Mɨlʉmlʉ 23 - Kálar Nzyɛ̌m : Ejwán é Sáá

¹ Nó ó, Pɔ̂l á bɨʼ bʉr ó bʉm mejwôʼlʉ. Nye ó: «Bɨ́ɔɔ́ bâm, mě séá Nzyɛ̌m syɛ́ɛ́ ó e léme ɨ́ sɔ́ɔ́ɔ́, pyâl ɨ́ dʉ́ó lɨ̂ʼ mûh.»

² Nó ó, njwɨ́ɨ opara Ananías á lɛ́ɛ e bʉr o b'á bě bǎʼ e Pɔ̂l bá ó, bé ŋmɛ́hɛɛ nye ɨ́ num.

³ Nó ó Pɔ̂l á lɛ́ɛ e né ó: «Nzyɛ̌m óbî gô, go sá pǎb dí le epɛ́m yɨ̂! Go ó náǎ ndîndǐl lɨ́ etíʼě lɔ̌b wâm, ɨ́ mpʉ métié dí elɛ́ɛ yɨ́. Sâ gwár, go lɨ́ elwímla e metié, ɨ́ jɔʼ gó dí elɛ́ɛ ó, bé ŋmɛ́hɛɛ me yɨ́.»

⁴ Baá bé á bě bǎʼ e Pɔ̂l bá, bê nzě lɛ́ɛ e né ó: «Nzê gǒ lwɨ́ɨ́ ó, njwɨ́ɨ opara ɛ̌?

⁵ Nó ó Pɔ̂l á yala e bé ó: «Bɨ́ɔɔ́ bâm, me bé agʉ́a ó, yé ó njwɨ́ɨ opara. Yé bé me bé ɨ́ gʉ́a nó, mpa me bé alwib nó, ebě, yê cɛmá ó: “Gǒ sá alwib e njwɨ́ɨ gǒ ɨ́ bébe bébe.”»

⁶ Sâ gwár, ɨ́ jɔ̌ʼ Pɔ̂l á ka gʉ́a ó, bʉr ó bʉm, bé á be ó menkɔ̌m mebá: nyɨ̂ʼ nkɔ́m, oSadwisyɛ̂n; nyʉ́ʉ́, oFarizyɛ̂n yɨ́, nó ó nyé á bʉ̂ tím gúmó ótîʼ o mílɔ̌b bé á be yɨ́. Nye ó: «Bɨ́ɔɔ́ bâm, me ó Farizyɛ̂n. Odâ, bé á be ntémé ó oFarizyɛ̂n. Me lɨ́ ebúʼla ó, odwe, bé ópah. Sá tɨ̂ʼ ó mé mû lɨ́ esâ nkâr yɨ́.»

⁷ Jɔʼ nyé á cɨ mekǎn maá yɨ́, oFarizyɛ̂n, bé le oSadwisyɛ̂n nzě nyɛl épére mékǎn páʼ nyɔ́ɔ́. Tɨ̂ʼ ó gwɨ́hlá yɔ́ɔ́, yé á bɔ́ʼa menkɔ̌m mebá yɨ́.

⁸ (Ebě, oSadwisyɛ̂n bɨ́ɛ, bé lɛ́ɛ́ ó, odwe, bé ákóʼó pah. Bé lɛ́ɛ́ ntémé ó, beéngeles le misísǐm, byé abe. OFarizyɛ̂n bɨ́ɛ, bé lɨ́ ebúʼla bísâ byaá bíbyɛ̂h.)

⁹ Bé á be ɨ́ buú bɨ̂n métwíí kʉ́ e nkul. Nó ó bʉ́ʉ́ ólɛ̂ʼla o métié ɨ́ sɔ́má bʉ̂r o nkɔ́m oFarizyɛ̂n, bé á tyɛ̂b tîtyěl, ntɔ̂ʼ lwib e nkul nyɨnyɛ̂h ó: «Bɨ̌h bé abeě sá ébébe ɨ́ mʉr nyâ. Yʉ́ʉ́ jɔʼ, yé á be ó sísǐm, nkʉ̂ ntɔ̂ʼ ó, éngeles ó b'á lwib e né.»

¹⁰ Nó ɨ́ jɔʼ óleŋéleŋé, wé á be, wé mû lɨ́ ekǎ sahle yɨ́, njwɨ́ɨ bisója nzě jóʼo bʉ́á, ó bé ámû nyǎ Pɔ̂l bipêh bipêh. Sá tɨ̂ʼ ó nyé á dwe bisója nkul ó, byé súlaa sí, nko bʉ̂r, bé á be yɨ́. Bé tô dwǐh Pɔ̂l ɨ́ mebó mɔ́ɔ́. Bé obáʼǎ swîʼ e né ɨ́ kóʼ bísója tʉ́ŋlʉ̌.

¹¹ Ɨ́ pum wé á ka bɔma wɨ́, Tî Yésʉs nzě pyâl nyê, ntɔ̂ʼ lɛ́ɛ e né ó: «Mɛ́rɨ́ɨ́ léme. Ɨ́ mpʉ gó á nyɛɛ túno lɔ́ɔ́ wâm ɨ́ Yerʉ́zalɛm yɨ́, yé jala ntémé ó, go tôʼ túno wé Rôm.»

Bʉm éjʉ̂ Pɔ̂l

¹² Jɔ̌ʼ mɛ́n wé á lɔ́ma yɨ́, oYúden nzě kǎʼ bʉm. Ntaŋɔɔ mínkâl ó, bé ókǎ bɔmǎ mbô e num ó, bé osí pǎ jʉ̂ Pɔ̂l.

¹³ Baá bé á kaʼ bʉm bá, bé á si laa bʉr mekám ménâ.

¹⁴ Nó ó bé á nze to bee ojwɨ́ɨ o mpáh Nzyɛ̌m le ompené. Bé e bé ó: «Bɨ̌h bʉr o tɨ̂ʼ mû ó sí nʉǎ tíʼá, le entaa mínkâl témé bʉr ó, bɨ̌h bé ákóʼó bóblǒ sá éde ɨ́ minum míh, tó pyâl ɨ́ jɔʼ bɨ́h óbě sí jʉ̂ Pɔ̂l yɨ́.

¹⁵ Nó, bɨ̌n bʉr o tɨ̂, ndu e bʉr ó bʉ̌m nɨ́nɨ́ɨ́ bɨ́bɛ̂h, díʼéé gá njwɨ́ɨ bisója ɨ́ nzɨ̌ mikóo ó, nye dwêʼ bɨ̌n Pɔ̂l ɨ́ báánâ. Bɨ̌n a lɛ́ɛ́ njwɨ́ɨ waá ó, bɨ̌n bé ótó timlě lɔ̌b wé mbɨ̂mbɨá. Bɨ̌h bɨɛ, bé ó, ɨ́ cǎr ó, bɨ̌h jʉ́ʼoo nye, nye dína apǎ pyâl wâ.»

¹⁶ Nkúná mâ kɛ́l mé Pɔ̂l á be ó sí cárǎ jóʼǒ bʉm yaá, le egʉ́a éboʼo bé á la nye lɨ́. Nó nyé á tô mbɛ̌r mímbʉʼ tʉ́ŋlʉ̌, ntɔ̂ʼ tó gwîh Pɔ̂l lɔ̌b waá.

¹⁷ Pɔ̂l nyɨɛ nzě jébe nyʉ́ʉ́ kapitɛ̂n. Nye e né ó: «Tóʼ e mâ sohó nyâʼ nko njwɨ́ɨ bisójǎ nɨ́nɨ́ɨ́ dí yɨ́, ebě, nyě e yʉ́ʉ́ sá nyé dí egwɨ̂m élɛ́ɛ nyé yɨ́!»

¹⁸ Nó nyé á nʉa nye, tô e né nko njwɨ́ɨ bisójǎ nɨ́nɨ́ɨ́ á be yɨ́. Nye e né ó: «Pɔ̂l dí mbʉʼ nyá, nye sí jébe mê, nzě lɛ́ɛ e me ó, me ntâʼ go e mâ sohó nyâ. Nyě e lʉ́ʉ́ ékǎn nyé dí egwɨ̂m elɛ́ɛ gó lɨ́.»

¹⁹ Nó ó, njwɨ́ɨ bisója á mɛ̂r mâ sohó nɨ̌ ɨ́ mbô, bé e nɔ́ɔ́ tô lɨ́ empah. Nó nyé á dî e né ó: «Gǒ kpɛl élɛ́ɛ mé yé?»

²⁰ Nó nyé á yala ó: «OYúden, bɨ́ di twíí ó, bé ódî e go ó, bé ntâʼ e Pɔ̂l ɨ́ mɛ́n ɨ́ míh mé bʉ̂r ó gwɨ́hlá nɨ́nɨ́ɨ́. Bé ósâ mpʉ̌ sá lɛ́ɛ́, bé óbáʼǎ timlě lɔ̌b wé.

²¹ Sâ gwár, sá akǎm lɔ̌b waá, ebě, bʉr o ngá tó bóno nyé bá, bɨ́ laa bʉ̂r mekám ménâ. Bɨ́ boó kǎʼ bʉm, ntaa mínkâl ó, bé áde méde nkʉ̂ menyoʼ, tó pyâl ɨ́ jɔʼ bé óbe, bé mû sí jʉ̂ nyé yɨ́. Nó ó, ɨ́ báánâ, bɨ́ boó la éboʼo. Bé mû kǎ bóno ó njɨ yalá yô.»

²² Nó ó, njwɨ́ɨ bisójǎ nɨ́nɨ́ɨ́ waá á nze bîr mâ sohó nɨ̌. Nye nzě lɛ́ɛ e né ó: «Gǒ sá alɛ́ɛ nyʉ́ʉ́ mʉ̂r swîh ó, go bé ɨ́ nzě gwîh mé bʉ̌m nɨ̌!»

Pɔ̂l lɨ́ etyenɔɔ kwá mé Félix

²³ Píe tɨ̂, njwɨ́ɨ nzě jébe bʉ́ʉ́ ókapitɛ̂n obá. Nye e bé ó: «Syɛŋɨɨ gá bisója minter mimbá, ndu e bʉr mekám nzaangbá o dí ekalwo kʉ́ bikablá bá, ndu e bʉr minter mimbá o dí e mekʉá ɨ́ mebô bá. Diʼee gá ɨ́ cǎr ó, bɨ̌n tôʼ Kesáre ɨ́ mewala ebǔ mé pum!

²⁴ Kʉmsaa gá ntémé bikablá bí énkɛ́ɛ̌ Pɔ̂l tɨ̂. Bɨ̌n a tó e né mbɨ̂mbɨá kwá mé ngóvina Félix.»

²⁵ Nó nyé á cɛma ntémé mekaná ɨ́ mbi wɨ̂:

²⁶ Yé ó mɛm, Klodíʉs Lisías. Mě cɛmá ó, tî ngóvina Félix. Me lɨ́ esoho gô!

²⁷ OYúden, bé á si mɛ̂r mʉr nyâ, bé ntémé, bé á be ó, bé jʉ́ ó nye. Jɔʼ mé á jóʼo ó, nye ó mʉr Rôm yɨ́, me ntɔ̂ʼ tô e bisója gúmó bé á be yɨ́, pɛʼ nyê, ntɔ̂ʼ tiʼ nyê.

²⁸ Nó mpʉ mé á tíʼe ɨ́ lémé wâm ó, mě gʉ́á sá óYúden, bé á pur nye yɨ́, me á si tô e né ɨ́ mpǒm bʉ̌m nɨ́nɨ́ɨ́.

²⁹ Me á kʉ kœb ó, bé lɨ́ elaʼ nyé milɔ̌b mi dí edumo e metié mɔ́ɔ́ mí. Byé á be yɨ́ɛ ó, abě mpǎŋ bipurá, apʉgʉ́ bě mbi byaá bi mʉ̂r dí e nkul ejʉ́ŋɔɔ, nkʉ̂ gbáŋɔɔ nyé ɨ́ mbʉʼ bí.

³⁰ Nó ɨ́ jɔʼ bê nze lɛ́ɛ́ mé ó, oYúden, bé á si kaʼ bʉm, le etíʼe ó, bé jʉ́ ó nye yɨ́, nó ó, mê ka kpahwa lómó nyé gʉ̂ʼ kwá nyǒ yɨ́. Me á lɛ́ɛ ntémé e bʉr o dí ebúʼo nyé lɔ̌b bá ó, bé ntáa lwǐb lɔ̌b wɔ́ɔ́ ɨ́ mpǒm nyǒ.

³¹ Bisója ntɔ̂ʼ sâ sá nyé á lɛ́ɛ bé yɨ́. Byé ntɔ̂ʼ nʉǎ Pɔ̂l, tô e né ɨ́ pum waá, tó pyâl Antipatrîs.

³² Ádwií ɨ́ mɛ́n tɨ̂ʼ nɛ́ɛ: bisója byé á tye e mekʉ̌ bí, bíɛ ntɔ̂ʼ búla yɔ́ɔ́, tó nî ɨ́ kóʼ bísója tʉ́ŋlʉ̌. Bé á to lîʼle ó, byaá byé á titye ɨ́ bikablá kʉ́ bí, bíhaá bíɛ ó b'á tô e Pɔ̂l, tô tóʼ, tó kumǒ kumáa e né Kesáre.

³³ Jɔʼ bé á pyâl Kesáre yɨ́, otyel o bíkablá nzě dwě ngóvina mekaná maá, le etyêl ntémé Pɔ̂l ɨ́ míh mé.

³⁴ Jɔ̌ʼ ngóvina á sil eláa mekaná maá yɨ́, nó ó nyé á dî e Pɔ̂l ó, nye mʉr yáǎ péh sí. Jɔʼ nyé á be ɨ́ gʉ́a ó, nye ó mʉr Silisía yɨ́,

³⁵ nye nzě lɛ́ɛ e né ó: «Me ódî gó metíá ó, ɨ́ jɔʼ bʉ̂r o b'á pa pur go bá, ngá pyâl yɨ́.» Nó nyé á dwe nkul ó, bé bâʼlaa Pɔ̂l ɨ́ bíi mé Erôd.