Mɨlʉmlʉ 8 - Kálar Nzyɛ̌m : Ejwán é Sáá

¹ Saʉ̂l nzě kam éswie mé Étiene. Ɨ́ móhó ngwár e ngwár waá, bê nzě nyɛl étíblě Mbɛ̌r-Nzyɛ̌m Yerʉ́zalɛm ɨ́ dwíííá. Obûʼla bɨ́bɛ̂h, pɛ̌ʼ njɨ bʉr o mílʉ́mlʉ́ mé Yésʉs, bê nzě gbɛha ɨ́ mekwár mé sí Yʉ́da ti e maá mé sí Samarî.

² Nó ó, bʉrʉ̂m o b'á dwáawo Nzyɛ̌m bá, bé á nze dɨl Étiene, ntɔ̂ʼ jɨ ɨ́ buo buo lɨ́ eswie lé.

³ Saʉ̂l nyɨɛ nzě gbâ nkûl lɨ́ egbǎh Mbɛ̌r-Nzyɛ̌m. Nye á tʉtô nó ó, mímbɛ̌r e mímbɛ̌r myɛ̂h, lɨ́ etô le edulo bʉ́bá le bʉrʉ̂m o b'á bûʼla bá bɨ́bɛ̂h, gbâ bé ɨ́ mbʉʼ.

Philippe lɨ́ etúnǒ Mbɨambɨa Lɔ́ɔ ɨ́ sí Samarî

⁴ Baá bé á gbɛha bá, bê nzě tô mésí e mésí mɛ̂h, lɨ́ etô le etúnǒ Mbɨambɨa Lɔ́ɔ.

⁵ Philippe nyɨɛ nzě tô ɨ́ yʉ́ʉ́ nkana yé á be ɨ́ sí Samarî yɨ́, nzě táare élɛ́ɛ bʉ̂r lɔ́ɔ́ mé Krîst tɨ̂.

⁶ Ɨ́ jɔʼ méntumo me bʉ̂r ménɨ̌, mé á jóʼo Philippe le ebee mésimá nyé á sɨsâ má yɨ́, bʉr baá kʉ́ nzě gwá jôʼlǒ lɔ́ɔ́ wé wɨ́wɛ̂h.

⁷ Ebě, mimbɨ́a mísísǐm, myé á si bu duho ɨ́ menyʉ́l mé bʉ̂r o b'á bibíle bá, bɨ́haá lɨ́ ebʉ̂ bítím kʉ́kʉ́. Mimbʉ́mbʉ́ʼ mí bʉ̂r ɨ́ buo buo ti e bʉr o b'á tɨtɨ́a bá, bé ntémé, bé á si tiʼe.

⁸ Yé á nze sâ ó, bʉr ó nkana yaá díʼee e bisʉhʉʉ ɨ́ buo buo.

⁹ Yé á be ó e nyʉ́ʉ́ mʉ̂r, díé lé Simon. Nye á boo didi ó, tɨ̂ʼ ɨ́ nkana yaá. Ɨ́ mimbú mí píhe, ɨ́ jɔʼ nyé á bɨbe lɨ́ esɨ̂sa mésimá mé ónkaa mé yɨ́, bʉr ó Samarî, bé á bɨbe ó lɨ́ ekâm nyê. Nye á be ɨ́ jɔʼ yaá ó, lɨ́ ekʉ́ buú nkʉ́na, le elɛ́ɛ ó, nyɨɛ nye ó mpaŋ mʉ̂r.

¹⁰ Bʉr bɨ́bɛ̂h, otɔ́má le ontwǒm, bé á bɨbe ó, lɨ́ egwá jôʼlo nyê. Bé á lɨlɛ́ɛ ó: «Mʉr nyâ, nye ó le nkǔl nɨ́nɨ́ɨ́ mé Nzyɛ̌m, nyaá bé jɨ́jébé “ánɨ̂nɨ̂n” nyɨ́.»

¹¹ Bé á bu jʉjôʼlo nye nó ó, ɨ́ nko nyé á sɨsâ mesimá mé ónkaa yɨ́. Nye á sâ bé mǎ ó, bé kámaa nye.

¹² Túná Philippe á túno bé lɔ́ɔ dumo e Mpóʼo mé Nzyɛ̌m le Yésʉs-Krîst wɨ́, bé ntɔ̂ʼ bûʼla, nzě duŋɔɔ, bʉbá le bʉrʉ̂m.

¹³ Simon mʉr tɨ̂ʼ nzě bûʼla ntémé, nye ntɔ̂ʼ duŋɔɔ. Nye nzě didǐ gúmó yɨ́yɛ̂h Philippe á be yɨ́. Nó ó, nye á be ó lɨ́ ebuú kâm lɨ́ esiŋle mésimá ménɨ́nɨ́ɨ́ Philippe á sɨsâ má.

¹⁴ Bʉr o mílʉ́mlʉ́ bé á be ɨ́ Yerʉ́zalɛm bá, bé ntɔ̂ʼ jóʼǒ lɔ́ɔ ó, bʉr ó Samarî, bé á si bûʼla lɔ́ɔ́ mé Nzyɛ̌m. Bê nzě lómlo bé Pétrus, bé e Yʉánɛs.

¹⁵ Pyálá bé á pyâl ɨ́ sí Samarî yɨ́, bê nzě jɨʼla e Nzyɛ̌m lɨ́ esú lé óbûʼla baá, ó bé bíʼee ntémé Sísǐm mé Nzyɛ̌m.

¹⁶ Ebě, wé á bé apǎ sulo ɨ́ mʉr ngwár ɨ́ sɔ́má yɔ́ɔ́. Bé á jaa duŋɔɔ ó, njɨ ɨ́ díé mé Tî Yésʉs.

¹⁷ Nó ó, Pétrus, bé e Yʉánɛs, bé á kɛl bé mebô, bé ntɔ̂ʼ kǎ bǐ Sísǐm mé Nzyɛ̌m ɨ́ jɔʼ yaá.

¹⁸ Jɔ̌ʼ Simon nyɨɛ á bee mpʉ bʉ̂r, bé á bi Sísǐm mé Nzyɛ̌m ɨ́ kɛlá bʉ̂r o mílʉ́mlʉ́, bé á kɛl bé mebô wɨ́ yɨ́, nye nzě syɛ̂m mbô, ó nyě dwé ó Pétrus, bé e Yʉánɛs mɔnɨ́.

¹⁹ Nye e bé ó: «Dwéʼ gá me ntémé nkul ó, mʉr nyɨnyɛ̂h mé ókɛl mébô nyá, bíʼee Sísǐm mé Nzyɛ̌m.»

²⁰ Pétrus nyɨɛ nzě kǎ lɛ́ɛ e né ó: «Bɨ̌n e mɔnɨ́ yô bɨ́bɛ̂h dímɨɨ ɨ́ jɔʼ gwár, ebě, go sí bánǎ jwɨʼ ó, ndwéá mé Nzyɛ̌m, wé sá ó bwámɔɔ e mɔnɨ́.

²¹ Gó akúnwo e bá nkɔ̂b ɨ́ lɔ̌b wɨ̂, nkʉ̂ gúú pâʼ tɨ̂, ebě, lémé gô, wé abě tîtyěl ɨ́ míh mé Nzyɛ̌m.

²² Nó túmáá koo e bibébebébe bíjwɨʼ gó dí e byé ɨ́ léme bí. Go e dwírá léme, le ejɨʼla e Tî Yésʉs ó, nye pɛ́ʼɛɛ go baa ébébe nyê niʼé gó ɨ́ lɔ̌b jwɨʼ gô bé e yé ɨ́ léme yɨ́, nyé ókpɛl nó.

²³ Ebě, mě beé ó, go ó lwɨ́ŋlá le ebébe. Go ntémé, go ó mbilá ɨ́ menkara mé ébébe.»

²⁴ Simon ntɔ̂ʼ lɛ́ɛ e bé ó: «Jɨʼlaa gá e Dâ Nzyɛ̌m lɨ́ esú lâm ó, sá yɨ́yɛ̂h bɨ̂n lɛ́ɛ́ yɨ́, yé sá apyâl mê.»

²⁵ Jɔʼ bé á sil elɛ́ɛ, le eboʼlǒ lɔ́ɔ́ dí edumo e Tî Yésʉs wɨ́ yɨ́, bʉr o mílʉ́mlʉ́ obá baá, bé ntɔ̂ʼ báʼǎ tô Yerʉ́zalɛm. Nzɨ́ e nzɨ̌, bé á be lɨ́ ebuú tô le etúnǒ Mbɨambɨa Lɔ́ɔ ɨ́ mekwár mé sí Samarî.

Philippe, bé e cwɨhá mʉ̂r Etiopî

²⁶ Nó ó éngeles mé Dâ á lɛ́ɛ e Philippe ó: «Mɔaa sí. Tóʼ nkǒ páʼ díbé tie, ɨ́ nkpǎʼ dí esulǒ Yerʉ́zalɛm, tô Gáza wɨ́. Nkpǎʼ waá, wé cɨɨ ó ɨ́ lʉá.»

²⁷ Philippe ntɔ̂ʼ mɔa, tô. Nye dína téme-nzɨ̌ nɛ́ɛ: nyʉ́ʉ́ mʉ̂r ntɔ̂ʼ kœb nyê. Yé á be ó cwɨhá mʉ̂r Etiopî á be bâŋ másǎ nɨ́nɨ́ɨ́ wɨ́. Wé á sɨséa ó, kwá mé njwɨ́ɨ mʉmá á be ɨ́ sí Etiopî, díé lé Kandâs nyá. Cwɨhá mʉ̂r waá, wé á duho ó, Yerʉ́zalɛm, nko nyé á pa to dwe Nzyɛ̌m kûm yɨ́.

²⁸ Nó wé á nze búla, ndîndǐl ɨ́ kálîʼ yé kʉ́, le etô le eláa mékaná ngwíha milɔ̌b mé Nzyɛ̌m Ésayie á cɛma má.

²⁹ Sísǐm mé Nzyɛ̌m ntɔ̂ʼ lɛ́ɛ e Philippe ó: «Síhláa. Tó dǐ bǎʼ e kálîʼ.»

³⁰ Philippe nzě tô kám, tó tyɛ̂b bǎʼ e kálîʼ, ntɔ̂ʼ jóʼo mʉ̂r Etiopî waá lɨ́ eláa mékaná ngwíha milɔ̌b mé Nzyɛ̌m Ésayie á cɛma má. Nye ntɔ̂ʼ dî e né ó: «Nzê go lɨ́ ejóʼǒ sá gó dí eláǎ nɨ̌ ɛ́?»

³¹ Nye e Philippe ó: «Mʉ̂r bé atɨ́e mé yǎ nó, á wáǎ mbi mé dí e nkul ejóʼo wɨ́ ɛ́?» Nó nyé á lɛ́ɛ e Philippe ó, nye kálwaa ɨ́ kálîʼ, bɨ́bɛ̂h díʼee ɨ́ diá yé yaá.

³² Náǎ yé ó, pêh Mékaná mé Nzyɛ̌m nyé á lɨláa yɨ́, yé á lɛ́ɛ ó: “Nye á di ó mpʉ̌ nteme mû lɨ́ etó tíʼɔɔ twíí yɨ́. Nye á be ó mpʉ mâ nteme dídí ɨ́ puuu ɨ́ jɔʼ bé dí ecɨa nyé myě yɨ́ nyá. Nye á bé abɛ́ɛ̌ num.

³³ Bé á si sámle nye. Bé á bé atíʼe nyé lɔ̌b wé lɨ́ otîtyěl. Nzé ngá lɛ́ɛ ó, nye á si líʼe bwân sí? Ebě, bé á si pɛʼ nye ɨ́ sí yɨ̂.”

³⁴ Cwɨhá mʉ̂r waá ntɔ̂ʼ dî e Philippe ó: «Lɛ́yɨ́ɨ́ mê, me lɨ́ ejɨʼla e go: ngwíha milɔ̌b, nye á cɛma mpʉ́nʉ̌, dumo e wáa mʉ̂r? Nzê ɨ́ lɔ̌b wé nye mʉr tɨ̂ʼ ɛ̌? Nzê ɨ́ lɔ̌b mʉ̂r swîh ɛ̌?»

³⁵ Philippe ntɔ̂ʼ táare ɨ́ péh Mékaná mé Nzyɛ̌m gwár e gwár yaá, nzě lɛ́ɛ nyé Mbɨambɨa Lɔ́ɔ dí edumo e Yésʉs wɨ́.

^36-37 Ɨ́ mpʉ bé á tʉ̂to nzɨ́ e nzɨ̌ yɨ́, bê nzě pyâl ɨ́ yʉ́ʉ́ gúmo, yé á be e medíbé yɨ́. Cwɨhá mʉ̂r waá ntɔ̂ʼ lɛ́ɛ e né ó: «Paá bee: medíbé ó mâ! Yé dí e nkul ekǎ kamle mé lɨ́ eduŋɔɔ?»

³⁸ Nye ntɔ̂ʼ dwe twíí ó, bé tyélɨɨ kálîʼ. Philippe, bé e né bɨ́bɛ̂h, bê nzě sulo ɨ́ medíbé. Philippe ntɔ̂ʼ du nyê.

³⁹ Pɔʼá bé á pʉʼa ɨ́ medíbé yɨ́, Sísǐm mé Tî Yésʉs ntɔ̂ʼ pɛ̌ʼ Philippe tɨ̂, syɛ̂l mesâ ntɔ̂ʼ lîʼ náǎ, akǎ bee nyê. Nye ntɔ̂ʼ laa, tô e tyen yé dóló le ekʉ́ soho.

⁴⁰ Philippe á ka to pâm ó Ázɔt. Nye á be ó lɨ́ elaa bínkana e bínkana byɛ̂h lɨ́ etô le etúnǒ Mbɨambɨa Lɔ́ɔ ɨ́ mekwár mɨ́mɛ̂h, tó pyâl ɨ́ jɔʼ nyé á pyâl ɨ́ Kesáre yɨ́.