Mɨngwiha 1 - Kálar Nzyɛ̌m : Ejwán é Sáá

Meswɨhlɨ

¹ Yésʉs-Krîst á si gwîh bisá Nzyɛ̌m á tɨ́e nye ó, nye lɛ̂ʼlaa osyɛ̂l o mésá bé, ó bé gʉ́ŋaa sá mû kúno epyâl bé yɨ́. Nye á gwîh byé ó, lɨ́ elómo éngeles wé kwá me, Yʉánɛs, syɛ̂l mesâ wé.

² Yʉánɛs waá, nye ó mboʼlo lɨ́ esú é sá yɨ́yɛ̂h nyé á bee yɨ́. Nyě boʼló ó, dumo e lɔ́ɔ́ mé Nzyɛ̌m, ti e twiʼ mé Yésʉs-Krîst.

³ Metyɛʼ me mpóm, mé díʼee e waá dí eláa míngwíhá mílɔ̌b mi dí ɨ́ mekaná mâʼ mí nyá. Metyɛʼ me mpóm, mé díʼee ntémé e bʉr o dí ejóʼo le ebaʼle métwɨ́ɨ́ me dí tɨ̂ʼ má bá. Gʉ́ŋáá gá ó, sá nyé á bee yɨ́, yé mû ó kúno epyâl.

⁴ Yé ó mɛm Yʉánɛs ó dí ecɛma bɨ́n mekaná mâʼ nyá, bʉr ó Mbɛ̌r-Nzyɛ̌m dí ɨ́ binkana nzaangbá bi dí ɨ́ sí Azía bí. Nzyɛ̌m sʉ́ʼoo bɨ̌n metyɛʼ me mpóm le egbâ mépyɛbla ɨ́ milémé mín. Mé díʼee e bɨ̌n, duho e waá á boo be nyá. Nye ntémé ó dína. Nye ntémé ónze. Mé díʼee e bɨ̌n ntémé, duho e misísǐm nzaangbá dí ɨ́ mpǒm mecwɨ́ɨ́ mé jwɨ́ɨ́ mé Nzyɛ̌m mí.

⁵ Yésʉs-Krîst sʉ́ʼoo bɨ̌n metyɛʼ me mpóm, le egbâ mépyɛbla ɨ́ sɔ́má yɨ́n. Nye ó mboʼlo jálá le ebúʼlɔɔ nyá. Nye ó dí mwâ medwéʼe mé Nzyɛ̌m á pah, duho lɨ́ odwe nyá. Nye ó dí Njwɨ́ɨ mesí mé sí yɨ̂ʼ mɨ́mɛ̂h. Nye lɨ́ ekpɛl mɨ́ná gâ. Nyɨ́ sʉ métié mé sí, ntɔ̂ʼ pɛʼ bibaa bí ébébě Nzyɛ̌m á niʼe ɨ́ lɔ̌b mísyóm gá míná bí, ɨ́ nzɨ̌ ndwéá wé.

⁶ Nye ó b'á liŋ mɨná gá bʉr o Mpóʼo nyé, le esâ ó, mɨná díʼee gá opara dí eséa e waá dí Nzyɛ̌m wé, waá dí ntémé Sɔ́ŋ wé nyá bá. Kûm e nkul, byé díʼee e né njʉ̌m dǐ e njʉ̌m dǐ. Amɛn.

⁷ Paá bee gâ: nye lɨ́ enze ɨ́ dwiné. Bʉr bɨ́bɛ̂h, bé óbee nyê, damá be ó baá bé á lúmo nye ekʉá bá. Bʉr o bíkúl bí sí yɨ̂ʼ bíbyɛ̂h, bé ójɨ médwê le ekâm ékúhó lé. Eee! Amɛn!

⁸ Dâ Nzyɛ̌m, nyě lɛ́ɛ́ ó: «Me ó dí waá esôʼ ndu e waá epíhe. Me waá á boo be, waá dína, ndu e waá ngá nze nyá. Me ó dí Nzyɛ̌m nkul nyɨnyɛ̂h.»

Yʉánɛs lɨ́ ebeě Yésʉs ɨ́ nzɨ̌ mbeá ésimá

⁹ Yé ó mɛm Yʉánɛs, mɨ́ɔɔ́ wɨ́n. Mɨná gá bé ɨ́ mpúhlá e Yésʉs ó, lɨ́ esia e mitúú mímpwár. Mɨná gá óbɛ̂h bé ɨ́ mpóʼo Yésʉs dí ejwɨ́ɨ yɨ́. Mɨná gá óbɛ̂h ó dí e bíhwó nyé dí egbâ bʉ̂r ɨ́ miléme nyɨ́. Bé á mɛ̂r me, pɨrɔɔ mé wâʼ ɨ́ tíhé dí ejébɔɔ «Pátmos» wɨ́ ó, ebě, lɔ́ɔ́ mé Nzyɛ̌m le milɔ̌b mé Yésʉs mé dí eboʼlo mí.

¹⁰ Ɨ́ gúú móhó sábat, me á be ó, ɨ́ nkul Sísǐm mé Nzyɛ̌m. Nó ó mé á jóʼo twíí lɨ́ elwib ɨ́ koo wâm píhe, lɨ́ enwɨɨla e sébé. Nye á lwib ó kʉ́kʉ́.

¹¹ Nye e me ó: «Sá gó mû lɨ́ ebee yɨ́, go e cɛ́má yé ɨ́ mekaná. Gó otyen mé ɨ́ bʉr ó Mbɛ̌r-Nzyɛ̌m dí ɨ́ binkana nzaangbá bi dí Éfɛsɔs, Smírna, Pɛ́rgamos, Teatîr, Sárdɛs, Filadɛ́lfia, ndu e Laodiséa bí.»

¹² Jɔʼ mé á dwira ó, mě dwɛ́ʼ ó mʉr á be lɨ́ elwib e me nyá yɨ́, nó ó mé á dwira, nzě bee bítyélátyéla méláma bí gʉ̂l nzaangbá.

¹³ Témé bityélátyéla méláma byaá, me á si bee nyʉ́ʉ́ mʉ̂r á nwɨɨla e mwân mé mʉr nyá. Nye á bwâr ó, dur ɨ́ jaa jaa, pyâl ɨ́ mekʉ̌ sí. Nye á be ntémé ó e kaná gʉ̂l ɨ́ kuó tyeelá.

¹⁴ Mpuo lʉ́ nyé, nye á be ó, ɨ́ pumo pumo mpʉ égul, ɨ́ pumo pumo mpʉ épɛ́m. Míh mé, mé á be ó mpʉ̌ njʉ̌l siʼe.

¹⁵ Mekʉ̌ mé, mé á be ó, nyʉ̂l ɨ́ cʉʼ, mpʉ̌ nkóho mû sí gbáŋɔɔ ɨ́ duró lé ólûl yɨ́. Twíí nyé, nye á jwɨ̂ʼ ɨ́ megwǎl ó, ɨ́ mpʉ mésʉʼ méntíbé ɨ́ buo buo.

¹⁶ Lɨ́ ekœ́h lé éjʉ́m lé, nye á be ó le ocwícwén nzaangbá. Nye ntémé e pasoŋ, njebá myoo mipáʼ mímbá. Pasoŋ waá, nye á duho nye ó, ɨ́ num. Mpǒm nyé, nye á pɨpan ó, ɨ́ keleb keleb, mpʉ̌ mbah dʉ́o dí epan témé móhó wɨ́.

¹⁷ Jɔʼ mé á bee nye yɨ́, me kúrwo sí, píʼe mpóm ɨ́ bibwǎh ɨ́ mekʉ̌ mé, mpʉ̌ múu ɨ́ séhé. Nye ntɔ̂ʼ kɛ̌l mbó éjʉ́m wé ɨ́ nyʉ̂l nyǎm. Nye e me ó: «Akǎ jóʼo bʉ́á. Me ó dí mʉr esôʼ ndu e mʉr epíhe.

¹⁸ Me ó waá dí kublakúbla nyá. Me á si dwe. Paá bee gâ: me mû ó, ɨ́ twǐʼ njʉ̌m dǐ! Me ó dí le osab o dí edib kwár odwe bá.

¹⁹ Nó ó, cɛmaa bísá gó dí ebee bí. Cɛmaa bísá mû lɨ́ esyɛ́ɛ ndu e byaá ngá syɛ́ɛ bí.

²⁰ Ocwícwén nzaangbá gó dí ebee lɨ́ ekœ́h lé éjʉ́m lâm bâʼ le bityélátyéla méláma bí gʉ̂l nzaangbá, sá dí elɛ́ɔɔ tɨ̂ʼ ɨ́ lwǐb ódîm yɨ́ ó yɨ̂: ocwícwén nzaangbá, bé ó beéngeles nzaangbá dí edwéele bʉ̂r ó Mbɛ̌r-Nzyɛ̌m dí ɨ́ binkana nzaangbá bá. Bityélátyéla méláma byaá bíɛ, byê mveʼle ó, bʉr ó Mbɛ̌r-Nzyɛ̌m dí ɨ́ binkana nzaangbá bá.»