá, mé dúʼoo mʉmá waá nko nyé á tô yɨ́. Mé kœ́b nyé nɛ́ɛ: mé e jʉ́ nyê.

¹⁶ Sâ gwár, sí, yé á si kɛm nye. Yé á si bɛ́ɛ num, ntɔ̂ʼ mině díbé yé á duduho ɨ́ nǔm myɔ́ɔ́ yɨ́.

¹⁷ Jɔ̌ʼ myɔ́ɔ́ á bee nó yɨ́, wé ntɔ̂ʼ lɛ̂ʼle mʉ́má waá nkpaa nyé ɨ́ buo buo. Nó ó, wé ntɔ̂ʼ búla, tó sâ dɔ̂m e bwán mé mʉmá waá. Bwán bé baá, bé lɨ́ elóŋlo métié mé Nzyɛ̌m, le ebaʼle mílɔ́ɔ́ mé Yésʉs.