Mɨngwiha 11 - Kálar Nzyɛ̌m : Ejwán é Sáá

Oboʼlo obá

¹ Nó ó mé á dweŋɔɔ mâ lɨ́ bé á jwɨjwɨʼ bisɔ̂ʼ e tɨ̂ʼ nyá. Bé e me ó: «Gbɔlwaa sí. Go e tó jwɨ̌ʼ mpáh Nzyɛ̌m. Go e jwɨ́ʼ ntémé alatâr mindwéá. Go e láá ntémé bím bʉ̂r o dí edwě Nzyɛ̌m kûm tɨ̂ʼ bá.

² Go e bír ébɛhɛɛ. Sá ajwɨʼ lê, ebě, Nzyɛ̌m á pɛʼ lé ó, dwe bʉ̂r o dí abe óYúden bá. Mekʉ̌ mɔ́ɔ́, mé ónyǎl nkana dí tí yɨ́ ó, tâŋ ongɔn mekám ménâ le obá.

³ Nó ó, me óntɨh bʉ́ʉ́ óboʼlo bâm obá. Bé ónzě lwib ɨ́ díé lâm. Bé ókʉ́ba mínkura. Bé ógwîh lɔ́ɔ́ wâm tâŋ melû tɔ́ɔ́sin e minter mimbá e mekám mésaman (1.260).»

⁴ Oboʼlo obá baá, bé lɨ́ etyɛ̂b ó, ɨ́ mpǒm me Njwɨ́ɨ sí yɨ̂ʼ yɨ́yɛ̂h. Bé ó mpʉ bílɨ́ bí ólivier bibá ndu e bityélátyéla méláma bibá.

⁵ Bʉ̂r o dɔ̂m bɔ́ɔ́ sí gwɨ̂m ó, gwɨ́mɨ́ɨ esâ bé ebébe nó, oboʼlo bâm, bé ójʉ̂ bé e siʼe yé óduho bé ɨ́ minum yɨ́. Nó ntémé ó, óntɨ̂m le obɨn bɔ́ɔ́, bé ódwe yɨ́.

⁶ Jɔʼ bé dí egwîh mílɔ̌b yɨ́, bé e nkul ediblě jʉ́o ó, ompíé ayɨ́ kǎ nwɨ́ɨ. Bé ntémé, bé e nkul esâ ó, medíbé, mé líŋaa metié. Bé ntémé, bé e nkul entɨh bʉ̂r ó sí yɨ̂ʼ bɨ́bɛ̂h bibébebébe bísɔ̂ʼ mimbi mimbi, ɨ́ jɔʼ yɨ́yɛ̂h bé kpɛ̂l yɨ́.

⁷ Nó ɨ́ jɔʼ bé ósîl édwe bʉ̂r mboʼlá wɔ́ɔ́ yɨ́, tír menyan óduho ɨ́ bɨ́ dí sí ɨ́ kœ́ʼlɛ́ yɨ́. Tír waá ólwímla e bê. Nye ónʉa bê, jʉ̂.

⁸ Nó ó, mimúú myɔ́ɔ́, myé ódyéʼɔɔ ó, témé ebɛhɛɛ ɨ́ kpɛŋlɛm ɨ́ nkana ɨ́ bwaʼ bwaʼ yaá. Ɨ́ nkana yaá ó Tî wɔ́ɔ́ á jʉ́ŋɔɔ ɨ́ jɔʼ bé á bomlo nye e binzâŋ, le ebɨ̂n nyé ɨ́ kolôs kʉ́ yɨ́. Díé é nkana yaá, bé jébé lé ɨ́ lwǐb ódîm ó: «Sodôm», nkʉ̂ «Egɨ̂ptɛn.»

⁹ Bʉr ɨ́ buo buo, bé ónzě siŋle mímúú myɔ́ɔ́ ó, tâŋ melú mélɛ̂l e pêh. Bé óbe ó bʉr o bíkúl bíbyɛ̂h, e mempóʼo mɨ́mɛ̂h. Bé óbe ó bʉr o bílwǐb bíbyɛ̂h, le eduho ɨ́ mesí mɨ́mɛ̂h. Bé ákam ó, bé débaa ɨ́ mesoo.

¹⁰ Bʉr ó sí yɨ̂ʼ bɨ́bɛ̂h, bé óbuú soho, ebě, bʉr obá baá, bé á si jʉ́ŋɔɔ. Bé ótyêl nzɔ́ɔ bisʉhʉʉ, ebě, ogwíha o mílɔ̌b obá baá, bé á si gwa ntɨ̂ʼ bʉr ó sí yɨ̂ʼ ɨ́ buo buo. Bʉr, bé ódweela bísɔ̂ʼ ɨ́ bisʉhʉʉ byɔ́ɔ́.

¹¹ Nó ɨ́ jɔʼ mélú mélɛ̂l e pêh maá, mé á be, mé mû sí laa yɨ́, Nzyɛ̌m á si gúmlo ngúl twiʼ wé ɨ́ sɔ́má bʉ̂r obá baá. Ngúl wé nzě nî bé ɨ́ menyʉ̂l, bé ntɔ̂ʼ pah, tyɛ̂b mítîtyěl. Bʉr bɨ́bɛ̂h o b'á bee bé bá, bé ntɔ̂ʼ buú jóʼo bʉ́á.

¹² Jɔʼ bé á tyɛ̂b mitîtyěl yɨ́, bê nzě jóʼo twíí duho ɨ́ jʉ́o kʉ́, lɨ́ elɛ́ɛ e bé kʉ́kʉ́ ó: «Béráá gâ. Ntá gá kâʼ kʉ́.» Nó ó bé á nze bére kʉ́ ɨ́ dwiné tʉ́ŋlʉ̌, ontɨ̂m le obɨn bɔ́ɔ́ lɨ́ ebee.

¹³ Sí, yé á si bu pɨ̂ʼla ɨ́ jɔʼ yaá. Nó ó, mimbɛ̌r mí nkana yaá, myé á si duma sí. Nkɔb mimbɛ̌r mpwár ɨ́ menkɔb kám, nye á si duma sí. Jɔʼ sí, yé á pɨ̂ʼla yɨ́, bʉr, bé á si dwe, tâŋ otɔ́ɔ́sin nzaangbá. Baá bé á ka lîʼ mikublakúbla bá, bé á si bu jóʼo bʉ́á. Bé ntɔ̂ʼ gúmlǒ Nzyɛ̌m dí ɨ́ jʉ́o kʉ́ nyá.

¹⁴ Túú mbá, wɨ́ laa. Waá lɛ̂l mû ó kúno epyâl.

Sébé nzaangbá

¹⁵ Píe tɨ̂, éngeles nzaangbá á si lʉ́o sébé wé. Me ntɔ̂ʼ jóʼo métwíí ménɨ́nɨ́ɨ́, duho ɨ́ jʉ́o kʉ́. Mé ó: «Dâ Nzyɛ̌m wɨ́h, bé e mʉr nyé á lœm múló mé jwɨ́ɨ nyá, bé ó dí e jwɨ́ɨ ɨ́ páʼ bʉ̂r ó sí yɨ̂ʼ bɨ́bɛ̂h. Jwɨ́ɨ́ yé, yé ódǐ njʉ̌m dǐ e njʉ̌m dǐ.»

¹⁶ Otɔ́má bʉ̂r mekám mébá le onâ bé á be mindîndǐl ɨ́ bidiá bí ójwɨ́ɨ ɨ́ míh mé Nzyɛ̌m bá, ntɔ̂ʼ búrwɔɔ sí, mempǒm mipíʼá ɨ́ bibwǎh, lɨ́ edweŋɔɔ nyé kûm.

¹⁷ Bé ó: «Dâ Nzyɛ̌m, Nzyɛ̌m nkul nyɨnyɛ̂h, Go ó b'á boo be. Go ntémé ó dína. Bɨ̌h bé lɨ́ edwe gó nzyǒo ɨ́ lɔ̌b nkûl nɨ́nɨ́ɨ́ nyǒ, gó dí e né nyɨ́. Go ó dí njwɨ́ɨ.

¹⁸ Bikûl bi dí agʉ́a gó bí, byé á si lɛ̂ʼle go nkpaa nyɔ́ɔ́. Nó ó, ɨ́ báánâ, yé mû ó jɔʼ gúa jálá le elɛ̂ʼle bé nkpaa yɨ́. Yé ntémé mû ó jɔʼ ékǎ tíʼe ódwe milɔ̌b yɨ́. Go ójána ósyɛ̂l o mésâ bô bɨ́bɛ̂h: le ogwíha o mílɔ̌b, le bʉr o dí egúmo e go bá, le bʉr bɨ́bɛ̂h o dí edwe díé lô kûm bá, damá jóʼo míndyêbndyéb mi bʉ̂r, nkʉ̂ ntɔ̂ʼ minjwɨ́ʼ mí bʉ̂r. Sâ gwár, bʉr o dí etíblě sí yɨ̂ʼ bá, go ósîl éjʉ̂ bé ɨ́ pé.»

¹⁹ Jɔʼ bé á sil elwib nó yɨ́, mpáh Nzyɛ̌m ɨ́ jʉ́o kʉ́, nye á si diba. Nó ó, Mpɔra Sáá yé á be tɨ̂ʼ yɨ́, yé á si nyɨ̂n ɨ́ kpɛŋlɛm. Me á si bee mindweh ɨ́ keleb keleb, jóʼo métwíí, ndu e nkɛ̂l jʉ́o ɨ́ sɨŋgɨɨm. Sí nzě kubla. Metánaá ntémé, mê nzě gɔ́na le ekur ɨ́ buo buo.